2025.02.13
អតីតនាយករដ្ឋមន្ត្រី និងជាប្រធានព្រឹទ្ធសភា លោក ហ៊ុន សែន ទម្លាយសារសំឡេងចំនួន២ បង្ហាញពីការរៀបចំផែនការ សម្លាប់លោក ដោយប្រើយន្តហោះដ្រូន (Drone) វាយប្រហារចូលភូមិគ្រឹះ របស់លោក ក្នុង ក្រុងតាខ្មៅ ខេត្តកណ្ដាល។ អ្នកវិភាគ និងមន្ត្រីបក្សាប្រឆាំងថា សារសំឡេង ដែលលោក ហ៊ុន សែន បង្ហាញនៅពេលនេះ អាចជាល្បិចកលរបស់លោក ហ៊ុន សែន ក្នុងការជំរុញច្បាប់ដាក់អ្នកប្រឆាំងនៅក្រៅប្រទេសជាភេរវករ។
អ្នកវិភាគ និងមន្ត្រីបក្សប្រឆាំងលើកឡើងថា ការបញ្ចេញសារសំឡេងរបស់លោក ហ៊ុន សែន នៅពេលនេះ អាចជាល្បិចកលរបស់លោក ក្នុងការជំរុញឲ្យការបង្កើតច្បាប់ដាក់មន្ត្រីបក្សប្រឆាំងនៅក្រៅប្រទេសជាភេរវករ។
មន្ត្រីជាន់ខ្ពស់គណបក្សសង្គ្រោះជាតិ លោក ម៉ែន សុថាវរិន្ទ្រ ប្រាប់វិទ្យុអាស៊ីសេរី នៅថ្ងៃទី១៣ ខែកុម្ភៈថា លទ្ធភាពរបស់ពលរដ្ឋ និងមន្ត្រីបក្សប្រឆាំងជាដើម ទំនងជាគ្មានលទ្ធភាព និងបច្ចេកទេសក្នុងការប្រើប្រាស់ឧបករណ៍ទំនើប ដូចជា ដ្រូន ឡើយ ។
លោក ម៉ែន សុថាវរិន្ទ្រ៖ «រឿងដ្រូនអ្នកដែលធ្វើបានមានតែអ្នកនៅជុំវិញគេហដ្ឋានគាត់ហ្នឹង គ្មានអ្នកណាអាចចូលបានទេ ប្រជារាស្ត្រធម្មតា មិនអាចទៅជិតទេ មិនអាចទេ ប្រោះអ្នកយាមច្រើនណាស់ អង្គរក្សគាត់ច្រើនណាស់ ។ បើថា មានដ្រូនមែន គឺមានតែរបស់អង្គរក្សគាត់ ពួកទាហាន ដែលនៅជុំវិញគាត់ អត់ពេញចិត្តនឹងគាត់ ។ អីចឹងគណបក្សប្រឆាំង គឺអត់មានលទ្ធភាពទេ អីចឹងហើយកុំចេះតែចោទប្រជាពលរដ្ឋ កុំចេះតែចោទគេ រឿងស្ដីអីនេះនោះ យកមកចោទគេ អាហ្នឹងមកពីគាត់ភ័យខ្លាចពេក ។ ធ្វើតែល្អទៅៗ គាត់អត់ខ្លាចអីទេ»។
ការលើកឡើងនេះ ធ្វើឡើងបន្ទាប់ពីអតីតនាយករដ្ឋមន្ត្រី និងជាប្រធានព្រឹទ្ធសភា លោក ហ៊ុន សែន នៅថ្ងៃទី១៣ ខែកុម្ភៈ ទម្លាយសារសំឡេង ចំនួន២ នៅលើបណ្ដាញសង្គម ដែលសារសំឡេងនេះ ជាផែនការភេរវកម្ម ប៉ុនប៉ងធ្វើឃាតលោក និងគ្រួសារ។ លោក ហ៊ុន សែន បន្តថា «យើងដឹងមេធំរបស់គេជាអ្នកណាហើយនៅទីណា តែយើងនៅមិនទាន់បញ្ចេញនៅពេលនេះទេ ព្រោះយើងត្រូវកំចាត់ពួកជ្រុលនិយម និងហិង្សានិយមឲ្យអស់សិន»។ បន្ថែមពីនេះ លោក ហ៊ុន សែន ប្រកាសថា លោកនឹងកម្ចាត់ចោលអ្នកណាក៏ដោយ ដែលចង់សម្លាប់លោក និងគ្រួសារ។
ងាកមកមើលសារសំឡេងទាំងពីរនោះវិញ ជាសារសំឡេង (Voice) ឆ្លើយឆ្លងគ្នា នៅក្នុងក្រុមមួយ ប៉ុន្តែលោក ហ៊ុន សែន មិនបានបញ្ជាក់អំពីប្រភព នៃសារសំឡេងនេះឡើយ។
