ដោយ ប្រាជ្ញ ចេវ
2015-10-03 rfa
 |
| លោក កឹម សុខា ប្រធានស្ដីទីគណបក្សសង្គ្រោះជាតិ
ផ្ដល់បទសម្ភាសន៍ដល់អ្នកកាសែតនៅមុខពន្ធនាគារព្រៃស
កាលពីព្រឹកថ្ងៃទី២៧ ខែកក្កដា ឆ្នាំ២០១៥។
RFA/Brach Chev
|
មន្ត្រីជាន់ខ្ពស់នៃ គណបក្សកាន់អំណាចលើកឡើងថា អនុប្រធានគណបក្សសង្គ្រោះជាតិ ដែលរិះគន់ថា គណបក្សប្រជាជនកម្ពុជា មានចំណុចខ្សោយនោះ មិនមានតម្លៃស្មើនឹងអ្នកផ្សព្វផ្សាយលក់ផលិតផង ដែលមិនត្រឹមបង្អួតខ្លួនឯងប៉ុណ្ណោះ គឺថែមទាំងបង្អាប់គេថែមទៀត។ ចំណែកអ្នកវិភាគហៅសារនយោបាយនេះថា ជាអាយ៉ៃឆ្លើយឆ្លងមុនការបោះឆ្នោតប៉ុណ្ណោះ។
អ្នកនាំ ពាក្យគណបក្សប្រជាជនកម្ពុជា លោក សុខ ឥសាន និយាយថា លោក កឹម សុខា គួរយកពេលវេលាទៅពង្រឹងគណបក្សរបស់ខ្លួនជាជាងមករិះគន់គណបក្ស ប្រជាជនកម្ពុជា។ លោកបន្តថា អ្នកផ្សាយផ្សព្វផ្សាយពាណិជ្ជកម្ម គេអួតតែផលិតផលរបស់ខ្លួនទេ គេមិនដែលបង្អាប់ផលិតផលអ្នកផ្សេង ប៉ុន្តែលោក កឹម សុខា មិនត្រឹមតែបង្អួតគណបក្សរបស់ខ្លួនទេ ថែមទាំងបង្អាប់គណបក្សប្រជាជនកម្ពុជា ក្នុងពេលដែលគណបក្សប្រឆាំងត្រឹមតែផ្ដល់ការសន្យានៅឡើយ៖ «ជាធម្មតាទេ គណបក្សប្រឆាំងមិនដែលសរសើរគណបក្សកាន់អំណាចទេ។ ខ្ញុំយល់ថា បក្សប្រឆាំងគួរខិតខំយកទៅពង្រឹង ឬបង្កើតគុណភាពបក្សគាត់ទៅគឺជាង (គណបក្សសង្គ្រោះជាតិ) ចាញ់ទាំងអ្នកផ្សាយផលិតផលផ្សេងៗផង កាលណាគេផ្សាយ គេលើកតែគុណសម្បត្តិរបស់គេទេ គេមិនដែលរិះគន់ផលិតផលរបស់គេទេ»។
ការ ផ្ដើមរិះគន់គណបក្សកាន់អំណាចជាថ្មីទៀតរបស់គណបក្សប្រឆាំងនេះ គឺនៅក្រោយការព្រមានចំៗរបស់លោក ហ៊ុន សែន និងចំពេលដែលគណបក្សថ្មីៗចាប់ផ្ដើមធ្វើសកម្មភាព និងផ្ដើមរិះគន់គណបក្សប្រឆាំង។
ឆ្លើយ នឹងសំណួររបស់អ្នកសារព័ត៌មានកាលពីថ្ងៃទី២ ខែតុលា អនុប្រធានគណបក្សសង្គ្រោះជាតិ និងជាអនុប្រធានរដ្ឋសភា លោក កឹម សុខា និយាយថា ចំណុចខ្សោយគណបក្សប្រជាជនកម្ពុជា មានច្រើនណាស់ ប៉ុន្តែលោកមិនទាន់និយាយនៅពេលនេះទេ ទុកនិយាយនៅពេលឃោសនាបោះឆ្នោត។ លោកបន្តថា