2023.01.27
អាជ្ញាធរខេត្តព្រះសីហនុ និងមន្ត្រីកំពូលៗនៃក្រសួងទេសចរណ៍បានធ្វើពិធីទទួលស្វាគមន៍ភ្ញៀវទេសចរចិនជាង ១រយនាក់ (១០៤) ជាលើកដំបូងនៅព្រលានយន្តហោះអន្តរជាតិកេងកេងក្នុងខេត្តព្រះសីហនុ។ អ្នកឃ្លាំមើលព្រួយបារម្ភថា ថា កម្ពុជាអាចនឹងមានហានិភ័យខ្ពស់រីករាលដាលជំងឺកូវីដ-១៩ សាជាថ្មី ដោយសារតែកម្ពុជាមិនមានវិធានការរឹតបន្តឹងវិធានការសុខាភិបាលលើទេសចរចិន។
អាជ្ញាធរខេត្តព្រះសីហនុ និងមន្ត្រីក្រសួងទេសចរណ៍ នៅថ្ងៃទី២៧ ខែមករា ទទួលស្វាគមន៍ភ្ញៀវទេសចរចិនដោយពុំមានការធ្វើតេស្ដពិនិត្យរកមេរោគកូវីដ-១៩ នោះទេ ខណៈក្នុងប្រទេសចិនបន្តកើនឡើងនាក់ឆ្លងជំងឺកាចសាហាវមួយនេះ។
ពិធីទទួលស្វាគមន៍ភ្ញៀវទេសចរចិននៅព្រលានយន្តហោះខេត្តព្រះសីហនុ មានការជូនបាច់ផ្កា និងបំពាក់ក្រមាដល់ពួកគេថែមទៀតផង។
ស្របពេលកម្ពុជាបើកទទួលភ្ញៀវទេសចរចិន ដោយគ្មានវិធានការរឹតបន្តឹងផ្នែកសុខាភិបាល នៅប្រទេសចិនកំពុងរីករាលដាលជំងឺកូវីដ-១៩ និងមានអ្នកឆ្លងជំងឺនេះរាប់ម៉ឺននាក់ក្នុងមួយថ្ងៃ។
អ្នកជំនាញមជ្ឈមណ្ឌលគ្រប់គ្រង និងបង្ការជំងឺឆ្លងរបស់ចិនថា ករណីឆ្លងថ្មីនៃជំងឺកូវីដ១៩ នៅចិនគិតត្រឹមថ្ងៃទី២២ ខែធ្នូ បានឈានដល់កម្រិតកំពូល ដោយអ្នកឆ្លងរហូតដល់ជាង ៧លាន និងមានមនុស្សស្លាប់ប្រចាំថ្ងៃជាង ៤ពាន់នាក់ នៅថ្ងៃទី៤ ខែមករា។
ជាមួយគ្នានេះ សារព័ត៌មាន (BBC) របស់អង់គ្លេសបានដកស្រង់ខ្លឹមសារស្រាវជ្រាវនៃសាកលវិទ្យាល័យ Peking University ដែលបានរកឃើញថា គិតត្រឹមថ្ងៃទី១១ ខែមករា មានមនុស្សប្រហែលជាង ៩០០លាននាក់ នៅក្នុងប្រទេសចិនបានឆ្លងជំងឺកូវីដ-១៩។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងសុខាភិបាលអ្នកស្រី ឱ វណ្ណឌីន និងអ្នកនាំពាក្យក្រសួងទេសចរណ៍ លោក តុប សុភ័ក ដើម្បីសាកសួរអំពីរឿងនេះបានទេនៅថ្ងៃទី២៧ ខែមករា។ ទោះបីជាយ៉ាងណា លោក តុប សុភ័ក ធ្លាប់ប្រាប់វិទ្យុអាស៊ីសេរីថា ការទទួលស្វាគមន៍ភ្ញៀវទេសចរចិនដោយគ្មានរឹតបន្តឹងផ្នែកសុខាភិបាលនេះ គឺជាយុទ្ធសាស្ត្ររបស់រដ្ឋាភិបាលក្នុងការទាក់ទាញទេសចរចិនឱ្យចូលកម្ពុជាកាន់តែច្រើន។
ប៉ុន្តែ ស្នងការនគរបាលខេត្តព្រះសីហនុ លោក ជួន ណារិន្ទ ប្រាប់វិទ្យុអាស៊ីសេរីយ៉ាងខ្លីថា កម្ពុជាពុំមានវិធានការតឹងតែងផ្នែកសុខាភិបាលទេ ពោលគឺមានត្រឹមកាតចាក់វ៉ាក់សាំងពួកគេអាចចូលកម្ពុជាបាន។
