2024.05.02
ម្ចាស់ក្រុមហ៊ុន ហ្វាទីណា មេនផៅវើ (Fatina Manpower Co., Ltd) ឬមេខ្យល់ដែលបញ្ជូនក្រុមពលករទៅធ្វើការនៅប្រទេសអារ៉ាប៊ី សាអូឌីត (Saudi Arabia) គឺជាមន្ត្រីជំនិតរបស់រដ្ឋមន្ត្រីក្រសួងការងារ លោក ហេង សួរ និងទើបតែត្រូវបានតែងតាំងជាអនុរដ្ឋលេខាធិការនៃក្រសួងការងារ។ ក្រុមពលករចោទក្រុមហ៊ុនមួយនេះថា អនុវត្តខុសពីកិច្ចសន្យាការងារ និងគ្មានទំនួលខុសត្រូវ ដែលធ្វើឱ្យថៅកែក្នុងប្រទេស អារ៉ាប៊ី សាអូឌីត បង្ខំឱ្យពលករខ្មែរធ្វើការច្រើនម៉ោង មិនផ្ដល់អាហារហូបចុកគ្រប់គ្រាន់ និងបង្ខាំងក្រុមពលករក្នុងបន្ទប់ ពេលពួកគាត់ទាមទារឱ្យក្រុមហ៊ុន និងថៅកែគោរពសិទ្ធកម្មករ។
ក្រុមហ៊ុន ហ្វាទីណា មេនផៅវើ និងក្រុមហ៊ុនមួយចំនួនទៀតក្នុងប្រទេសអារ៉ាប៊ី សាអូឌីត កំពុងរៀបចំឯកសារប្ដឹងក្រុមពលករទៅតុលាការ ដោយមិនទាន់អនុញ្ញាតឱ្យក្រុមពលករត្រឡប់មកកម្ពុជាវិញឡើយ។ ចំណែក ក្រុមពលករចំនួន ៣៥នាក់ដែលស្ថានទូតកម្ពុជាប្រចាំប្រទេសអារ៉ាប៊ី សាអូឌីត ជម្លៀសចេញពីកន្លែងបង្ខាំង ក៏មិនត្រូវបានគេអនុញ្ញាតឱ្យស្នាក់នៅសណ្ឋាគារទៀតដែរ។ ក្រុមហ៊ុនបានជម្លៀសក្រុមពលករឱ្យស្នាក់នៅផ្ទះជួលវិញ ដើម្បីត្រៀមឡើងតុលាការក្នុងប្រទេសអារ៉ាប៊ី សាអូឌីត ក្នុងពេលឆាប់ៗនេះ។
ក្រុមពលករកំពុងជាប់ក្នុងប្រទេសអារ៉ាប៊ី សាអូឌីត ឱ្យវិទ្យុអាស៊ីសេរីដឹងថា ហេតុផលដែលក្រុមហ៊ុនប្ដឹងពលករ ដោយសារតែក្រុមហ៊ុន ហ្វាទីណា មេនផៅវើ និងក្រុមហ៊ុនក្នុងប្រទេសអារ៉ាប៊ី សាអូឌីត ចង់បានភាពស្អាតស្អំ អំពីរឿងរ៉ាវដែលក្រុមពលករអះអាងថា រងការបង្ខាំង ហើយថៅកែពុំបានផ្ដល់បាយទឹកឱ្យហូបគ្រប់គ្រាន់។ ក្រុមពលករបញ្ជាក់ថា ប្រសិនបើឡើងតុលាការក្នុងប្រទេសអារ៉ាប់ ពួកគាត់នឹងនិយាយអ្វីដែលជាការពិត និងបញ្ហាដែលបានជួបនាពេលកន្លងមក។
