សត្វត្មាត ដែលជាសត្វកម្រ ចុះស៊ីចំណីនៅអាហារដ្ឋានត្មាតក្នុងស្រុកឆែប ខេត្តព្រះវិហារ
WCS
ដោយ សរ ពិសី 01/04/2017 01/04/2017
rfi
ដីសម្បទានសេដ្ឋកិច្ច ដីសម្បទានសង្គមកិច្ចយោធា និងការកាប់រានទន្ទ្រានព្រៃនៅខេត្តព្រៃវិហារ កំពុងតែគម្រាមកំហែងជីវិតសត្វស្លាបកម្រៗជាច្រើនប្រភេទ។ នេះបើតាមការគូសបញ្ជាក់របស់មន្ដ្រីស្រាវជ្រាវសត្វព្រៃ នៅក្នុងទឹកដីខេត្តព្រៃវិហារ។ មន្ដ្រីដដែលព្រួយបារម្ភថា ប្រសិនបើការផ្ដល់ដីសម្បទាននិងការរានព្រៃរបស់ពលរដ្ឋមិនត្រូវបានគ្រប់គ្រងឲ្យបានល្អប្រសើរទេ នោះសត្វស្លាបដ៏កម្រនៅតំបន់នេះ អាចនឹងឈានទៅដល់ការផុតពូជជាក់ជាពុំខាន។
ខេត្តព្រះវិហារ ដែលស្ថិតនៅតំបន់ខ្ពង់រាបភាគខាងជើងប្រទេសកម្ពុជា គឺជាទីជម្រកដ៏សំខាន់សម្រាប់សត្វស្លាបកម្រជាច្រើនប្រភេទ ដូចជា៖ សត្វត្រយ៉ងយក្ស សត្វត្រយ៉ងចង្កំកស សត្វត្មាត សត្វក្រៀល ទាព្រៃស្លាបស អង្កត់ខ្មៅ សត្វត្រដក់ធំនិងត្រដក់តូចជាដើម។ សត្វស្លាបទាំងនេះ សុទ្ធសឹងតែជាប្រភេទសត្វជិតរងការគម្រាមកំហែងជាសកល និងរងការគម្រាមកំហែងជាសកល ព្រមទាំងរងគ្រោះជិតផុតពូជបំផុតនៅលើសកលលោក។
ប៉ុន្តែពីមួយឆ្នាំទៅមួយឆ្នាំ សម្បុកសត្វ ក៏ដូចចំនួនសត្វទាំងនេះ កាន់តែខើចទៅៗ ដោយសារតែការបរបាញ់ ការប្រមូលយកសម្បុកពងកូន ការកាប់រានទន្ទ្រានព្រៃដែលជាទីជម្រករបស់សត្វ និងការផ្ដល់ដីសម្បទាននៅក្បែរជម្រកសត្វជាដើម។ នេះបើតាមការអះអាងរបស់លោក រស់ វ៉ាន់ ប្រធានក្រុមផ្នែកស្រាវជ្រាវសត្វព្រៃ នៃដែនជម្រកសត្វព្រៃគូលែនព្រហ្មទេព នៅខេត្តព្រះវិហារ។ មន្ដ្រីក្រសួងបរិស្ថានរូបនេះគូសបញ្ជាក់ថា សកម្មភាពរបស់មនុស្សដូចដែលលើកឡើងខាងដើម គឺជាការគម្រាមកំហែងដ៏ធំសម្រាប់ប្រភេទសត្វព្រៃដ៏កម្រនៅលើសកលលោក ដែលកំពុងរស់នៅក្នុងទឹកដីខេត្តព្រះវិហារ។
ជាការកត់សម្គាល់ ដើម្បីឆ្លើយតបនឹងការគម្រាមកំហែងនេះ ក្រសួងបរិស្ថានសហការជាមួយអង្គការសមាគមអភិរក្សសត្វព្រៃ WCS បានផ្ដួចផ្ដើមឲ្យមានកម្មវិធីការពារសម្បុកសត្វស្លាប នៅឆ្នាំ២០០២។ ជាកម្មវិធីដែលអប់រំលើកទឹកចិត្តឲ្យប្រជាសហគមន៍ចូលរួមការពារនិងយាមសម្បុកពងកូនរបស់សត្វស្លាបសំខាន់ៗ ជាថ្នូរនឹងប្រាក់លើកទឹកចិត្តម្នាក់១ម៉ឺន៤ពាន់រៀលក្នុងមួយថ្ងៃ។ អស់ពេល១៥ឆ្នាំកន្លងមកនេះ កម្មវិធីការពារសម្បុកសត្វស្លាបបានរួមចំណែកយ៉ាងច្រើន ក្នុងការជួយឲ្យពងសត្វស្លាបកម្រញាស់ដោយជោគជ័យ ចៀសផុតពីការរំខានផ្សេងៗ។
ប៉ុន្តែ បើទោះបីជាមានកម្មវិធីការពារសម្បុកសត្វស្លាបដូច្នេះក៏ដោយ មន្ដ្រីក្រសួងបរិស្ថាន លោក រស់ វ៉ាន់ បានរំឭកថា ការផ្ដល់ដីសម្បទាននិងការរានព្រៃរបស់ពលរដ្ឋ គួរតែត្រូវបានគ្រប់គ្រងឲ្យបានល្អប្រសើរ។ ព្រោះបើពុំដូច្នោះទេ សត្វស្លាបដ៏កម្រនៅតំបន់ខ្ពង់រាបភាគខាងជើងនេះ អាចនឹងឈានទៅដល់ការផុតពូជជាក់ជាពុំខាន៕
No comments:
Post a Comment