មន្ត្រីបក្សប្រឆាំងបានលើកឡើងថា ទាហានថៃនឹងកាន់តែងាយស្រួលចូលឈ្លានពានទឹកដីកម្ពុជា ជាពិសេសនៅប្រាសាទតាក្របី ប្រសិនបើរដ្ឋាភិបាលកម្ពុជាបានឯកភាពជាមួយថៃ ដោះមីននៅតំបន់ព្រំដែនជម្លោះដែលមិនទាន់ឯកភាពគ្នា។ ការលើកឡើងនេះ ក្រោយពេលរដ្ឋមន្ត្រីក្រសួងការពារជាតិកម្ពុជាប្រកាសថា កម្ពុជា-ថៃ បានឯកភាពគ្នាដោះមីនមនុស្សធម៌។
អតីតតំណាងរាស្ដ្រគណបក្សសង្គ្រោះជាតិលោក អ៊ុំ សំអាន បានប្រាប់វិទ្យុអាស៊ីសេរីនៅថ្ងៃទី១៦ ខែកញ្ញាថា ប្រសិនបើកម្ពុជាបានឯកភាពជាមួយថៃ ដោះមីននៅតាមតំបន់ព្រំដែនដែលមិនទាន់មានការវាស់វែងនិងឯកភាពគ្នា ដូច្នេះការដោះមីនខាងមុខនេះ នឹងជួយឱ្យទាហានថៃកាន់តែងាយស្រួលចូលរាយបន្លាលួសរំលោភយកដីខ្មែរបន្ថែមទៀត ជាពិសេសនៅតំបន់ប្រាសាទតាក្របី ដែលទាហានកំពុងព្យាយាមចូលកាន់កាប់។
ពីព្រោះ តំបន់ខ្លះ ថៃអត់ហ៊ានចូលមក ដោយសារមានមីន ហើយសូម្បីប្រាសាទតាក្របីហ្នឹង មេទ័ពថៃក៏សារភាពដែរថា នៅពេលបាញ់គ្នាហ្នឹង គឺមិនអាចយកប្រាសាទតាក្របីបាន ដោយសារមានមីនច្រើនពេក ហើយមីនហ្នឹង គឺសល់ពីសម័យសង្គ្រាមនាទស្សវត្សទី៨០។
— លោក អ៊ុំ សំអាន
ការលើកឡើងពីមន្ត្រីគណបក្សប្រឆាំងនេះ បានធ្វើឡើងបន្ទាប់ពីស្ថានទូតបរទេសមួយចំនួននៅកម្ពុជា រួមមានស្ថានទូតអង់គ្លេស និងស្ថានទូតបារាំងជាដើម បានបង្ហោះសារលើទំព័រហ្វេសប៊ុកស្វាគមន៍ការសម្រេចចិត្តរបស់ភាគីកម្ពុជានិងថៃ ដែលរួមគ្នាដោះមីននៅតាមព្រំដែន។
ការស្វាគមន៍របស់ស្ថានទូតបរទេសទាំងនោះ បានធ្វើឡើងបន្ទាប់ពីរដ្ឋមន្ត្រីក្រសួងការពារជាតិកម្ពុជាលោក ទៀ សីហា បានលើកឡើងនៅក្នុងសេចក្ដីប្រកាសព័ត៌មានថា នៅក្នុងកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) កាលពីថ្ងៃទី១០ ខែកញ្ញា ភាគីកម្ពុជា-ថៃ បានឯកភាពចាប់ផ្ដើមកំណត់តំបន់សាកល្បងសម្រាប់ការងារដោះមីននៅតាមព្រំដែន ដើម្បីរួមចំណែកជួយដល់ការអភិវឌ្ឍសេដ្ឋកិច្ចនិងសង្គម រួមទាំងការពារអាយុជីវិតពលរដ្ឋ។ ប៉ុន្តែសេចក្ដីប្រកាសព័ត៌មាននេះមិនបានបញ្ជាក់ថា ការដោះមីនសាកល្បងនោះ នឹងធ្វើឡើងនៅតំបន់មិនទាន់ឯកភាពគ្នាឬយ៉ាងណានោះទេ។
អនុប្រធានទី១អាជ្ញាធរមីនលោក លី ធុជ បានប្រាប់ប្រធានគណៈប្រតិភូសហភាពអ៊ឺរ៉ុបប្រចាំកម្ពុជាលោក អ៊ីហ្គូ ទ្រីសម៉ាន់ (Igor Driesmans) នៅក្នុងជំនួបនៅថ្ងៃទី១៦ ខែកញ្ញាថា ការបោសសម្អាតមីនមនុស្សធម៌នៅតាមបណ្តោយព្រំដែនកម្ពុជា-ថៃ នៅតែបន្តសកម្មភាពជាប្រចាំស្របតាមកម្មវិធីបានកំណត់ និងស្របតាមគោលដៅជាអាទិភាព ក្រោមគំនិតផ្តួចផ្តើមថ្មីរបស់លោកនាយករដ្ឋមន្ត្រី ហ៊ុន ម៉ាណែត។ លោក លី ធុជ បានបន្តថា ការដោះសម្អាតមីន គឺត្រូវផ្តោតសំខាន់ជាអាទិភាពលើតំបន់មានការខណ្ឌសីមាច្បាស់លាស់ ទីកន្លែងដែលមានប្រជាជនរស់នៅ និងទីកន្លែងបម្រើដល់សេដ្ឋកិច្ចសង្គម។
