2023.03.24
តុលាការកំពូល នៅព្រឹកថ្ងៃទី២៤ ខែមីនា សម្រេចបដិសេធបណ្ដឹងសាទុក្ខរបស់ស្ត្រីសហជីពនៅក្នុងក្រុមហ៊ុនណាហ្គាវើលដ៍ចំនួន ៧រូប ដោយរួមមានប្រធានសហជីព កញ្ញា ឈឹម ស៊ីថរ ផងដែរ ។
សាលដីការបស់តុលាការកំពូលនេះ សម្រេចបន្តឃុំខ្លួនកញ្ញា ស៊ីថរ នៅក្នុងពន្ធនាគារ ពាក់ព័ន្ធនឹងសំណុំរឿងញុះញង់ដែលកំពុងដំណើរការសវនាការ នៅសាលាដំបូងរាជធានីភ្នំពេញ ។ ចំណែកស្ត្រីចំនួន៦រូបទៀត រួមមាន អ្នកស្រី ឈឹម សុខន លោកស្រី ហៃ សុភាព លោកស្រី ឃ្លាំង សុបិន្ត លោកស្រី រី សុវណ្ណឌី លោកស្រី ស៊ុន ស្រីពេជ្រ និងលោកស្រី ទូច សិរីមាស ដែលកំពុងស្ថិតនៅក្រៅឃុំបណ្ដោះអាសន្ននោះ នឹងត្រូវបន្តដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការដដែល។
ការចោទប្រកាន់ និងការដាក់ទោសទណ្ឌទៅលើស្ត្រីសហជីពទាំង៧រូប ពាក់ព័ន្ធនឹងបទចោទញុះញង់នេះ ដោយសារតែសកម្មភាពកូដកម្មអហិង្សារបស់ពួកគេ ទាមទារឲ្យក្រុមហ៊ុនណាហ្គាវើលដ៍ ដោះស្រាយវិវាទការងារ ក្រោយពេលក្រុមហ៊ុន បានបញ្ឈប់ បុគ្គលិកទ្រង់ទ្រាយធំនៅក្រុមហ៊ុនកាស៊ីណូ ណាហ្គាវើលដ៍ ដែលរួមមានថ្នាក់ដឹកនាំនិងសមាជិកសហជីពណាហ្គាវើលដ៍ ក្នុងបំណងរំលាយសហជីពមួយនេះ។ ដំបូងឡើយ សមត្ថកិច្ចបានចាប់ខ្លួនស្ត្រីសហជីពទាំង៧រូបជាបន្តបន្ទាប់ កាលពីដើមឆ្នាំ២០២២ ហើយត្រូវបានដោះលែងវិញ ក្រោយឃុំខ្លួនក្នុងពន្ធនាគារអស់រយៈពេល២ខែ ។
ប៉ុន្តែ ប្រធានសហជីព កញ្ញា ស៊ីថរ ត្រូវបានសមត្ថកិច្ច ចាប់ខ្លួនឡើងវិញ នៅព្រលានយន្តហោះអន្តរជាតិភ្នំពេញ និងបញ្ជូនទៅឃុំខ្លួនក្នុងពន្ធនាគារព្រៃស (ម២) ម្តងទៀត កាលពីថ្ងៃទី២៦ ខែវិច្ឆិកា ឆ្នាំ២០២២ រហូតមកដល់ពេលនេះ។
ក្រុមកូដករណាហ្គាវើលដ៍ និងមន្ត្រីសិទ្ធិមនុស្ស ចាត់ទុកថា សេចក្តីសម្រេចរបស់តុលាការកំពូលនេះ គឺជារឿងអយុត្តិធម៌។
No comments:
Post a Comment