បក្សកាន់អំណាចថាលោក ស ខេង មិនជាប់ពាក់ព័ន្ធជាមួយលោក សម រង្ស៊ី ក្នុងការបង្កើតចលនាជាតិតស៊

លោក ស ខេង នៅតែគោរពកោតសរសើរក្រុមគ្រួសារលោក ហ៊ុន សែន ថា បានបន្សល់ទុកស្នាដៃច្រើនជូនដល់សង្គមកម្ពុជាដែលមិនអាចបំភ្លេចបានឡើយ។

ដោយ ហ៊ុំ ចំរើន

2025.03.24

លោក​ ស​ ខេង​ កាលនៅជារដ្ឋមន្ត្រីក្រសួងមហាផ្ទៃ (ឆ្វេង) ចាប់ដៃជាមួយលោក សម រង្ស៊ី បច្ចុប្បន្នជាប្រធានស្តីទីគណបក្សសង្គ្រោះជាតិ នៅ​ក្រោយ​​កិច្ចប្រជុំរវាង​គណបក្ស​ទាំង​ពីរលើសេចក្ដីព្រាងច្បាប់មួយ ស្ដីពីវិសោធនកម្មបទបញ្ជាផ្ទៃក្នុងរដ្ឋសភា និងសេចក្ដីព្រាងច្បាប់ស្ដីពីការរៀបចំការបោះឆ្នោតឃុំ-សង្កាត់ ​នៅ​រដ្ឋសភា​ជាតិ​​ក្នុង​រាជធានី​ភ្នំពេញ កាលពីថ្ងៃទី៩ ខែតុលា ឆ្នាំ២០១៥។ (Sam Rainsy/FB)

អនុប្រធានគណបក្សប្រជាជនកម្ពុជា លោក ស ខេង បានថ្កោលទោសថ្នាក់ដឹកនាំគណបក្សប្រឆាំងនៅក្រៅប្រទេស ដែលបានយកឈ្មោះលោក ទៅភ្ជាប់ជាមួយក្រុមប្រឹក្សាជាតិតស៊ូរបស់លោក សម រង្ស៊ី ថាជារឿងមិនពិត និងដើម្បីបំបែកបំបាក់ផ្ទៃក្នុងបក្សប្រជាជនកម្ពុជា។

អ្នកនាំពាក្យលោក ស ខេង បានបញ្ជាក់ក្នុងសេចក្ដីប្រកាសរបស់គណៈកម្មការកណ្ដាលគណបក្សប្រជាជនកម្ពុជា នៅថ្ងៃទី២៤មីនា ថា លោក ស ខេង នៅតែគោរពកោតសរសើរក្រុមគ្រួសារលោក ហ៊ុន សែន ថា បានបន្សល់ទុកស្នាដៃច្រើនជូនដល់សង្គមកម្ពុជា ដែលមិនអាចបំភ្លេចបានឡើយ។

ប្រតិកម្មនេះធ្វើឡើង បន្ទាប់ពីប្រធានស្ដីទីគណបក្សសង្គ្រោះជាតិ លោក សម រង្ស៊ី បានតែងតាំងក្បាលម៉ាស៊ីនក្រុមប្រឹក្សាជាតិតស៊ូ ដែលមានលោក សម រង្ស៊ី ជាប្រធាន អ្នកអត្ថាធិប្បាយនយោបាយលោក គឹម សុខ ជាអ្នកនាំពាក្យ និងលោក ឆាំ ឆានី អគ្គលេខាធិការសាខាសង្គ្រោះជាតិប្រចាំទ្វីបអឺរ៉ុប ជាជំនួយការ ហើយថា លោក ស ខេង និង មន្ត្រីគណបក្សប្រជាជនកម្ពុជាមួយចំនួនទៀត ក៏បានចូលក្នុងចលនានេះដែរ។ ក្រុមប្រឹក្សានេះ មានគោលដៅ ដើម្បីប្រមូលកម្លាំងខ្មែរនៅទូទាំងពិភពលោក រួមគ្នារំដោះកម្ពុជា ចេញពីរបបដឹកនាំរបស់ត្រកូល «ហ៊ុន» និងដើម្បីបញ្ចប់នយោបាយ «ងើបមួយវ៉ៃមួយ» របស់លោក ហ៊ុន សែន។

អ្នកអត្ថាធិប្បាយនយោបាយ លោក គឹម សុខ ប្រាប់វិទ្យុអាស៊ីសេរីថា ការលើកឡើងរបស់ លោក ស ខេង ទំនងមានសម្ពាធពីប្រធានគណបក្សប្រជាជនកម្ពុជា គឺលោក ហ៊ុន សែន ដែលព្រួយបារម្ភខ្លាចចលនារបស់បក្សប្រឆាំងនេះ ផ្ទុះឡើង៕