ដោយ សាន សែល
2016-12-28
ពិធីដង្ហែសពបណ្ឌិត កែម ឡី ទៅបញ្ចុះនៅស្រុកកំណើតរបស់លោកនាភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ កាលពីថ្ងៃទី២៤ ខែកក្កដា ឆ្នាំ២០១៦។ RFA/Chuop Sereyroth
RFA/Chuop Sereyroth
សាលាដំបូងរាជធានីភ្នំពេញ សម្រេចបិទបញ្ចប់ការស៊ើបសួរសំណុំរឿងឃាតកម្មបណ្ឌិត កែម ឡី។ សេចក្តីជូនដំណឹងរបស់ចៅក្រមស៊ើបសួរនៃសាលាដំបូងរាជធានីភ្នំពេញ លោក សេង លាង ចេញផ្សាយកាលពីថ្ងៃទី២៣ ធ្នូ ឲ្យដឹងថា សាលាដំបូងរាជធានីភ្នំពេញ បានស៊ើបសួរ និងប្រមូលភស្តុតាងទាក់ទងនឹងសំណុំរឿងនេះហើយ។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា ថ្លែងតាមប្រព័ន្ធទំនាក់ទំនងតេឡេក្រាម (Telegram) ថា នេះជាការជូនដំណឹងអំពីការបិទការស៊ើបសួរតែប៉ុណ្ណោះ តែសំណុំរឿងនេះមិនទាន់ត្រូវបញ្ជូនទៅជំនុំជម្រះទេ។
លោកបញ្ជាក់ថា ចៅក្រមស៊ើបសួរបានជូនដំណឹងអំពីការបិទការស៊ើបសួរដល់ភាគីដើមបណ្ដឹងរដ្ឋប្បវេណី តាមការកំណត់ដោយច្បាប់។ លោកឲ្យដឹងថា បន្ទាប់ពីការជូនដំណឹងអំពីការបិទការស៊ើបសួរដល់ភាគីដើមបណ្ដឹងរដ្ឋប្បវេណី ជនជាប់ចោទ និងព្រះរាជអាជ្ញាហើយ ចៅក្រមស៊ើបសួរនឹងបញ្ជូនសំណុំរឿងទាំងមូលទៅព្រះរាជអាជ្ញា ដើម្បីធ្វើដីកាសន្និដ្ឋានស្ថាពរ៕
No comments:
Post a Comment