សព្វថ្ងៃគណបក្សកាន់អំណាចប្រើប្រាស់ចំណុចខ្លាំងរបស់ខ្លួនស្ទើរអស់ ទៅហើយ ដែលសព្វថ្ងៃគណបក្សប្រជាជនកម្ពុជា កំពុងតែប្រើប្រាស់នោះ គឺអំណាចរដ្ឋ និងប្រព័ន្ធតុលាការ៖ «ខ្ញុំគិតថា ប្រជាជនកម្ពុជា រកឃើញមុនខ្ញុំ មុនគណបក្សសង្គ្រោះជាតិ ទៀត ចំណុចខ្សោយគណបក្សប្រជាជន ច្រើនដែលគណបក្សសង្គ្រោះជាតិ បានកត់ត្រាហើយអស់ហើយ នៅពេលឃោសនាយើងនឹងនិយាយ»។
លោក សុខ ឥសាន ថ្លែងអះអាងថា គណបក្សប្រជាជនកម្ពុជា មានគុណសម្បត្តិផ្ដាច់មុខ គឺរំដោះប្រទេសរួចផុតពីរបបប្រល័យពូជសាសន៍ឆ្នាំ១៩៧៩ បង្កើតកិច្ចព្រមព្រៀងសន្តិភាព ២៣ តុលា ឆ្នាំ១៩៩១ និងការរៀបចំប្រទេសឲ្យសន្តិភាពពេញលេញក្រោយបោះឆ្នោតឆ្នាំ១៩៩៣។
ទោះ យ៉ាងនេះក្តី សាស្ត្រាចារ្យផ្នែកវិទ្យានយោបាយ លោកបណ្ឌិតបញ្ចេញមតិយោបល់ថា គុណសម្បត្តិគណបក្សកាន់អំណាចគឺទទួលបានគុណបំណាច់ធំក្នុងការដឹកនាំ ប៉ុន្តែបើធ្វើច្រើនក៏ខុសច្រើនដែរ។ យ៉ាងណាក៏ដោយចុះ លោកបណ្ឌិត រស់ រ៉ាវុធ ចង់ឃើញគណបក្សទាំងពីររក្សាភាពស្ងប់ស្ងៀមសិន ព្រោះការឌឺដងគ្នានេះ អាចធ្វើឲ្យរាស្ត្រម្ចាស់ឆ្នោតមានការព្រួយបារម្ភ៖ «គណបក្សទាំងពីរគួរតែធ្វើយ៉ាងណាឲ្យប្រជាជនទុកចិត្ត ឲ្យប្រជាជនមានការគាំទ្រ ជៀសវាងការវាយប្រហារគ្នាតាំងពីមិនទាន់ឃោសនាបោះឆ្នោត ធ្វើឲ្យប្រជាពលរដ្ឋ និងប្រទេសជាតិខាតបង់ទៅវិញ»។
ក្រៅពីរិះគន់ចំណុចខ្សោយរបស់គណបក្សប្រជាជនកម្ពុជា លោក កឹម សុខា ក៏ទទួលស្គាល់ចំណុចខ្សោយរបស់ខ្លួនដែរ។ លោកថា គណបក្សប្រឆាំងមានបញ្ហារចនាសម្ព័ន្ធ ការរូបរួមមិនទាន់បានរឹងមាំ សារនយោបាយមិនទាន់មានសំឡេងតែមួយ។
ដោយឡែកអ្នកនាំ ពាក្យគណបក្សប្រជាជនកម្ពុជា លោក សុខ ឥសាន ថា ចំណុចខ្សោយរបស់គណបក្សប្រជាជនកម្ពុជា គឺមន្ត្រីបក្សមួយចំនួនមិនគោរពតាមគោលនយោបាយគណបក្ស ឬកម្មវិធីនយោបាយរបស់រដ្ឋាភិបាល។ ប៉ុន្តែលោក កឹម សុខា រិះគន់ថា តុលាការមិនឯករាជ្យ អំពើពុករលួយ បញ្ហាដីធ្លី ភាពក្រីក្រ យុវជនអត់ការងារធ្វើ ចំណាកស្រុក បញ្ហាបូរណភាពទឹកដី បញ្ហាសង្គមកិច្ច អប់រំ និងសុខាភិបាល៕
No comments:
Post a Comment