ដោយ យ៉ង ចាន់តារា
2016-12-18
(ពីឆ្វេង) អគ្គលេខាធិការរងគ.ជ.ប លោក នី ចរិយា មន្ត្រីសមាគមអាដហុក (ADHOC) លោក យី សុខសាន្ត លោក នី សុខា អ្នកស្រី លឹម មុន្នី និងលោក ណៃ វ៉ង់ដា ពេលបញ្ជូនមកសាលាឧទ្ធរណ៍ នៅថ្ងៃទី១១ ខែវិច្ឆិកា ឆ្នាំ២០១៦។ RFA/Brach Chev
RFA/Brach Chev
ក្រុមអង្គការសិទ្ធិមនុស្សជាតិ និងអន្តរជាតិ ចេញសេចក្តីប្រកាសព័ត៌មានរួមគ្នានៅរសៀលថ្ងៃទី១៨ ខែធ្នូ អំពាវនាវឲ្យអាជ្ញាធរកម្ពុជា អនុវត្តអនុសាសន៍របស់ក្រុមការងារអង្គការសហប្រជាជាតិ ស្ដីពីការឃុំឃាំងដោយឥតច្បាប់ (WGAD) ដោយដោះលែងមន្ត្រី គ.ជ.ប និងមន្ត្រីការពារសិទ្ធិមនុស្សសមាគមអាដហុក (ADHOC) ៤រូប ដែលកំពុងជាប់ឃុំ និងផ្តល់សំណងសមរម្យដល់ពួកគេ។
ការអំពាវនាវនេះ ធ្វើឡើងបន្ទាប់ពីក្រុមការងារអង្គការសហប្រជាជាតិ ស្ដីពីការឃុំឃាំងដោយឥតច្បាប់ (WGAD) រកឃើញថា ការធ្វើទុក្ខបុកម្នេញលើមន្ត្រីសមាគមអាដហុក ដែលគ្រាន់តែផ្តល់ “ការប្រឹក្សាផ្នែកច្បាប់ដោយត្រឹមត្រូវ និងជំនួយផ្សេងទៀត” គឺជាការរំលោភបំពានសិទ្ធិសេរីភាពក្នុងការជួបជុំរបស់អ្នកការពារសិទ្ធិមនុស្សទាំងនោះ។
ក្រុមការងារអង្គការសហប្រជាជាតិ បានចាត់ទុកថា ការរំលោភបំពានសិទ្ធិជំនុំជម្រះដោយស្មើភាព ការឃុំខ្លួនបណ្ដោះអាសន្នរង់ចាំសវនាការដោយមិនសមហេតុផល និងសេចក្តីថ្លែងការណ៍របស់អាជ្ញាធរកម្ពុជា ដែលបានបដិសេធសិទ្ធិក្នុងការសន្មតថាគ្មានកំហុសរបស់អ្នកទាំង ៥នាក់ គឺមានសភាពធ្ងន់ធ្ងរគ្រប់គ្រាន់ក្នុងការពិចារណាថា ការបន្តឃុំខ្លួនពួកគេ គឺមិនត្រឹមត្រូវ។
មន្ត្រីសិទ្ធិមនុស្សសមាគមអាដហុក ៤រូប គឺលោក នី សុខា លោក យី សុខសាន្ត លោក ណៃ វ៉ង់ដា និងអ្នកស្រី លឹម មុន្នី ត្រូវបានអាជ្ញាធរឃុំខ្លួនបណ្ដោះអាសន្នរង់ចាំសវនាការ ក្រោមការចោទប្រកាន់ពីបទសូកប៉ាន់សាក្សីក្នុងសំណុំរឿងអាស្រូវស្នេហារបស់លោក កឹម សុខា និងនាង ខុម ចាន់តារាទី ហៅស្រីមុំ។
ចំណែកអគ្គលេខាធិការរង គ.ជ.ប លោក នី ចរិយា ដែលជាអតីតប្រធានការិយាល័យស៊ើបអង្កេតសមាគមការពារសិទ្ធិមនុស្សអាដហុក កាលពីថ្ងៃទី២២ កញ្ញា កន្លងទៅ ត្រូវបានចៅក្រមជំនុំជម្រះនៃតុលាការក្រុងភ្នំពេញ កាត់ទោសឲ្យជាប់ពន្ធនាគារ ៦ខែ និងពិន័យជាប្រាក់ចំនួន ៦លានរៀល ក្រោមបទចោទបរិហារកេរ្តិ៍ បរិហារបង្កាច់កេរ្តិ៍ និងពីបទប្រើប្រាស់ឥទ្ធិពលដាក់សម្ពាធលើតុលាការខេត្តសៀមរាប។
ក្រៅពីបណ្ដឹងបរិហារកេរ្តិ៍នេះ លោក នី ចរិយា ក៏កំពុងជាប់បណ្ដឹងមួយទៀតដែរ គឺបណ្ដឹងទាក់ទងនឹងរឿងអាស្រូវស្នេហារបស់លោក កឹម សុខា និងនាង ខុម ចាន់តារាទី ហៅស្រីមុំ ដោយលោកត្រូវបានតុលាការក្រុងភ្នំពេញ ចោទពីបទសមគំនិតសូកប៉ាន់សាក្សី។
គិតមកទល់នឹងពេលនេះ ទាំងលោក នី ចរិយា និងមន្ត្រីសមាគមអាដហុកទាំង ៤រូប ត្រូវបានអាជ្ញាធរឃុំខ្លួនអស់រយៈពេល ២៣៤ថ្ងៃហើយ ចាប់តាំងពីពេលដែលពួកគេត្រូវបានចាប់ខ្លួនកាលពីអំឡុងខែមេសា កន្លងទៅ៕
No comments:
Post a Comment