ដោយ អ៊ុង សេរីវុទ្ធ
2017-09-08
សកម្មជនអង្គការចលនាមាតាធម្មជាតិ លោក ថុន រដ្ឋា (ស្ដាំ) ថ្លែងប្រាប់អ្នកសារព័ត៌មាននៅមុខសាលាឧទ្ធរណ៍ នៅថ្ងៃទី១៥ ខែកុម្ភៈ ឆ្នាំ២០១៧។ RFA/Brach Chev
RFA/Brach Chev
សមត្ថកិច្ចខេត្តស្ទឹងត្រែង រារាំងយុវជនប្រមាណ៣០នាក់ ពីរាជធានីភ្នំពេញ មិនឲ្យចូលទៅឃុំស្រែគរ នៃស្រុកសេសាន ដើម្បីមើលស្ថានភាពពលរដ្ឋដែលរងផលប៉ះពាល់ដោយសារទំនប់វារីអគ្គិសនីសេសានក្រោមពីរ។
សកម្មជនបរិស្ថាននៃចលនាមាតាធម្មជាតិ លោក ថុន រដ្ឋា ឲ្យអាស៊ីសេរីដឹងនៅថ្ងៃទី៨ កញ្ញា ថា សមត្ថកិច្ចលើកហេតុផលថា ការរារាំងនេះគឺដើម្បីការពារសុវត្ថិភាព និងតម្រូវសុំការអនុញ្ញាតជាដើម។
លោកបន្តថា ពួកលោកព្យាយាមពន្យល់សមត្ថកិច្ចពីគោលបំណងដែលក្រុមយុវជនរបស់លោកទៅទីតាំងនោះថា ជាការចង់ស្វែងយល់នៃការរស់នៅរបស់ជនជាតិដើមភាគតិច និងទុក្ខកង្វល់របស់អ្នកភូមិដែលមិនព្រមទទួលសំណងពីក្រុមហ៊ុនវារីអគ្គិសនីសេសានក្រោមពីរ ជាថ្នូរនឹងការចាកចេញ៖ «តើហេតុអ្វីបានអាជ្ញាធរព្យាយាមបិទបាំងកន្លែងនឹងម៉េះ? មិនឲ្យយុវជននិងអ្នកផ្សេងចូលទៅ ទោះពួកគេប្រាប់ពីមូលហេតុចូលទៅមិនមែនបក្សនយោបាយ ឬញុះញង់ជាដើម»។
ក្រុមយុវជនដែលមានបំណងទៅកាន់ឃុំស្រែគរនោះមកពីសាកលវិទ្យាល័យ និងក្រុមហ៊ុនមួយចំនួននៅភ្នំពេញ។ ពួកគេសម្រេចចិត្តត្រឡប់មកកាន់ខេត្តក្រចេះវិញនៅម៉ោងប្រមាណ ៤រសៀល បន្ទាប់ពីពួកគេត្រូវបានសមត្ថកិច្ចរារាំងនៅចំណុចបំបែកច្រប់ ក្នុងឃុំក្បាលរមាស។ ពួកគេបានចុះពីរថយន្តក្រុង ធ្វើដំណើរថ្មើរជើងប្រមាណ២គីឡូម៉ែត្រទៀត ដើម្បីចូលភូមិ ប៉ុន្តែសមត្ថកិច្ចបានបន្តថែមកម្លាំង និងឃាត់ពួកគេដដែល។
លោក ថុន រដ្ឋា អះអាងថា សមត្ថកិច្ចតែងរឹតបន្តឹងការចូលទៅសហគមន៍ ក្រោយក្រុមហ៊ុនសាកល្បងបិទទ្វារទឹកទំនប់វារីអគ្គិសនីសេសានក្រោមពីរកាលពីខែមុន និងបណ្ដាលឲ្យទឹកជន់លិចឃុំស្រែគរ ខណៈពលរដ្ឋឃុំស្រែគរ ១២០គ្រួសារ និងឃុំក្បាលរមាស ៥៨គ្រួសារមិនព្រមចាកចេញ៕
No comments:
Post a Comment