ប្រធានព្រឹទ្ធសភាកម្ពុជាលោក ហ៊ុន សែន បានប្រាប់នាយករដ្ឋមន្ត្រីប្រទេសសិង្ហបុរីថា កម្ពុជាចង់ដោះស្រាយជម្លោះព្រំដែនជាមួយប្រទេសថៃដោយសន្ដិភាពវិធី និងមិនចង់ឱ្យមានសង្គ្រាមផ្ទុះឡើយ។ ចំណែកនាយករដ្ឋមន្ត្រីសិង្ហបុរីជំរុញឱ្យប្រទេសទាំងពីរដោះស្រាយជម្លោះស្របតាមច្បាប់អន្តរជាតិ។
លោក ហ៊ុន សែន នៅថ្ងៃទី០២ ខែកក្កដា បានជួបជាមួយនាយករដ្ឋមន្ត្រីសិង្ហបុរីលោក ឡរ៉េន វ៉ុង (Lawrence Wong) នៅវិមានព្រឹទ្ធសភា ខណៈមេដឹកនាំសិង្ហបុរីបានធ្វើដំណើរមកបំពេញទស្សនកិច្ចផ្លូវការរយៈពេល ១ថ្ងៃនៅកម្ពុជា តបតាមការអញ្ជើញរបស់លោកនាយករដ្ឋមន្ត្រី ហ៊ុន ម៉ាណែត ដើម្បីប្រារព្ធខួបលើកទី៦០ឆ្នាំ នៃការបង្កើតទំនាក់ទំនងការទូតរវាងប្រទេសទាំងពីរ។
ទំព័រហ្វេសប៊ុកលោក ហ៊ុន សែន បានចុះផ្សាយថា នៅក្នុងជំនួបនោះ លោក ហ៊ុន សែន និងនាយករដ្ឋមន្ត្រីសិង្ហបុរីលោក ឡរ៉េន វ៉ុង បានពិភាក្សាគ្នាពីការរក្សាទំនាក់ទំនងល្អរវាងប្រទេសទាំងពីរអស់រយៈពេល ៦០ឆ្នាំមកនេះ ខណៈលោក ហ៊ុន សែន ក៏ចង់ឱ្យប្រទេសទាំងពីរពង្រីកទំនាក់ទំនងបន្ថែមទៀតលើវិស័យពាណិជ្ជកម្ម សេដ្ឋកិច្ច និងវិស័យទេសចរណ៍ គឺការបន្ថែមចំនួនជើងហោះហើរត្រង់ពីសិង្ហបុរីមកកម្ពុជា នៅពេលកម្ពុជានឹងដំណើរការព្រមានយន្តហោះអន្តរជាតិថ្មីនៅពេលខាងមុខនេះ។
លោក ហ៊ុន សែន ក៏បានលើកឡើងពីជម្លោះព្រំដែនកម្ពុជានិងថៃ ដោយលោកបានប្រាប់ទៅមេដឹកនាំសិង្ហបុរីថា កម្ពុជាមិនចង់មានសង្គ្រាមជាមួយប្រទេសថៃឡើយ ហើយចង់ដោះស្រាយជម្លោះដោយសន្ដិវិធី និងតាមច្បាប់អន្តរជាតិ។ ប៉ុន្តែលោកបញ្ជាក់ថា កម្ពុជានឹងប្រើប្រាស់សិទ្ធិការពារខ្លួនវាយបក ប្រសិនបើយោធាថៃនៅតែបំពាននិងឈ្លានពានទឹកដីកម្ពុជា។
នាយករដ្ឋមន្ត្រីសិង្ហបុរីលោក ឡរ៉េន វ៉ុង ក៏បានបង្ហោះសារលើហ្វេសប៊ុករបស់លោកថា ដំណើរបំពេញទស្សនកិច្ចនៅកម្ពុជានេះ ដើម្បីជជែកជាមួយលោកនាយករដ្ឋមន្ត្រី ហ៊ុន ម៉ាណែត ដើម្បីពង្រឹងភាពជាដៃគូនៃប្រទេសទាំងពីរបន្ថែមទៀតស្របពេលប្រទេសទាំងពីរប្រារព្ធខួប៦០ឆ្នាំ នៃទំនាក់ទំនងការទូត។
លោកបានសរសេរបង្ហោះទៀតថា ស្របពេលមានភាពតានតឹងជម្លោះព្រំដែនកម្ពុជានិងថៃ លោកបានលើកឡើងពីភាពចាំបាច់សម្រាប់ភាគីកម្ពុជានិងថៃ ត្រូវរក្សាភាពអត់ធ្មត់ បន្ធូរបន្ថយភាពតានតឹង និងត្រូវបន្តចរចាដោះស្រាយជម្លោះដោយមិត្តភាព និងស្របតាមច្បាប់អន្តរជាតិ។ លោកបញ្ជាក់ទៀតថា អាស៊ានមិនត្រូវបែកបាក់គ្នាដោយសារជម្លោះនោះទេ។
លោក ហ៊ុន ម៉ាណែត បានរៀបចំជំនួបជាមួយលោក ឡរ៉េន វ៉ុង នៅវិមានសន្ដិភាព និងបានពិភាក្សាគ្នាលើប្រធានបទជាច្រើន ទាំងក្របខណ្ឌទ្វេភាគី និងពហុភាគី ក្នុងនោះរួមមាន វិស័យពាណិជ្ជកម្ម វិនិយោគនិងហិរញ្ញវត្ថុ ការពារជាតិនិងសន្ដិសុខ កសិកម្ម ថាមពល និងការបណ្ដុះបណ្ដាលជំនាញនិងវិជ្ជាជីវៈ។
កាលពីពេលថ្មីៗនេះ ប្រធានព្រឹទ្ធសភាលោក ហ៊ុន សែន ធ្លាប់បានស្នើទៅអគ្គមេបញ្ជាការនៃកងស្វ័យការពារជើងគោកជប៉ុន លោកនាយឧត្តមសេនីយ៍ ម៉ូរីស៊ីកា យ៉ាស៊ូណូរី (Morishita Yasunori) ដែលបានធ្វើដំណើរបំពេញទស្សនកិច្ចនៅកម្ពុជា ឱ្យជួយជំរុញទៅប្រទេសថៃ ចូលរួមដោះស្រាយជម្លោះព្រំដែនដោយសន្ដិវិធី និងគោរពច្បាប់អន្តរជាតិ។
កម្ពុជានៅតែជំហរដោះស្រាយបញ្ជាព្រំដែនជាមួយថៃនៅតុលាការអន្តរជាតិ (ICJ)។
លោកនាយករដ្ឋមន្ត្រី ហ៊ុន ម៉ាណែត បានបញ្ជាក់ថា លោកនឹងមិនឱ្យមានកិច្ចចរចាណាមួយរវាងកងទ័ពនិងកងទ័ពកើតឡើងឡើយ ដរាបណា ក្រុមយោធាថៃមិនបើកព្រំដែនទាំងអស់ដែលខ្លួនបានបិទជាឯកតោភាគី ឱ្យដំណើរការពីម៉ោង៦ព្រឹកដល់ម៉ោង១០យប់ជាធម្មតាវិញ៕
No comments:
Post a Comment