ដោយ អាស៊ីសេរី
2018-04-29
តំណាងរាស្ត្រគណបក្សសង្គ្រោះជាតិលោក អ៊ូ ច័ន្ទរ័ត្ន ថ្លែងពេលជួបប្រជុំគ្នា ពង្រឹងគណបក្សនៅស្រុកស្ទឹងត្រង់ ខេត្តកំពង់ចាម នៅថ្ងៃទី១២ ខែវិច្ឆិកា ឆ្នាំ២០១៧។
Photo Provided
តំណាងរាស្ត្ររបស់គណបក្សប្រឆាំងម្នាក់ គ្រោងអញ្ជើញសមាជិករដ្ឋសភា និងក្រុមប្រឹក្សាឃុំ-សង្កាត់ របស់គណបក្សសង្គ្រោះជាតិ ផ្ដិតមេដៃដាក់ថ្វាយព្រះមហាក្សត្រ និងអង្គការសហប្រជាជាតិ ដើម្បីស្នើសុំឲ្យអន្តរាគមន៍ឲ្យពួកគេ មានសិទ្ធិធ្វើនយោបាយនៅក្នុងប្រទេសកម្ពុជាឡើងវិញ។ អ្នកវិភាគយល់ថា សកម្មភាពប្រមូលស្នាមមេដៃនេះ ជាមធ្យោបាយល្អ ប៉ុន្តែ អាចមិនមានប្រសិទ្ធភាព ដោយសាររបបក្រុងភ្នំពេញ ហើយករណីបក្សប្រឆាំង តុលាការកំពូលមិនបានអនុវត្តតាមច្បាប់ទេ គឺជារឿងនយោបាយ។
តំណាងរាស្ត្រជាប់ឆ្នោតមណ្ឌលខេត្តតាកែវ លោក អ៊ូ ច័ន្ទរ័ត្ន ប្រាប់ថា មកដល់ថ្ងៃទី២៩ មេសានេះ មានរយៈពេលជាងកន្លះខែហើយ ដែលមន្ត្រីខាងព្រះបរមរាជវាំងមិនទាន់ឆ្លើយតបនឹងសំណើរបស់លោក ដែលបានថ្វាយព្រះមហាក្សត្រសុំព្រះរាជអន្តរាគមន៍ពីអង្គដើម្បីទម្លាក់ចោលបម្រាមហាមថ្នាក់ដឹកនាំគណបក្សសង្គ្រោះជាតិ ១១៨រូប ដែលរបបលោកហ៊ុន សែន ដាក់បម្រាមមិនឲ្យធ្វើនយោបាយរយៈពេល ៥ឆ្នាំនោះ។
លោក អ៊ូ ច័ន្ទរ័ត្ន បន្តថាមន្ត្រីព្រះបរមរាជវាំងបានប្រាប់លោកថា សំណើដែលលោកបានដាក់ថ្វាយព្រះមហាក្សត្រ តាមផ្លូវច្បាប់ គឺព្រះមហាក្សត្រត្រូវបញ្ជូនទៅឲ្យនាយករដ្ឋមន្ត្រីពិនិត្យសិន ហេតុនេះ ទើបធ្វើឲ្យមានការយឺតយ៉ាវ មិនទាន់មានការឆ្លើយតបនឹងសំណើនេះ។
តំណាងរាស្ត្របក្សប្រឆាំងប្រាប់ថា បើទោះជាព្រះរាជតម្រិះរបស់ព្រះមហាក្សត្រសម្រេចបែបណាក៏លោក រង់ចាំទទួលការឆ្លើយតបវិញដែរ។ ប៉ុន្តែ លោក អ៊ូ ច័ន្ទរ័ត្ន ឲ្យដឹងថា ជំហានបន្ត លោកនឹងអាចអញ្ជើញក្រុមអ្នកតំណាងរាស្ត្រ និងក្រុមប្រឹក្សាឃុំ-សង្កាត់ របស់គណបក្សសង្គ្រោះជាតិ ដែលរងគ្រោះ ដោយការដកហូតតំណែង