2024.04.25
សង្គមស៊ីវិលផ្នែកសិទ្ធិមនុស្ស និងអ្នកឃ្លាំមើលបរិស្ថានលើកឡើងថា ករណីឃាតកម្មលើអ្នកការពារព្រៃឈើលោក ឈុត វុទ្ធី នៅមានរឿងរ៉ាវអាថ៌កំបាំងជាច្រើនទៀត ដែលតុលាការនិងរដ្ឋាភិបាល គួរបន្តស៊ើបអង្កេតស្វែងរកអ្នកពាក់ព័ន្ធផ្សេងទៀត និងឃាតកពិតយកទៅផ្ដន្ទាទោស។
ប៉ុន្តែមន្ត្រីរដ្ឋាភិបាល និងតុលាការអះអាងថា សំណុំរឿងឃាតកម្មនេះ ត្រូវបានបិទបញ្ចប់តាមនីតិវិធីរួចហើយ។
អ្នកការពារព្រៃឈើដ៏ល្បីល្បាញលោក ឈុត វុទ្ធី ត្រូវបានឃាតកបាញ់សម្លាប់នៅស្រុកមណ្ឌលសីមា ខេត្តកោះកុង កាលពីថ្ងៃទី២៦ ខែមេសា ឆ្នាំ២០១២ ពេលលោកចុះស៊ើបអង្កេតនិងថតរូបសកម្មភាពបទល្មើសព្រៃឈើខុសច្បាប់ នៅតំបន់ជួរភ្នំក្រវាញជាមួយអ្នកកាសែតពីររូបរបស់សារព័ត៌មាន ឌឹ ខេមបូឌា ដេលី (The Cambodia Daily)។
កន្លងមក តុលាការខេត្តកោះកុងបានបិទការស៊ើបអង្កេតទៅលើសំណុំរឿងនេះ ដោយកាត់ទោសឱ្យយុវជនម្នាក់ ឈ្មោះ រ៉ាន់ បូរ័ត្ន ជាសន្តិសុខក្រុមហ៊ុន ធីមប៊ឺ ហ្គ្រីន (Timber Green) ជាប់គុក ២ឆ្នាំ ពីបទមនុស្សឃាតដោយអចេតនាលើមន្ត្រី កងរាជអាវុធហត្ថម្នាក់ ឈ្មោះ អ៊ិន រតនា ដែលតុលាការខេត្តកោះកុង បានវិនិច្ឆ័យថា ជាឃាតកបាញ់សម្លាប់លោក ឈុត វុទ្ធី។
មកដល់ពេលនេះ ទោះបីជាសំណុំរឿងឃាតកម្មលើលោក ឈុត វុទ្ធី ត្រូវបានបិទបញ្ចប់រួចហើយក៏ដោយ ប៉ុន្តែការបិទបញ្ចប់បែបនេះ ធ្វើឱ្យមានការមើលឃើញ ផ្សេងគ្នា រវាងមន្ត្រីរដ្ឋាភិបាល និងមន្ត្រីសិទ្ធិមនុស្ស សកម្មជនព្រៃឈើ ព្រមទាំង សមាជិកគ្រួសារជនរងគ្រោះ អំពីដំណើរការស្វែងរកយុត្តិធម៌។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (Licadho) លោក អំ សំអាត កត់សម្គាល់ករណីនេះ ថា តាំងពីដើមមក មានភាពមិនប្រក្រតីមួយចំនួន នៅក្នុងការស៊ើបអង្កេតបឋម ហើយការផ្លាស់ប្ដូរអង្គហេតុ ដែលមានការលើកឡើងជាបន្តបន្ទាប់ ក៏នៅមានមន្ទិលជាច្រើន។
