2024.10.10
សមាជិកសភាម៉ាឡេស៊ីកំពុងជំរុញឱ្យមានសវនាការពិសេស ដើម្បីកោះហៅមន្រ្តីពាក់ព័ន្ធទៅសាកសួរអំពីមូលហេតុនៃការចាប់បញ្ជូនពលករខ្មែរ និងជាអ្នករិះគន់រដ្ឋាភិបាលកម្ពុជាឈ្មោះ នួន តឿន ពីប្រទេសម៉ាឡេស៊ីទៅឱ្យរដ្ឋាភិបាលកម្ពុជាទាំងបង្ខំកាលពីពេលថ្មីៗ នេះ។ អង្គការសង្គមស៊ីវិលស្វាគមន៍ និងអំពាវនាវឱ្យស្ថាប័នមានសមត្ថកិច្ចរបស់ម៉ាឡេស៊ីផ្ដល់យុត្តិធម៌ដល់កញ្ញា នួន តឿន និងទប់ស្កាត់អំពើរំលោភសិទ្ធិមនុស្សពីសំណាក់មេដឹកនាំក្រុងភ្នំពេញ។
សមាជិកនៃគណបក្សយុត្តិធម៌ប្រជាជន (People’s Justice Party) របស់នាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម (Awar Ibrahim) គឺលោក វង់ ឈិន (Wong Chen) បានអំពាវនាវឱ្យសមាជិកសភាប្រទេសនេះរៀបចំសវនាការពិសេស ជុំវិញការនិរទេសពលករខ្មែរម្នាក់ទៅកម្ពុជាយ៉ាងប្រញាប់ប្រញាល់ ទាក់ទងបទចោទរឿងរិះគន់មេដឹកនាំក្រុងភ្នំពេញគឺលោក ហ៊ុន សែន នៅលើបណ្ដាញសង្គមកន្លងមក។
សមាជិកសភាតំបន់ស៊ូបាំង (Subang) លោក វង់ ឈិន ថា មន្ត្រីម៉ាឡេស៊ីទាំងអស់ដែលពាក់ព័ន្ធការចាប់បញ្ជូនកញ្ញា នួន តឿន ទៅកម្ពុជានោះ គួរតែត្រូវបានកោះហៅឱ្យពន្យល់ពីការសម្រេចចិត្តរបស់ពួកគេ។ នេះបើតាមសារព័ត៌មាន ហ្រ្វីម៉ាឡេស៊ី ធូដេ (Free Malaysia Today) ចុះផ្សាយនៅថ្ងៃទី១០ ខែតុលា។
លោក វង់ ឈិន និយាយថា លោកនឹងភ្ជាប់ទំនាក់ទំនងជាមួយសមាជិកសភាតំបន់សេឡាយាំង (Selayang) លោក វីឡាម ឡុង (William Leong) ប្រធានគណៈកម្មាធិការសភាស្ដីពីសិទ្ធិមនុស្ស ការបោះឆ្នោត និងកំណែទម្រង់ស្ថាប័ន (Human Rights, Elections, and Institutional Reforms) រួមជាមួយសមាជិកសភាតំបន់ ប៊ូគីត បេនដារ៉ា (Bukit Bendera) មួយរូបទៀត គឺអ្នកស្រី សឺលីណា អាប់ដុល រ៉ាស៊ីត (Syerleena Abdul Rashid) ប្រធានក្រុមតំណាងរាស្ត្រគ្រប់គណបក្សនយោបាយ (All-Party Parliamentary Group Malaysia) ស្ដីពីគោលនយោបាយជនភៀសខ្លួន ដើម្បីចាប់ផ្ដើមសវនាការជុំវិញរឿងនេះនៅខែវិច្ឆិកា ឬខែធ្នូខាងមុខ។
លោក វង់ ឈិន ដែលជាប្រធានគណៈកម្មាធិការទទួលបន្ទុក ទំនាក់ទំនងអន្តរជាតិនៃរដ្ឋសភាម៉ាឡេស៊ី បារម្ភចំពោះការនិរទេសកញ្ញា នួន តឿន យ៉ាងរហ័ស ដែលធ្វើឡើងត្រឹមតែរយៈពេលពីរថ្ងៃបន្ទាប់ពីការចាប់ខ្លួននាង។
លោក វង់ ឈិន៖ «នាងត្រូវបានចាប់ខ្លួននៅថ្ងៃសៅរ៍ ហើយត្រូវបាននិរទេសនៅថ្ងៃច័ន្ទ។ វាច្បាស់ណាស់ថា នាងមិនទទួលបានមេធាវីការពារសិទ្ធិទេ ករណីនេះដំណើរការមិនបានត្រឹមត្រូវ។ ការសម្រេចចិត្តនិរទេសនាងយ៉ាងប្រញាប់ប្រញាល់បានបង្ខូចការប្ដេជ្ញាចិត្តរបស់ម៉ាឡេស៊ីចំពោះសិទ្ធិមនុស្ស។ ហើយសវនាការសភានឹងអាចកែតម្រូវរឿងនេះបាន»។
ប្រភពដដែលឱ្យថា លោក វង់ ឈិន ក៏កំពុងពិចារណាដាក់របាយការណ៍ទៅគណៈកម្មាធិការសិទ្ធិមនុស្សម៉ាឡេស៊ី (Human Right Commission of Malaysia) ហើយនឹងជំរុញឱ្យរដ្ឋាភិបាលធ្វើវិសោធនកម្មនីតិវិធី សម្រាប់សំណើសុំនិរទេសបែបនេះផងដែរ។
