ក្រុមអង្គការសង្គមស៊ីវិលកំពុងធ្វើយុទ្ធនាការតាមបណ្ដាញសង្គមទាមទាររកយុត្តិធម៌ជូនបណ្ឌិត កែម ឡី និងរម្លឹកខួប៩ឆ្នាំនៃឃាតកម្មលើអ្នកស្រាវជ្រាវសង្គមរូបនេះ។
អង្គការសង្គមស៊ីវិល និងអ្នកគោរពស្រលាញ់លោកបណ្ឌិត កែម ឡី កំពុងចាប់ផ្ដើមធ្វើយុទ្ធនាការនៅលើបណ្ដាញសង្គមហ្វេសប៊ុក ដូចជាដាក់ Profile Frame រូបលោកបណ្ឌិត កែម ឡី បង្ហោះឡើងវិញនូវវីដេអូផតខាសត៍វីរភាពលោកបណ្ឌិតកែម ឡី វីដេអូស្តីពីជីវប្រវត្តិសង្ខេប តើលោកបណ្ឌិតកែម ឡី ជាអ្នកណា ជាដើម។
អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត បានឱ្យវិទ្យុអាស៊ីសេរីដឹងថា ក្រុមអង្គការសង្គមស៊ីវិលនៅតែចងចាំវីរភាពបណ្ឌិត កែម ឡី ដែលជាធនធានកម្ររបស់ជាតិ។ មន្ត្រីសង្គមស៊ីវិលរូបនេះ នៅតែទទូចទៅរដ្ឋាភិបាល និងស្ថាប័នតុលាការ ឱ្យស្វះស្វែងរកឃាតករពិតដើម្បីផ្ដល់យុត្តិធម៌ជូនបណ្ឌិត កែម ឡី។
ជារឿងរាល់ឆ្នាំយើងតែងតែប្រារព្ធធ្វើនេះ គឺថាយើងមិនបំភ្លេចទេ ដើម្បីឱ្យវិញ្ញាណក្ខន្ធបណ្ឌិត កែម ឡី ហ្នឹងទៅកាន់សុគតិភព ហើយយើងនៅចងចាំនូវវីរភាពរបស់លោកជានិច្ច មិនអាចបំភ្លេចបានទេ ហើយជាពិសេសប្រជាពលរដ្ឋជាច្រើនរួមទាំងយុវជនផងដែរ។
— លោក វណ្ណ សុផាត
មជ្ឈមណ្ឌលសិទ្ធិមនុស្សកម្ពុជា CCHR បានរៀបចំការជួបជុំមួយនៅទីស្នាក់ការរបស់ខ្លួនកាលពីថ្ងៃទី០៧ ខែកក្កដា ដោយមានការចូលរួមពីអ្នកការពារសិទ្ធិមនុស្សជាង៤០នាក់។ វិធីរម្លឹកខួបនេះមានដូចជា ការរាប់បាត្រ បង្សុកូល និងប្រគេនទេយ្យវត្ថុដល់ព្រះសង្ឃដើម្បីឧទ្ទិសកុសលជូនចំពោះវិញ្ញាណក្ខន្ធរបស់លោកបណ្ឌិត កែម ឡី និងវីរៈជនមួយចំនួនទៀត ដែលបាត់បង់ជីវិតដោយសារបុព្វហេតុនៃកិច្ចការពារបរិស្ថាន សិទ្ធិការងារ និងយុត្តិធម៌សង្គម។ ក្រៅពីធ្វើពិធីសាសនា ក៏មានការជជែកពិភាក្សា និងការទាមទារយុត្តិធម៌ជូនបណ្ឌិត កែម ឡី ផងដែរ។