លោកប្រាប់វិទ្យុអាស៊ីសេរី ថា មកទល់ពេលនេះ មិនទាន់មានយុត្តិធម៌ពេញលេញ សម្រាប់លោក ឈុត វុទ្ធី នៅឡើយទេ ហើយលោកទទូចឱ្យមានការស៊ើបអង្កេតបន្តទៀត។
លោក អំ សំអាត៖ «ដើម្បីរកឱ្យឃើញពិតប្រាកដថា ជនដែលពាក់ព័ន្ធនឹងអ្នកនៅពីក្រោយខ្នង នៃការបាញ់សម្លាប់លោក ឈុត វុទ្ធី នេះ ត្រូវបានធានាថា យកទៅអនុវត្តតាមផ្លូវច្បាប់ដើម្បីជាយុត្តិធម៌នៅក្នុងសង្គមក៏ជាការលើកកម្ពស់ការផ្ដល់តម្លៃ ប្រសិទ្ធនាម ដែលគេឱ្យទៅលោក ឈុត វុទ្ធី ថា វីរៈការពារបរិស្ថាន និងព្រៃឈើ»។
ឆ្លើយតបនឹងវិទ្យុអាស៊ីសេរី នៅថ្ងៃទី២៣ ខែមេសា អ្នកនាំពាក្យសាលាដំបូងខេត្តកោះកុង លោក អ៊ួច ជ្រិន ប្រាប់ថា សំណុំរឿងឃាតកម្មលើលោក ឈុត វុទ្ធី នៅពេលនេះ គួរទៅសួរខាងអយ្យការ ដែលជាអ្នកស៊ើបអង្កេត។
លោក អ៊ួច ជ្រិន៖ «រឿងហ្នឹងចំណាត់ការនៅតុលាការខេត្តកោះកុង ចប់សព្វគ្រប់អស់ហើយ។ សួរទៅដំណាក់កាលខាងអយ្យការវិញ ព្រោះអយ្យការគេជាអ្នកអង្កេត»។
វិទ្យុអាស៊ីសេរី បានទាក់ទងសុំការបំភ្លឺបញ្ហានេះ ពីអ្នកនាំពាក្យ និងជាព្រះរាជអាជ្ញារងសាលាដំបូងខេត្តកោះកុង លោក វ៉ៃ ភីរម្យ នៅថ្ងៃទី២៣ ខែមេសា ប៉ុន្តែទូរស័ព្ទចូលគ្មានអ្នកទទួល។
យ៉ាងណា អ្នកនាំពាក្យរងក្រសួងមហាផ្ទៃលោក ទូច សុឃៈ អះអាងថា រដ្ឋាភិបាល បានបង្កើតគណៈកម្មការចម្រុះមួយ ឱ្យធ្វើការស៊ើបអង្កេតស្រាវជ្រាវ នៅទីតាំងកើតហេតុ ដើម្បីប្រមូលភស្តុតាង ហើយតុលាការបានចាត់ការតាមនីតិវិធីរហូតដល់ តុលាការបើកសវនាការជាបន្តបន្ទាប់ កាត់ទោសជនដៃដល់ម្នាក់ ដែលជាកងកម្លាំង។
លោកប្រាប់វិទ្យុអាស៊ីសេរីថា ទាំងនេះ គឺជាការគិតគូររបស់រដ្ឋាភិបាល ដើម្បីស្វែងរកការពិត និងផ្ដល់នូវយុត្តិធម៌ ហើយតុលាការបានចាត់ការតាមនីតិវិធី។ លោកថា ដើម្បីអាចប្ដឹងសើរើករណីនេះបាន លុះត្រាតែមានភស្តុតាងថ្មី ទៅបង្ហាញតុលាការ ព្រោះសំណុំរឿងនេះ នៅក្នុងសមត្ថកិច្ចរបស់តុលាការ។