ក្រុមហ៊ុនដៃគូសហការរបស់ក្រុមហ៊ុន ហ្វាទីណា មេនផៅវើ ក្នុងប្រទេសអារ៉ាប៊ី សាអូឌីត មានក្រុមហ៊ុន ប៊ីអេប៊ី (BAB) និងក្រុមហ៊ុន សារ៉ាកូ (Saraco)។ ក្រុមពលករឱ្យដឹងថា ក្រុមហ៊ុនទាំងនេះ ទទួលក្រុមពលករពីក្រុមហ៊ុន ហ្វាទីម៉ា មេនផៅវើ ដើម្បីនាំយកពលករខ្មែរភាគច្រើនជាស្ត្រីបញ្ជូនទៅធ្វើការងារជាអ្នកបម្រើតាមផ្ទះអ្នកមានៗ មហាសេដ្ឋី និងនៅតាមខុនដូ (Condo) សណ្ឋាគារក្នុងប្រទេសអារ៉ាប៊ី សាអូឌីត។ ក្រុមពលករចោទក្រុមហ៊ុនទាំងនេះថា បង្ខំឱ្យពលករខ្មែរជាស្ត្រីធ្វើការច្រើនម៉ោង មិនគោរពសិទ្ធិកម្មករខ្មែរ និងពុំបានផ្ដល់អាហារឱ្យពលករបានហូបគ្រប់គ្រាន់ទេ។
អគ្គនាយកក្រុមហ៊ុន ហ្វាទីណា មេនផៅវើ គឺលោក ម៉ាន តើរ៉មីហ្សី (Man Teramizy) ដែលជាកូនកាត់អារ៉ាប៊ី សាអូឌីត និងភរិយារបស់លោកគឺអ្នកស្រី ស្វាយ សុគន្ធារី។ លោក ម៉ាន តើរ៉មីហ្សី មានងារជាឯកឧត្តម ហើយក៏ជាមន្ត្រីជំនិតរបស់រដ្ឋមន្ត្រីក្រសួងការងារ លោក ហេង សួរ។ លោក ត្រូវបានលោកនាយករដ្ឋមន្ត្រី ហ៊ុន ម៉ាណែត តែងតាំងជាអនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី៣០ ខែវិច្ឆិកា ឆ្នាំ២០២៣។ ក្រុមហ៊ុនរបស់លោកបានចុះបញ្ជីនៅក្រសួងការងារ ដើម្បីឱ្យក្រសួងទទួលស្គាល់ក្នុងការបញ្ជូនពលករខ្មែរទៅធ្វើការនៅប្រទេសជប៉ុន (Japan) និងប្រទេសអារ៉ាប៊ី សាអូឌីត (Saudi Arabia) កាលពីឆ្នាំ២០១៧។
លោក ម៉ាន តើរ៉មីហ្សី ជាមន្ត្រីជំនិតរបស់រដ្ឋមន្ត្រីក្រសួងការងារ លោក ហេង សួរ ព្រមទាំងមានមុខតំណែងខ្ពស់ក្នុងក្រសួងផ្ទាល់បែបនេះហើយ ក្រុមពលករថា ទើបក្រសួង និងស្ថានទូតកម្ពុជាប្រចាំប្រទេសអារ៉ាប៊ី សាអូឌីត បានព្រមានក្រុមពលករមិនឱ្យបញ្ចេញព័ត៌មានពាក់ព័ន្ធថៅកែបង្ខាំង និងបង្អត់បាយទឹកពលករខ្មែរ ព្រោះខ្លាចប៉ះពាល់មុខមាត់ក្រុមហ៊ុន និងក្រសួងការងារ។
