ដោយ សាន សែល
2015-10-04 rfa
 |
| នគរបាលចរាចរណ៍ខេត្តព្រះសីហនុ
ចុះអប់រំច្បាប់ចរាចរណ៍ផ្លូវគោកដល់អ្នកប្រើប្រាស់ផ្លូវសាធារណៈ
កាលពីថ្ងៃទី៨ ខែកក្កដា ឆ្នាំ២០១៥។
RFA/Den Ayuthyea
|
ក្នុងការចូលរួមប្រារព្ធពិធីបុណ្យភ្ជុំបិណ្ឌ ចាប់ពីថ្ងៃទី២៨ ខែកញ្ញា ដល់ថ្ងៃទី១៣ ខែតុលា ពលរដ្ឋជាច្រើនតែងធ្វើដំណើរត្រឡប់ទៅស្រុកកំណើតវិញ។ ទន្ទឹមគ្នានេះដែរ ប្រជាពលរដ្ឋត្អូញត្អែរពីការលំបាកក្នុងការធ្វើដំណើរ ដោយម្ចាស់រថយន្តឈ្នួលផ្ទុកលើសកំណត់ បើកបរហួសល្បឿនកំណត់ ដែលអាចធ្វើឲ្យមានគ្រោះថ្នាក់កើតឡើង។ ទាំងប្រជាពលរដ្ឋ ទាំងសង្គមស៊ីវិល ក៏បានកត់សម្គាល់ថា ឲ្យតែពេលមានបុណ្យជាតិធំៗម្តងៗ តែងមានកុងត្រូលជជុះដាក់ពង្រាយតាមផ្លូវ ស្ទាក់យកលុយពីប្រជាជន។
ប្រជាពលរដ្ឋ និងសង្គមស៊ីវិលលើកឡើងថា បញ្ហាអនុវត្តច្បាប់ចរាចរណ៍មិនបានត្រឹមត្រូវ និងកុងត្រូលជជុះ ជាបញ្ហាចម្បងដែលមិនអាចឲ្យគ្រោះថ្នាក់ចរាចរណ៍ថយចុះ។ ករណីនេះ ពួកគេស្នើឲ្យរដ្ឋាភិបាល ទប់ស្កាត់កុំឲ្យមានកុងត្រូលជជុះ និងពង្រឹងការអនុវត្តច្បាប់នៅតាមផ្លូវពេលមានបុណ្យជាតិធំៗ។
ការលើកឡើងរបស់ពលរដ្ឋ និងសង្គមស៊ីវិលនេះ ស្របពេលដែលគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ប.គ) កាលពីថ្ងៃទី១ ខែកញ្ញា បានចេញសេចក្តីណែនាំឲ្យអ្នកធ្វើដំណើរគោរពច្បាប់ចរាចរណ៍ ដោយមិនត្រូវបើកលើសល្បឿនកំណត់ មិនត្រូវបើកបរពេលស្រវឹង ត្រូវពាក់មួក និងខ្សែក្រវាត់សុវត្ថិភាពឲ្យបានត្រឹមត្រូវ។
អ្នកនាង កែវ ចាន់រិទ្ធ ប្រជាពលរដ្ឋម្នាក់ដែលត្រូវធ្វើដំណើរទៅស្រុកកំណើតនៅខេត្តពោធិ៍សាត់ អំពាវនាវឲ្យរដ្ឋាភិបាល ទប់ស្កាត់កុងត្រូលជជុះដើម្បីបញ្ចៀសគ្រោះថ្នាក់ចរាចរណ៍នៅក្នុងពេលបុណ្យភ្ជុំបិណ្ឌ។ អ្នកនាងរៀបរាប់ថា កុងត្រូលជជុះបានជំរិតយកប្រាក់ពីម្ចាស់រថយន្តឈ្នួល ហើយម្ចាស់រថយន្តឈ្នួល បានដំឡើងថ្លៃឈ្នួលឡាន និងដឹកមនុស្សលើសចំណុះ ដែលអ្នកនាងថា ប្រការនេះវាងាយប្រឈមនឹងគ្រោះថ្នាក់ចរាចរណ៍។ អ្នកនាងក៏សង្កេតឃើញថា នៅពេលមានបុណ្យទានម្តងៗ កុងត្រូលជជុះកើនឡើង៖ «នៅតាមដងផ្លូវ ក្នុងនាមខ្ញុំជាប្រជាពលរដ្ឋ នៅថ្ងៃទូទៅអត់សូវមានកុងត្រូលយកលុយឡានរត់ឈ្នួលទេ តែដល់ថ្ងៃបុណ្យទានសំខាន់ៗ ឃើញមានកុងត្រូលរបស់ប៉ូលិសចរាចរណ៍កាក់យកលុយ។ អ្នករត់ឡានដែលហុចលុយឲ្យ បានអាចចេញទៅបាន។ ចង់និយាយថា ពួកគាត់ហ្នឹង គឺបិទភ្នែកហ្មងហ្នឹង។ គាត់បណ្ដោយឲ្យឡានហ្នឹងទៅ យកតែលុយទេ គឺឡានអាចទៅមុខបាន ទោះបីគាត់ដឹកលើសចំណុះម៉េចក៏អាចទៅមុខបាន»។
