ដោយ សេក បណ្ឌិត
2024.10.08
(រូបឯកសារ) លោក ហ៊ុន សែន ថ្លែងសន្ទរកថាក្នុងពិធីជួបសំណេះសំណាលជាមួយអាចារ្យ និងអាចារិនី កាលពីថ្ងៃទី៨ ខែមេសា ឆ្នាំ២០២៣។
រូប៖ ហ្វេសប៊ុកលោក ហ៊ុន សែន
ប្រធានព្រឹទ្ធសភាលោក ហ៊ុន សែន ចោទទីប្រឹក្សារបស់ខ្លួន គឺលោក លី សាម៉េត ថា បានយកឈ្មោះលោកទៅបោកប្រាស់ពលរដ្ឋ និងមន្ត្រីមួយចំនួនឱ្យលុយទៅកាន់លោក ហ៊ុន សែន ដើម្បីទទួលបានតួនាទី ឬផលប្រយោជន៍។ អ្នកវិភាគថាករណីចោទប្រកាន់ពាក់ព័ន្ធអំពើពុករលួយរាប់លានដុល្លារនេះ សមត្ថកិច្ចត្រូវពន្លឿនការស៊ើបអង្កេតករណីនេះឱ្យមានតម្លាភាព និងអាចឱ្យពលរដ្ឋជឿជាក់បាន។
ប្រធានព្រឹទ្ធសភា លោក ហ៊ុន សែន បានបង្ហោះសារនៅលើទំព័រហ្វេសប៊ុកលោក កាលពីថ្ងៃទី៧ ខែតុលាថា ទីប្រឹក្សារបស់លោក គឺលោក លី សាម៉េត ហៅគ្រូមា បានប្រើប្រាស់ឈ្មោះលោក ដើម្បីយកលុយពីពលរដ្ឋ និងមន្ត្រីមួយចំនួនជាថ្នូរនឹងមុខតំណែង ឬផលប្រយោជន៍។
លោក ហ៊ុន សែន ថា លោក លី សាម៉េត បានបោកប្រាស់បុគ្គលជាច្រើនរូប រួមមាន បុគ្គលឈ្មោះ សុខ ឡេង បុគ្គលឈ្មោះ មួង ឃីម និងអភិបាលស្រុកល្វាឯម លោក កន សុខកាយ ក្នុងទំហំទឹកប្រាក់រាប់សែន ទៅរាប់លានដុល្លារ។ ទោះជាយ៉ាងណាក្ដី លោក ហ៊ុន សែន ថា លោកមិនដែលបានទទួលលុយជាថ្នូរនឹងការតែងតាំងមន្ត្រី ក្នុងតួនាទីលោកជានាយករដ្ឋមន្ត្រី ឬប្រមុខរដ្ឋស្ដីទីនោះទេ។
បន្ថែមពីនេះ លោក ហ៊ុន សែន បានស្នើរដ្ឋមន្ត្រីក្រសួងយុត្តិធម៌ឱ្យសហការជាមួយតុលាការចេញដីកាបង្កកទ្រព្យសម្បត្តិ លោក លី សាម៉េត ដើម្បីទុកសងដល់អ្នកចាញ់បោក លោក លី សាម៉េត។ លោក ហ៊ុន សែន ថា អ្នកចាញ់បោកលោក លី សាម៉េត ទាំងអស់អាចដាក់ពាក្យបណ្ដឹង ឬទាមទារសំណងទៅកាន់ក្រុមមេធាវីលោក ហ៊ុន សែន ហើយសមត្ថកិច្ចត្រូវឃ្លាំមើលមិនឱ្យលោក លី សាម៉េត នៅក្រៅសំណាញ់ច្បាប់។
មួយថ្ងៃក្រោយមក នាយករដ្ឋមន្ត្រី លោក ហ៊ុន ម៉ាណែត បានដកដំណែងអភិបាលស្រុកល្វាឯម លោក កន សុខកាយ ដែលអភិបាលស្រុករូបនេះ ត្រូវបានលោក ហ៊ុន សែន ថ្លែងថា បានផ្ដល់ប្រាក់ចំនួន ៣០ម៉ឺនដុល្លារទៅឱ្យលោក លី សាម៉េត ដើម្បីរត់ការធ្វើជាអភិបាលក្រុងអរិយក្សត្រ។ ទោះជាយ៉ាងណា ក្ដី លោក ហ៊ុន ម៉ាណែត អះអាងថា លោក កន សុខកាយ ត្រូវបានដកពីតំណែងដោយសារមន្ត្រីរូបនេះ បានប្រព្រឹត្តកំហុសក្រមសីលធម៌ និងវិជ្ជាជីវៈធ្ងន់ធ្ងរ ផ្ទុយនឹងច្បាប់ស្ដីពីសហលក្ខន្តិកៈមន្ត្រីរាជការស៊ីវិល។
