ដោយ៖ ជុំ ជោគជាតា | ថ្ងៃទី 10 មិនា 2017
wmc
ពីរសប្តាហ៍មុននឹងសាលាដំបូងរាជធានីភ្នំពេញប្រកាសសាលក្រមស្តីពីការកាត់ទោសជនសង្ស័យសម្លាប់លោកបណ្ឌិតកែម ឡី សមាជិកគ្រួសារនិងសហការីរបស់លោកកែម ឡី បានប្រតិកម្មចំពោះភស្តុតាងដែលតុលាការបានបង្ហាញ។
មន្ត្រីសង្គមស៊ីវិលមានទស្សនប្រហាក់ប្រហែលគ្នានេះដែរ។
សាកសពលោកបណ្ឌិតកែម ឡី ដែលត្រូវបានខ្មាន់កាំភ្លើងបាញ់សម្លាប់កាលពីថ្ងៃទី១០កក្ដដា កន្លងទៅ។
កញ្ញា ជុំ ជោគជាតា ជូនសេចក្ដីរាយការណ៍ដូចតទៅ៖
ភ្នំពេញ៖ ប្អូនប្រុសបង្កើតនិងសហការីជិតស្និទរបស់បណ្ឌិតកែម ឡី សង្ស័យលើភស្តុតាងជាគ្លីបវីដេអូដែលដាក់បង្ហាញដោយសាលាដំបូងរាជធានីភ្នំពេញក្នុងការកាត់ទោសជនជាប់សង្ស័យក្នុងការសម្លាប់អតីតអ្នកវិភាគសង្គមនិងនយោបាយរូបនេះ។
សាលាដំបូងរាជធានីភ្នំពេញកាលពីថ្ងៃទី ២ខែមិនា បានកាត់ទោសជួប សម្លាប់ ដែលជាជនសង្ស័យថា ជាឃាតករបាញ់សម្លាប់លោកបណ្ឌិត កែម ឡី។
ក្នុងគ្លីបវីដេអូរយៈពេលជាងដប់នាទី ជួប សម្លាប់ ត្រូវគេមើលឃើញពីក្រោយខ្នងនិងមានការបង្ហាញកាំភ្លើងខ្លី។ ប៉ុន្តែ មជ្ឈដ្ឋានមួយចំនួនយល់ថា វីដេអូនេះ មិនមានរូបភាពច្បាស់ ហើយ មិនបង្ហាញចំណុចជាក់ស្តែង ។
វីដេអូគ្លីបនេះ ដែលតុលាការអះអាងថាយកចេញពីកាម៉េរាសុវត្ថិភាពក្នុងស្តាម៉ាត របស់ស្ថានីយ៍ប្រេងឥន្ធនៈបូកគោ ដែលជាទីលោកកែម ឡី ត្រូវបាញ់សម្លាប់ ។
លោកកែម រិទ្ធីសិទ្ធ ប្អូនបង្កើតរបស់លោកកែម ឡី មិនជឿលើវីដេអូគ្លីបនោះទេ ដោយសារលោកឃើញថា ជួបសម្លាប់ដែលជាជនសង្ស័យ និងជនសង្ស័យក្នុងវីដេអូគ្លីប មានភិនភាគខុសគ្នា ។
កែម រិទ្ធីសិទ្ធ ៖ « យើងមើលឃើញនៅក្នុងវីដេអូកាំមេរ៉ានោះ វាមានការខុសគ្នា ។ រូបដែលគេបញ្ចាំងនៅស្ដាម៉ាតចំហៀងនោះ វាមានរូបសង្ហារ ហើយខោរៀងសរបន្ថិច មិនខ្មៅទេ ស្បែកជើងនឹងពណ៌សរ ហើយជួបសម្លាប់យើងមើលឃើញទៅ ខោហ្នឹងខ្មៅ ហើយស្បែកជើងហ្នឹងក៏ខ្មៅដែរ»។
ដូចគ្នានេះ លោក មួង សូនី ប្រធានសមាគមសម្ពន្ធ័និស្សិតបញ្ញាវន្ត័ខ្មែរ និងជាកូនសិស្សរបស់លោក កែម ឡី បានលើកឡើងថា វីដេអូដែលគេបានបញ្ចេញនោះ មានរូបភាពមិនច្បាស់ និងពិបាកចំណាំ ។
