2023.02.06
មន្ត្រីជាន់ខ្ពស់គណបក្សយុវជនកម្ពុជាជាច្រើនរូបបានលាលែងពីតំណែង ដោយសារមិនពេញចិត្តប្រធានគណបក្សដោយចោទថា លោក ពេជ្រ ស្រស់ ទទួលប្រាក់ពីលោក ហ៊ុន សែន សម្រាប់ប្រយោជន៍ផ្ទាល់ខ្លួន។ ប៉ុន្តែលោក ពេជ្រ ស្រស់ បដិសេធការចោទប្រកាន់នេះ។
មន្ត្រីជាន់ខ្ពស់គណបក្សយុវជនកម្ពុជា ១៨នាក់ និងថ្នាក់ដឹកនាំថ្នាក់ក្រោមជាតិ នៅតាមមូលដ្ឋានជាច្រើននាក់ទៀត បានលាលែងពីតំណែង។
លិខិតសុំលាលែងពីតំណែងនៅថ្ងៃទី៣ កុម្ភៈ ដែលវិទ្យុអាស៊ីសេរីទទួលបាននោះ រួមមាន អនុប្រធានគណៈកម្មាធិការអចិន្ត្រៃយ៍ និងជាអនុប្រធានគណបក្ស លោក នៅ បូរ៉ា អនុប្រធានគណៈកម្មាធិការអចិន្ត្រៃយ៍ និងជាអនុប្រធានគណបក្ស លោក ហួន ធារិទ្ធ សមាជិកគណៈកម្មាធិការអចិន្ត្រៃយ៍ និងជាអគ្គលេខាធិការគណបក្សលោក ឆុម ចាន់ថន រួមជាមួយថ្នាក់ដឹកនាំជាន់ខ្ពស់ ថ្នាក់ក្រោមជាតិ នៅមូលដ្ឋាន និងសមាជិកជាច្រើននាក់ទៀត។
នៅក្នុងលិខិតលាលែងនេះ ពួកគេបញ្ជាក់ពីមូលហេតុដូចគ្នាថា ដោយសារគ្មានសមត្ថភាព លទ្ធភាព និងពេលវេលាគ្រប់គ្រាន់ ដើម្បីបម្រើការងារជូនគណបក្ស។ ប៉ុន្តែពួកគេបានបញ្ជាក់ប្រាប់វិទ្យុអាស៊ីសេរី នៅថ្ងៃទី៦ កុម្ភៈថា មូលហេតុពិតប្រាកដ ដែលនាំឱ្យមន្ត្រីជាន់ខ្ពស់គណបក្សយុវជនកម្ពុជា នាំគ្នាលាលែងទាំងចង្កោមបែបនេះ ដោយសារប្រធានគណបក្សយុវជនកម្ពុជា លោក ពេជ្រ ស្រស់ បានយកលុយពីលោក ហ៊ុន សែន ជាថ្លៃឈ្នួលសម្រាប់ការបម្រើផលប្រយោជន៍ឱ្យបក្សកាន់អំណាច។ ពួកគេអះអាងថា ភស្តុតាងដែលបញ្ជាក់ថា លុយនោះមានទំនាក់ទំនងជាមួយលោក ហ៊ុន សែន គឺសង្កេតតាមរយៈលោក ពេជ្រ ស្រស់ មានទំនាក់ទំនងជាមួយក្រុមមនុស្សដែលស្និទ្ធនឹងលោក ហ៊ុន សែន តាមរយៈការរកស៊ីវិស័យអចលនទ្រព្យ។ ពួកគេបញ្ជាក់ថា មួយរយៈចុងក្រោយនេះ លោក ពេជ្រ ស្រស់ បានទទួលលុយជាច្រើនដោយគ្មានប្រភពច្បាស់លាស់ និងទិញដីឡូត៍ពុះលក់ជាច្រើនកន្លែង។
ទោះយ៉ាងណាក្ដី មន្ត្រីទាំងនេះបានផ្ញើលិខិតឱ្យវិទ្យុអាស៊ីសេរី ដោយមិនបញ្ចេញឈ្មោះ ឬសំឡេងឡើយ ដោយសារបារម្ភពីសុវត្ថិភាព និងខ្លាចលោក ពេជ្រ ស្រស់ ដែលជាប្រធានគណបក្សប្ដឹងទៅតុលាការ។