បណ្ឌិត កែម ឡី ត្រូវបានឃាតករបាញ់សម្លាប់នៅព្រឹកថ្ងៃទី១០ កក្កដា ឆ្នាំ២០១៦ ក្នុងហាងលក់ទំនិញស្តារម៉ាត (Star Mart) នៃស្ថានីយប្រេងឥន្ធនៈកាល់តិច (Caltex) ស្តុបបូកគោ រាជធានីភ្នំពេញ។ ហេតុការណ៍ឃាតកម្មនេះ កើតឡើងរយៈពេលពីរថ្ងៃ ក្រោយពេលបណ្ឌិត កែម ឡី ចូលរួមវេទិកាអ្នកស្ដាប់វិទ្យុអាស៊ីសេរី ជជែកអំពីទ្រព្យសម្បត្តិមហាសាល និងការក្តោបក្តាប់មុខជំនួញច្រើនរាប់មិនអស់របស់គ្រួសារលោក ហ៊ុន សែន នៅកម្ពុជា ដែលអង្គការឃ្លាំមើលពិភពលោក (Global Witness) បានរកឃើញ។
រយៈពេល៩ឆ្នាំមកនេះ តុលាការបានរកឃើញឃាតករតែម្នាក់ប៉ុណ្ណោះឈ្មោះ អឿត អាង ហៅខ្លួនឯងថា ជួប សម្លាប់ និងបានកាត់ទោសឱ្យជនរូបនេះឱ្យជាប់ពន្ធនាគារអស់មួយជីវិត។ ទោះយ៉ាងណា សាច់ញាតិ និងអ្នកឃ្លាំមើល រិះគន់ថា ជួប សម្លាប់ ជាឃាតករក្លែងក្លាយ ហើយចម្លើយសារភាពរបស់ ជួប សម្លាប់ លោក បណ្ឌិត កែម ឡី ជំពាក់លុយរបស់ខ្លួន៣ពាន់ដុល្លារ ក៏មិនអាចទុកចិត្តបានដែរ។
វិទ្យុអាស៊ីសេរីមិនអាចទាក់ទង អ្នកនាំពាក្យក្រសួងយុត្តិធម៌ លោក ជិន ម៉ាលីន ដើម្បីសុំការបកស្រាយជុំវិញបញ្ហានេះទេនៅថ្ងៃទី០៨ ខែកក្កដា។
អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី បានលើកឡើងថា បើទោះបីជាក្រុមអង្គការសង្គមស៊ីវិល មានសង្ឃឹមតិចតួចថា នឹងអាចរកយុត្តិធម៌ជូនបណ្ឌិត កែម ឡី ក្ដី ប៉ុន្តែពួកគាត់មិនលះបង់ក្ដីសង្ឃឹមនេះឡើយ។
ការសម្លាប់ហ្នឹងមិនពាក់ព័ន្ធរឿងខ្ចីលុយពីរបីពាន់(ដុល្លារ)ហ្នឹងទេ។ យើងយល់ថា បញ្ហានេះ គឺមានបញ្ហាផ្សេងក្រៅពីបញ្ហាថវិកា អ៊ីចឹងហើយបានសង្គមស៊ីវិលនៅតែទាមទារឱ្យមានការស៊ើបអង្កេតពាក់ព័ន្ធនឹងបញ្ហានេះ។
— លោក យិន ម៉េងលី
ក្រុមអ្នកការពារសិទ្ធិមនុស្សគ្រោងទៅជួបជុំគ្នានៅស្តុបបូកគោ កន្លែងឃាតករបាញ់សម្លាប់បណ្ឌិត កែម ឡី ដើម្បីប្រារព្ធពិធីសែនព្រេនបែបប្រពៃណី ដាក់ផ្កាជូនវិញ្ញាណក្ខន្ធលោកបណ្ឌិត កែម ឡី នៅព្រឹកថ្ងៃ១០ ខែកក្កដា ខាងមុខ៕
1 comment:
The murderer Hun Sen kept killing because he has always gotten away with his crimes: from the execution of the K5 project, the 97 grenade attack, the 1997 coup d'Etat to the killing of Dr. Kem Ley.
Post a Comment