នាំគ្នាផ្ដិតមេដៃថ្វាយព្រះមហាក្សត្រ និងអង្គការសហប្រជាជាតិ សហគមន៍អន្តរជាតិ ឲ្យបានដឹងឮ។ ទោះយ៉ាងណា លោក អ៊ូ ច័ន្ទរ័ត្ន ថា លោកមិនចង់ស្វែងរកកិច្ចអន្តរាគមន៍ ពីអន្តរជាតិទេ ដោយលោកចង់ឃើញមានការសម្របសម្រួលវាងខ្មែរនិងខ្មែរ ដើម្បីកុំឲ្យអន្តរជាតិមើលងាយ។ «»
លោក អ៊ូ ច័ន្ទរ័ត្ន និងតំណាងរាស្ត្រមួយចំនួនទៀត របស់គណបក្សសង្គ្រោះជាតិ មិនសុខចិត្តនឹងការសម្រេចរបស់តុលាការកំពូល ដែលបានសម្រេចដកហូតតួនាទីក្នុងរដ្ឋសភារបស់ពួកគេ ដែលបានផ្ដល់ឲ្យដោយពលរដ្ឋទូទាំងប្រទេស។ ក្រុមតំណាងរាស្ត្របក្សប្រឆាំង បានដាក់ពាក្យប្ដឹងទៅតុលាការកំពូល២ដងហើយ ដើម្បីស្នើសុំឲ្យមានការសើរើឡើងវិញ ចំពោះករណីដកហូតតំណែងដែលពលរដ្ឋផ្ដល់ឲ្យគណបក្សសង្គ្រោះជាតិនៅទូទាំងប្រទេស មានតំណាងរាស្ត្រ និងក្រុមប្រឹក្សាឃុំសង្កាត់។
លោក អ៊ូ ច័ន្ទរ័ត្ន ថា លោកមិនសុខចិត្តនឹងការសម្រេចរបស់តុលាការកំពូលទេ ដោយសារការកាត់ទោសរំលាយបក្សប្រឆាំង ហាមឃាត់ថ្នាក់ដឹកនាំ ១១៨នាក់ឲ្យឈប់ធ្វើនយោបាយ និងការដកតំណែងក្រុមប្រឹក្សារបស់បក្សប្រឆាំងទូទាំងប្រទេស ធ្វើឡើងក្នុងពេលដែលប្រធានគណបក្សសង្គ្រោះជាតិកំពុងជាប់ពន្ធនាគារ និងមិនមានលទ្ធភាពតតាំងតាមផ្លូវតុលាការបាន។ តំណាងរាស្ត្ររូបនេះ បញ្ជាក់ទៀតថា ការមិនដាក់មេធាវីការពារការរំលាយរបស់គណបក្ស ធ្វើឡើងដោយថ្នាក់ដឹកនាំកំពូលរបស់បក្សប្រឆាំង ប៉ុន្តែ ការកាត់ក្ដីហាមឃាត់បុគ្គល ១១៨នាក់ មិនឲ្យធ្វើនយោបាយ៥ឆ្នាំ ជាការបំបិទសិទ្ធិសេរីភាពរបស់ពួកគេ ដូច្នេះត្រូវតែមានការសើរើកាត់ក្ដីឡើងវិញ ចំពោះករណីបំបិទសិទ្ធិរូបវន្តបុគ្គលក្នុងការធ្វើនយោបាយ។
រដ្ឋធម្មនុញ្ញ ជាច្បាប់កំពូល ត្រង់មាត្រា៣៤ថ្មី និងមាត្រា៣៥ ចែងថា ប្រជាពលរដ្ឋខ្មែរទាំងពីរភេទមានសិទ្ធិបោះឆ្នោត និងអាចឈរឈ្មោះឱ្យគេបោះឆ្នោត។ ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។
