ដោយ ទីន ហ្សាការីយ៉ា
2019-09-25
លោក សម រង្ស៊ី (ឆ្វេង) និងលោក កឹម សុខា (កណ្ដាល) ជជែកជាមួយលោក ហ៊ុន សែន ក្រោយចេញពីជំនួបប្រជុំកំពូលកាលពីថ្ងៃទី២២ កក្កដា ២០១៤ នាវិមានព្រឹទ្ធសភា។
RFA/Tin Zakariya
ការឃុំខ្លួនលោក កឹម សុខា គឺជាប្រធានបទមួយដ៏សំខាន់ដែលសហគមន៍ជាតិ អន្តរជាតិចាប់អារម្មណ៍ និងទាមទារឱ្យដោះលែងវិញ។ ករណីលោក កឹម សុខា នេះ ក៏ជាលក្ខខណ្ឌមួយក្នុងចំណោមលក្ខខណ្ឌជាច្រើនទៀត ដែលសហភាពអឺរ៉ុប នឹងបន្តប្រព័ន្ធអនុគ្រោះពន្ធ ឱ្យរបបក្រុងភ្នំពេញទៀតដែរ។
ការប្រកាសវិលចូលស្រុកវិញ របស់លោក សម រង្ស៊ី ជាប្រធានបទមួយដ៏សំខាន់ ដែលសហគមន៍ជាតិ អន្តរជាតិ តាមដានឃ្លាំមើលដែរ។ តើលោក ហ៊ុន សែន អាចនឹងលេងល្បិច “ព្រួញមួយបាញ់បានសត្វពីរ” ដោយដោះលែង លោក កឹម សុខា ដើម្បីបន្ធួរស្ថានការណ៍តានតឹងផ្នែកនយោបាយ ដើម្បីផ្គាប់ចិត្តសហភាពអឺរ៉ុប តែលោកនៅអាច សម្រេចនូវយុទ្ធសាស្ត្ររបស់ខ្លួនកម្ទេចកម្លាំងបក្សប្រឆាំងផង តាមរយៈការបង្កឱ្យមាន ការប្រឈមមុខដាក់គ្នាផ្ទៃក្នុងគណបក្សសង្គ្រោះជាតិកាន់តែខ្លាំង ឬយ៉ាងណា?
របបលោក ហ៊ុន សែន បានប្រកាសពីផែនការទប់ស្កាត់ ការវិលត្រលប់របស់លោក សម រង្ស៊ី ទៅកាន់មាតុប្រទេសវិញជាបន្តបន្ទាប់។ ការប្រកាសនេះ មិនត្រឹមតែត្រៀមទប់ស្កាត់តែរឿងចាប់ខ្លួនតែមួយមុខនោះទេ គឺថែមទាំងប្រកាសត្រៀមគ្រាប់រ៉ុកកែតបាញ់ផ្លោង កម្ទេចលោក សម រង្ស៊ី ទៀតផង បើសិនជាមេដឹកនាំបក្សប្រឆាំងរូបនេះឆ្លងចូលទឹកដីកម្ពុជា។
មូលហេតុអ្វីបានជាលោក ហ៊ុន សែន ប្រកាសត្រៀមកាំភ្លើងធំ ចាំកម្ទេចលោក សម រង្ស៊ី នៅគ្រាដែលលោក សម រង្ស៊ី គ្មានអាវុធនៅដៃផងនោះ? ជាការពិតណាស់ លោក សម រង្ស៊ី គ្មានអាវុធណាមួយសម្រាប់តដៃនឹងកម្លាំងប្រដាប់អាវុធរបស់លោក ហ៊ុន សែន ឡើយ។ តាមមើលទៅ ការព្រមាននិងការប្រកាសប្រឆាំងលោក សម រង្ស៊ី នេះ ទំនងជាលោក ហ៊ុន សែន ភ័យខ្លាច វត្តមានលោក សម រង្ស៊ី វិលចូលស្រុកវិញក៏ថាបាន ពីព្រោះថា វត្តមានរបស់លោកមេដឹកនាំបក្សប្រឆាំងរូបនេះ អាចប៉ះពាល់ដល់ដល់គ្រឹះអំណាចរបស់លោក ហ៊ុន សែន តាមរយៈកម្លាំងរូបរួមជាធ្លុងតែមួយរវាង កឹម សុខា សម រង្ស៊ី នោះ។
