2024.05.15
លោកនាយករដ្ឋមន្ត្រី ហ៊ុន ម៉ាណែត បញ្ជាឱ្យរៀបចំមេធាវីការពារក្ដីជូនពលរដ្ឋរងគ្រោះ ជាមួយក្រុមហ៊ុន ប្រ៊ីលាន ស៊ីធី (Brilliant City) របស់អតីតឧកញ៉ា ឡេង ចាន់ណា ក្រោយពីពលករខ្មែរជាច្រើន នៅប្រទេសកូរ៉េ ត្រៀមតវ៉ាទាមទារឱ្យលោក ហ៊ុន ម៉ាណែត ពន្លឿនការដោះស្រាយជូនពួកគាត់។
ប្រជាពលរដ្ឋរាប់ពាន់នាក់នៅកម្ពុជា កំពុងជួបវិបត្តិបំណុលធ្ងន់ធ្ងរ ដោយសារតែការចាញ់បោកក្រុមឧកញ៉ា ដែលខ្លះធ្លាប់អះអាងថា ពួកគេមានទំនាក់ទំនងនឹងលោកនាយករដ្ឋមន្ត្រី លោក ហ៊ុន ម៉ាណែត ទៀតផង។ ជាក់ស្ដែង ពលរដ្ឋជិត ១ពាន់នាក់ ដែលរងគ្រោះ ដោយសារតែ ក្រុមហ៊ុន ប្រ៊ីលាន ស៊ីធី នៅមិនទាន់ទទួលបានដំណោះស្រាយនៅឡើយ។
ការយឺតយ៉ាវ រកដំណោះស្រាយពីសំណាក់មន្ត្រីពាក់ព័ន្ធ បណ្ដាលឱ្យពលរដ្ឋមួយចំនួនផ្ទុះការតវ៉ា ជាបន្តបន្ទាប់។ ជាក់ស្ដែង នៅឯប្រទេសកូរ៉េ មានពលករខ្មែររាប់រយនាក់ ដែលចាញ់បោក អតីតឧកញ៉ា ឡេង ចាន់ណា ត្រៀមតវ៉ា ដើម្បីស្នើលោក ហ៊ុន ម៉ាណែត ឱ្យពន្លឿនការរកដំណោះស្រាយ អំឡុងពេលលោកកំពុងមានវត្តមាន នៅក្នុងប្រទេសកូរ៉េខាងត្បូង ។
មុនចេញដំណើរទៅកាន់ប្រទេសកូរ៉េខាងត្បូង លោក ហ៊ុន ម៉ាណែត បានបង្ហោះសារ នៅលើបណ្ដាញសង្គម ហ្វេសប៊ុក (Facebook) របស់លោក នៅថ្ងៃទី១៤ ខែឧសភា ដោយ បញ្ជាឱ្យមន្ត្រីក្រោមបង្គាប់ រៀបចំ មេធាវី ដែលមាន លោក គី តិច ជា ប្រធានក្រុមមេធាវីរបស់រដ្ឋាភិបាល ដើម្បី ការពារក្ដី ជូនពលរដ្ឋរងគ្រោះជាមួយ អ្នកស្រី ឡេង ចាន់ណា។
ទោះជាយ៉ាងណា ក្ដី មន្ត្រីសង្គមស៊ីវិល និងពលករខ្មែរនៅប្រទេសកូរ៉េយល់ថា ការរៀបចំ មេធាវីការពារក្ដី ជូនជនរងគ្រោះនៅពេលនេះ គឺគ្រាន់តែដើម្បីស្អំចិត្ត កុំឱ្យពលករខ្មែរ នៅប្រទេសកូរ៉េ តវ៉ាប៉ុណ្ណោះ ដោយពួកគេលើកហេតុផលថា លោក ហ៊ុន ម៉ាណែត ត្រូវបានគេដឹងថា ជាអ្នក ដែលធ្លាប់មានទំនាក់ទំនងជិតស្និទ្ធជាមួយនឹងម្ចាស់ក្រុមហ៊ុន ប្រ៊ីលាន ស៊ីធី គឺ អ្នកស្រី ឡេង ចាន់ណា ដោយ ពួកគេធ្លាប់ថតរូប និងវីដេអូសន្ទនាជុំគ្នាទៀតផង។
ពលករខ្មែរធ្វើការនៅប្រទេសកូរ៉េ ដែលរងគ្រោះដោយសារក្រុមហ៊ុន ប្រ៊ីលាន ស៊ីធី កញ្ញា សាក់ ផាន់ណា ប្រាប់វិទ្យុអាស៊ីសេរី នៅថ្ងៃទី១៥ ខែ ឧសភា ថា បច្ចុប្បន្ន មានពលករខ្មែររាប់រយ នាក់ រងគ្រោះ ដោយសារអ្នកស្រី ឡេង ចាន់ណា។ ក៏ប៉ុន្តែ មានពលករខ្លះហ៊ានចេញមុខតវ៉ា ចំណែកពលករខ្លះទៀត ពុំហ៊ានចេញតវ៉ា ព្រោះបារម្ភពីសុវត្ថិភាព។
ទោះជាយ៉ាងណាក្ដី កញ្ញា សាក់ ផាន់ណា បានឱ្យដឹងថា មានពលករប្រមាណជិត ១០០នាក់ ត្រៀម ប្រមូលម្ដុំតវ៉ា ដើម្បីស្នើលោក ហ៊ុន ម៉ាណែត ឱ្យរកដំណោះស្រាយ អំឡុងពេល ដែលលោក កំពុងមានវត្តមាននៅប្រទេសកូរ៉េ ពេលនេះ។
