នាយករដ្ឋមន្ត្រីម៉ាឡេស៊ីបានលើកឡើងថា សំណើដាក់ពង្រាយក្រុមអ្នកសង្កេតការណ៍អន្តរជាតិបន្ថែម ដើម្បីចូលរួមតាមដានបទឈប់បាញ់រវាងកម្ពុជា-ថៃ មិនមែនជាការជ្រៀតជ្រែកពីខាងក្រៅឡើយ។ ការលើកឡើងនេះ បន្ទាប់ពីនាយករដ្ឋមន្ត្រីស្ដីទីថៃបានលើកឡើងថា ការដាក់អ្នកសង្កេតការណ៍ មិនមែនមកពីក្រុមប្រទេសអាស៊ាន ជាការជ្រៀតជ្រែកពីខាងក្រៅ។
លោកនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម (Anwar Ibrahim) បានលើកឡើងថា មូលហេតុដែលលោកចង់ឱ្យបន្ថែមអ្នកសង្កេតការណ៍អន្តរជាតិ ដោយសារក្រុមអ្នកសង្កេតការណ៍បណ្ដោះអាសន្នអាស៊ាន ដែលដឹកនាំដោយអនុព័ន្ធយោធាម៉ាឡេស៊ី មានសមាជិកតិចហើយមានការងារច្រើនដែលមិនអាចរ៉ាប់រងអស់។
លោក អាន់វ៉ា អ៊ីប្រាហ៊ីម បានថ្លែងប្រាប់ក្រុមអ្នកសារព័ត៌មានក្នុងកម្មវិធីបិទវេទិកាច្បាប់អាស៊ាន២០២៥ (ASEAN Law Forum 2025) នៅទីក្រុងកូឡាឡាំពួរ (Kuala Lumpur) នៅថ្ងៃទី២១ ខែសីហាថា នៅក្នុងការនិយាយទូរស័ព្ទជាមួយនាយករដ្ឋមន្ត្រីស្ដីទីថៃលោក ភូមិថាំ វេឆាយ៉ាឆៃ (Phumtham Wechayachai) លោកបានលើកឡើងពីសំណើបន្ថែមចំនួនអ្នកសង្កេតការណ៍អន្តរជាតិ ដែលអាចយកមន្ត្រីអនុព័ន្ធយោធាពីស្ថានទូតដែលមានស្រាប់នៅក្នុងប្រទេសកម្ពុជានិងថៃ ដើម្បីគាំទ្រដល់ការងារតាមដានបទឈប់បាញ់ ដូច្នេះវាមិនមែនជាបញ្ហាបង្កឱ្យមានការជ្រៀតជ្រែកអ្វីឡើយ។
កាលពីថ្ងៃទី២០ ខែសីហា សារព័ត៌មានថៃ The Nation បានចុះផ្សាយថា នាយករដ្ឋមន្ត្រីស្ដីទីថៃ លោក ភូមិថាំ វេឆាយ៉ាឆៃ បានបដិសេធសំណើពីនាយករដ្ឋមន្ត្រីម៉ាឡេស៊ី ដែលចង់បន្ថែមចំនួនអ្នកសង្កេតការណ៍អន្តរជាតិ។ លោក ភូមិថាំ វេឆាយ៉ាឆៃ បានបញ្ជាក់ថា ប្រសិនបើក្រុមអ្នកសង្កេតការណ៍អាស៊ានបណ្ដោះអាសន្ន ចង់បានសមាជិកបន្ថែមចូលរួមសង្កេតការណ៍បទឈប់បាញ់ គឺអាចប្រើក្រុមអនុព័ន្ធយោធាឬបុគ្គលិកនៃស្ថានទូតអាស៊ានទាំង៨ប្រទេស។