ជាការពិត កម្លាំងរួបរួមរវាង លោក កឹម សុខា និងលោក សម រង្ស៊ី បានធ្វើឱ្យគណបក្សប្រឆាំងលេចមុខត្រដែតទាំងនៅឆាកជាតិ អន្តរជាតិ តាមរយៈលទ្ធផលបោះឆ្នោតអាណត្តិទី៥ ឆ្នាំ២០១៣។ អ្នកណាក៏ជឿរថា ដោយគណបក្សកាន់អំណាចមើលឃើញពីលទ្ធផលនេះ ទើបលោក ហ៊ុន សែន ប្រើគ្រប់មធ្យោបាយ ដើម្បីបំបែកបំបាក់ និងកម្ទេចគណបក្សប្រឆាំងចោល ក្រោមរូបភាពអនុវត្តច្បាប់ ដោយប្រើសភា តុលាការជាកូនអុករបស់ខ្លួន ក្នុងការកាត់សេចក្ដី និងវិសោធនកម្មច្បាប់មួយចំនួន។ ជាក់ស្ដែង ដូចជាការចោទគណបក្សប្រឆាំងថា ជាអង្គការចាត់តាំងផ្ដួលរំលំរដ្ឋាភិបាល ហើយអ្វីដែលគួរឱ្យស្ញប់ស្ញែងនោះ គឺបេសកកម្មផ្លេកបន្ទោរស្វែងរក "យុត្តិធម៌ និងសន្តិសុខសង្គម" នោះ គឺការចាប់លោក កឹម សុខា ដាក់ពន្ធនាគារភ្លាមៗ ការធ្វើវិសោធនកម្មច្បាប់បោះឆ្នោត ច្បាប់ស្ដីពីគណបក្សនយោបាយ ដើម្បីរំលាយគណបក្សសង្គ្រោះជាតិ និង ដាក់បម្រាមមិនឱ្យបក្សប្រឆាំង១១៨ នាក់ មានសិទ្ធិធ្វើនយោបាយជាដើម។
រយៈពេលពីរឆ្នាំមកនេះ ទោះជាគណបក្សប្រឆាំង ត្រូវបានរំលាយទៅហើយក្ដី រចនាសម្ព័ន្ធគណបក្សប្រឆាំងមិនរលាយទៅតាមសាលដីការបស់តុលាការកំពូលឡើយ។ ទោះបីជារបបលោក ហ៊ុន សែន ប្រើគ្រប់វិធីដើម្បីរារាំង ឱ្យកម្លាំងគណបក្សប្រឆាំងចុះខ្សោយ និងបែកបាក់ តាមរយៈការបញ្ចុះបញ្ចូលឱ្យចុះចូលផង ការគំរាមកំហែងប្រើអំពើហិង្សាលួចវាយសកម្មជនបក្សប្រឆាំងផង និងការចាប់ចងដាក់ពន្ធនាគារជាដើម តែមកទល់ពេលនេះ គណបក្សប្រឆាំង មិនរលាយទៅតាមសាលដីការបស់តុលាការកំពូលឡើយ។ លោក សម រង្ស៊ី អះអាងថា គណបក្សប្រឆាំងរលាយតែនៅលើក្រដាសទេ តែរចនាសម្ព័ន្ធគណបក្សមិនរលាយឡើយ។ តាមមើលទៅ លោក ហ៊ុន សែន ប្រហែលអាចដឹងថា នឹងមិនទទួលបានជោគជ័យលើការបំបែកបំបាក់កម្លាំងបក្សប្រឆាំងដែរ។ យុទ្ធសាស្ត្របន្ទាប់ អ្វីដែលលោក ហ៊ុន សែន អាចមើលឃើញ ថា នឹងមានប្រសិទ្ធភាពនោះ គឺមានតែបំបែកលោក កឹម សុខា ចេញពីលោក សម រង្ស៊ី ទេ ដែលអាចធ្វើឱ្យកម្លាំងបក្សប្រឆាំងពុះហែកជាពីរ និងចុះខ្សោយបាន នៅខណៈក្រុម កឹម សុខា និយម និងក្រុម សម រង្ស៊ី និយមមួយចំនួន កំពុងតែជះទឹកដាក់គ្នាជាបណ្ដើរៗទៅហើយនោះ។