ជុំវិញរឿងនេះ ប្រធានគណបក្សយុវជនកម្ពុជា លោក ពេជ្រ ស្រស់ ទទួលស្គាល់ថា ពិតជាមានមន្ត្រីក្នុងគណបក្សបានលាឈប់ពីតួនាទី ក្រោមហេតុផលគ្មានពេលវេលាសម្រាប់ការងារ។ លោកថា ការលាលែងរបស់មន្ត្រីទាំងនោះមិនបានធ្វើឱ្យរង្គោះរង្គើដល់គណបក្សនោះឡើយ និងបានចោទមន្ត្រីទាំងនោះថា បាននាំគ្នារៀបគម្រោងលាឈប់ ដែលលោកចាត់ទុកបញ្ហានេះថា ជាទង្វើក្បត់។ ជាមួយគ្នានេះលោកថា លោកនឹងចាត់វិធានការតាមផ្លូវច្បាប់ ប្ដឹងមន្ត្រីទាំងនោះឡើងតុលាការ ប្រសិនបើពួកគេផ្សព្វផ្សាយពីគោលបំណងនៃការលាឈប់ខុសពីក្នុងលិខិត ដែលធ្វើឱ្យប៉ះពាល់ដល់កិត្តិយសរបស់លោក។
លោក ពេជ្រ ស្រស់៖ «ធ្វើអ្វីក៏ដោយនៅប្រទេសកម្ពុជាគេមានច្បាប់ តែបើធ្វើអ្វីខុសច្បាប់ ហើយខ្ញុំចាត់ការតាមផ្លូវច្បាប់ អាហ្នឹងកុំខឹងខ្ញុំ ព្រោះគាត់បានទៅប្រាប់អាស៊ីសេរីថា ខ្ញុំបានទទួលលុយពីគណបក្សកាន់អំណាច។ ចុះបើដឹងអ៊ីចឹង មិនព្រមមកប្រាប់ខ្ញុំ ទៅប្រាប់អាស៊ីសេរីធ្វើអី? ចុះម៉េចមិនមកតតាំងជាមួយខ្ញុំ ចាំបាច់លាឈប់ធ្វើអី?»។
គណបក្សយុវជនកម្ពុជា បង្កើតឡើងនៅ ខែធ្នូ ឆ្នាំ២០១៥ ដោយមានលោក ពេជ្រ ស្រស់ ជាប្រធាន។ ទោះបីជាគណបក្សប្រឆាំងទើបនឹងចាប់កំណើតមួយនេះ មិនទាន់មានសំឡេងគាំទ្រច្រើនពីប្រជាពលរដ្ឋ ហើយមិនមានអាសនៈនៅក្នុងរដ្ឋសភាក្ដី ក៏ប្រធានគណបក្សលោក ពេជ្រ ស្រស់ រួមជាមួយប្រធានគណបក្សជាង១០ ផ្សេងទៀត មានឱកាសផ្សារភ្ជាប់ខ្លួននឹងគណបក្សកាន់អំណាចតាមរយៈតំណែងជាឧត្ដមក្រុមប្រឹក្សាពិគ្រោះ និងផ្ដល់យោបល់ ដែលបង្កើតឡើង ក្រោមគំនិតផ្ដួចផ្ដើមរបស់លោក ហ៊ុន សែន កាលពីឆ្នាំ២០១៨។
ក្រៅពីតួនាទីជាឧត្ដមក្រុមប្រឹក្សាពិគ្រោះ និងផ្ដល់យោបល់ លោក ពេជ្រ ស្រស់ ក៏សកម្មក្នុងការបំពេញតួនាទីជាអ្នកថែសួនប្រជាធិបតេយ្យ និងការពារផ្លាកសន្តិភាពឱ្យលោក ហ៊ុន សែន ដែរ តាមរយៈការគាំទ្រកំហុសគោលនយោបាយដែលជាប់ពាក់ព័ន្ធនឹងការរំលោភសិទ្ធិមនុស្សរបស់លោក ហ៊ុន សែន និងថ្កោលទោសគណបក្សប្រឆាំង ដែលចេញមុខរិះគន់គណបក្សកាន់អំណាច។
