រដ្ឋមន្ត្រីក្រសួងការពារជាតិកម្ពុជា-ថៃបានពិភាក្សាគ្នាលើសំណើពីភាគីជប៉ុន ដើម្បីឱ្យបើកច្រកព្រំដែនមួយចំនួនឡើងវិញ សម្រាប់ការចរាចរទំនិញចាំបាច់។ ការពិភាក្សានេះធ្វើឡើងនៅក្នុងកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) នៅថ្ងៃទី១០ ខែកញ្ញា ដែលធ្វើឡើងនៅខេត្តកោះកុង។
សេចក្ដីប្រកាសព័ត៌មានរបស់រដ្ឋមន្ត្រីក្រសួងការពារជាតិកម្ពុជាលោក ទៀ សីហា បានលើកឡើងថា នៅក្នុងកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ ជាមួយរដ្ឋមន្ត្រីក្រសួងការពារជាតិថៃលោក ណាត់ថាក់ផុន ណាកផានីត (Nattaphon Narkphanit) បានពិភាក្សាគ្នាដើម្បីដាក់ចេញនូវជំហានជាក់ស្ដែងនានាចាំបាច់ ដើម្បីអនុវត្តបទឈប់បាញ់ឱ្យបានពេញលេញ និងមានប្រសិទ្ធភាព។
សេចក្ដីប្រកាសព័ត៌មានបានបន្តថា នៅក្នុងជំនួបនោះ ភាគីកម្ពុជាបានជំរុញឱ្យថៃដោះលែងទាហានកម្ពុជា១៨នាក់ ឱ្យបានឆាប់រហ័សស្របតាមច្បាប់មនុស្សធម៌អន្តរជាតិ។ បន្ថែមពីនេះ ភាគីទាំងពីរបានឯកភាពគ្នាលើលក្ខខណ្ឌប្រតិបត្តិសម្រាប់បង្កើតក្រុមអ្នកសង្កេតការណ៍អាស៊ាន ដើម្បីឱ្យរដ្ឋាភិបាលប្រទេសទាំងពីរអនុម័ត។
លោក ទៀ សីហា បានលើកឡើងនៅក្នុងសេចក្ដីប្រកាសព័ត៌មានទៀតថា អង្គប្រជុំក៏បានពិនិត្យលើសំណូមពររបស់ប្រទេសជប៉ុន ដែលចង់ឱ្យប្រទេសទាំងពីរពិចារណាបើកច្រកព្រំដែនមួយចំនួនឡើងវិញ សម្រាប់ដឹកទំនិញចាំបាច់ ក្នុងការធានាដល់ខ្សែច្រវាក់ផ្គត់ផ្គង់។
មេបញ្ជាការភូមិភាគរបស់ថៃបានចេញបញ្ជាជាឯកតោភាគីឱ្យបិទច្រកព្រំដែនអន្តរជាតិទាំង៧ជាមួយកម្ពុជាចាប់តាំងពីថ្ងៃទី២៣ ខែមិថុនា លើកលែងការឆ្លងកាត់របស់មនុស្សធម៌ ខណៈពលរដ្ឋកម្ពុជាបានប្រកាសធ្វើពហិកាមិនប្រើប្រាស់ទំនិញពីប្រទេសថៃ ស្របពេលប្រទេសទាំងពីរកើនឡើងភាពតានតឹងដោយសារជម្លោះព្រំដែន។
No comments:
Post a Comment