ដោយ អ៊ុង សេរីវុទ្ធ
2017-03-24
សាលាដំបូងរាជធានីភ្នំពេញ។ រូបថតថ្ងៃទី៣០ ខែមេសា ឆ្នាំ២០១៦
RFA/Brach Chev
ចៅក្រមស៊ើបសួរសាលាដំបូងរាជធានីភ្នំពេញ លោក ប៊ុន ធី សម្រេចឃុំខ្លួនមន្ត្រីក្រសួងមហាផ្ទៃមួយរូបពាក់ព័ន្ធនឹងករណីពុករលួយ បន្ទាប់ពីអង្គភាពប្រឆាំងអំពើពុករលួយបញ្ជូនសំណុំរឿងនេះមកតុលាការកាលពីថ្ងៃទី២៣ ខែមីនា។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា ឲ្យដឹងនៅថ្ងៃទី២៤ ខែមីនា ថា ជនសង្ស័យឈ្មោះ ហ៊ុយ ហឿន ដែលជានាយរងផ្នែកសិទ្ធិនិពន្ធ និងសិទ្ធិប្រហាក់ប្រហែល ការិយាល័យកម្មសិទ្ធិបញ្ញា នៃនាយកដ្ឋាននគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ ត្រូវបានចោទប្រកាន់បទពីបទវិតិក្រម។ ការចោទនេះផ្អែកតាមមាត្រា ៥៩២ និង ៥៩៣ នៃក្រមព្រហ្មទណ្ឌ និងមាត្រា ៣២ នៃច្បាប់ប្រឆាំងអំពើពុករលួយ ក្រោយបញ្ចប់ការដេញដោលចំពោះមុខ។ ចំណែកមន្ត្រីប៉ូលិសប្រឆាំងបទល្មើសសេដ្ឋកិច្ចម្នាក់ទៀតឈ្មោះ ឯម កុសល ត្រូវបានចោទប្រកាន់ដូចគ្នា ខណៈរូបគេកំពុងគេចខ្លួន។
លោក ហ៊ុយ ហឿន ត្រូវបានអង្គភាពប្រឆាំងអំពើពុករលួយឃាត់ខ្លួនកាលពីព្រឹកថ្ងៃទី២១ ខែមីនា ក្នុងហាងកាហ្វេមួយកន្លែង ក្រោយអង្គភាពនេះតាមដានលោកជាច្រើនកន្លែង ចំពោះការទារលុយពីម្ចាស់ក្រុមហ៊ុនសហគ្រាសនានា ដោយតម្រូវបង់ប្រចាំខែដល់រូបគេ ចាប់ពី ២ម៉ឺនរៀល ដល់ ១ពាន់ដុល្លារអាមេរិក។ អង្គភាពប្រឆាំងអំពើពុករលួយ បញ្ជាក់ថា លោក ហ៊ុយ ហឿន បានដើរទារប្រាក់ពីក្រុមហ៊ុនសហគ្រាសជាង ១០០ទីតាំង នារាជធានីភ្នំពេញ អស់ពេលជាង ១០ខែ បន្ទាប់ពីលោកត្រូវបានចាត់តាំងបំពេញការងារនេះ៕
No comments:
Post a Comment