ក្រុមពលករបញ្ជាក់ថា ក្នុងលិខិតកិច្ចសន្យាការងារ ក្រុមហ៊ុន ហ្វាទីណា មេនផៅវើ របស់លោក ម៉ាន តើរ៉មីហ្សី ធានាថា ការងារផ្នែកអនាម័យនៅក្នុងប្រទេសអារ៉ាប៊ី សាអូឌីត ធ្វើការមួយថ្ងៃតែ ៨ម៉ោងតែណ្ណោះ។ ចំណែក ក្នុងលិខិតកិច្ចព្រមព្រៀងការងារ ក្រុមហ៊ុនមួយនេះធានាថា ពេលបញ្ជូនពលករខ្មែរទៅធ្វើការក្នុងប្រទេសអារ៉ាប៊ី សាអូឌីត ក្រុមហ៊ុននឹងសហការជាមួយក្រុមហ៊ុនដៃគូក្នុងប្រទេសនោះ ដោយធានាប្រាក់ខែគោល ៤រយដុល្លារ (៤០០ដុល្លារ) ក្នុងមួយខែ។ លើសពីនេះទៀត ក្រុមហ៊ុនក៏ធានាលើការចំណាយរាល់លិខិតឆ្លងដែន ទិដ្ឋាការធ្វើការ ថ្លៃសំបុត្រយន្តហោះ និងធានាអាហារហូបចុក ៣ពេល កន្លែងស្នាក់នៅឥតគិតថ្លៃ ពេលក្រុមពលករធ្វើការក្នុងប្រទេសអារ៉ាប៊ី សាអូឌីត។
ទោះជាយ៉ាងណា ពេលក្រុមពលករទៅដល់ប្រទេសអារ៉ាប៊ី សាអូឌីត គឺខុសពីការពិត ហើយក្រុមហ៊ុន ហ្វាទីណា មេនផៅវើ បញ្ជូនក្រុមពលករទៅក្រុមហ៊ុនដៃគូសហការ ទៅធ្វើការងារជាអ្នកបម្រើតាមផ្ទះទៅវិញ។
ពលករម្នាក់ដែលកំពុងធ្លាក់ខ្លួនឈឺពេលមកដល់ខ្មែរគឺ កញ្ញា លាង ស៊ីដែន ប្រាប់វិទ្យុអាស៊ីសេរីនៅថ្ងៃទី០១ ខែឧសភាថា ក្រុមហ៊ុន និងថៅកែ ក្នុងប្រទេសអារ៉ាប៊ី សាអូឌីត បង្ខាំងពលករខ្មែរ មិនផ្ដល់បាយទឹកឱ្យហូបគ្រប់គ្រាន់ គឺជាការពិត។ កញ្ញាបញ្ជាក់ថា ចំណែកការអះអាងរបស់ក្រុមហ៊ុនថា មិនកាត់ថ្លៃចំណាយរបស់ពលករពេលធ្វើដំណើរទៅដល់ប្រទេសអារ៉ាប៊ី សាអូឌីត ខុសពីការពិត។ កញ្ញារៀបរាប់ថា ពេលដល់ប្រទេសគេទើបដឹងខ្លួនថា ចាញ់បោកក្រុមហ៊ុន ហ្វាទីម៉ា មេនផៅវើ ព្រោះក្រុមហ៊ុន សារ៉ាកូ ដែលកញ្ញាធ្វើការនោះប្រាប់ថា នឹងកាត់ប្រាក់ខែកញ្ញា ចំនួន ២ខែ លើថ្លៃចំណាយការធ្វើដំណើរ។ កញ្ញាទាមទារឱ្យក្រុមហ៊ុនផ្ដល់សំណងជំងឺចិត្ត និងទទួលខុសត្រូវលើស្ថានភាពសុខភាពកញ្ញានាពេលនេះ។
កញ្ញា លាង ស៊ីដែន៖ «អារ៉ាប់គេអត់ដឹងអីផង! អារ៉ាប់គេឆ្លើយប្រាប់ខ្ញុំថា ក្រុមហ៊ុនអ្នកឯងហ្នឹងហើយធ្វើស៊ីអ្នកឯង ខ្ញុំឆ្អែតចិត្តត្រង់ហ្នឹង។ គេថា អ្នកឯងមកដល់សារ៉ាកូ (Saraco) អារ៉ាប៊ី សាអីឌីត ហ្នឹង អ្នកឯងអត់មានពាក់ព័ន្ធនឹងក្រុមហ៊ុន ហ្វាទីណា របស់អ្នកឯងអីទៀតទេ។ (Because you came here to work in Saudi Arabia to work here, not ask for an agency in Cambodia. Here in Saraco.) ចង់និយាយថា វាចង់និយាយថា អត់ឱ្យយើងនិយាយពីរឿងក្រុមហ៊ុននៅខ្មែរទេ។ មកដល់ទឹកដីអារ៉ាប់ គឺក្រុមហ៊ុន សារ៉ាកូ (Saraco) វាចង់ធ្វើអីក៏បានដែរ។ បាយទឹកព្រោះតែមិនគ្រប់គ្រាន់ហ្នឹងហើយបានដួលសន្លប់ទីងទាំងអស់ហ្នឹង។ ពួកខ្ញុំទៅតស៊ូ និយាយតែការពិតពួកខ្ញុំមើលឃើញ ពួកខ្ញុំជួបរបស់ពិត នៅកន្លែងពិត។ ខ្ញុំហ៊ានប្រឈមមុខ និងហ៊ានតទល់ជាមួយទៀត»។
ដោយឡែក ពលករកំពុងជាប់ក្នុងប្រទេសអារ៉ាប៊ី សាអូឌីត ថ្លែងសុំមិនបញ្ចេញឈ្មោះព្រួយបារម្ភពីបញ្ហាសុវត្ថិភាពឱ្យដឹងដែរថា កាលពីថ្ងៃទី៣០ ខែមេសា តំណាងក្រុមហ៊ុន ហ្វាទីណា បានជួបក្រុមពលករ ដោយប្រាប់ថា នឹងត្រូវឡើងតុលាការក្នុងប្រទសអារ៉ាប៊ី សាអូឌីតឆាប់ៗនេះ។ ពលកររូបនេះបញ្ជាក់ថា ក្រុមពលករមិនខ្លាចញញើតចំពោះបញ្ហាផ្លូវច្បាប់ឡើយ ហើយក្រុមពលករនឹងរៀបរាប់ប្រាប់តុលាការប្រទេសអារ៉ាប៊ី សាអូឌីត ចំពោះអ្វីដែលជាការពិត និងបានជួបបញ្ហានាពេលកំពុងធ្វើការ។
ពលករថ្លែងលាក់ឈ្មោះ៖ «ក្រុមហ៊ុននៅខ្មែរដែលនិយាយថា ពួកខ្ញុំនឹងអាចឡើងតុលាការរង់ចាំការឡើងតុលាការបញ្ជាក់ អ៊ីចឹងពួកខ្ញុំនឹងអាចនៅយូរទៀត ខ្ញុំប្រាប់គាត់ថា បើឡើងតុលាការខ្ញុំឱ្យតុលាការពន្លឿននាំពួកខ្ញុំទៅឡើងឱ្យហើយៗទៅ បើថា រឿងក្ដីមិនឈ្នះៗអី បើភាសាមួយថា បើចាញ់គេចាញ់ឱ្យជាប់គុកឱ្យហើយទាំងអស់គ្នាហ្មងឱ្យលឿន បើឈ្នះៗឱ្យបានទៅផ្ទះឱ្យលឿន។ ខ្ញុំបានប្រាប់គាត់ថា ទីមួយពួកខ្ញុំអត់មានលុយផ្ញើទៅផ្ទះទេ អ្នកផ្ទះខ្ញុំទីមួយត្រូវការលុយ ដូចជាខ្ញុំអីត្រូវការលុយទឹកដោះគោកូន ត្រូវការចិញ្ចឹមគ្រួសារ ត្រូវការបង់អង្គការ ប៉ុន្មានខែនេះ ខ្ញុំអត់មានលុយឱ្យពួកគាត់ទេ»។
