2024.01.04
សមត្ថកិច្ចក្រសួងមហាផ្ទៃឃាត់ខ្លួនអ្នកជំនាញកសិកម្មលោក នី ណាក់ សាជាថ្មី នៅព្រឹកថ្ងៃទី៥ មករា ដោយចោទពីបទបរិហារកេរ្តិ៍ និងញុះញង់ ក្រោយលោកបង្ហោះសារលើហ្វេសប៊ុករិះគន់ពីព័ត៌មានដែលក្រសួងការងារទើបបង្ហាញចំនួនក្រុមហ៊ុនទើបបើកថ្មីនៅដើមឆ្នាំ២០២៤។
ភរិយាលោក នី ណាក់ លោកស្រី សុខ ស៊ីណែត បង្ហោះនៅលើហ្វេសប៊ុកពីដំណឹងនៃការចាប់ខ្លួននេះ ដែលលោកស្រីបានប្រាប់ទៅសកម្មជនបរិស្ថានលោក ថុន រដ្ឋា ជួយផ្សព្វផ្សាយភ្លាមៗ។ តាមរយៈដំណឹងនោះលោកស្រីបន្តថា លោក នី ណាក់ ត្រូវសមត្ថកិច្ចនៃក្រសួងមហាផ្ទៃឃាត់ខ្លួនសាកសួរ តាំងពីព្រឹកម៉ោង ៨.៤០នាទី។ ចំណែកអ្នកប្ដឹងលោក នី ណាក់ គឺរដ្ឋមន្ត្រីក្រសួងការងារ និងបណ្ដុះបណ្ដាល វិជ្ជាជីវៈ លោក ហេង សួរ ហើយសមត្ថកិច្ចគ្រោងបញ្ជូនលោក នី ណាក់ ទៅតុលាការបន្ទាប់ពីសាកសួររួចរាល់។
មុនការចាប់បន្តិចលោក នី ណាក់ បានសរសេរសារបង្ហោះលើហ្វេសប៊ុក (Iman KH) ដែលលោកគ្រប់គ្រងថា សារព័ត៌មានស្និទ្ធនឹងរដ្ឋាភិបាលគឺហ្វ្រេសញូវ (FreshNews) បានផ្សាយថា ក្រុមហ៊ុនទើបបើកថ្មីនៅកម្ពុជា ក្នុងឆ្នាំ២០២៤ មាន១ម៉ឺនក្រុមហ៊ុន។ លោកបន្តដោយឌឺដងថា ដំណឹងនេះសង្ស័យរាប់តាំងពីក្រុមហ៊ុនលក់លៀសហាល ក្រុមហ៊ុនដើរសុំទាន ក្រុមហ៊ុនលក់ថ្នាំញៀន។ល។
សារដើមនៅលើហ្វេសប៊ុកលោក នី ណាក់៖ «FN,មួយម៉ឺនក្រុមហ៊ុនបើកថ្មីនៅ២០២៤។សង្ស័យរាប់តាំងពីក្រុមហ៊ុនលក់លៀសហាល ក្រុមហ៊ុនដើរសុំទាន ក្រុមហ៊ុនលក់ថ្នាំញៀន។ល។ បើកច្រើន បិទវិញអត់រាប់ឡើយ។ ប្រទេសខ្លាសេដ្ឋកិច្ចលក់តាំងពីភ្នំមិនសល់»។
លោក នី ណាក់ ទើបត្រូវជនមិនស្គាល់មុខស្ទាក់វាយក្បាលស្ទើរផុតជីវិត ហើយកំពុងអំពាវនាវដល់សាធារណជនសុំថវិកា គ្រោងទៅព្យាបាលរបួសក្បាលនៅប្រទេសថៃ។ លោកក៏ធ្លាប់ត្រូវបានអតីតរដ្ឋមន្ត្រីក្រសួងកសិកម្ម លោក វ៉េង សាខុន ប្ដឹងពីបទញុះញង់ ដាក់ពន្ធនាគារ ១៨ខែ កន្លងទៅហើយ ករណីលោកសរសេររិះគន់យុទ្ធនាការរបស់ក្រសួងកសិកម្ម និងឌឺដងរឿងទិញម៉ាស់ពាក់ឱ្យកូនមាន់។
No comments:
Post a Comment