Khmer Circle រង្វង់ខ្មែរ: ស្ត្រីម្នាក់ត្រូវបានតុលាការផ្ដន្ទាទោស២ឆ្នាំ ដោយសារបង្ហោះសាររឿងជម្លោះព្រំដែនកម្ពុជា-ថៃ

May be an image of one or more people and text

ប្ដីរបស់កម្មការិនីរោងចក្រម្នាក់ស្នើឲ្យលោកនាយករដ្ឋមន្ត្រី ហ៊ុន ម៉ាណែត ជួយអន្តរាគមន៍ទៅតុលាការដោះលែងប្រពន្ធឲ្យមានសេរីភាពវិញ ដោយថាប្រពន្ធ របស់លោកគ្មានកំហុសដូចការចោទប្រកាន់ឡើយ។ សំណើនេះ ធ្វើឡើងបន្ទាប់ពីតុលាការផ្ដន្ទាទោសកម្មការិនីរោងចក្រ លោកស្រី ហ៊ុល មុន្នីសាមន ឲ្យជាប់ ពន្ធនាគារ ២ឆ្នាំ និងពិន័យជាប្រាក់ ៤ លានរៀល ពាក់ពព័ន្ធនឹងការបញ្ចេញមតិ រឿងជម្លោះព្រំដែនកម្ពុជា-ថៃ។

ប្ដីរបស់កម្មការិនីរោងចក្រ អះអាងថា លោកនឹងប្ដឹងជំទាស់ចំពោះសេចក្ដីសម្រេច របស់សាលាដំបូងរាជធានីភ្នំពេញ ទៅសាលាឧទ្ធរណ៍បន្តទៀត ដោយលោក ចាត់ទុកការ ផ្ដន្ទាទោសប្រពន្ធរបស់លោក ឲ្យជាប់ពន្ធនាគារ ២ ឆ្នាំ ពីបទ«ញុះញង់ និងប្រមាថ» ពាក់ព័ន្ធនឹងការបញ្ចេញមតិថា ជារឿងអយុត្តិធម៌។

ប្ដីរបស់កម្មការិនីរោងចក្រ លោកស្រី ហ៊ុល មុន្នីសាមន គឺលោក ឆេង ចន្ទធា ប្រាប់ទូរទស្សន៍អាស៊ីសេរី នៅថ្ងៃទី២៤ ខែមីនា ថា ប្រសិនបើប្រពន្ធរបស់លោក បញ្ចេញមតិទៅខុសឆ្គង គួរធ្វើការអប់រំ ពីព្រោះប្រពន្ធរបស់លោក គ្រាន់តែជា កម្មការិនីរោងចក្រ ហើយមានជំងឺជាប់ខ្លួនទៀត។

លោក ឆេង ចន្ទធា៖ «គេអ្នកខ្លះគ្រោះថ្នាក់ចរាចរណ៍បុកដល់ស្លាប់ដល់អី ហើយគាត់ គ្រាន់តែនិយាយលើបណ្ដាញសង្គម គាត់ជាប្រជាពលរដ្ឋមួយរូប គ្រាន់តែនិយាយ ប៉ុណ្ណឹង គាត់មានទោសដល់ជាប់គុក ជាប់ច្រវាក់។ សំណូមពរទៅខាងអាជ្ញាធរ សំណូមពរទៅខាងតុលាការ ដោះលែងគាត់ ដើម្បីយកគាត់មកព្យាបាល នៅខាងក្រៅវិញ»។

លោក ឆេង ចន្ទធា ទទូចឲ្យលោក ហ៊ុន ម៉ាណែត ជួយអន្តរាគមន៍ទៅតុលាការ ដោះលែងប្រពន្ធឲ្យមានសេរីភាពវិញ ដោយថា ប្រពន្ធរបស់លោកគ្រាន់តែ ជាពលរដ្ឋសាមញ្ញប៉ុណ្ណោះ។

ពាក់ព័ន្ធនឹងការបញ្ចេញមតិឈឺឆ្អាលពីបញ្ហាព្រំដែនកម្ពុជា-ថៃ លោក ហ៊ុន ម៉ាណែត នៅថ្ងៃទី១០ ខែកុម្ភៈ បានលើកឡើងថា ការបញ្ចេញមតិ ឈឺចាប់ ចំពោះ ទង្វើថៃ ឈ្លានពានទឹកដីខ្មែរ មិនមានអ្វីខុសនោះទេ ព្រោះពលរដ្ឋមានសិទ្ធិសេរីភាពក្នុងការបញ្ចេញមតិ។