ក្រៅពីអ្នកនយោបាយនៅបក្សប្រឆាំង សម្រាប់អ្នកនយោបាយក្នុងគណបក្សប្រជាធិបតេយ្យមូលដ្ឋានក៏ធ្លាប់សម្ដែងការមិនពេញចិត្តចំពោះសកម្មភាពរបស់តុលាការកំពូលក្នុងរបបក្រុងភ្នំពេញ ដែលសម្រេចហាមឃាត់សិទ្ធិធ្វើនយោបាយរបស់ថ្នាក់ដឹកនាំគណបក្សសង្គ្រោះជាតិទាំង១១៨នាក់ដែរ។
ប៉ុន្តែ មេដឹកនាំរបបក្រុងភ្នំពេញ លោកនាយករដ្ឋមន្ត្រី ហ៊ុន សែន ធ្លាប់ប្រាប់ពីមូលហេតុនៃការហាមឃាត់សិទ្ធិធ្វើនយោបាយសម្រាប់ថ្នាក់ដឹកនាំបក្សប្រឆាំងទាំងនេះ ដោយសារភ័យខ្លាចពួកគេប្រមូលកម្លាំង ទៅជ្រកក្រោមស្លាកគណបក្សនយោបាយផ្សេង ដែលមានការគាំទ្រពីពលរដ្ឋ មិនអាចឲ្យលោក អាចបន្តក្រាញអំណាចអស់មួយជីវិតបាន។
អ្នកវិភាគនយោបាយ លោកបណ្ឌិត ឡៅ ម៉ុងហៃ ថា ករណីរំលាយបក្សប្រឆាំង ហាមឃាត់ថ្នាក់ដឹកនាំធ្វើនយោបាយ ៥ឆ្នាំ និងការរំលោភឆន្ទៈរាស្ត្រកន្លងមក គឺតុលាការកំពូលបានប្រព្រឹត្តិខុសច្បាប់ ដូច្នេះក្នុងផ្លូវច្បាប់ ព្រះមហាក្សត្រមានព្រះរាជសិទ្ធិឲ្យសើរើកាត់ក្ដីឡើងវិញ។ លោកបណ្ឌិត ឡៅ ម៉ុងហៃ យល់ថា គម្រោងរបស់លោក អ៊ូ ច័ន្ទរ័ត្ន ក្នុងការប្រមូលស្នាមមេដៃសុំព្រះរាជអន្តរាគមន៍ ពីព្រះមហាក្សត្រ និងសហគមន៍អន្តរជាតិ មិនខុសច្បាប់ទេ ប៉ុន្តែ លទ្ធផលជោគជ័យឬយ៉ាងណា មិនអាចសន្និដ្ឋានបានទេ ព្រោះរបបលោក ហ៊ុន សែន មានឥទ្ធិពលខ្លាំងនៅកម្ពុជា។ «»
លោក អ៊ូ ច័ន្ទរ័ត្ន អះអាងថា ការមិនដាក់មេធាវីការពារក្ដីសំណុំរឿងរំលាយបក្សប្រឆាំង ជាតួនាទីរបស់មេដឹកនាំកំពូលនៃបក្ស ប៉ុន្តែសម្រាប់បណ្ដឹងសើរើ ការហាមឃាត់សិទ្ធិ ១១៨នាក់ មិនឲ្យធ្វើនយោបាយ ជាសិទ្ធិរបស់បុគ្គលម្នាក់ៗ ចាំបាច់ត្រូវតែសើរើឡើងវិញ។ លោក អ៊ូ ច័ន្ទរ័ត្ន ថា បើទោះជាបក្សប្រឆាំងបានចូលរួម ឬមិនបានចូលរួមបោះឆ្នោតរដ្ឋសភាអាណត្តិទី៦ ឬក៏ បើទោះជាអាច លោកទៅធ្វើនយោបាយកន្លែងណា ក៏នៅតែមានបេះដូងភក្ដីភាពជាមួយបក្សប្រឆាំង ជាមួយប្រទេសជាតិ និងពលរដ្ឋខ្មែរដែរ៕
No comments:
Post a Comment