2024.07.22
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បំពេញទស្សនកិច្ចនៅកម្ពុជា រយៈពេលពេញមួយសប្ដាហ៍នេះ គឺចាប់ពីថ្ងៃទី២១ ដល់២៧ កក្កដា។ ក្រុមអង្គការសិទ្ធិមនុស្សនៅកម្ពុជាអះអាងថា នឹងដាក់របាយការណ៍មួយចំនួនជូនអ្នករាយការណ៍ពិសេស របស់អង្គការសហប្រជាជាតិ ដើម្បីពិនិត្យ និងលើកឡើងជាមួយភាគីរដ្ឋាភិបាល។
ក្នុងដំណើរស្សនកិច្ចនៅប្រទេសកម្ពុជា រយៈពេល ៧ថ្ងៃ ចាប់ពីថ្ងៃទី២១ ដល់ថ្ងៃទី២៧ ខែកក្កដា អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោក វិទិត ម៉ុនតាបន (Vitit Muntarbhorn) ក្រៅពីបំពេញបេសកកម្មការងារនៅក្នុងរាជធានីភ្នំពេញ និងខេត្តកណ្តាល លោកក៏នឹងធ្វើដំណើរទៅបំពេញការងារនៅតាមខេត្តឆ្ងាយៗ ដូចជា ខេត្តរតនគិរីផងដែរ។
សេចក្ដីប្រកាសព័ត៌មានរបស់អង្គការសហប្រជាជាតិចុះថ្ងៃទី១៩ ខែកក្កដា ឱ្យដឹងថា នៅរាជធានីភ្នំពេញ អ្នករាយការណ៍ពិសេសរបស់អង្គការសហប្រជាជាតិ នឹងជួបមន្ត្រីតំណាងរដ្ឋាភិបាល អ្នកការពារសិទ្ធិមនុស្ស អង្គការសង្គមស៊ីវិល តំណាងប្រព័ន្ធផ្សព្វផ្សាយ និងអ្នកសារព័ត៌មាន សមាជិកសហគមន៍ អ្នកការទូត ទីភ្នាក់ងារអង្គការសហប្រជាជាតិ និងអ្នកពាក់ព័ន្ធសំខាន់ៗ ផ្សេងទៀត ក្រោយពេលលោកវិលត្រឡប់មកពីបំពេញបេសកកម្មនៅខេត្តកណ្តាល និងខេត្តរតនគិរី ដើម្បីប្រមូលព័ត៌មានពាក់ព័ន្ធនឹងការរំលោភសិទ្ធិមនុស្សនៅក្នុងខេត្តទាំងពីរនេះ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ប្រាប់វិទ្យុអាស៊ីសេរីនៅថ្ងៃទី២១ ខែកក្កដា ថា អង្គការសង្គមស៊ីវិលនឹងលើកយកបញ្ហាខុសៗ គ្នាខ្លះ ទៅតាមគោលការណ៍ និងការមើលឃើញរបស់អង្គការសង្គមស៊ីវិលនីមួយៗ ដើម្បីរាយការណ៍ជូនតំណាងពិសេសរបស់អង្គការសហប្រជាជាតិ។
យ៉ាងណា លោកយល់ថា ការលើកឡើងទាំងនោះ មិនឆ្ងាយពីរឿងសេរីភាពជាមូលដ្ឋាន បញ្ហាលំហសេរីភាពបញ្ចេញមតិ លំហសេរីភាពសារព័ត៌មាន បញ្ហាលំហសេរីភាពនយោបាយ សេរីភាពជួបជុំ ការប្រមូលផ្ដុំដោយសន្តិវិធី និងបញ្ហាដីធ្លី ជាដើម ដូចកាលពីពេលកន្លងមកដែរ។
លោក អំ សំអាត ថា ជំនួបជាមួយភាគីពាក់ព័ន្ធរបស់អ្នករាយការណ៍ពិសេស របស់អង្គការសហប្រជាជាតិទទួលបន្ទុកសិទ្ធិមនុស្ស គឺចង់បញ្ជាក់អំពីស្ថានភាព និងដំណើរការវិវត្តន៍អំពីបញ្ហាសិទ្ធិមនុស្ស ពីព្រោះបញ្ហាសិទ្ធិមនុស្សនៅកម្ពុជានៅមានភាពចម្រូងចម្រាស់ និងរងការរិះគន់ច្រើននៅឡើយ។