វិទ្យុអាស៊ីសេរីមិនអាចទាក់ទងលោក លី សាម៉េត ដើម្បីសុំការអត្ថាធិប្បាយជុំវិញរឿងនេះបានទេ នៅថ្ងៃទី៨ ខែតុលា។
ចំណែកអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា ឱ្យដឹងថា សមត្ថកិច្ចបានចុះទៅដល់ផ្ទះលោក លោក លី សាម៉េត នៅព្រឹកថ្ងៃទី៨ តុលានេះ ប៉ុន្តែ លោក លី សាម៉េត មិនបាននៅផ្ទះនោះដែរ។ លោកថា សមត្ថកិច្ច ក៏មិនទាន់កំណត់បទចោទទៅលើលោក លី សាម៉េត ដែរ ប៉ុន្តែ លោកថា សាលាដំបូងរាជធានីភ្នំពេញកំពុងធ្វើការលើករណីនេះ។
លោក សំ វិច្ឆិកា៖ «កាលពីព្រឹកមិញកម្លាំងសមត្ថកិច្ចដឹកនាំដោយកម្លាំងអយ្យការអមសាលាដំបូងរាជធានីភ្នំពេញបានចុះត្រួតពិនិត្យច្រកចូលផ្ទះគាត់ នៅខណ្ឌឫស្សីកែវ ប៉ុន្តែការត្រួតពិនិត្យនោះគាត់មិនបាននៅក្នុងគេហដ្ឋាននោះទេ ហើយឥឡូវសមត្ថកិច្ចបន្តស្រាវជ្រាវស្វែងរកតាមជំនាញតាមសមត្ថកិច្ចបន្ថែមទៀត»។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ថា ការលើកឡើងរបស់ប្រធានព្រឹទ្ធសភាបង្ហាញឱ្យឃើញថា លោក លី សាម៉េត បានប្រព្រឹត្តអំពើពុករលួយក្នុងទ្រង់ទ្រាយធំ និងជារឿងដែលគួរឱ្យព្រួយបារម្ភ។ លោកថា ដើម្បីកុំឱ្យមានករណីបោកប្រាស់ និងប្រព្រឹត្តអំពើពុករលួយកើតឡើងដដែលៗ បន្តទៀត អង្គភាពប្រឆាំងអំពើពុករលួយ និងសមត្ថកិច្ចពាក់ព័ន្ធពន្លឿនការស៊ើបអង្កេតករណីនេះឱ្យបានឆាប់រហ័ស និងអាចឱ្យសាធារណជនជឿជាក់បាន។
លោក សេក សុជាតិ៖ «ក្រសួង ស្ថាប័ន ជាពិសេស អង្គភាពប្រឆាំងអំពើពុករលួយ គួរតែបន្តនីតិវិធីរកឱ្យថា តើលោក លី សាម៉េត ដែលជាទីព្រឹក្សាហ្នឹង ពិតជាមានពាក់ព័ន្ធនឹងការរំលោភបំពានទៅលើប្រព័ន្ធច្បាប់របស់កម្ពុជាដែរ ឬអត់ ហើយបើមានពាក់ព័ន្ធនឹងអំពើពុករលួយគួរចាត់វិធានការយ៉ាងម៉េច ដើម្បីឱ្យសាធារណជនជាតិ និងអន្តរជាតិមើលឃើញថា ការអនុវត្តច្បាប់នៅកម្ពុជាមានស្តង់ដារតែមួយមិនមានស្តង់ដារពីរ»។
ប្រធានគណបក្សប្រជាជនកម្ពុជា លោក ហ៊ុន សែន កាលពីថ្ងៃទី២២ ខែកុម្ភៈ ឆ្នាំ២០២២ បានតែងតាំង លោក លី សាម៉េត ជាទីប្រឹក្សាផ្ទាល់របស់លោក។ ជាមួយនឹងតួនាទីនេះ លោក លី សាម៉េត តែងបានចុះទៅតាមបណ្ដាខេត្តនានា ដើម្បីជួបជាមួយមន្ត្រីបក្សប្រឆាំង ដែលចុះចូលជាមួយគណបក្សកាន់អំណាច។ នៅក្នុងអង្កពិធីនានា លោក លី សាម៉េត ត្រូវបានគេរៀបឱ្យអង្គុយស្មើនឹងរដ្ឋមន្ត្រី ឬអភិបាលខេត្តផងដែរ៕
No comments:
Post a Comment