កងទ័ពថៃបានបើកប្រតិបត្តិការវាយប្រហារកាន់តែខ្លាំងចូលទឹកដីកម្ពុជានៅថ្ងៃទី០២ នៃការផ្ទុះអាវុធដាក់គ្នាតាមព្រំដែន ក្នុងនោះ គឺការវាយសង្គ្រប់លើកងទ័ពកម្ពុជា ដើម្បីឈ្លានពានយកទឹកដីនៅប្រាសាទតាក្របី និងតំបន់ផ្សេងទៀតនៅក្នុងខេត្តព្រះវិហារ និងខេត្តឧត្តរមានជ័យ។
អ្នកនាំពាក្យក្រសួងការពារជាតិកម្ពុជាអ្នកស្រី ម៉ាលី សុជាតា ថ្លែងនៅក្នុងសន្និសីទសារព័ត៌មាននៅថ្ងៃទី២៥ ខែកក្កដានេះថា កងទ័ពប្រទេសថៃបានបន្តប្រើប្រាស់យន្តហោះចម្បាំង F-16 វាយប្រហារចូលទឹកដីកម្ពុជា ក្នុងនោះបានវាយប្រហារដោយប្រើប្រាស់គ្រាប់បែកចង្កោមចំនួន២លើក នៅតំបន់ភ្នំខ្មោច និងស្ថិតនៅក្នុងភូមិតេជោធម្មជាតិ ស្ថិតក្នុងស្រុកជាំក្សាន្ត ខេត្តព្រះវិហារ។
អ្នកស្រីថា ម៉ាលី សុជាតា បានបញ្ជាក់ដែរថា កងទ័ពថៃប្រើគ្រាប់បែកចង្កោម ស្របពេលព្យាយាមវាយសង្គ្រប់លើកងទ័ពកម្ពុជា ដើម្បីឈ្លានពានយកទឹកដីនៅតំបន់ប្រាសាទតាក្របី និងទីតាំងមួយចំនួនទៀត ដែលជាទង្វើឃោឃៅនិងអមនុស្សធម៌ និងបំពានច្បាប់អន្តរជាតិ រួមទាំងអនុសញ្ញាស្ដីពីការហាមឃាត់ប្រើប្រាស់គ្រាប់បែកចង្កោមរបស់អង្គការសហប្រជាជាតិ។
កាលពីថ្ងៃទី២៤ ខែកក្កដា កងទ័ពថៃក៏បានប្រើប្រាស់យន្តហោះចម្បាំង F-16 ទម្លាក់គ្រាប់នៅតំបន់ប្រាសាទព្រះវិហារ ដែលបណ្ដាលឱ្យផ្នែកខ្លះនៃប្រាសាទរងការខូចខាត។ ក្រសួងវប្បធម៌ និងវិចិត្រសិល្បៈកម្ពុជា ចេញថ្កោលទោសចំពោះការវាយប្រហារលើប្រាសាទព្រះវិហារ ដែលជាទង្វើមិនគោរពតាមអនុសញ្ញាអន្តរជាតិស្ដីពីការការពារបេតិកភណ្ឌវប្បធម៌ពិភពលោក និងបានស្នើឱ្យអង្គការយូណេស្កូ (Unesco) ចាត់វិធានការបន្ទាន់ដើម្បីការពារប្រាសាទព្រះវិហារ៕
No comments:
Post a Comment