លោក អំ សំអាតថា៖ «ចុងក្រោយនេះ ចំពោះការចាប់ខ្លួនសកម្មជនបរិស្ថាន ការចាប់ខ្លួនសកម្មជនសិទ្ធិមនុស្ស សហជីពនិងសកម្មជននយោបាយអីផ្សេងៗ តែងតែមានការលើកឡើងនូវការខ្វែងគំនិតគ្នា រវាងតំណាងរាជរដ្ឋាភិបាល ជាមួយក្រុមប្រឹក្សាសិទ្ធិមនុស្សអង្គការសហប្រជាជាតិ ដោយគេលើកឡើងថា ការចាប់ខ្លួនវាអាចប៉ះពាល់ទៅដល់សេរីភាពជាមូលដ្ឋាន សេរីភាពក្នុងការបញ្ចេញមតិ លំហសេរីភាពសមាគម អង្គការមិនមែនរដ្ឋាភិបាលជាដើម»។
រីឯប្រធានអង្គការសង់ត្រាល់ (CENTRAL) លោក មឿន តុលា ប្រាប់វិទ្យុអាស៊ីសេរី ថ្ងៃទី២១ ខែកក្កដា ថា ប្រសិនបើមានឱកាសជួបតំណាងពិសេសរបស់អង្គការសហប្រជាជាតិ អង្គការសង់ត្រាល់នឹងលើករឿងរ៉ាវ ដែលកើតឡើងទាក់ទងនឹងអង្គការសង់ត្រាល់ផ្ទាល់ និងអង្គការសង្គមស៊ីវិលផ្សេងៗទៀត ជាពិសេស ការបំពេញតួនាទីរបស់សង្គមស៊ីវិល។
លោកថា មួយរយៈនេះ ការបំពេញតួនាទីរបស់អង្គការសង្គមស៊ីវិលទទួលរងការរំខាន និងយាយីរំខាន ជាឧទាហរណ៍ ករណីអង្គការសង់ត្រាល់ និងការចាប់ខ្លួនអ្នកដឹកនាំមូលដ្ឋានរបស់សមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធនៅខេត្ត ស្វាយរៀង ដែលគ្រាន់តែចុះផ្សព្វផ្សាយអត្ថប្រយោជន៍កិច្ចគាំពារសង្គម ប.ស.ស ដល់ប្រជាពលរដ្ឋ។
លោក មឿន តុលា ជឿថា អ្នករាយការណ៍ពិសេសនឹងលើកកង្វល់ទាំងឡាយ របស់អង្គការសង្គលស៊ីវិលទៅជជែកជាមួយរដ្ឋាភិបាលកម្ពុជា។ លោកបារម្ភថា ប្រសិនកម្ពុជាមានឈ្មោះមិនល្អនៅលើឆាកអន្តរជាតិ នោះនឹងធ្វើឱ្យអ្នកវិនិយោគបរទេស ដែលចង់មករកស៊ីនៅកម្ពុជាខ្លាចរអា។
លោក មឿន តុលា៖ «កម្ពុជាយើងនៅជំពាក់អនុសាសន៍របស់អង្គការសហប្រជាជាតិច្រើន។ ប៉ុនយ៉ាងណាក៏ដោយ ប្រសិនបើជាកម្ពុជានៅតែគេចវេះមិនព្រមទទួលយកនូវសំណើ ឬក៏នូវអនុសាសន៍មួយចំនួនរបស់អង្គការសហប្រជាជាតិ។ យើងហាក់ដូចជាកណ្ដោចកណ្ដែងម្នាក់ឯង ពីព្រោះចង់ ឬមិនចង់យើងជាសមាជិករបស់អង្គការសហប្រជាជាតិ ហើយយើងក៏មានកាតព្វកិច្ចមួយ ដែលទទួលយកនូវបទដ្ឋានគតិយុត្តិអន្តរជាតិ ជាពិសេស គឺរឿងសិទ្ធិមនុស្សជាមូលដ្ឋាន យកមកអនុវត្តដែរ។ ប្រសិនជាយើងធ្វើមិនដឹងមិនឮ វាទៅជារឿងមួយក្នុងរូបភាពអាក្រក់សម្រាប់កម្ពុជានៅលើឆាកអន្តរជាតិ»។
ចំពោះប្រធានសមាគមការពារសិទ្ធិមនុស្សអាដហុក (ADHOC) លោក នី សុខា ប្រាប់វិទ្យុអាស៊ីសេរីនៅថ្ងៃទី២១ ខែកក្កដា ថា សមាគមអាដហុក នឹងត្រៀមព័ត៌មានមួយចំនួន ទាក់ទងនឹងស្ថានភាពសិទ្ធិមនុស្សនៅកម្ពុជា រាយការណ៍ជូនអ្នករាយការណ៍ពិសេសរបស់អង្គការសហប្រជាជាតិ ដើម្បីរួមចំណែកឱ្យលោកធ្វើការឆ្លុះបញ្ចាំង និងប្រៀបធៀបឱ្យបានគ្រប់ជ្រុងជ្រោយ ក្នុងការវាយតម្លៃ ដែលនេះជាផ្នែកមួយក្នុងការជួយលើកកម្ពស់បញ្ហាសិទ្ធិមនុស្ស។
