ដោយ ខាន់ លក្ខិណា
2024.05.09
លោក ស៊ុន ចន្ធី ប្រធានគណបក្សកម្លាំងជាតិ ក្នុងពេលអាជ្ញាធរចាប់ខ្លួន នៅវាលយន្តហោះអន្តរជាតិភ្នំពេញ នៅពីថ្ងៃទី៩ ខែឧសភា ឆ្នាំ២០២៤។
រូប៖ ហ្វេសប៊ុកគណបក្សកម្លាំងជាតិ
គណបក្សកម្លាំងជាតិអំពាវនាវឱ្យសមត្ថកិច្ចដោះលែងលោក ស៊ុន ចន្ធី ឱ្យមាន សេរីភាពវិញ ដោយចាត់ទុកការចាប់ខ្លួននេះថា ជាការគំរាមកំហែង និងធ្វើទុក្ខបុកម្នេញផ្នែកនយោបាយធ្ងន់ធ្ងរ។ ប៉ុន្តែ ស្នងការដ្ឋាននគរបាលរាជធានីភ្នំពេញថា ការចាប់ខ្លួននេះ មិនពាក់ព័ន្ធនឹងរឿងនយោបាយនោះទេ។
ប្រធានគណបក្សកម្លាំងជាតិ លោក ស៊ុន ចន្ធី ត្រូវបានសមត្ថកិច្ចចាប់ខ្លួន នៅវាលយន្តហោះរាជធានីភ្នំពេញ នៅព្រឹកថ្ងៃទី៩ ខែឧសភា បន្ទាប់ពីលោកវិលត្រឡប់មកពីប្រទេសជប៉ុន។
គណបក្សកម្លាំងជាតិ ចាត់ទុកការចាប់ខ្លួនលោក ស៊ុន ចន្ធី នេះថា ជាការគំរាមកំហែង បំភិតបំភ័យ និងជាការធ្វើទុក្ខបុកម្នេញផ្នែកនយោបាយយ៉ាងធ្ងន់ធ្ងរ មកលើគណបក្ស និងជាការប៉ះពាល់យ៉ាងធ្ងន់ធ្ងរ ដល់ដំណើរការលទ្ធិប្រជាធិបតេយ្យ នៅក្នុងប្រទេសកម្ពុជា។
ក្នុងសេចក្ដីថ្លែងការណ៍របស់គណបក្សកម្លាំងជាតិ នៅថ្ងៃទី៩ ខែឧសភាគណបក្សនេះអំពាវនាវ ដល់រដ្ឋាភិបាលកម្ពុជាឱ្យដោះលែង លោក ស៊ុន ចន្ធី ប្រធានគណបក្សកម្លាំងជាតិ ឱ្យមានសេរីភាពឡើងវិញដោយឥតលក្ខខណ្ឌ ដើម្បីបើកលំហសិទ្ធិសេរីភាពនយោបាយ សម្រាប់គណបក្សកម្លាំងជាតិ ក្នុងការចូលរួមចំណែកលើកម្ពស់សិទ្ធិសេរីភាព និងដំណើរការលទ្ធិប្រជាធិបតេយ្យ នៅកម្ពុជា។
ទីប្រឹក្សាគណបក្សកម្លាំងជាតិ លោក រ៉ុង ឈុន ប្រាប់វិទ្យុអាស៊ីសេរី នៅថ្ងៃទី៩ ខែឧសភា ថា ការចាប់ខ្លួនលោក ស៊ុន ចន្ធី នេះ គឺជាការគំរាមកំហែងថ្មីមួយទៀត ទៅដល់សកម្មជន និងអ្នកគាំទ្រគណបក្ស។ លោកចាត់ទុកការចាប់ខ្លួនលោក ស៊ុន ចន្ធី នេះ ជារឿងនយោបាយច្រើនជាងការ អនុវត្តច្បាប់។
ប៉ុន្តែ អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា ច្រាន ចោល ការចោទប្រកាន់នេះ ដោយអះអាងថា ការឃាត់ខ្លួន គឺអនុវត្តតាមច្បាប់។
លោក សំ វិច្ឆិកា ប្រាប់វិទ្យុអាស៊ីសេរី នៅថ្ងៃទី៩ ខែឧសភាថា ការឃាត់ខ្លួនលោក ស៊ុន ចន្ធី គឺអនុវត្តតាមដីកាឱ្យចូលខ្លួនរបស់តំណាងអយ្យការអមសាលាដំបូង រាជធានីភ្នំពេញ កាលពី ថ្ងៃទី០៧ ខែឧសភា។ លោកថា សមត្ថកិច្ចកំពុងសាកសួរ ដើម្បីបន្តនីតិវិធី ។