វិទ្យុអាស៊ីសេរីបានព្យាយាមទាក់ទងអគ្គនាយក ក្រុមហ៊ុន ហ្វាទីណា មេនផៅវើ លោក ម៉ាន តើរ៉មីហ្សី (Man Teramizy) និងភរិយារបស់លោកគឺអ្នកស្រី ស្វាយ សុគន្ធារី ជាច្រើនលើក ដើម្បីសុំការបំភ្លឺរឿងនេះ ប៉ុន្តែទូរស័ព្ទច្រើនដងគ្មានអ្នកទទួលនៅថ្ងៃទី០១ ខែឧសភា។ ចំណែក អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង ក៏មិនអាចទាក់ទងបានដែរនៅថ្ងៃដដែលនេះ។
ពាក់ព័ន្ធនឹងការប្រឈមរបស់ក្រុមពលករដែលរងបណ្ដឹងនៅតុលាការ ឯកអគ្គរាជទូតកម្ពុជាប្រចាំប្រទេស អារ៉ាប៊ី សាអូឌីត លោក អ៊ុក សារុន អះអាងថា លោកកំពុងខិតខំពន្លឿននីតិវិធី និងធានាពីសុវត្ថិភាពក្រុមពលករកំពុងស្ថិតក្នុងប្រទេសអារ៉ាប៊ី សាអូឌីត។ លោកបានបញ្ជាក់ប្រាប់ក្រុមពលករថា ករណីក្រុមហ៊ុនប្តឹងពលករនោះលោកមិនជ្រៀតជ្រែក ឬចូលរួមទេ ព្រោះលោកថា មានតួនាទីត្រឹមជួយការពារក្រុមពលករឱ្យមានសុវត្ថិភាព និងបានវិលត្រឡប់ទៅប្រទេសកម្ពុជាវិញ។
លោក អ៊ុក សារុន៖ «នៅពេលដែលយើងទទួលបានព័ត៌មានទុក្ខលំបាកយើងខ្ញុំមិនដែលនៅទំនេរទេ យើងទាក់ទង តួយ៉ាងថា អត់ខ្ញុំទាក់ទងទៅក្រុមហ៊ុន តាមលទ្ធភាពដែលធ្វើបាន អត់មានអីថា ខ្ញុំព្យាយាមចង់បានមុខមាត់អីទេ ខ្ញុំជម្រាបបងប្អូនជនរួមជាតិ ក៏ដូចជាកូនៗទាំងអស់ឱ្យបានជ្រាប។ ខ្ញុំធ្វើនេះតែមួយគត់គឺក្នុងនាមតំណាងរដ្ឋាភិបាលជួយពលករកម្ពុជា ការពារពលរដ្ឋកម្ពុជា ឱ្យមានសុវត្ថិភាព ហើយយើងព្យាយាមជំរុញភាគីមិត្ត និងភាគីពាក់ព័ន្ធ ដើម្បីធ្វើម៉េចបានបញ្ជូនពលករមកស្រុកខ្មែរយើងវិញ នោះជាវត្ថុបំណងធំដែលរដ្ឋាភិបាលបានដាក់ខ្ញុំធ្វើការងារនេះ»។
លោក អ៊ុក សារុន អះអាងប្រាប់វិទ្យុអាស៊ីសេរីថា លោកបានដឹងពីទីតាំងក្រុមពលករដែលស្នើឱ្យស្ថានទូតជួយអន្តរាគមន៍ក្នុងនោះរួមមានពលករនៅក្រុមហ៊ុនស្ថិតក្នុងក្រុង ជេសដាស (Jeddah) ចំនួន ៤នាក់ ទីក្រុង អាប់ហា (Abha) ៣នាក់ ក្រុមហ៊ុននៅតំបន់ ដាមម៉ាម (Dammam) ចំនួន ១០នាក់ និងក្រុមហ៊ុននៅជុំវិញតំបន់ ជេសដាស (Jeddah) ចំនួន ៩នាក់។