លោកថា នឹងប្រមូលរបាយការណ៍ ហើយផ្ដល់អនុសាសន៍សំខាន់ៗ អំពីចំណុចខ្វះខាត ដែលរដ្ឋាភិបាលកម្ពុជា មិនទាន់អនុវត្តឱ្យបានគ្រប់ជ្រុងជ្រោយ។
លោក នី សុខា កត់សម្គាល់ថា បញ្ហាសិទ្ធិមនុស្សអាចដោះស្រាយបានកម្រិតណានោះ គឺអាស្រ័យលើការតាំងចិត្តរបស់រដ្ឋាភិបាលកម្ពុជាក្នុងការទទួលយកឬមិនទទួលយករបាយការណ៍ និងអនុសាសន៍របស់អង្គការសហប្រជាជាតិ។
លោក នី សុខា៖ «សង្គមស៊ីវិលទទូចគឺចង់ឃើញរដ្ឋាភិបាលទេ ពីព្រោះរដ្ឋាភិបាលយើង គឺជាប្រទេសដែលមានកាតព្វកិច្ចព្រោះជាប្រទេសហត្ថលេខីនៃកតិកាសញ្ញាសិទ្ធិមនុស្សទាំងអស់់ហ្នឹង។ អ៊ីចឹង រដ្ឋាភិបាលគឺជាតួអង្គមួយ ដែលមានកាតព្វកិច្ចក្នុងការស្ដារ និងលើកកម្ពស់សិទ្ធិមនុស្សនៅក្នុងប្រទេសយើងហ្នឹង គឺតួនាទីរដ្ឋាភិបាល គឺសំខាន់។ អ៊ីចឹង យើងចង់ពីរដ្ឋាភិបាលទៅវិញទេ ក្នុងការតាំងចិត្តឱ្យបានមុតមាំចំពោះបញ្ហាហ្នឹង ហើយបើសិនមិនអ៊ីចឹងទេ ស្ថានភាពសិទ្ធិមនុស្សនៅតែបន្តអូសបន្លាយ គេហៅថា មានការមិនល្អប្រសើរចេះតែអូសបន្លាយពាក្យមិនល្អប្រសើរបន្តទៅមុខទៀតទៅ វាធ្វើឱ្យប៉ះពាល់ដល់តម្លៃកិត្តិយសដល់មុខរដ្ឋាភិបាលនៅលើឆាកអន្តរជាតិដូចយើងឃើញជារឿយៗ កន្លងមក»។
វិទ្យុអាស៊ីសេរីមិនអាចសុំការអត្ថាធិប្បាយជុំវិញរឿងនេះពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានទេ នៅថ្ងៃទី២១ ខែកក្កដា ដោយទូរសព្ទចូលតែគ្មានអ្នកទទួល។
លោក វិទិត ម៉ុនតាបន ត្រូវបានតែងតាំងជាអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា កាលពីខែមីនា ឆ្នាំ២០២១ ហើយនេះជាលើកទី៣ ហើយ ដែលលោកមកបំពេញបេសកកម្មស្វែងរកការពិត អំពីស្ថានភាពសិទ្ធិមនុស្សនៅកម្ពុជា។ នៅចុងបញ្ចប់នៃដំណើរទស្សនកិច្ចលើកទី៣ នេះ លោកនឹងធ្វើសន្និសីទសារព័ត៌មាន នៅថ្ងៃទី២៦ ខែកក្កដា។
ទោះជាយ៉ាងណា លោក វិទិត ម៉ុនតាបន (Vitit Muntarbhorn) ធ្លាប់រាយការណ៍ទៅអង្គការសហប្រជាជាតិថា កម្ពុជាកំពុងតែដើរថយក្រោយ ដោយងាកចេញពីការគោរពសិទ្ធិមនុស្ស និងគន្លងប្រជាធិបតេយ្យ។ លោកក៏ធ្លាប់បានអំពាវនាវឱ្យរដ្ឋាភិបាលកម្ពុជា បញ្ឈប់ការបង្កើតច្បាប់នានា ព្រមទាំងលុបបំបាត់ការប្រើ អំណាច ដែលបំពានរដ្ឋធម្មនុញ្ញនិងច្បាប់សិទ្ធិមនុស្សអន្តរជាតិ ហើយងាកមករក កិច្ចពិភាក្សាជាមួយអង្គការសង្គមស៊ីវិល ដើម្បីកែសម្រួលឱ្យស្ថានភាពសិទ្ធិមនុស្ស នៅកម្ពុជាឱ្យប្រសើរឡើង៕
No comments:
Post a Comment