លោក សំ វិច្ឆិកា៖ «បុគ្គលឈ្មោះ ស៊ុន ចន្ធី នេះ រងការចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមរយៈការបង្ហោះផ្សព្វផ្សាយព័ត៌មានលើបណ្ដាញសង្គម ក្នុងចេតនាញុះញង់បំភ្លៃព័ត៌មានមិនពិតនាំឱ្យប្រជាពលរដ្ឋយល់ច្រឡំបង្កឱ្យមានភាពវឹកវរក្នុងសង្គម»។
ក្នុងដីកាបង្គាប់ឱ្យចូលខ្លួនរបស់ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ លោក ច្រឹង ខ្មៅ ចុះថ្ងៃទី៧ ខែឧសភា បានបង្គាប់ឱ្យកម្លាំងសមត្ថកិច្ចនាំខ្លួនលោក ស៊ុន ចន្ធី បង្ហាញខ្លួននៅការិយាល័យសន្តិសុខផ្ទៃក្នុង ផែនការងារសន្តិសុខ នៃស្នងការដ្ឋាននគរបាលរាជធានីភ្នំពេញឱ្យបានមុនថ្ងៃទី២៣ ខែឧសភា ដើម្បីសាកសួរដំណើររឿង «ញុះញង់»។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក លោក នី សុខា កត់សម្គាល់ថា ដំណាក់កាលចុងក្រោយនេះ មានការចាប់ខ្លួនសកម្មជនគណបក្សនយោបាយ ជាពិសេស សកម្មជនបក្សប្រឆាំងកាន់តែបន្តកើនឡើង ស្របពេលកម្ពុជា នឹងរៀបចំការបោះឆ្នោតក្រុមប្រឹក្សារាជធានី ខេត្ត ក្រុងស្រុក ខណ្ឌ ក្នុងពេលខាងមុខ។
លោកថា ការចាប់ខ្លួនជាបន្តបន្ទាប់មុនការបោះឆ្នោតមកដល់នេះ អាចនឹងជះឥទ្ធិពលដល់ដំណើរការបោះឆ្នោតដែរ ពីព្រោះអ្នកដែលត្រូវសមត្ថកិច្ច ចាប់ខ្លួនមួយចំនួន គឺជាបេក្ខជនឈរឈ្មោះបោះឆ្នោតក្រុមប្រឹក្សារាជធានី ខេត្ត ក្រុងស្រុក ខណ្ឌថែមទៀត។
លោក នី សុខា បន្តថា ប្រសិនបើនៅតែបន្តចាប់ និងឃុំខ្លួនសកម្មជនទៀតនោះ រដ្ឋាភិបាលកម្ពុជា នឹងទទួលការដាក់សម្ពាធផ្សេងៗ ពីសហគមន៍អន្តរជាតិ ហើយមុខមាត់រដ្ឋាភិបាល ក៏ប៉ះពាល់ខ្លាំងដែរ នៅលើឆាកអន្តរជាតិ។
អាជ្ញាធរក្រោមការដឹកនាំរបស់អតីតនាយករដ្ឋមន្ត្រី ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត បានចាប់ខ្លួនសកម្មជន និងមន្ត្រីបក្សប្រឆាំងជាបន្តបន្ទាប់ ដែលធ្វើឱ្យសហគមន៍អន្តរជាតិ រិះគន់មកលើរដ្ឋាភិបាលប្រទេសកម្ពុជាថា បានរំលោភសិទ្ធិមនុស្សធ្ងន់ធ្ងរ ហើយសិទ្ធិសេរីភាពកាន់តែធ្លាក់ចុះពីមួយឆ្នាំទៅមួយឆ្នាំ។
ពួកគេទាមទាររដ្ឋាភិបាលកម្ពុជា ឱ្យដោះលែងអ្នកទោសមនសិការ ជាពិសេស មេដឹកនាំបក្សប្រឆាំង និង ស្នើដល់រដ្ឋាភិបាលកម្ពុជាឱ្យធានាឱ្យបាននូវការបោះឆ្នោត ដោយត្រឹមត្រូវ សេរី និងយុត្តិធម៌ ព្រមទាំងធ្វើកំណែទម្រង់ប្រព័ន្ធតុលាការ ឱ្យមានភាពឯករាជ និងមិនលំអៀង ស្របតាមស្តង់ដារអន្តរជាតិ៕
No comments:
Post a Comment