លោក មួង សូនី ៖ «ពេលដែលឃាតករនៅក្នុងម៉ាតហ្នឹងគាត់បាញ់ ឃើញថាអាក់ៗ យើងមើលទៅដូចឥតដឹងថាជានរណាច្បាស់លាស់ជាអ្នកបាញ់ទេ ហើយមួយទៀតយើងឃើញថា នៅស្ដាម៉ាតហ្នឹងមានកាំមេរ៉ាជាច្រើន ហេតុអីបានជាមិនយកកាំមេរ៉ាទាំងអស់នោះមកបញ្ចាំងវិឱ្យឃើញ »។
លោកបណ្ឌិត កែម ឡី អ្នកវិភាគដែលមិនសំចៃមាត់ ត្រូវឃាតករបាញ់សម្លាប់កាលពីថ្ងៃទី ១០ ខែកក្កដា ឆ្នាំ២០១៦ នៅពេលដែលលោកកំពុងស្ថិតក្នុងស្តាម៉ាត នៅស្ថានីយ៍ប្រេងឥន្ធនៈកាល់តិច ត្រង់ចំណុចភ្លើងស្តុបបូកគោ ខណ្ឌ័ចំការមន ក្រុងភ្នំពេញ។
ភ្លាមៗនោះ ជនសង្ស័យជាឃាតករត្រូវបានចាប់ខ្លួន។ ហើយជួបសម្លាប់ដែលទើបត្រូវបានចាប់ខ្លួនភ្លាមៗបានសារភាពថាខ្លួនសម្លាប់លោកកែម ឡី ដោយសារលោកកែម ឡី ជំពាក់បំណុលខ្លួនចំនួន៣០០០ដុល្លារអាមេរិក។
លោក ជួប សម្លាប់ ដែលអះអាងខ្លួនឯងថា ជាខ្មាន់កាំភ្លើង បាញ់សម្លាប់ លោកបណ្ឌិត កែម ឡី
នៅក្នុងសវនាការកាលពីដើមខែនេះ ជួប សង្ស័យ បានទទួលស្គាល់ថាខ្លួនបានសម្លាប់លោកបណ្ឌិត កែម ឡី ដោយសារមូលហេតុខាងលើនេះ។
សេចក្តីអត្ថាធិប្បាយរបស់សមាជិកគ្រួសារនិងសហការរីរបស់លោកកែម ឡី ធ្វើឡើងពីរសប្តាហ៍ប៉ុណ្ណោះមុននឹងសាលាដំបូងរាជធានីភ្នំពេញប្រកាសសាលក្រម។សាលក្រមដែលនឹងត្រូវប្រកាសនៅថ្ងៃទី២៣ខែមិនានេះ។
ជុំវិញរឿងនេះដែល អ្នកនាំពាក្យសាលាដំបូងរាជធានីភ្នំពេញ លោក លី សុផាណា មិនអាចសុំការឆ្លើយតបបាននោះទេ នៅថ្ងៃសុក្រនេះ ។
ដោយឡែក លោក មឿន តុលាការជំរុញឲ្យតុលាការបង្ហាញវីដេអូគ្លីបទាំងស្រុងដើម្បីឲ្យសាធារណជនវិនិច្ឆ័យដោយសារតែជនសង្ស័យដែលត្រូវចាប់ខ្លួននោះមានអត្តសញ្ញាណមិនច្បាស់លាស់ ហើយជនសង្ស័យច្បាស់ជាមានបក្សពួកបន្ថែមទៀត ៕
1 comment:
When Mr Kem ley was killed, there was no forensic team there to find any incriminated evidence but only some monkeys in the police uniform walking around doing monkey business.
Post a Comment