ក្នុងចំណោមពលករស្ថិតក្នុងតំបន់ទាំងនោះមានពលករ ៤នាក់ ស្ថិតនៅទីក្រុង អាប់ហា (Abha) អះអាងថា ក្រុមហ៊ុនបានបង្ខាំងពួកគេក្នុងបន្ទប់ និងមិនផ្ដល់បាយទឹកឱ្យពួកគាត់ហូបគ្រប់គ្រាន់ទេ។ លោកស្រី សូ ចេឡា ជាពលករម្នាក់ក្នុងចំណោមពលករទាំង ៤នាក់នោះរៀបរាប់ថា កាលពីថ្ងៃទី២៩ ខែមេសា ភ្នាក់ងារក្រុមហ៊ុននៅប្រទេសអារ៉ាប៊ី សាអូឌីត បាននាំពលករទាំង ៤នាក់ចេញពីបន្ទប់ឃុំឃាំង ទៅផ្សារ និងបង្ខំឱ្យពលករសម្ដែងទិញអាហារហូប ប៉ុន្តែក្រុមភ្នាក់ងារក្រុមហ៊ុនទាំងនោះពុំបានផ្ដល់អាហារឱ្យពួកគាត់ទេ។
លោកស្រី សូ ចេឡា៖ «ពេលនាងខ្ញុំទៅដល់ម៉ាត (Mart) ខ្ញុំត្រេកអរណាស់ព្រោះអីឃើញមានម្ហូបអាហារច្រើននាំគ្នារត់ចែកជើងគ្នា អ្នកខ្លះច្រកប៉េងប៉ោះ ដូចឃើញក្នុងរូបភាពហ្នឹងអ៊ីចឹងតែតាមការពិត ខុសពីការពិតគេសម្ដែងទេ។ ពេលពួកខ្ញុំចង់បានអី ឱ្យពួកខ្ញុំកាន់ហើយថត លួចថត ហើយអត់ឱ្យពួកខ្ញុំកាន់យកមកទេ ខ្ញុំខ្មាសទាំងអ្នកគិតលុយទៀត គេមើលខ្ញុំគ្រប់គ្នា។ តើពួកខ្ញុំជាអីគេវិញយកពួកខ្ញុំទៅថតហើយយកចេញមកក្រៅ ទាំងប្រាប់ថា ថតឱ្យខាងការិយាល័យ (Office) មើលចាំគេឱ្យលុយមកចាំទិញឱ្យ។ ក៏ប៉ុន្តែអត់ទេ នាំពួកខ្ញុំទៅថតហើយយកពួកខ្ញុំទៅវិញ។ សំណាងហើយខ្ញុំនៅមានលុយតិចតួចទិញបានទឹកក្រូច ២ដបជាលុយផ្ទាល់ខ្លួន។ ខ្ញុំនៅទីនេះ ៤នាក់រងទុក្ខវេទនាហើយ បែរជានាំគ្នាសម្ដែងធ្វើរឿងអ៊ីចឹងៗទៀត អយុត្តិធម៌ខ្លាំងណាស់»។
ជុំវិញរឿងនេះ មន្ត្រីជាន់ខ្ពស់ក្នុងកម្មវិធីប្រយុទ្ធប្រឆាំងអំពើជួញដូរមនុស្សនៃអង្គការសង់ត្រាល់ (CENTRAL) លោក ប៊ុន ចិន្តា មើលឃើញថា ក្រុមហ៊ុនដែលធានាក្រុមពលករបញ្ជូនទៅធ្វើការនៅប្រទេសអារ៉ាប៊ី សាអូឌីត ជាអ្នករំលោភបំពានកិច្ចសន្យាការងារ ដូច្នេះលោកថា ក្រុមហ៊ុនពុំគួរគំរាមកំហែងប្ដឹងក្រុមពលករទេ។ លោកសង្កត់ធ្ងន់ថា ក្រុមពលករទៅធ្វើការនៅប្រទេសអារ៉ាប៊ី សាអូឌីតរងសម្ពាធទាំងផ្លូវកាយ និងផ្លូវចិត្ត ហើយត្រូវបានថៅកែរំលោភបំពានកេងប្រវ័ញ្ចកម្លាំងពលកម្ម ដូច្នេះក្រសួងស្ថាប័នពាក់ព័ន្ធគួរតែផ្ដល់កិច្ចគាំពារឱ្យបានខ្លាំងក្លា និងគាំទ្រផ្នែកច្បាប់ជូនពលករ។
