2024.07.01
សាលាដំបូងរាជធានីភ្នំពេញ ច្រានចោលសំណើសុំនៅក្រៅឃុំរបស់អ្នកជំនាញកសិកម្ម លោក នី ណាក់ ក្រោមហេតុផលថា នៅក្នុងពន្ធនាគារមានពេទ្យប្រចាំការហើយ។
ការសម្រេចនេះ បន្ទាប់ពីចៅក្រមសាលាដំបូងរាជធានីភ្នំពេញ លោក ទិត្យ សុទ្ធីបូរ៉ាឆាត បានបើកសវនាការបណ្ដឹងសុំនៅក្រៅឃុំបណ្ដោះអាសន្នរបស់លោក ជូង ជូងី មេធាវីការពារក្ដីឱ្យលោក នី ណាក់ នៅថ្ងៃទី១ ខែកក្កដា។
ក្រោយពីបើកសវនាការនេះ លោក ទិត្យ សុទ្ធីបូរ៉ាឆាត បានសម្រេចប្រកាសសាលក្រមភ្លាមៗ មិនអនុញ្ញាតឱ្យលោក នី ណាក់ នៅក្រៅឃុំបណ្ដោះអាសន្នឡើយ។
វិទ្យុអាស៊ីសេរីមិនអាចទាក់ទងលោក ជូង ជូងី មេធាវីការពារក្ដីឱ្យលោក នី ណាក់ បានទេ នៅល្ងាចថ្ងៃទី១ ខែកក្កដា។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ដែលតាមដានរឿងនេះ ប្រាប់វិទ្យុអាស៊ីសេរី នៅថ្ងៃទី១ ខែកក្កដាថា តុលាការមិនអនុញ្ញាតឱ្យលោក នី ណាក់ នៅក្រៅឃុំដោយតុលាការសំអាងថា បើលោក នី ណាក់ មានបញ្ហាសុខភាពខាងពន្ធនាគារ គឺមានគ្រូពេទ្យប្រចាំការ ហើយបើជំងឺលោក នី ណាក់ មានសភាពធ្ងន់ធ្ងរ ពេទ្យពន្ធនាគារនឹងបញ្ជូនលោកទៅព្យាបាលនៅពេទ្យរដ្ឋធំៗ។
ជាងនេះទៀត តុលាការថា លោក នី ណាក់ បានប្រព្រឹត្តបទល្មើសមជ្ឈិម ជាលើកទី២ ដោយមិនរាងចាល ហើយការរក្សាលោក នី ណាក់ ឱ្យនៅក្នុងឃុំ គឺដើម្បីធានាដល់ដំណើរការនីតិវិធីរបស់តុលាការ។
ទោះជាយ៉ាងណា លោក អំ សំអាត សោកស្ដាយការសម្រេចបដិសេធបណ្ដឹងសុំនៅក្រៅឃុំរបស់លោក នី ណាក់ នៅពេលនេះ។
កាលពីថ្ងៃទី៥ ខែមករា ចៅក្រមស៊ើបសួរសាលាដំបូងរាជធានីភ្នំពេញ លោក ញឹម ពិសាល បានឃុំខ្លួនអ្នកជំនាញកសិកម្ម និងជាអ្នកអត្ថាធិប្បាយបញ្ហាសង្គម លោក នី ណាក់ ពីបទ «បរិហារកេរ្តិ៍ជាសាធារណៈ និងញុះញង់ឱ្យមានការរើសអើង ក្រោម បណ្ដឹងរបស់លោក ហេង សួរ ដែលជារដ្ឋមន្ត្រីក្រសួងការងារ ពាក់ព័ន្ធនឹងការបញ្ចេញមតិរឿងកាត់ដី ៩១ហិកតា នៅខេត្តកំពតឱ្យទៅបុគ្គលឈ្មោះ ហេង សួរ។
លោក នី ណាក់ ធ្លាប់ត្រូវបានតុលាការក្រុងភ្នំពេញកាត់ឱ្យជាប់ពន្ធនាគារ ១៨ខែ ម្ដងរួចមកហើយ អំពីបទ «ញុះញង់ឱ្យមានការរើសអើង និងការប្រមាថជា សាធារណៈ» ទាក់ទងនឹងរឿងទិញម៉ាស់ពាក់ឱ្យមាន់ ដើម្បីការពារការឆ្លងជំងឺកូវីដ-១៩។
នៅមុនពេលជាប់ពន្ធនាគារជាលើកទី២ នេះ លោក នី ណាក់ កាលពីថ្ងៃទី១២ ខែកញ្ញា ឆ្នាំ២០២៣ ក៏ត្រូវបានក្រុមជនមិនស្គាល់មុខ ប្រដាប់ដោយដំបងដែក ព្រួតគ្នាវាយទាំងកណ្ដាលថ្ងៃ ក្នុងទីក្រុងភ្នំពេញ បណ្ដាលឱ្យបែកក្បាលហូរឈាម ស្រោចខ្លួនសន្លប់ស្ដូកស្ដឹងនៅនឹងកន្លែង។ ប៉ុន្តែមកដល់ពេលបច្ចុប្បន្ន សមត្ថកិច្ចក្រោមការដឹកនាំរបស់លោក ហ៊ុន ម៉ាណែត មិនទាន់ចាប់ខ្លួនជនល្មើសមកអនុវត្តទោសតាមច្បាប់នៅឡើយ៕
No comments:
Post a Comment