កញ្ញា សាក់ ផាន់ណា៖ «ពួកខ្ញុំ ជាអ្នកឈឺចាប់ អ្នកឈឺចាប់ គេមើលមិនឃើញពីការឈឺចាប់របស់ពួកខ្ញុំ។ គេបោកប្រាស់ ហើយពួកខ្ញុំទទួលរឿងអយុត្តិធម៌ច្រើន គេអត់រវល់ជាមួយនឹងពួកខ្ញុំទេ។ ដូច្នេះ ពួកខ្ញុំមានតែរើបម្រះ»។
ការលើកឡើងនេះ ស្របពេល ដែលលោក ហ៊ុន ម៉ាណែត កំពុងធ្វើដំណើរទស្សនកិច្ច នៅប្រទេសកូរ៉េខាងត្បូង ចាប់ពីថ្ងៃទី១៥ ដល់ ១៨ ខែឧសភា ។
យ៉ាងណា ក៏ដោយ ក៏មានពលករខ្មែរចំនួន ២ក្រុម កំពុងត្រៀមធ្វើបាតុកម្ម គឺក្រុមទី១ មានពលករជិត ១០០នាក់ ដែលអ្នកទាំងនោះ ជាអ្នករងគ្រោះជាមួយ ក្រុមហ៊ុន ប្រ៊ីលាន ស៊ីធី ពួកគេនឹងតវ៉ា ដើម្បីទាមទាររដ្ឋាភិបាលឱ្យដោះស្រាយបញ្ហាជាមួយក្រុមហ៊ុនអ្នកស្រី ឡេង ចាន់ណា។ ចំណែកក្រុមទី២ ភាគច្រើនជា អ្នកស្រឡាញ់ ប្រជាធិបតេយ្យ និងសិទ្ធិមនុស្ស ពួកគេនឹង តវ៉ានៅថ្ងៃទី១៩ ខែឧសភា ដើម្បីឱ្យលោក ហ៊ុន ម៉ាណែត ស្ដារប្រជាធិបតេយ្យនៅកម្ពុជាឡើងវិញ។ ក្រៅពីអ្នកត្រៀមតវ៉ាប្រឆាំង ក្នុងពេលជាមួយគ្នា គេក៏ឃើញមានក្រុមពលរដ្ឋចេញស្វាគមន៍ដំណើរទស្សនកិច្ចរបស់លោក ហ៊ុន ម៉ាណែត នៅទីនោះដែរ។
ជុំវិញបញ្ហានេះ ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា ប្រាប់វិទ្យុអាស៊ីសេរី នៅថ្ងៃទី១៥ ខែឧសភាថា ការតវ៉ារបស់ពលករខ្មែរ នៅប្រទេសកូរ៉េ អំឡុង វត្តមានលោកនាយករដ្ឋមន្ត្រី ហ៊ុន ម៉ាណែតនេះ គឺជាសិទ្ធិរបស់ពួកគាត់។ លោកបន្តថា រដ្ឋាភិបាល គួរតែយកក្ដីកង្វល់ របស់ពលករទាំងនោះ ដើម្បីពិចារណារកដំណោះស្រាយសមស្របណាមួយ នោះជារឿងប្រសើរ ក្នុងនាមជាមេដឹកនាំ។
លោក នី សុខា៖ «រដ្ឋាភិបាលត្រូវតែធានាធ្វើយ៉ាងណា ឱ្យប្រជាពលរដ្ឋទទួលបាន យុត្តិធម៌ ឱ្យបានស្មើភាពគ្នានៅក្នុងសង្គមរបស់យើង។ អ៊ីចឹង ចំពោះការលើកឡើង តវ៉ារបស់ប្រជាពលរដ្ឋនេះ គឺមិនមានការខុសឆ្គងអ្វីនោះទេ នេះជាកាតព្វកិច្ច របស់ពលរដ្ឋ»។
កាលពីថ្ងៃទី១២ ខែមីនា សមត្ថកិច្ចខេត្តសៀមរាបបានឃាត់ខ្លួនអ្នកស្រី ឡេង ចាន់ណា ដែលជាអគ្គនាយិកាក្រុមហ៊ុន ប្រ៊ីលាន ស៊ីធី និងបក្ខពួកមួយចំនួនទៀត តាមពាក្យបណ្ដឹងរបស់ពលរដ្ឋដោយសារតែក្រុមហ៊ុននេះមិនមានលទ្ធភាពសងលុយពលរដ្ឋវិញ។
ក្រោយការចាប់ខ្លួន សាលាដំបូងខេត្តសៀមរាបបានចេញដីកាសម្រេចរឹបអូសទ្រព្យសម្បត្តិរបស់ អ្នកស្រី ឡេង ចាន់ណា ជាបណ្ដោះអាសន្ន ដើម្បីលក់សងម្ចាស់បំណុល។ ប៉ុន្តែ ពលរដ្ឋអះអាងថា គិតមកទល់ ពេលនេះពួកគាត់នៅមិនទាន់ទទួលបានប្រាក់សំណងនៅឡើយទេ។ ការយឺតយ៉ាវនេះ បណ្ដាលឱ្យពលករខ្មែរ នៅប្រទេសកូរ៉េ ប្រទេសថៃ និងនៅកម្ពុជា ដែលរងគ្រោះរាប់ពាន់នាក់ កំពុងជួបវិបត្តិបំណុលវ័ណ្ឌក៕
No comments:
Post a Comment