យុទ្ធសាស្ត្របំបែកបំបាក់ កឹម សុខា ចេញពី សម រង្ស៊ី បាននោះ គឺមានតែធ្វើយ៉ាងណា រារាំងកុំឱ្យលោក សម រង្ស៊ី វិលចូលស្រុកវិញបានតាមផែនការកំណត់នៅថ្ងៃទី៩ វិច្ឆិកា ខាងមុខ។ បញ្ហានេះហើយដែលលោក ហ៊ុន សែន ប្រើស្ថាប័នជាតិសំខាន់ៗ ចេញសេចក្ដីថ្លែងការណ៍ប្រឆាំងលោក សម រង្ស៊ី និងការប្រើប្រាស់តុលាការ ចេញដីកាតាមចាប់ខ្លួនលោក សម រង្ស៊ី ស្ទើរតែរាប់មិនអស់ ក្រោមបទចោទប្រកាន់ជាច្រើន ក្នុងនោះរួមមាន ចោទពីបទក្បត់ជាតិផង។ ការធ្វើដូច្នេះ គឺជាការបន្លាចលោក សម រង្ស៊ី ផង និងបំបាក់ស្មារតីអ្នកគាំទ្របក្សប្រឆាំងផង។ ក៏ប៉ុន្តែផែនការទប់ស្កាត់លោក សម រង្ស៊ី នេះ តាមមើលទៅរបបក្រុងភ្នំពេញពិបាកនឹងទទួលបានជោគជ័យណាស់ ពីព្រោះថា លោក សម រង្ស៊ី ក៏ទំនងជាដឹងខ្លួនថា បើសិនជាលោក មិនវិលចូលស្រុកទៅតាមផែនការរបស់គណបក្សសង្គ្រោះជាតិដែលដាក់ចេញឱ្យគេឯងដឹងជាសាធារណៈទៅហើយទេ គឺជីវិតនយោបាយរបស់លោក អាចនឹងត្រូវបញ្ចប់នៅត្រឹមខែវិច្ឆិកាខាងមុខនេះ ព្រោះការសន្យារបស់លោក ក៏ធ្លាប់បានធ្វើឡើងជាច្រើនលើករួចទៅហើយនោះ។
ដោយលោក ហ៊ុន សែន មើលឃើញពីផែនការជាក់លាក់របស់លោក សម រង្ស៊ី ដូច្នេះ លោក ហ៊ុន សែន ទំនងជានឹងអាចប្រើយុទ្ធសាស្ត្រផ្សេងទៀត គឺ ការដោះលែងលោក កឹម សុខា ឱ្យមានសេរីភាពឡើងវិញ នៅមុនថ្ងៃទី៩ វិច្ឆិកា ខាងមុខនេះ ពោលគឺនៅមុនពេល លោក សម រង្ស៊ី វិលចូលស្រុកវិញ ប្រសិនបើលោក កឹម សុខា ត្រូវបានលោក ហ៊ុន សែន ដោះលែងមែន ហើយលោក សម រង្ស៊ី នឹងត្រូវគេផាត់ចោល ដោយឈរលើហេតុផលថា លោក សម រង្ស៊ី ជាទណ្ឌិត ឬក៏ដោយប្រការណាមួយនោះ អ្នកគាំទ្រលោក សម រង្ស៊ី អាចនឹងអាក់អន់ស្រពន់ចិត្ត មិនចូលរួមសហការជាមួយលោក កឹម សុខា។ បើរឿងនេះកើតឡើងមែន គណបក្សនេះអាចនឹងប្រឈមមុខនឹងគ្រោះមហន្តរាយ។
ទោះជាយ៉ាងណាក៏ដោយ លោក កឹម សុខា អាចនឹងយល់ច្បាស់ណាស់នូវល្បែងនយោបាយរបស់លោក ហ៊ុន សែន។ លោកបានលះបង់ និងរងនូវការឈឺចាប់ដោយសារតែរបបលោក ហ៊ុន សែន ចាប់លោក និងសកម្មជនប្រឆាំងជាច្រើនទៀតដាក់ពន្ធនាគារ លោកនឹងមិនអនុញាតឱ្យវីរភាពទាំងនោះ ក្លាយទៅជារឿងអាសាបង់នោះឡើយ ។ ហើយការលះបង់របស់លោក កឹម សុខា រយៈពេលពីរឆ្នាំ ទាំងនៅក្នុងពន្ធនាគារត្រពាំងផ្លុង និងការឃុំខ្លួនក្នុងផ្ទះនេះ ទំនងជាលោក កឹម