លោក ទូច សុឃៈ៖ «ចំពោះបងប្អូន ដែលមិនទទួលស្គាល់ វាគឺជារឿងបងប្អូនរបស់ បងប្អូន ដែលមិនទទួលស្គាល់ ខ្ញុំមិនអាចហាមឃាត់បានទេ ប៉ុន្តែសូមឱ្យមានសុចរិតភាព ទី២ ត្រូវទឡ្ហីករណ៍ផ្នែកផ្លូវច្បាប់ ពោលគឺភស្តុតាងថ្មី ដែលអាចបញ្ជាក់ថា ការកាត់សេចក្ដី គឺមានយុត្តិធម៌ ឬមានសាក្សី ឬរកឃើញជនដៃដល់ណា ដែលអាចយកបង្ហាញតុលាការ ដើម្បីបន្តនីតិវិធីធ្វើបណ្ដឹងសើរើ»។
អ្នកស្រាវជ្រាវនិងឃ្លាំមើលធនធានធម្មជាតិ លោក សេង សុខហេង មិនទាន់ជឿថា មានយុត្តិធម៌ទេ ហើយចង់ឱ្យស្ថាប័នមានសមត្ថកិច្ច ធ្វើការស៊ើបអង្កេត និងសើរើឡើងវិញ ដើម្បីយកអ្នកពាក់ព័ន្ធ និងឃាតកពិតទៅផ្ដន្ទាទោសតាមច្បាប់។
លោកប្រាប់វិទ្យុអាស៊ីសេរីថា អង្គហេតុនៃសំណុំរឿងនេះ ហាក់ដូចជាមិនមានព័ត៌មានគ្រប់ជ្រុងជ្រោយ មិនបានបញ្ចេញព័ត៌មានឱ្យទូលំទូលាយ និងមានភាពតក់ក្រហល់។
លោក សេង សុខហេង៖ «វាមានរឿងរ៉ាវដ៏អាថ៌កំបាំង នៅពីក្រោយខ្នង ជាច្រើនទៀត តុលាការឬរដ្ឋាភិបាលគួរធ្វើការស៊ើបអង្កេត ដើម្បីរកយុត្តិធម៌ លោក ឈុត វុទ្ធី ជាពិសេសក្រុមគ្រួសាររបស់គាត់ហ្នឹង»។
របាយការណ៍របស់កងរាជអាវុធហត្ថខេត្តកោះកុង បង្ហាញថា ឃាតកបាញ់សម្លាប់ លោក ឈុត វុទ្ធី គឺជាមន្ត្រីកងរាជអាវុធហត្ថម្នាក់ឈ្មោះ អ៊ិន រតនា ហើយនៅក្រោយបាញ់សម្លាប់លោក ឈុត វុទ្ធី រួចហើយ ឈ្មោះ អ៊ិន រតនា ក៏បានបាញ់សម្លាប់ខ្លួន ឯងចំនួន ២គ្រាប់។
របាយការណ៍នេះ មិនស៊ីសង្វាក់គ្នាជាមួយអង្គហេតុ ក្នុងសាលក្រមរបស់តុលាការ ខេត្តកោះកុង ដែលចេញនៅថ្ងៃទី២២ ខែតុលា ឆ្នាំ២០១២ ឡើយ។ តុលាការខេត្តនេះ រកឃើញបុរសម្នាក់ទៀត គឺលោក រ៉ាន់ បូរ័ត្ន ជាសន្តិសុខក្រុមហ៊ុន ធីមប៊ឺ ហ្គ្រីន (Timber Green) ដែលត្រូវមានទោសជាប់ពន្ធនាគារ ២ឆ្នាំ។
តុលាការខេត្តកោះកុង ថា លោក រ៉ាន់ បូរ័ត្ន ជាអ្នកកេះកៃកាំភ្លើង បាញ់សម្លាប់ប៉េអិម ឈ្មោះ អ៊ិន រតនា ដោយអចេតនា ក្រោយលោក អ៊ិន រតនា បានបាញ់សម្លាប់លោក ឈុត វុទ្ធី។ សន្តិសុខក្រុមហ៊ុន ធីមប៊ឺ ហ្គ្រីន លោក រ៉ាន់ បូរ័ត្ន ត្រូវបានតុលាការតម្រូវឱ្យជាប់គុកតែ ៦ខែ ប៉ុណ្ណោះ រួចដោះលែងឱ្យមានសេរីភាពនៅថ្ងៃទី៣ ខែវិច្ឆិកា ឆ្នាំ២០១២ ហើយព្យួរទោសដែលនៅសេសសល់។