ជុំវិញរឿងនេះ ប្រធានចលនាខ្មែរ ដើម្បីប្រជាធិបតេយ្យ អ្នកស្រី មូរ សុខហួរ ប្រាប់វិទ្យុអាស៊ីសេរីនៅថ្ងៃទី១០ ខែតុលាថា ការណ៍ដែលតំណាងរាស្ត្រម៉ាឡេស៊ីមកពីបក្សកាន់អំណាចគ្រោងហៅមន្ត្រីពាក់ព័ន្ធ ទៅសួរដេញដោលឱ្យទទួលខុសត្រូវចំពោះមុខសភា ទាក់ទងករណីរបស់កញ្ញា នួន តឿន ខាងមុខ គឺដើម្បីការពាររាស្ត្រ តម្លៃជាតិ គោលការណ៍សិទ្ធិមនុស្ស ប្រជាធិបតេយ្យ និងការចូលរួមរកយុត្តិធម៌សម្រាប់ជនរងគ្រោះ ដែលអ្នកស្រីថាសកម្មភាពទាំងនេះខុសពីសមាជិកសភានៅកម្ពុជាដែលតែងអសកម្មក្នុងការបំពេញតួនាទីក្នុងនាមជាតំណាងរាស្ត្រ។ អ្នកស្រីជឿថាកិច្ចអន្តរាគមន៍ពីសមាជិកសភាម៉ាឡេស៊ី គឺមានសារៈសំខាន់ និងជាសញ្ញាវិជ្ជមានមួយផ្នែកសម្រាប់កញ្ញា នួន តឿន ដែលកំពុងជាប់ឃុំនៅពន្ធនាគារដោយអយុត្តិធម៌។
អ្នកស្រី មូរ សុខហួរ៖ «ប៉ូលិសអន្តោប្រវេសន៍អត់សហការ ហ្នឹងហើយដែលលោក វង់ ឈិន មិនព្រម ហ្នឹងហើយដែលលោក វង់ ឈិន ទាមទារឱ្យមន្រ្តីពាក់ព័ន្ធឡើងទៅបំភ្លឺនៅគណៈកម្មាធិការសិទ្ធិមនុស្សនៅសភា នេះបង្ហាញថាការបែងចែកអំណាចនៅម៉ាឡេស៊ី ជាការបែងចែកអំណាចពិតប្រាកដ គឺនីតិប្រតិបត្តិ នីតិប្បញ្ញត្តិ ដែលនីតិប្រតិបត្តិត្រូវមកទទួលខុសត្រូវ ចំពោះមុខនីតិប្បញ្ញត្តិ គឺគណៈកម្មាធិការសិទ្ធិមនុស្សនៅក្នុងសភាយកតួនាទី អំណាចរបស់គេយកមកអនុវត្តដើម្បីឱ្យអ្នកពាក់ព័ន្ធទាំងឡាយនៅក្នុងកាន់អំណាចប្រតិបត្តិមកទទួលខុសត្រូវ មកឆ្លើយចំពោះមុខសភា»។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា និងអ្នកនាំពាក្យក្រសួងការបរទេសកម្ពុជាលោក ជុំ សុន្ទរី ដើម្បីបកស្រាយជុំវិញរឿងនេះបានទេ នៅថ្ងៃទី១០ ខែតុលា។កាលពីល្ងាចថ្ងៃទី៣០ ខែកញ្ញា សមត្ថកិច្ចម៉ាឡេស៊ីបានចាប់បញ្ជូនពលករខ្មែរ និងជាសមាជិកបណ្ដាញយុវជនកម្ពុជាសកល ប្រចាំម៉ាឡេស៊ី គឺកញ្ញា នួន តឿន ទៅកម្ពុជាតាមសំណើរបស់អាជ្ញាធរក្រុងភ្នំពេញ។ តុលាការបានចោទប្រកាន់កញ្ញា នួន តឿន ពីបទ «ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឱ្យមានការរើសអើង» និងបញ្ជូនទៅឃុំខ្លួននៅពន្ធនាគារម២ រាជធានីភ្នំពេញ កាលពីថ្ងៃទី១ ខែតុលា។
ក្រុមអង្គការសិទ្ធិមនុស្សថ្កោលទោស និងចាត់ទុកការចាប់បញ្ជូនកញ្ញា នួន តឿន ដោយបង្ខំថាជាទង្វើរំលោភច្បាប់អន្តរជាតិ និងបំពានសិទ្ធិមនុស្សយ៉ាងធ្ងន់ធ្ងរ ហើយទាមទារឱ្យរដ្ឋាភិបាលកម្ពុជា និងម៉ាឡេស៊ី ត្រូវបញ្ឈប់សកម្មភាពបែបនេះជាបន្ទាន់៕
1 comment:
The ROOT cause of the problem was that Hun Sen stole the power from Khmer people. People did not vote for him.
He is so worry and paranoid that Khmer people would revolt and bring him down, which prompt him to launch a preemptive strike by arbitrarily arresting and incarcerating any Khmers who dare to criticize him.
There was a Khmer saying: "Kor Kmao Dombao Knong, Kaek Heu Romlorng Romsay Kantuy".
For example: Hun Sen thought this young innocent girl's comment can lead to a movement to topple him.
Post a Comment