2024.07.14
អតីតប្រធានាធិបតី និងជាបេក្ខជនប្រធានាធិបតីមកពីបក្សសាធារណរដ្ឋ ដែលជាគូប្រជែងរបស់លោក ចូ បៃឌិន (Jeo Biden) សម្រាប់ការបោះឆ្នោតប្រធានាធិបតីនៅក្នុងខែវិច្ឆិកា ខាងមុខនេះ គឺលោក ដូណាល់ ត្រាំ (Donald Trump) បានរួចជីវិតពីការបាញ់ប្រហារនៅព្រឹកថ្ងៃទី១៤ កក្កដា (ពេលវេលានៅប្រទេសកម្ពុជា) ពេលលោកកំពុងថ្លែងទៅកាន់អ្នកគាំទ្រក្នុងទីក្រុង បុតឡើ (Butler) រដ្ឋ ផេនស៊ីលវែនញ៉ា (Pennsylvania) សហរដ្ឋអាមេរិក។
បើតាមវីដេអូបង្ហោះនៅលើបណ្តាញសង្គម និងតាមសារព័ត៌មាននានា ក្នុងពេលលោក ដូណាល់ ត្រាំ កំពុងថ្លែងទៅកាន់អ្នកគាំទ្រជាច្រើនរយនាក់ ស្រាប់តែគេឮស្នូរកំាភ្លើងលាន់ឡើង ពេលនោះលោក ដូណាល់ ត្រាំ បានយកដៃស្តាំរបស់លោកទៅខ្ទប់ស្លឹកត្រចៀកខាងស្តាំ រួចឱនចុះក្រោមក្នុងបំណងដើម្បីគេចពីគ្រាប់កំាភ្លើង មុនកងអង្គរក្ស និងកងការពារប្រដាប់ដោយអាវុធរត់ឡើងលើវេទិកាឡោមព័ទ្ធការពារសុវត្ថិភាព។
មួយសន្ទុះក្រោយមក គេឃើញលោក ដូណាល់ ត្រាំ បានងើបឡើងវិញដោយមានឈាមប្រលាក់ត្រចៀកខាងស្តាំហាក់គ្មានភាពតក់ស្លុត និងបានលើកដៃបក់ទៅកាន់អ្នកគាំទ្រ មុនលោកត្រូវបានបញ្ជូនចុះពីលើវេទិកាដោយក្រុមកងការពារ។
លោក ដូណាល់ ត្រាំ បានសរសេរនៅបណ្តាញសង្គមរបស់លោកនៅក្រោយការបាញ់ប្រហារថា លោកដឹងថា លោកត្រូវបានគេបាញ់ប្រហារ ក្រោយគ្រាប់កាំភ្លើងមួយគ្រាប់ហោះចំស្លឹកត្រចៀកខាងស្តាំរបស់លោក។ ទោះជាយ៉ាងណា លោកគ្មានគ្រោះថ្នាក់ដល់ជីវិតឡើយ។ ទោះជាយ៉ាងណា ករណីបាញ់ប្រហារនេះ បានបណ្តាលឱ្យមនុស្សម្នាក់បាត់បង់ជីវិត និងពីរនាក់ផ្សេងទៀត រងរបួសធ្ងន់។ ចំណែកខ្មាន់កាំភ្លើងត្រូវបានសមត្ថកិច្ចបាញ់ស្លាប់នៅនឹងកន្លែង។
គេនៅមិនទាន់ដឹងពីមូលហេតុនៅពីក្រោយការបាញ់ប្រហារនេះនៅឡើយទេ ខណៈសមត្ថកិច្ចអាមេរិកកំពុងតែស៊ើបអង្កេតករណីនេះ៕
No comments:
Post a Comment