ក្រុមហ៊ុន ធីមប៊ឺ ហ្គ្រីន នេះ ទទួលបានសិទ្ធិកាប់ព្រៃសម្អាតបាតអាង ដើម្បីធ្វើទំនប់ វារីអគ្គិសនីតាតៃ នៅក្នុងស្រុកថ្មបាំង ខេត្តកោះកុង។ មានការចុះផ្សាយពីបណ្ដាញព័ត៌មានខ្លះថា ក្រុមហ៊ុននេះ ជារបស់ឧកញ៉ា ទ្រី ភាព។ ប៉ុន្តែមានរបាយការណ៍ខ្លះថា ក្រុមហ៊ុននេះ ជារបស់អ្នកស្រី ខៀវ សស៊ីលាភ និងមន្ត្រីយោធាឈ្មោះ ហួរ ហាប់។ តែបើទោះបីជាក្រុមហ៊ុននេះ ជារបស់អ្នកណាក្នុងចំណោមអ្នកទាំងបី ក៏ដោយ ក៏បុគ្គលទាំងនេះ សុទ្ធតែជាមនុស្សមានទំនាក់ទំនងជិតស្និទ្ធនឹងលោក ហ៊ុន សែន។
កូនប្រុសរបស់់លោក ឈុត វុទ្ធី គឺលោក ឆឺយ ឧត្ដមរស្មី ប្រាប់វិទ្យុអាស៊ីសេរី នៅថ្ងៃទី២៣ ខែមេសាថា លោកពុំមានសង្ឃឹមនឹងមានយុត្តិធម៌ សម្រាប់ឪពុករបស់លោកឡើយ លុះត្រាតែមានការផ្លាស់ប្ដូរប្រព័ន្ធដឹកនាំនៅកម្ពុជា ទៅកាន់ប្រជាធិបតេយ្យនៅថ្ងៃក្រោយ។
លោកថា អយុត្តិធម៌សម្រាប់លោក ឈុត វុទ្ធី គឺជាការឈឺចាប់របស់លោកជាកូន ក្រុមគ្រួសារលោក ពលរដ្ឋសហគមន៍ និងប្រជាពលរដ្ឋខ្មែរទូទៅ។
លោក ឆឺយ ឧត្ដមរស្មី៖ «យើងសម្លឹងឃើញទៅការរកស៊ី កាប់ព្រៃឈើនិងជួញដូរ ព្រៃឈើខុសច្បាប់នៅប្រទេសកម្ពុជាសុទ្ធសឹងតែអ្នកដែលជាប់ពាក់ព័ន្ធនឹងសែស្រឡាយរបស់រដ្ឋាភិបាល និងជាប់សែស្រឡាយលោកនាយករដ្ឋមន្ត្រីតែម្ដង។ ខ្ញុំគិតថា ការវែកមុខរកអ្នកដែលបញ្ជាឱ្យសម្លាប់ គឺវាមានការលំបាកណាស់ ពីព្រោះអ្នកទាំងអស់នោះ វាទាក់ទងជាមួយនឹងរាជរដ្ឋាភិបាលជិតស្និទ្ធ»។
សមាជិកបណ្ដាញសហគមន៍ព្រៃឡង់ខេត្តកំពង់ធំ លោក ហឿន សុភាព ប្រាប់វិទ្យុអាស៊ីសេរីនៅថ្ងៃទី២៣ ខែមេសា ថា រដ្ឋាភិបាលនឹងរងការចោទប្រកាន់អំពីអសមត្ថភាពក្នុងការរកយុត្តិធម៌ជូនជនរងគ្រោះ និងធ្វើឱ្យមហាជនបាត់ទំនុកចិត្តលើរដ្ឋាភិបាលនិងតុលាការ។