នាយករដ្ឋមន្ត្រីស្ដីទីថៃបានបញ្ជាក់ថា លោកបានប្រាប់ទៅនាយករដ្ឋមន្ត្រីម៉ាឡេស៊ី តាមទូរស័ព្ទថា ជម្លោះព្រំដែនរវាងកម្ពុជានិងថៃ គឺជាបញ្ហារបស់ប្រទេសចំនួនពីរ ហើយប្រទេសថៃមិនអនុញ្ញាតឱ្យអន្តរជាតិខាងក្រៅ ចូលរួមក្នុងការសង្កេតការណ៍បទឈប់បាញ់ឡើយ។
ទាក់ទងជំហររបស់ភាគីកម្ពុជា ជុំវិញសំណើដាក់ពង្រាយក្រុមអ្នកសង្កេតការណ៍អន្តរជាតិបន្ថែមនេះ វិទ្យុអាស៊ីសេរីមិនអាចសុំអត្ថាធិប្បាយពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានទេនៅថ្ងៃទី២១ ខែសីហា។
ជុំវិញបញ្ហានេះ អ្នកតាមដានបញ្ហានយោបាយនិងសង្គមលោក ប៉ោ មករា បានលើកឡើងថា ការបដិសេធរបស់នាយករដ្ឋមន្ត្រីស្ដីទីថៃចំពោះសំណើពីប្រធានប្ដូរវេនអាស៊ាន គឺបង្ហាញកាន់តែច្បាស់ថា ប្រទេសថៃមិនបានគោរពតាមធម្មនុញ្ញអាស៊ាន និងធម្មនុញ្ញអង្គការសហប្រជាជាតិ ដែលជាច្បាប់អន្តរជាតិឡើយ។
ជារួម ថៃអត់អាចធ្វើតាមតែអំពើចិត្តបានទេ ពីព្រោះថៃក៏ជាសមាជិកអង្គការសហប្រជាជាតិ ក៏ជាសមាជិកនៃសមាគមអាស៊ីអាគ្នេយ៍ហៅកាត់ថាអាស៊ានហ្នឹង។ ដូច្នេះ អ្វីដែលថៃមិនគោរព និងបំពានមកលើកម្ពុជា វាបង្ហាញពីភាពមិនគោរពច្បាប់ទម្លាប់ពិភពលោកទាំងមូល។
— លោក ប៉ោ មករា
កាលពីថ្ងៃទី១៩ ខែសីហា នាយករដ្ឋមន្ត្រីម៉ាឡេស៊ី បានបញ្ជាក់ថា លោកបានហៅទូរស័ព្ទនិយាយជាមួយលោកនាយករដ្ឋមន្ត្រី ហ៊ុន ម៉ាណែត និងនាយករដ្ឋមន្ត្រីស្ដីទីថៃពិភាក្សាលើគំនិតផ្ដួចផ្ដើមមួយចំនួនទៀត ដើម្បីពង្រឹងការតាមដានបទឈប់បាញ់របស់ក្រុមអ្នកសង្កេតការណ៍បណ្ដោះអាសន្ន ខណៈកិច្ចប្រជុំវិសាមញ្ញនៃគណៈកម្មការព្រំដែនទូទៅកម្ពុជា-ថៃ (GBC) នឹងធ្វើឡើងលើកទី២ នៅខែកញ្ញាខាងមុខ បន្ទាប់ពីមានបទឈប់បាញ់កាលពីថ្ងៃទី២៨ ខែកក្កដា។
លោកនាយករដ្ឋមន្ត្រីហ៊ុនម៉ាណែតក៏បានលើកឡើងថានៅក្នុងកិច្ចសន្ទនាជាមួយនាយករដ្ឋមន្ត្រីម៉ាឡេស៊ីលោកបានជំរុញឱ្យបង្កើតក្រុមអ្នកសង្កេតការណ៍អាស៊ានផ្លូវការឱ្យបានឆាប់និងដំណើរការនៃក្រុមសង្កេតការណ៍បណ្ដោះអាសន្នដើម្បីឱ្យការតាមដានបទបាញ់កាន់តែមានប្រសិទ្ធភាព៕
No comments:
Post a Comment