ដោយ សេក បណ្ឌិត
2024.08.25
សហគមន៍ខ្មែរនៅទីក្រុងឡុងប៊ិច (Long Beach) រដ្ឋកាលីហ្វ័រញ៉ា (California ) សហរដ្ឋអាមេរិក ធ្វើបាតុកម្មប្រឆាំងគម្រោង CLV នៅថ្ងៃសៅរិ៍ ទី២៤ ខែសីហា ឆ្នាំ២០២៤។
រូប៖ ពលរដ្ឋផ្ដល់ឱ្យ
សហគមន៍ខ្មែរនៅទីក្រុងឡុងប៊ិច (Long Beach) រដ្ឋកាលីហ្វ័រញ៉ា (California ) សហរដ្ឋអាមេរិក ធ្វើបាតុកម្មកាលពីថ្ងៃសៅរិ៍ ទី២៤ សីហា វេលាម៉ោង១ ដល់ម៉ោង៤រសៀល ដើម្បីឲ្យរដ្ឋាភិបាលឪនិងកូន គឺលោក ហ៊ុន សែន និង លោក ហ៊ុន ម៉ាណែត ដកខ្លួនចេញពីគម្រោងអភិវឌ្ឍន៍រួមគ្នាជាមួយឡាវ និងវៀតណាម (CLV)។
បាតុកម្មនេះ ក្រៅពីសហគមន៍ខ្មែររស់នៅរដ្ឋកាលីហ្វ័រញ៉ា ក៏មានពលរដ្ឋខ្មែរមកពីបណ្ដារដ្ឋមួយចំនួនក្នុងសហរដ្ឋអាមេរិកចូលរួមផងដែរ ដើម្បីសម្ដែងមតិរួមគ្នា និងជាសារមួយជូនទៅ លោក ហ៊ុន សែន និង លោក ហ៊ុន ម៉ាណែត ឲ្យបញ្ឈប់ជាបន្ទាន់នូវគម្រោង CLVនេះ។ ក្រុមអ្នកតវ៉ាបារម្ភថា គម្រោងនេះនឹងអាចធ្វើឱ្យកម្ពុជាបាត់បង់ទឹកដីទៅខាងប្រទេសវៀតណាម ហើយពួកគេទាមទារឱ្យរដ្ឋាភិបាលត្រកូលហ៊ុន ដកកម្ពុជាចេញពីគម្រោងមួយនេះ ដើម្បីការពារអធិបតេយ្យជាតិ និងបូរណភាពទឹកដីខ្មែរ។
ពួកគាត់យល់ឃើញថា បើគម្រោងនេះនៅតែបន្តនោះកម្ពុជានឹងបាត់ខេត្តចំនួន៤ទៀតនៅភូមិភាគឦសានដូចប្រវត្តិសាសាស្រ្តខ្មែរ បានបាត់បង់ទឹកដីកម្ពុជាក្រោមយ៉ាងដូច្នេះដែរ។ អ្នកចូលរួម និងជួយរៀបចំបាតុកម្មមួយរូប គឺ អ្នកស្រី វ៉ាន់ ចាន់ដាវី បានឲ្យដឹងថា បាតុកម្មនេះ មិនពាក់ព័ន្ធនឹងគណបក្សនយោបាយនោះទេ ទោះបីអ្នកស្រីជាមនុស្សគាំទ្របក្សប្រឆាំងក្តី។ អ្នកស្រីថា បាតុកម្មនេះកើតចេញពីក្តីបារម្ភរបស់ពលរដ្ឋសាមញ្ញដែលឈឺចាប់ចំពោះការបាត់បង់ទឹកដីទៅប្រទេសជិតខាង។
អ្នកស្រី វ៉ាន់ ចាន់ដាវី៖ «ពីព្រោះអ្នកខ្លះគាត់អត់មានគណបក្ស មិនមែនជាសកម្មជនបក្ស ក៏គាត់ចូលរួមដែរ ពីព្រោះគាត់មានការឈឺចាប់ គាត់ឈឺឆ្អាលដែរក្នុងនាមជាខ្មែរ គាត់មិនពេញចិត្តទេដែល ហ៊ុន សែន យកដី សម្បត្តិរបស់ខ្មែរ ទៅដាក់ឲ្យយួនធ្វើអាណានិគមរកស៊ីពីលើប្រទេសខ្មែរ»។