លោក ប៊ុន ចិន្តា៖ «ផ្ទុយទៅវិញបែរជាក្រុមហ៊ុនចោទ និងមានការគំរាមកំហែង និងប្ដឹងលើពលករទៅវិញ ដែលគាត់ [ក្រុមហ៊ុន] ជាអ្នករំលោភលើកិច្ចសន្យា ឬបំពានកុងត្រាការងារទាំងអស់ហ្នឹង។ វាមិនគួរកើតឡើងចំពោះពលករ អ្វីដែលគួរគឺក្រុមហ៊ុនត្រូវតែជួយគាំពារដោះស្រាយ ផ្ដល់នូវការគាំទ្រពេញលេញសម្រាប់ពលករ»។
ក្រុមពលករ និងមន្ត្រីសិទ្ធិមនុស្ស ជំរុញភាគីក្រសួងការងារ និងស្ថានទូតផ្តល់កិច្ចគាំពារក្រុមពលករ ដើម្បីធ្វើយ៉ាងណាបញ្ជូនក្រុមពលករឱ្យមកកម្ពុជាបានឆាប់ ជាជាងបណ្ដែតបណ្ដោយឱ្យក្រុមហ៊ុនបន្តគំរាមកំហែង និងប្ដឹងក្រុមពលករបន្ថែមទៀត។
មកទល់ពេលនេះ ក្រុមពលករអះអាងថា នៅតែមានពលករបម្រើការងារតាមផ្ទះ ហើយត្រូវបានថៅកែបង្ខាំងក្នុងបន្ទប់ ដោយពុំផ្ដល់អាហារឱ្យពួកគាត់ហូបគ្រប់គ្រាន់។ ចំណែក ពលករចំនួន ២នាក់គឺលោកស្រី យ៉េ ធឿន និងលោកស្រី ដឿន ភាព ដែលរងការបង្ខាំងក្នុងបន្ទប់ ត្រូវបានគេបញ្ជូនទៅសម្រាកព្យាបាលនៅមន្ទីរពេទ្យក្នុងប្រទេសអារ៉ាប៊ី សាអូឌីត ហើយ។ ប៉ុន្តែ ពួកគាត់ទាំង ២នាក់នៅតែមិនអាចហូបអាហារបានច្រើនដោយសារបញ្ហាក្រពះ ដែលធ្វើឱ្យពួកគាត់នៅតែគ្មានកម្លាំងដដែល។
ក្រុមពលករកំពុងជាប់ក្នុងប្រទេសអារ៉ាប៊ី សាអូឌីតជាច្រើនអ្នកខ្លះអស់សង្ឃឹមក្នុងការវិលត្រឡប់មកកម្ពុជាវិញ ខណៈក្រុមហ៊ុនមិនបិទទិដ្ឋាការ ឬវីសា (VISA) ជូនក្រុមពលករ ពោលក្រុមហ៊ុនមិនអនុញ្ញាតឱ្យក្រុមពលករឈប់ធ្វើការ ហើយត្រឡប់ទៅកម្ពុជាមុនកិច្ចសន្យាការងារត្រូវបានបញ្ចប់ឡើយ បែរជាត្រៀមប្ដឹងក្រុមពលករឡើងតុលាការ។ ក្រុមពលករបញ្ជាក់ថា ក្រុមហ៊ុនធ្វើបែបនេះ កាន់តែធ្វើឱ្យពួកគាត់ប្រឈមមានបញ្ហាវិបត្តិផ្លូវចិត្ត និងរងអយុត្តិធម៌បន្ថែមទៀត៕
No comments:
Post a Comment