ទោះជាយ៉ាងណា មន្ត្រីជាន់ខ្ពស់គណបក្សសង្គ្រោះជាតិនៅប្រទេសបារាំង លោក ទេព មនោរម្យ បានយល់ឃើញថា ប្រទេសថៃមិនបានដាក់មីននៅព្រំដែនរបស់ខ្លួននោះទេ ព្រោះថៃគ្មានសង្គ្រាម មានតែកម្ពុជាទេ ដាក់មីននៅព្រំដែនតាំងពីជំនាន់សង្គ្រាម។ លោករិះគន់ថា កម្ពុជាព្រមព្រៀងដោះមីនជានយោបាយទន់ជ្រាយធ្វើតាមការចង់បានរបស់យោធាថៃ។
បើយើងធ្វើទៅតាមដែលគេ (ថៃ) ចង់បាន គឺយើងទន់ខ្សោយមែនទែន ដើម្បីតែចង់បានការបើកច្រកព្រំដែន ដើម្បីចង់បានការសម្របសម្រួលគ្នាជាមួយថៃ យើងព្រមដោះមីនឱ្យគេ អាហ្នឹងគឺយើងចាញ់ប្រៀបគេខ្លាំងណាស់។
— លោក ទេព មនោរម្យ
ចាប់តាំងពីមានភាពតានតឹងជម្លោះព្រំដែន ទាហានថៃបានដើរជាន់មីនផ្ទុះយ៉ាងហោចណាស់ចំនួន៦លើក ហើយករណីដើរជាន់មីនផ្ទុះចុងក្រោយគឺនៅថ្ងៃទី២៧ ខែកញ្ញា ស្ថិតនៅតំបន់ប្រាសាទតាក្របី។ ក្រសួងការបរទេសកម្ពុជា និងអាជ្ញាធរមីនកម្ពុជាបានចេញលិខិតច្រានចោលការចោទប្រកាន់ពីភាគីថៃជាបន្តបន្ទាប់ ដែលថា កងទ័ពកម្ពុជាបានដាក់មីនថ្មី។ ក្រសួងការបរទេស និងអាជ្ញាធរមីនកម្ពុជាបានបញ្ជាក់ថា មីននោះសល់ពីសម័យសង្គ្រាម និងស្ថិតក្នុងទឹកដីកម្ពុជា ហើយបានជំរុញឱ្យភាគីថៃបញ្ឈប់យកបញ្ហាមីនធ្វើជាលេស ដើម្បីប្រើកម្លាំងយោធាឈ្លានពានទឹកដីកម្ពុជា។
នៅថ្ងៃទី១៦ ខែកញ្ញា ទាហានថៃប្រហែល៣០នាក់ រួមទាំងកម្លាំងប៉ូលិសថៃប្រដាប់ដោយខែលបានចូលមកព្យាយាមរាយបន្លាលួសថែមនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ប៉ុន្តែត្រូវបានពលរដ្ឋខ្មែរលើកគ្នាតវ៉ារារាំងឱ្យដកថយទៅវិញ។ នៅថ្ងៃដដែលនេះ អ្នកនាំពាក្យក្រសួងការពារជាតិកម្ពុជាក៏បានចេញមកច្រានចោលការលើកឡើងពីកងទ័ពថៃ ដែលអះអាងថា លំនៅឋានពលរដ្ឋខ្មែរជាយូរមកហើយ នៅភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់ គឺស្ថិតនៅក្នុងទឹកដីថៃ៕
1 comment:
The devil Hun Sen's leaked audio made the world sympathize with Thailand, resulting the 5 days bloody clashes with Thailand. This leaked audio made Thailand’s attack on Cambodia justified. That’s why no country has condemned Thailand’s aggression..
More problems will be coming, even long after Hun Sen dies, from this devastating leaked audio.
The 5 days bloody clashes with Thailand have shaken the power of the HUN family. That's why Hun Sen stays quite and let Thailand do whatever it wanted so that he could keep his power.
Ceding Khmer land to Vietnam for peace has been the norm for Khmer traitor Hun Sen. Now, Hun Sen is ready to cede some more Khmer land to Thailand in exchange for peace and especially to secure the HUN family power.
So far, they don’t talk about the maritime border yet. The biggest problem lies in that maritime border with Vietnam and Thailand.
Why does Cambodia not ratify the UNCLOS?
Post a Comment