អ្នកជំនាញផ្នែកសុខាភិបាល និងមន្ត្រីសង្គមស៊ីវិលព្រួយបារម្ភជំងឺកូវីដ-១៩ រាតត្បាតនៅកម្ពុជាសាជាថ្មី។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី មានប្រសាសន៍ថា កម្ពុជាទទួលស្វាគមន៍ជនជាតិចិនឡើងវិញដោយគ្មានវិធានរឹតបន្តឹងនេះ ដោយសារតែរដ្ឋាភិបាលចង់ស្ដារសេដ្ឋកិច្ចជាតិតាមរយៈទទួលភ្ញៀវទេសចរកាន់តែច្រើន។ អ្នកជំនាញរូបនេះ លើកឡើងថា ទោះបីជារដ្ឋាភិបាលបើកចំហជើងមេឃទទួលចិនដោយគ្មានត្រួតពិនិត្យមេរោគកូវីដ-១៩ ក្ដី ប៉ុន្តែ លោកអំពាវនាវដល់ពលរដ្ឋទៅចាក់វ៉ាក់សាំងដូសជំរុញ ការពារខ្លួនឯង និងទៅពិគ្រោះជាមួយអ្នកជំនាញសុខាភិបាលនៅពេលមានរោគសញ្ញាសង្ស័យមានជំងឺកូវីដ-១៩។
លោក អ៊ូច វុទ្ធី៖ «ប្រសិនជា [ភ្ញៀវទេសចរចិន] គាត់អត់កាតវ៉ាក់សាំង មានត្រឹមតែលិខិតឆ្លងដែន (Passport) គាត់ចូលមកមិនទទួលស្គាល់ពីក្រសួងសុខាភិបាលនៃប្រទេស [ចិន និងកម្ពុជា] ទេយើងអាចយកគាត់មកធ្វើតេស្តរហ័ស (rapid tests)។ ប្រសិនឃើញមានវិជ្ជមានកូវីដ យើងប្រហែលៗ យើងញែកគាត់មួយដុំ ដើម្បីទុកគាត់យកទៅធ្វើ (PCR) ដើម្បីកុំឱ្យមានការរាលដាលឆ្លងមកបងប្អូនប្រជាពលរដ្ឋ»។
ស្រដៀងគ្នានេះដែរ អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ស្នើរដ្ឋាភិបាលពិចារណារឹតបន្តឹងវិធានការសុខាភិបាលឡើងវិញ ដើម្បីការពារកុំឱ្យមានជំងឺកូវីដរាតត្បាតនៅកម្ពុជាសាជាថ្មី។
អ្នកស្រី ជៀប សុធារី៖ «យើងគួរតែប្រុងប្រយ័ត្នដែរ សំខាន់គឺខ្លួនយើង [ប្រជាពលរដ្ឋ] ខ្លួនយើងផ្ទាល់ត្រូវម្ចាស់ការលើខ្លួនឯងដែរ។ ជាបទពិសោធន៍កន្លងមកខេត្តព្រះសីហនុ គឺជាខេត្តមុនគេដែលចាប់ផ្ដើមឆ្លងជំងឺកូវីដ។ ដូច្នេះ រដ្ឋាភិបាលប្រសិនជាលោកបើក ប្រលែងលក្ខខណ្ឌផ្សេងៗខ្លាំងពេកយើងនៅតែមានការព្រួយបារម្ភអ៊ីចឹង ព្រោះរាល់ថ្ងៃនេះយើងទើបតែបានធូរស្រាលបន្តិចទេ»។
ទាំងអ្នកជំនាញផ្នែកសុខាភិបាល និងមន្ត្រីសិទ្ធិមនុស្សព្រមានថា បើកម្ពុជាផ្ទុះជំងឺកូវីដ-១៩ សាជាថ្មី នោះនឹងធ្វើឱ្យសេដ្ឋកិច្ចជាតិនឹងកាន់តែធ្លាក់ចុះធ្ងន់ធ្ងរ ហើយជីវភាពរស់នៅរបស់ពលរដ្ឋប្រចាំនឹងកាន់ដុនដាបជាងមុន។
គិតត្រឹមថ្ងៃទី២៦ ខែមករា កម្ពុជា មានអ្នកឆ្លងជំងឺកូវីដ-១៩ ជិត ១សែន ៤ពាន់នាក់ (១៣៨.៦៨៣) និងមាននាក់ស្លាប់ជាង ៣ពាន់នាក់ (៣.០៥៦)។ ក្នុងនោះនាក់ឆ្លងថ្មីមាន ២ករណីជាប្រភេទមេរោគអូមីក្រុងធ្វើតេស្ដបញ្ជាក់ដោយម៉ាស៊ីន (PCR)៕
No comments:
Post a Comment