ដោយ វ៉ា សំណព្វ 26/03/2017 26/03/2017
rfi
លោក កឹមសុខា ប្រធានគណបក្សសង្រ្គោះជាតិ ក្នុងពេលថ្លែងទៅកាន់សមាជិកក្រុមប្រឹក្សាឃុំសង្កាត់គណបក្សនៅក្នុងខេត្តសៀមរាប ថ្ងៃទី ២៦ មីនា ឆ្នាំ២០១៧។
@Facebook kem sokha
លោក កឹម សុខា ប្រធានគណបក្សសង្គ្រោះជាតិនៅថ្ងៃទី២៦មីនានេះ បានបោះពាក្យឲ្យគណបក្សនយោបាយទាំងអស់ ធ្វើការប្រកួតប្រជែងគ្នា លើគោលនយោបាយនៃគណបក្សរៀងៗខ្លួន។ បើតាមប្រធានគណបក្សប្រឆាំងថ្មីរូបនេះ ការប្រកួតប្រជែងលើគោលនយោបាយនៃគណបក្សនីមួយៗ គឺដើម្បីជាសវាងការវាយប្រហារគ្នាដោយពាក្យសម្តីអសុរោះ។ ហើយអ្វីៗ គឺទុកឲ្យប្រជាពលរដ្ឋជាអ្នកសម្រេច។ អ្នកនាំពាក្យគណបក្សកាន់អំណាចលោក សុខ ឥសាន បានស្វាគមន៍ តែរក្សាសិទ្ធិក្នុងការទាមទារឲ្យគណបក្សប្រឆាំងដកពាក្យស្លោក “ដូរមេឃុំបម្រើបក្ស ដាក់មេឃុំបម្រើរាស្ត្រ"។
ខណៈដែលយុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់នៅសល់មិនដល់២ខែទៀតនោះផង ប្រធានគណបក្សប្រឆាំងលោក កឹម សុខា បានណែនាំទៅដល់សមាជិករបស់លោក ឲ្យជៀសវាងការប្រើប្រាស់ពាក្យពេជន៍អសុរោះ ដៀលត្មះ ឬវាយប្រហារគ្នា ដែលបង្ករឲ្យមានការឈឺចាប់រវាងគ្នានឹងគ្នា។ ជំនួសដោយការប្រកួតប្រជែងគ្នាបែបប្រទូសសារាយនេះ ប្រធានគណបក្សប្រឆាំងលោក កឹម សុខា បានអំពាវនាវឲ្យគណបក្សនយោបាយទាំងអស់ ធ្វើការប្រកួតប្រជែងគ្នាតែលើ “គោលនយោបាយនៃគណបក្សរៀងៗខ្លួន"។
ការលើកឡើងរបស់លោក កឹម សុខា បានធ្វើឡើងទំនងជាសំដៅដល់ការចាប់ខ្លួន និងការចោទប្រកាន់ទៅលើសកម្មជនគណបក្សប្រឆាំងពីសំណាក់រដ្ឋាភិបាលនាពេលកន្លងមក។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានស្វាគមន៍ចំពោះការលើកឡើងរបស់លោក កឹម សុខា។ ប៉ុន្តែលោកបានរក្សាសិទ្ធិក្នុងការទាមទារឲ្យគណបក្សប្រឆាំង លុបចោលពាក្យស្លោក “ដូរមេឃុំបម្រើបក្ស ដាក់មេឃុំបម្រើរាស្ត្រ។ បើតាមលោក សុខ ឥសាន ពាក្យស្លោកនេះ នឹងបង្ករឲ្យមានការប៉ះពាល់ដល់គណបក្សផ្សេងៗទៀត។
គួរជំរាបជូនថា កាលពីថ្ងៃទី២មីនា គណបក្សសង្គ្រោះជាតិបានអនុម័តនូវគោលនយោបាយអាទិភាព៥ចំណុច ក្រោមពាក្យស្លោក “ដូរមេឃុំបម្រើបក្ស ដាក់មេឃុំបម្រើរាស្ត្រ” សម្រាប់ការឃោសនាបោះឆ្នោតឃុំសង្កាត់ចាប់ពីថ្ងៃទី២០ឧសភាដល់ថ្ងៃទី២មិថុនាខាងមុខ ខណៈដែលគណបក្សប្រជាជនកម្ពុជាដែលកំពុងកាន់អំណាច ក៏បានដាក់ចេញនូវគោលនយោបាយសំខាន់ៗសម្រាប់អភិវឌ្ឍ ឃុំ-សង្កាត់ ឆ្នាំ២០១៧-២០២២ ចំនួន១៣ចំណុច នៅក្រោមពាក្យស្លោកចំនួន៣៥។ បើតាមលោក សុខ ឥសាន គោលនយោបាយរបស់គណបក្សប្រជាជនកម្ពុជានឹងទទួលបានការគាំទ្រច្រើន ពីប្រជាពលរដ្ឋដែលជាម្ចាស់ឆ្នោត។
បើតាមលោក កឹម សុខា ប្រធានគណបក្សប្រឆាំងវិញ ការប្រកួតប្រជែងគ្នាលើ “គោលនយោបាយនៃគណបក្សរៀងៗខ្លួន” គឺដើម្បីបានផលប្រយោជន៍ទៅដល់ប្រជាពលរដ្ឋនិងប្រទេសជាតិ។ “យើងមិនត្រូវប្រកួតគ្នាលើពាក្យសម្ដី អសុរោះ ដៀលត្មះ វាយប្រហារ ឬធ្វើទុក្ខបុកម្នេញ បង្កការឈឺចាប់ឲ្យគ្នាទៀតនោះឡើយ។ ហើយអ្វីៗគ្រាប់យ៉ាង គឺទុកជូនប្រជាពលរដ្ឋខ្មែរ ដែលជាម្ចាស់ឆ្នោត គឺជាអ្នកសម្រេច។ នេះបើតាមការថ្លែងរបស់លោក កឹម សុខា នៅក្នុងវគ្គផ្សព្វផ្សាយផ្ទៃក្នុងនូវគោលនយោបាយអាទិភាព សម្រាប់ការបោះឆ្នោត ឃុំ-សង្កាត់ នៅខេត្តសៀមរាប នាព្រឹកថ្ងៃទី២៦មីនានេះ។
សូមបញ្ជាក់ថា យុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់អាណត្តិទី៤ នឹងធ្វើឡើងចាប់ពីថ្ងៃទី២០ឧសភា ដល់ថ្ងៃទី ២ មិថុនាខាងមុខ ខណៈដែលការបោះឆ្នោតនឹងត្រូវធ្វើឡើងនៅថ្ងៃអាទិត្យ ទី៤ មិថុនាឆ្នាំ២០១៧នេះ៕
No comments:
Post a Comment