លោកបានហៅ លោក ឈុត វុទ្ធី ថា ជាអ្នកស្នេហាជាតិ ដែលរដ្ឋាភិបាលត្រូវយកចិត្តទុកដាក់ចំពោះគាត់ និងក្រុមគ្រួសារ។ លោកលើកហេតុផលថា លោក ឈុត វុទ្ធី បានលះបង់ពេលវេលា និងធ្វើពលិកម្មខ្ពស់ណាស់ ក្នុងការការពារព្រៃឈើ ដែលជាប្រយោជន៍ជាតិខ្មែរ និងប្រឹងប្រែងផ្សព្វផ្សាយរដ្ឋធម្មនុញ្ញ ច្បាប់ភូមិបាល និងច្បាប់ការពារព្រៃឈើ ឱ្យប្រជាពលរដ្ឋសហគមន៍យល់ដឹង។
លោក ហឿន សុភាព បានរំឭកអនុស្សាវរីយ៍ជាច្រើន អំពីសកម្មភាពរបស់លោក ឈុត វុទ្ធី ថា លោកមិនដែលខ្លាចញញើតនឹងហានិភ័យ នៃការគំរាមកំហែងដល់អាយុជីវិតរបស់លោកទេ។
លោក ហឿន សុភាព៖ «ក៏មានរឿងរ៉ាវជាច្រើន ករណីមែនទែន ដែលមានការគំរាមកំហែងដល់អាយុជីវិតគាត់មុននឹងគាត់ស្លាប់ហ្នឹង។ នៅក្នុងរឿងនោះ គឺខ្ញុំបានជួបផ្ទាល់ជាមួយលោក ឈុត វុទ្ធី ដូចជា សមត្ថកិច្ច អាជ្ញាធរមួយចំនួន គឺហៅកោះអញ្ជើញគាត់ទៅ សាកសួរ រឿងករណីនៃការចុះទប់ស្កាត់បទល្មើសព្រៃឈើ ហើយសាកសួរពីរឿងដំណើរ នៅក្នុងទស្សនកិច្ចសិក្សា ឬលោក ឈុត វុទ្ធី សកម្មជនដ៏សកម្ម ជួយផ្សព្វផ្សាយពីរដ្ឋធម្មនុញ្ញ ជាពិសេសច្បាប់ព្រៃឈើ ភូមិបាលមួយចំនួន»។
សកម្មជនសិទ្ធិមនុស្ស សកម្មជនសង្គម និងសកម្មជនបរិស្ថានជាច្រើនរូប បានរងការយាយីគ្រប់រូបភាព ដោយការធ្វើទុក្ខបុកម្នេញផ្សេងៗ ការចាប់ដាក់ពន្ធនាគារ រហូតដល់មានករណីបាញ់សម្លាប់ ជាក់ស្ដែងដូចជាករណីបាញ់សម្លាប់លោក ឈុត វុទ្ធី លោក ជា វិជ្ជា និងលោកបណ្ឌិត កែម ឡី ជាដើម។
អ្នកទាំងអស់នេះ ត្រូវបានប្រជាពលរដ្ឋភាគច្រើនទទួលស្គាល់ថា គឺជាវីរជន ដែលធ្វើការងារការពារផលប្រយោជន៍ជាតិ និងដើម្បីយុត្តិធម៌សង្គម ប៉ុន្តែការវិនិច្ឆ័យ លើឃាតកម្មសម្លាប់ពួកគាត់ តែងតែធ្វើឱ្យមហាជនរិះគន់ខ្លាំងៗថា អយុត្តិធម៌ និងមិនអាចទទួលយកបាន ដោយសារការស៊ើបអង្កេតខ្វះតម្លាភាព និងគ្មានឆន្ទៈស្វែងរកជ
No comments:
Post a Comment