សេចក្ដីអំពាវនាវដែលចុះហត្ថលេខាដោយ លោក ត្រាំ អ៊ីវតឹក អនុប្រធានអចិន្ត្រៃយ៍នៃ គ.ស.ប.គ ស្នើដល់អ្នកបើកបរកុំឲ្យបើកបរលើសល្បឿនកំណត់។ ល្បឿនកំណត់ដែល គ.ស.ប.គ បានស្នើនោះ គឺនៅក្រៅទីប្រជុំជន រថយន្តធុនតូចគួរបើកក្នុងល្បឿន ៨០គីឡូម៉ែត្រក្នុងមួយម៉ោង ហើយនៅក្នុងទីប្រជុំជន គួរបើកក្នុងល្បឿន ៤០គីឡូម៉ែត្រក្នុងមួយម៉ោង ហើយនៅក្នុងទីប្រជុំជន អ្នកបើកម៉ូតូ ត្រូវបើកក្នុងល្បឿន ៣០គីឡូម៉ែត្រក្នុងមួយម៉ោង។
លោក សន ជ័យ តំណាងបណ្ដាញគណនេយ្យភាពសង្គមអាស៊ីបូព៌ា លើកឡើងថា បញ្ហាកើតឡើងអាចបណ្ដាលពីមន្ត្រីប៉ូលិសចរាចរណ៍ មិនបានអនុវត្តច្បាប់ចរាចរណ៍ឲ្យបានម៉ឺងម៉ាត់។ លោកថា កត្តានេះធ្វើឲ្យអ្នកបើកបរ និងមន្ត្រីនគរបាល មិនខ្លាចច្បាប់ ដោយអ្នកបើកបរ បើកលើសល្បឿនកំណត់ និងបើកបរពេលស្រវឹង ជាដើម៖ «ព្រោះកន្លងមកនេះ អត់មានប្រព័ន្ធត្រួតពិនិត្យឲ្យបានម៉ត់ចត់ទេ ធ្វើការបើកលឿននៅតែកើតមាន ហើយវាមុខសញ្ញាធំដែលនាំឲ្យមានគ្រោះថ្នាក់ចរាចរណ៍ ហើយអ្នកដែលបើកលឿននេះទៀតសោត ជាក្រុមមនុស្សដែលស្រវឹង»។
ស្រដៀងគ្នានេះដែរ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) កត់សម្គាល់ថា មានប៉ូលិសចរាចរណ៍មួយចំនួនឆ្លៀតឱកាសជំរិតយកលុយម្ចាស់រថយន្តឈ្នួល ក្នុងពេលមានបុណ្យជាតិម្តងៗ។ លោកថា វិធានការចាំបាច់ គឺការអនុវត្តច្បាប់ចរាចរណ៍ឲ្យមានប្រសិទ្ធភាព៖ «ជំរុញឲ្យនគរបាលចរាចរណ៍ទាំងអស់ហ្នឹង ធ្វើការឲ្យមានប្រសិទ្ធភាព មែនទៅចាំយកលុយពីឡានទាំងអស់ហ្នឹងទេ ហើយឡានណាអត់ឲ្យលុយឃាត់ទុក ឡានណាឲ្យលុយ គឺទៅតាមសេរី»។
ឆ្លើយតបនឹងការលើកឡើងខាងលើ លោក ចេវ ហាក់ នាយការិយាល័យចរាចរណ៍ផ្លូវគោករាជធានីភ្នំពេញ លើកឡើងថា ខាងមន្ត្រីរបស់លោកបានទប់ស្កាត់មិនឲ្យមានការដាក់កុងត្រូលជជុះអនាធិបតេយ្យកើតឡើង ក្នុងពេលបុណ្យជាតិធំៗនោះទេ។ លោកបន្ថែមថា ចំពោះការអនុវត្តច្បាប់ពេលមានបុណ្យជាតិ ក៏មានការរឹតបន្តឹងការអនុវត្តច្បាប់ផងដែរ ដោយលោកថា ខាងមន្ត្រីរបស់លោកនឹងបន្ថែមម៉ោងធ្វើការ ដើម្បីធានាសន្តិសុខសុវត្ថិភាពប្រជាជន៖ «នៅក្នុងឱកាសបុណ្យភ្ជុំបិណ្ឌនេះ មិនមានកុងត្រូលជជុះទេ សំខាន់គឺការពារសុវត្ថិភាពបងប្អូនប្រជាពលរដ្ឋ»។
តាមការសិក្សាស្ដីពីការត្រួតពិនិត្យល្បឿនបើកបររបស់អង្គការជនពិការអន្តរជាតិ (Handicap International) ដែលចេញផ្សាយនៅខែកក្កដា ឆ្នាំ២០១៥ ពីរភាគបីនៃចំនួនអ្នកបើកបើកបរ បានបើកបរហួសល្បឿនកំណត់។ អង្គការនេះអះអាងថា ការបើកហួសល្បឿនកំណត់នេះ ជាមូលហេតុចម្បងទីមួយ ដែលបង្កឲ្យមានគ្រោះថ្នាក់ចរាចរណ៍នៅក្នុងប្រទេសកម្ពុជា។
តួលេខរបស់ក្រសួងមហាផ្ទៃ បង្ហាញថា រយៈពេល ៩ខែក្នុងឆ្នាំ២០១៥ មានគ្រោះថ្នាក់ចរាចរណ៍ ៣.៥០៥ករណីកើតឡើង ដោយមានអ្នកស្លាប់ ១.៧៣៥នាក់ និងរបួសធ្ងន់ចំនួន ៣.៣០៩នាក់៕
No comments:
Post a Comment