លោក ហ៊ុន ម៉ាណែត៖ «គាត់អស់ខុសទេព្រោះអារម្មណ៍ជាខ្មែរគាត់មានសិទ្ធិឈឺចាប់ គាត់មានសិទ្ធិខឹង មានសិទ្ធិបញ្ចេញមតិរបស់គាត់។ ហើយវាអត់មានប៉ះពាល់ទៅដល់ស្ថានភាព ឬក៏ការឆ្លើយទៅលើដី ដូចការ សម្រេចចិត្តរបស់រាជ រដ្ឋាភិបាល។ ប៉ុន្តែខ្ញុំគ្រាន់តែចង់បញ្ជាក់ថា ការសម្រេចចិត្តរបស់រាជរដ្ឋាភិបាល គ្រប់ជំហានទាំងអស់គឺដើម្បីឧត្ដមប្រយោជន៍ជាតិ និងប្រជាជន»។

ទោះបីជាលោក ហ៊ុន ម៉ាណែត ប្រកាសបែបនេះក៏ដោយអាជ្ញាធរ និងតុលាការ ក្រោមការដឹកនាំរបស់លោកនៅតែបន្តចាប់ខ្លួន ចោទប្រកាន់ និងផ្ដន្ទាទោសពលរដ្ឋដាក់ពន្ធនាគារជាបន្តបន្ទាប់។

ជាក់ស្ដែង លោកស្រី ហ៊ុល មុន្នីសាមន ត្រូវបានសាលាដំបូងរាជធានីភ្នំពេញកាលពីថ្ងៃទី២៣ ខែមីនា ផ្ដន្ទាទោស ជាប់ពន្ធនាគាររយៈពេល ២ ឆ្នាំ និង ពិន័យជា ប្រាក់ចំនួន ៤ លានរៀល ឬស្មើ ១ពាន់ ដុល្លារ ពីបទ «ញុះញង់ឱ្យប្រព្រឹត្តបទ ឧក្រិដ្ឋជាអាទិ៍» និងបទ «ប្រមាថអ្នករាជការសាធារណ:» ជុំវិញការបង្ហោះសារលើហ្វេសប៊ុក ពាក់ព័ន្ធនឹងជម្លោះព្រំដែនកម្ពុជា-ថៃ ។ គិតមកដល់បច្ចុប្បន្នលោកស្រី ហ៊ុល មុន្នីសាមន ជាប់ ពន្ធនាគារប្រមាណ ៤ខែហើយ បន្ទាប់ពីសមត្ថកិច្ចចាប់ខ្លួនកាលពីថ្ងៃទី១២ ខែវិច្ឆិកា ឆ្នាំ២០២៥ អំឡុងពេលលោកស្រីកំពុងជិះកង់ទៅទិញថ្នាំពេទ្យនៅផ្សារជម្ពូវ័ន ខណ្ឌពោធិ៍សែនជ័យ រាជធានីភ្នំពេញ។

ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICAHDO) លោក អំ សំអាត សង្កេតឃើញថា អំឡុងពេលមានជម្លោះព្រំដែនកម្ពុជា-ថៃ អាជ្ញាធរ និងតុលាការ បានចាប់ខ្លួន ចោទប្រកាន់ និងផ្ដន្ទាទោស អ្នកសារព័ត៌មាន សកម្មជនគណបក្សនយោបាយ សកម្មជនការងារសង្គម ដែលបញ្ចេញមតិ និងចែករំលែក លើបណ្ដាញសង្គម ពាក់ព័ន្ធនឹងរឿងព្រំដែននេះ។

លោកចាត់ទុកការផ្ដន្ទាទោសកម្មការិនីរោងចក្រនេះថា នឹងធ្វើឲ្យប៉ះពាល់ដល់ជីវភាពរបស់ពួកគាត់បន្ថែមទៀត។

លោក អំ សំអាត៖ «កម្ពុជាយើង យើងបានផ្ដល់សច្ចាប័ន និងទទួលស្គាល់នូវបទដ្ឋានអន្តរជាតិ ស្ដីអំពីសិទ្ធិមនុស្ស ក្នុងនោះ យើងទទួលស្គាល់អំពីសេរីភាព នៅក្នុងការបញ្ចេញមតិ សេរីភាពសារព័ត៌មាន ហើយមានចែងនៅក្នុង រដ្ឋធម្មនុញ្ញរបស់យើងទៀត។ អ៊ីចឹងកម្ពុជាត្រូវតែមានការគោរពទៅលើគោលការណ៍ទាំងអស់នេះឲ្យបានច្បាស់លាស់ ហើយហ្នឹងធានាអំពីសិទ្ធិ និងសេរីភាពនៅក្នុងការបញ្ចេញមតិ និងសេរីភាពសារព័ត៌មាន»។

អង្គការលីកាដូ ឲ្យដឹងថា កម្មការិនីរោងចក្រ គឺលោកស្រី ហ៊ុល មុន្នីសាមន គឺជា ពលរដ្ឋម្នាក់ក្នុងចំណោមមនុស្សចំនួន ៩៧ នាក់ ដែលត្រូវបានអាជ្ញាធរចាប់ខ្លួន ដោយសារតែការប្រើប្រាស់សិទិ្ធសេរីភាពបញ្ចេញមតិរបស់ពួកគេ៕