សុខា មិនចង់បែកបាក់សម្ពន្ធភាពជាមួយលោក សម រង្ស៊ី ដែរក៏ថាបាន។ ម្យ៉ាងទៀតលោក កឹម សុខា ក៏ដឹងដែរថា ការបែកបាក់ រវាងកម្លាំងទាំងពីរ កឹម សុខា សម រង្ស៊ី នោះ គឺធ្វើឱ្យគណបក្សសង្គ្រោះជាតិបរាជ័យនៅលើសង្វៀននយោបាយ ដោយលោកអាចមើលឃើញគណបក្សហ៊្វុនស៊ិនប៉ិច ជាគំរូស្រាប់ ដែលចុងបញ្ចប់លោក ហ៊ុន សែន ចេញមុខសារភាពថា លោកជាអ្នកនៅពីក្រោយនៃការបំបែកបំបាក់គណបក្សរាជានិយមហ៊្វុនស៊ិនប៉ិច ដែលធ្លាប់មានឥទ្ធិពលដ៏ខ្លាំង ដែលគណបក្សប្រជាជនកម្ពុជារបស់លោក ហ៊ុន សែន ពិបាកនឹងទប់ទល់កាលពីជាង២០ឆ្នាំមុននោះ។
លើសពីនេះទៀត លោក កឹម សុខា ធ្លាប់លើកឡើងដែរថា អ្វីៗលើលោកនេះ គ្មានអ្វីអមតទេ មានតែទឹកដីប្រទេសជាតិទេ ដែលអមត ហើយលោកនៅតែប្រកាន់ជំហររឹងមាំ ទោះបីជាមានឧបសគ្គអ្វីក៏ដោយ។ ម្យ៉ាងវិញទៀត ការចាប់ឃុំខ្លួនលោក កឹម សុខា នេះ ប្រៀបដូចជាវាំងនន នៃរឿងល្ខោនមួយ ដែលគេរូតបិទមួយភ្លែត ក៏ត្រូវគេរូតបើកឡើងវិញ។ ចំណែកឯតួឯក តួអង្គ ទាំងតួចិត្តល្អ និងតួចិត្តអាក្រក់ ក៏ចេញមកសម្ដែងរឿងល្ខោនដែលលាយឡំ ទៅដោយភាពទន់ភ្លន់ ផ្អែមល្ហែមដាក់គ្នាផង ផិតក្បត់គ្នា ញុះញង់ វាយប្រហារឈ្នានីសគ្នាផង ហើយអ្នកមើលរឿងល្ខោននេះ អាចថា អាណិតតួឯកដែលត្រូវគេធ្វើបាបនោះ នឹងត្រូវនាំគ្នាងើបតវ៉ាប្រឆាំងនឹងតួចិត្តអាក្រក់ ដើម្បីការពារតួចិត្តល្អ និងទាមទាររកយុត្តិធម៌សម្រាប់តួចិត្តល្អវិញក៏ថាបាន។
ជាសរុបសេចក្ដីទៅ សំណុំរឿងរំលាយគណបក្សសង្គ្រោះជាតិ និងការចាប់ខ្លួនលោក កឹម សុខា នេះ វាមិនខុសអីពីរឿងល្ខោនដែលគេសម្ដែងឱ្យមហាជនទស្សនានោះទេ។ ល្ខោនលេងកាន់តែយូរ អ្នកមើលកាន់តែដឹងតួណាចិត្តល្អ តួណាចិត្តអាក្រក់កាន់តែច្បាស់ ហើយអ្នកទស្សនានឹងកាន់តែអាណិតតួអង្គចិត្តល្អថែមទៀត។ នៅទន្ទឹមនឹងនេះ ទាំងលោក កឹម សុខា និង លោក សម រង្ស៊ី ក៏ទំនងជាចង់ឱ្យប្រវត្តិសាស្ត្រកត់ត្រាទុកថា សម្ពន្ធភាព សម រង្ស៊ី កឹម សុខា មិនអាចបំបែកបាន ទោះជា ជួបឧបសគ្គព្យុះភ្លៀងយ៉ាងណាក៏ដោយ។ ហើយ ទាំងលោក កឹម សុខា និង លោក សម រង្ស៊ី ធ្លាប់បានប្រកាសនៅចំពោះមុខអ្នកគាំទ្ររបស់ខ្លួនថា សម រង្ស៊ី កឹម សុខា គឺជាមនុស្សតែមួយនោះ៕
No comments:
Post a Comment