សារសំឡេង៖ «បើយើងមានមតិពិតប្រាកដ ទោះយើងធ្វើអ្វីកើត ឬមិនកើត ក៏យើងនិយាយស្មោះចេញពីចិត្តទៅ! ជាពាក្យសម្ដីយើងទៅ! ហើយនិយាយចំហជាទូទៅថា បើអាកុម្មុយនិស្តនោះបានតែទិញដ្រូនដាក់មួយទៅ អ្នកណាក៏គេនិយាយអ៊ីចឹងដែរមួយពិភពលោក។ គេនិយាយតែអីចឹងដែរ។ ដល់តែវាយកប្រទេសទាំងមូលហើយ គេថា បានតែទិញដ្រូនមួយដាក់អាហ្នឹង គឺអ៊ីចឹងឯង ហើយទៅវៃស្មៅបង្អើលពស់ម៉េច បើពួកចោរវាយកប្រទេសតែម្នាក់វាហើយ គេនិយាយតែអ៊ីចឹងគ្រប់តែគ្នា បើអ្នកណាចង់ធ្វើក៏ធ្វើទៅ បើអ្នកណាមិនធ្វើក៏ហីទៅ»។
ទាក់ទិននឹងបញ្ហានេះ អ្នកអត្ថាធិប្បាយបញ្ហានយោបាយ លោក គឹម សុខ ថ្លែងថា សារសំឡេងរបស់ពលរដ្ឋនេះ ហាក់បង្ហាញពីការឈឺចាប់ ដែលកំពុងរស់នៅក្រោមការដឹកនាំរបស់គ្រួសារត្រកូល ហ៊ុន។
លោក គឹម សុខ៖ «វិបត្តិធំទី១ គឺបញ្ហាជាតិ បញ្ហាកោះគជ់ ការទាមទារយុត្តិធម៌ ជូនលោក លិម គិមយ៉ា ការប្រឈមនឹងការដកប្រពន្ធអនុគ្រោះពន្ធ អ៊ី.ប៊ី.អេ (EBA) បន្ថែមទៀតពីសហភាពអឺរ៉ុប វិបត្តិបំណុល ការឆបោកប្រជាពលរដ្ឋរាប់ពាន់គ្រួសារនៅទូទាំងប្រទេស រឿងទាំងនេះ នឹងធ្វើឲ្យកម្ពុជាធ្លាក់ទៅក្នុងវិបត្តិសេដ្ឋកិច្ច និងសង្គមធ្ងន់ធ្ងរ ដែលរដ្ឋាភិបាលក្រុមគ្រួសារ ហ៊ុន ដោះស្រាយមិនចេញទេ ម្ល៉ោះហើយក៏យកជីវិតរបស់ពួកគេ ធ្វើជាឧបករណ៍បំភាន់ បំប៉ោង បំភ្លៃក្នុងការសមានចិត្តពីប្រជាពលរដ្ឋ»។
កាលពីពេលកន្លងទៅ លោក ហ៊ុន សែន បានព្យាយាមរកគ្រប់មធ្យោបាយ ដើម្បីធ្វើច្បាប់ដាក់មនុស្សមួយក្រុមជាភេរវករ ប្រឆាំងនឹងប្រធានស្ដីទីគណបក្សសង្គ្រោះជាតិ គឺលោក សម រង្ស៊ី ដែលកំពុងតែធ្វើចលនាមហាជនទាំងក្នុងស្រុក និងក្រៅប្រទេស ដើម្បីស្ដារប្រជាធិបតេយ្យ និងការពារអធិបតេយ្យភាពកម្ពុជា។ ទន្ទឹមនឹងនេះ កាលពីថ្ងៃទី៥ ខែធ្នូកន្លងទៅ លោក ហ៊ុន សែន ក៏បានព្រមានថា នឹងបង្កើតច្បាប់ ដាក់មនុស្សមួយក្រុមជាក្រុមភេរវករ ប្រសិនបើលោក សម រង្ស៊ី ហ៊ានបង្ហាញក្បាលម៉ាស៊ីនដឹកនាំរដ្ឋាភិបាលបណ្ដោះអាសន្ន នៅក្រៅប្រទេស។ ការណ៍នេះហើយ ទើបអ្នកវិភាគ និងមន្ត្រីបក្សប្រឆាំងមើលឃើញថា លោក ហ៊ុន សែន កំពុងយកជីវិតលោក និងគ្រួសារជាដើមទុន ទាក់ទាញចំណាប់អារម្មណ៍ពីពលរដ្ឋ បិទបាំងភាពអសមត្ថភាពក្នុងការដោះស្រាយបញ្ហាសង្គម និងជាល្បិចកល ទម្លាក់កំហុសឲ្យគណបក្សប្រឆាំង ក្នុងការបង្កើតច្បាប់ដាក់អ្នកប្រឆាំងជា ភេរវករ៕
No comments:
Post a Comment