ស្នាដៃសំខាន់របស់លោក ពេជ្រ ស្រស់ ប្រធានគណបក្សយុវជនកម្ពុជា រួមមាន ការចាប់ដៃគ្នាជាមួយគណបក្សហ៊្វុនស៊ិនប៉ិច ដើម្បីប្ដឹងរំលាយគណបក្សសង្គ្រោះជាតិ និងប្ដឹងគណៈកម្មការរៀបចំបុណ្យសពបណ្ឌិត កែម ឡី រួមមាន ព្រះតេជព្រះគុណ គុណ ប៊ុត ប៊ុនតិញ លោក ប៉ា ងួនទៀង និងលោក មឿន តុលា ពីបទរំលោភលើសេចក្ដីទុកចិត្តករណីបច្ច័យបុណ្យសព កាលពីឆ្នាំ២០១៧ ទោះបីគ្រួសារបណ្ឌិត កែម ឡី បដិសេធមិនដូចការចោទប្រកាន់នេះក៏ដោយ។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន មើលឃើញថា ការបែកបាក់ផ្ទៃក្នុងរបស់គណបក្សយុវជនកម្ពុជា ទំនងបណ្ដាលមកពីទំនាស់ផលប្រយោជន៍ ព្រោះគណបក្សនយោបាយតូចៗ មួយចំនួននៅកម្ពុជាបង្កើតឡើង ដើម្បីដើរតួសម្ដែងក្នុងល្ខោនប្រជាធិបតេយ្យ សេរីពហុបក្ស ដែលនិពន្ធឡើងដោយមេដឹកនាំផ្ដាច់ការប៉ុណ្ណោះ។ លោកសង្កេតឃើញថា នៅក្នុងបរិបទនយោបាយកម្ពុជា បើគណបក្សប្រឆាំងណា ដែលហ៊ានចេញមុខរិះគន់រដ្ឋាភិបាលដោយបើកចំហ នឹងត្រូវគណបក្សកាន់អំណាចធ្វើទុក្ខបុកម្នេញ ចាប់ខ្លួន និងរំលាយចោល។ ផ្ទុយមកវិញ ប្រសិនបើគណបក្សប្រឆាំងណា ព្រមធ្វើជាសាវ័កហែហមជួយជ្រោងទង់ទេវតាឱ្យលោក ហ៊ុន សែន នោះពួកគេនឹងទទួលបានគ្រឿងសំណែនតួនាទីក្នុងក្របខ័ណ្ឌរដ្ឋ លាភសក្ការ និងផលប្រយោជន៍ជាច្រើនទៀត។
លោក អ៊ុំ សំអាន៖ «គណបក្សតូចៗ មួយចំនួនហ្នឹង គ្រាន់តែជាឧបករណ៍របស់គណបក្សប្រជាជន ចូលរួមការបោះឆ្នោតហ្នឹង ដើម្បីបង្ហាញថា មានគណបក្សចូលរួមការបោះឆ្នោតហ្នឹងច្រើនណាស់នៅកម្ពុជា! សេរីពហុបក្ស»។
ទាក់ទងនឹងរឿងគណបក្សក្រៅរដ្ឋាភិបាលមួយចំនួន ដែលទទួលលុយពីលោក ហ៊ុន សែន មកបង្កើតគណបក្ស ដើម្បីបំបែកសំឡេងឆ្នោត និងកំដរល្ខោននយោបាយឱ្យលោក មិនមែនជារឿងថ្មីទេ។ កន្លងមក អតីតមន្ត្រីជាន់ខ្ពស់គណបក្សហ៊្វុនស៊ិនប៉ិច និងជាអគ្គស្នងការរងនគរបាលជាតិពាក់ផ្កាយ៣ ដែលអាជ្ញាធរលោក ហ៊ុន សែន តាមចាប់ខ្លួន និងប្ដឹងប៉ូលិសអន្តរជាតិ «អាំងទែរប៉ូល» ឱ្យចាប់ខ្លួន ពីបទចាប់ជំរិតមនុស្ស គឺលោក ងួន សឿ បានចេញមុខមកសារភាពកាលលោកនៅមានជីវិត កាលពីឆ្នាំ២០២២ ថ្លែងថា ធ្លាប់បានទទួលលុយពីលោកនាយករដ្ឋមន្ត្រី ហ៊ុន សែន មកបង្កើតគណបក្សថ្មី ដើម្បីប្រកួតប្រជែងការបោះឆ្នោត កាលពីឆ្នាំ១៩៩៨។ លោកបញ្ជាក់ថា លោកជាអ្នក ដែលធ្វើឱ្យគណបក្សហ៊្វុនស៊ិនប៉ិចចុះខ្សោយ និងបែកបាក់គ្នា ដើម្បីកុំឱ្យគណបក្សនេះ មានកម្លាំងមកប្រជែងជាមួយលោក ហ៊ុន សែន បន្តទៀត៕
No comments:
Post a Comment