ចំណែកពលរដ្ឋខ្មែរអាមេរិកកាំងមួយរូប មានដើមកំណើតខ្មែរកម្ពុជាក្រោម លោក ថាច់ ហុង បានឲ្យដឹងថា រូបលោក និងក្រុមគ្រួសារ ដែលមកចូលរួមបាតុកម្មនេះដែរ គឺដោយសារមិនចង់ឲ្យកម្ពុជាដើរជាន់ប្រវត្តិសាស្ត្រច្រំដែល ព្រោះវាបានធ្វើឲ្យកម្ពុជាបាត់បង់ទឹកដីអធិបតេយ្យជាតិ បាត់បង់សិទ្ធិជាម្ចាស់ស្រុក ខ្មែររស់វេទនា ឈឺចាប់គ្រប់យ៉ាង ដូចប្រវត្តិបាត់ដីខ្មែរកម្ពុជាក្រោមទៅខាងវៀតណាម ហើយលោកខ្លួនឯងផ្ទាល់ ធ្លាប់ស្គាល់រសជាតិហើយ អំពីការរស់នៅលើទឹកដីកំណើតខ្លួនឯង តែស្ថិតក្រោមការគ្រប់គ្រងរបស់បរទេស គឺគ្មានសិទ្ធិអ្វីទាំងអស់ គេធ្វើបាប ជិះជាន់ គាបសង្កត់គ្រប់បែបយ៉ាង។
លោក ថាច់ ហុង៖ «ខ្ញុំជាមួយបងប្អូនមួយចំនួនទៅចូលរួមដែរព្រោះអីរឿងនេះជារឿងសំខាន់របស់ជាតិយើងទាំងអស់គ្នា ហើយយើងបាននាំគ្នាធ្វើនំ ធ្វើម្ហូបខ្មែរទៅចែកជូនក្រុមបាតុករដែលមកពីចម្ងាយផងដែរ»។
លោកបញ្ជាក់ទៀតថា ការចូលរួមបាតុកម្មនេះ ពួកលោកមិនមានតួនាទីអ្វីជាមួយបក្សនយោបាយនោះទេ គឺធ្វើដោយសន្តានចិត្ត ផុសចេញពីបេះដូងនិងមានឈាមជ័រជាខ្មែរ។
លោក ថាច់ ហុង៖ «ដោយសាររឿងនេះ ជាបាតុកម្មមិនគាំទ្រគម្រោង CLV ជាគម្រោងមួយដែលយើងមើលឃើញថា រដ្ឋាភិបាលធ្វើនេះ វាមិនមានចំណេញអីដល់ខ្មែរសោះ មានតែបើកឱកាសឲ្យយួននាំមនុស្សចូលដោយស្របច្បាប់»។
ពលរដ្ឋខ្មែរនៅក្រៅប្រទេស នៅតែប្ដេជ្ញាចិត្ត ធ្វើបាតុកម្មប្រឆាំងនឹងគម្រោងត្រីកោណអភិវឌ្ឍន៍ CLV ជាបន្តបន្ទាប់ទៀត ដរាបណារដ្ឋាភិបាលលោក ហ៊ុន ម៉ាណែត មិនស្ដាប់តាមការទាមទាររបស់ពលរដ្ឋឲ្យដកគម្រោងនេះ ចេញពីឡាវ និងវៀតណាមទេនោះ។
បន្ទាប់ពីក្រុមយុវជន និងពលរដ្ឋខ្មែរនៅប្រទេសជប៉ុន ((Japan) អូស្ត្រាលី(Australia) កាណាដា (Canada) និងនៅក្រុងឡូវែល (Lowell) រដ្ឋម៉ាសាឈូសេត (Massachusetts) ធ្វើបាតុកម្មថ្មីៗនេះ ពលរដ្ឋខ្មែរនៅកាណាដា និងសហរដ្ឋអាមេរិក នឹងធ្វើបាតុកម្មនៅទីតាំងផ្សេងៗគ្នាបន្ថែមទៀត ដូចជានៅរដ្ឋវ៉ាស៊ីនតុន (Washington) នៅថ្ងៃទី៣១ សីហា និងនៅទីក្រុងស្ដុកតុន (Stockton) រដ្ឋកាលីហ្វ័រញ៉ា នៅថ្ងៃទី៧ខែកញ្ញាខាងមុខ៕
No comments:
Post a Comment