ដោយ អូន ភាព
2019-10-05
rfa
ជនរងគ្រោះជាជនជាតិចិន ត្រូវជនដៃដល់ជាចិនដូចគ្នា បាញ់សម្លាប់ នៅខេត្តព្រះសីហនុ កាលពីថ្ងៃទី ៦ ឧសភា ២០១៩។
រូបគេហទំព័រអគ្គស្នងការនគរបាលជាតិ
មន្ត្រីសង្គមស៊ីវិល និងប្រជាពលរដ្ឋនៅខេត្តព្រះសីហនុ កំពុងមានក្តីបារម្ភពីសុវត្ថិភាព សន្តិសុខ និងសណ្ដាប់ធ្នាប់សង្គម បន្ទាប់ពីមានឃាតកម្មជាបន្តបន្ទាប់ រួមទាំងករណីឃាតកម្មគួរឱ្យព្រឺខ្លាច ដែលបង្កដោយជនជាតិចិន នៅក្នុងសប្តាហ៍នេះ តែអាជ្ញាធរខេត្តអះអាងថា ឃាតកម្មនិងបទល្មើសផ្សេងៗ មិនមែនសុទ្ធតែជនជាតិចិន ជាអ្នកបង្កឡើងនោះទេ វាក៏មានជាតិសាសន៍ផ្សេងៗ និងប្រជាពលរដ្ឋខ្មែរ ជាអ្នកប្រព្រឹត្តផងដែរ។
អ្នកសម្របសម្រួលសមាគមអាដហុក (Adhoc) នៅខេត្តព្រះសីហនុ អ្នកស្រី ជៀប សុធារី មានប្រសាសន៍ថា អាជ្ញាធរខេត្តគួរតែពង្រឹងច្បាប់ និងចាត់វិធានការទៅលើជនជាតិចិនឱ្យបានតឹងរ៉ឹង បើទោះបីជនជាតិចិនទាំងនោះប្រព្រឹត្តបទល្មើស ទៅលើជនជាតិចិនដូចគ្នាក៏ដោយ។ អ្នកស្រីបន្ថែមថា ទង្វើទាំងនេះ បានធ្វើឱ្យប្រជាពលរដ្ឋខ្មែរ មានការភ័យខ្លាច ក្នុងការរស់នៅ និងការប្រកបរបររកស៊ីផ្សេងៗរបស់ពួកគាត់។
អ្នកស្រីបន្ថែមថា បច្ចុប្បន្ននេះ ខេត្តព្រះសីហនុមានកាស៊ីណូច្រើន ហើយថា ទីណាមានល្បែងស៊ីសង មានបទល្មើសកើតឡើងច្រើន ព្រោះអ្នកលេងល្បែងមិនខ្លាចប្រព្រឹត្តបទល្មើសទេ នៅពេលពួកគេចាញ់ល្បែង។ អ្នកស្រីថា កាលពីមុនខេត្តព្រះសីហនុ មិនសូវមានឃាតកម្ម ឬបទល្មើសផ្សេងៗដូចសព្វថ្ងៃទេ ប៉ុន្តែបន្ទាប់ពីមានអ្នកវិនិយោគជនជាតិចិនចូលមកច្រើន បទល្មើសនិងឃាតកម្មក៏កើតមានច្រើនដែរ៖ «អារឿងនិយាយពីចិនហ្នឹង ត្រូវនិយាយដោយប្រយ័ត្នជាទីបំផុត សព្វថ្ងៃទៅកន្លែងណាក៏ដោយ អត់មានអ្នកនិយាយពីរឿងចិនទេ សូម្បីតែមន្ត្រីរដ្ឋាភិបាលខេត្តព្រះសីហនុគ្មានហ៊ាននិយាយពីរឿងចិនទេ ហីឥឡូវតែមានរឿងចិនគេបិទហើយ»។
ការលើកឡើងនូវកង្វល់របស់អ្នកស្រីនៅពេលនេះ បន្ទាប់ពីអាជ្ញាធរខេត្តព្រះសីហនុ បានឃាត់ខ្លួនជនជាតិចិនម្នាក់ ពីបទមនុស្សឃាតក្នុងអំពើប្លន់យកលុយ៧ម៉ឺនដុល្លារពីជនរងគ្រោះដែលជាជនជាតិចិនដូចគ្នា។ ជនសង្ស័យជាជនជាតិចិនឈ្មោះ ហ៊ូ យ៉ាយន់ (ZHOU YA YUN) អាយុ២៩ឆ្នាំ ត្រូវបានចាប់ខ្លួនកាលពីថ្ងៃទី១ ខែតុលា ហើយអាជ្ញាធរគ្រោងនឹងបញ្ជូនទៅតុលាការនៅថ្ងៃសៅរ៍នេះ។ ចំណែកជនរងគ្រោះជាជនជាតិចិនដូចគ្នាឈ្មោះ វូ ចេងហ៊ី (WU CHENGHUI) ត្រូវបានជនល្មើសសម្លាប់ដោយកាំបិតប៉ឹងតោ កាលពីថ្ងៃទី៣០ ខែកញ្ញា ហើយសាកសពត្រូវបានកាត់ជាកំណាត់ៗ។អ្នកភូមិម្នាក់រស់នៅក្នុងសង្កាត់លេខ៤ ក្រុងព្រះសីហនុ លោក ផាន់ សុខា បានប្រាប់អាស៊ីសេរី កាលពីថ្ងៃសុក្រទី ៤ ខែតុលា ថា ជនជាតិចិនដែលមករកស៊ីនៅខេត្តនេះ ភាគច្រើនមានចារឹកឈ្លើយ ច្រងេងច្រងាង មិនសូវគោរពច្បាប់ទម្លាប់នៅស្រុកខ្មែរទេ តាំងពីការបើកបរ និង ការបាញ់បោះសេរី។ ដូច្នេះរូបភាពទាំងអស់នេះ បង្ហាញឱ្យឃើញថា ជនជាតិចិនមិនបានផ្ដល់តម្លៃឱ្យម្ចាស់ស្រុកខ្មែរទេ៖ «ខ្ញុំចូលហូបបាយ ហូបកាហ្វេ ខ្ញុំតែងតែលឺសូរពួកគាត់និយាយពីចារឹក ឫក្សពាររបស់ជនជាតិចិនហ្នឹង បើកបរមិនសូវគោរពច្បាប់ ហើយការបាញ់បោះ ការជួញដូរគ្រឿងញៀន ការចាប់ជំរិតអីហ្នឹង គាត់មានការព្រួយបារម្ភច្រើន»។
មន្ត្រីខេត្តព្រះសីហនុ មិនបានបដិសេធ ពីអំពីការកើនឡើង នៃអំពើឃាតកម្ម នៅខេត្តជាប់សមុទ្រមួយនេះនោះឡើយ។ ទោះជាយ៉ាងនេះក្តី អ្នកនាំពាក្យសាលាខេត្តព្រះសីហនុ លោក ឃាង ភារម្យ លើកឡើងថា មិនមែនឱ្យតែអំពើឃាតកម្ម គឺជនជាតិចិនជាអ្នកប្រព្រឹត្តទាំងអស់នោះដែរ៖ «បើកាលណាយើងសង្កត់ធ្ងន់ តែទៅលើជនជាតិចិនហ្នឹង មានន័យថា ការបកស្រាយការលើកឡើងនោះ វាអត់ទាន់មានលក្ខណ:ទូលំទូលាយដែលគួរឱ្យទទួលយកបានទេ»។
ទោះជាយ៉ាងនេះក្តី លោកអះអាងថា បទល្មើសផ្សេងៗ មានការថយចុះ រយៈពេលចុងក្រោយនេះ ទោះលោកមិនអាចប្រាប់ពីចំនួននៃការថយចុះនៃបទល្មើសនោះបាននៅពេលនេះ ព្រោះលោកមិនមានឯកសារនៅក្នុងដៃក៏ដោយ។ ជាមួយគ្នានេះ លោកទទួលស្គាល់ថា នៅមានបទល្មើសកើតឡើងមួយៗ ដែលបង្កដោយជនជាតិចិនដែរ ប៉ុន្តែលោកអះអាងថា អាជ្ញាធរខេត្តតែងតែបានបង្ក្រាបជនដែលបានប្រព្រឹត្ត ហើយយកមកផ្ដន្ទាទោសតាមច្បាប់។
ករណីឃាតកម្ម ដែលប្រព្រឹត្តដោយជនជាតិចិននេះដែរ បានកើតឡើងនៅខេត្តព្រះសីហនុ កាលពីដើមខែឧសភា ដោយជនជាតិចិនម្នាក់ ត្រូវបានជនជាតិគ្នាឯង បាញ់នៅក្នុងរថយន្ត រួចធ្លាក់មកដី ដេកស្លាប់ភ្លាមៗនៅនឹងកន្លែងបាញ់នោះ។
អតីតអភិបាលខេត្តព្រះសីហនុ លោក យន្ត មីន ធ្លាប់បានធ្វើរបាយការណ៍មួយជូនរដ្ឋមន្ត្រីក្រសួងមហាផ្ទៃ លោក ស ខេង ហើយលោកបានលើកឡើងពីការព្រួយបារម្ភអំពីការកើនឡើងនៃវត្តមានរបស់ជនជាតិចិននៅក្នុងខេត្តនេះ។ លោក យន្ត មីន មានប្រសាសន៍ថា ជនជាតិចិនមួយចំនួនបានប្រព្រឹត្តបទឧក្រិដ្ឋ ហើយបានចូលរួមក្នុងការចាប់ជំរិតយកប្រាក់ពីអ្នកវិនិយោគ និងពលករបរទេស ហើយជនជាតិចិនភាគច្រើន កំពុងឈ្លោះប្រកែកជាមួយអ្នកស្រុក៕
No comments:
Post a Comment