ដោយ ថា កិត្យា
2017-05-28
rfa
លោក គឹម សុខ (ក្នុងឯកសណ្ឋានអ្នកទោស) អ្នកឃ្លាំមើលបញ្ហាសង្គម និងនយោបាយ ពេលបញ្ជូនចេញពីសវនាការសាលាឧទ្ធរណ៍ នៅថ្ងៃទី៦ ខែមីនា ឆ្នាំ២០១៧។ RFA/Rann Samnang
RFA/Rann Samnang
អ្នកឃ្លាំមើលនយោបាយ និងសង្គម លោក គឹម សុខ ដែលកំពុងជាប់ពន្ធនាគារ បានផ្ញើលិខិតមួយច្បាប់ថា លោកនឹងធ្វើកូដកម្មបង្អត់អាហារខ្លួនឯងរយៈពេល ៧ថ្ងៃ ដើម្បីអង្វរប្រជាពលរដ្ឋដែលមានឈ្មោះបោះឆ្នោត ឲ្យទៅចូលរួមបោះឆ្នោតឲ្យបានគ្រប់គ្នានៅថ្ងៃទី៤ ខែមិថុនា ខាងមុខនេះ ដើម្បីផ្លាស់ប្ដូរមេឃុំកុម្មុយនីស្តភ្នែកខ្វាក់ ដាក់មេឃុំប្រជាធិបតេយ្យភ្នែកភ្លឺ។ រីឯអ្នកនាំពាក្យបក្សកាន់អំណាច ថាលិខិតរបស់លោក គឹម សុខ គ្មានឥទ្ធិពលអ្វីឡើយ ហើយពលរដ្ឋក៏មិនទទួលយកសំណូមពររបស់លោកដែរ។
សារលិខិតមួយច្បាប់របស់លោក គឹម សុខ ដែលដាស់តឿនឲ្យពលរដ្ឋបោះឆ្នោតនេះ គឺត្រូវបានផ្ញើចេញពីពន្ធនាគារតាមរយៈមេធាវីរបស់លោក គឺលោក ជូង ជូងី ឲ្យជួយផ្សព្វផ្សាយនៅថ្ងៃទី២៨ ខែឧសភា ហើយលិខិតមួយនេះ ក៏ត្រូវបានគេយកទៅបង្ហោះផ្សព្វផ្សាយបន្តព្រោងព្រាតនៅលើបណ្ដាញសង្គមហ្វេសប៊ុក (facebook)។
មេធាវីការពារក្តីលោក គឹម សុខ គឺលោក ជូង ជូងី បញ្ជាក់ថា លិខិតមួយនេះ គឺកូនក្តីរបស់លោកបានសរសេរដោយផ្ទាល់នៅចំពោះមុខលោក ហើយពឹងឲ្យលោកជួយយកទៅផ្សព្វផ្សាយបន្ត។ ក្នុងសារលិខិតនោះ លោក គឹម សុខ ផ្ដើមសរសេររៀបរាប់ថា លោកឃ្លានបោះឆ្នោតដូរមេឃុំ ដើម្បីសុខចម្រើនស្រុកភូមិ ជាងឃ្លានបាយចំអែតក្រពះ ដើម្បីគ្រាន់តែជីវិតរស់ទៅទៀត។ លោក គឹម សុខ បន្តថា សូមក្រោកឡើងជាមួយលោក បោះឆ្នោតដូរមេឃុំកុម្មុយនីស្តភ្នែកខ្វាក់ ដាក់មេឃុំប្រជាធិបតេយ្យភ្នែកភ្លឺ។
អ្នកឃ្លាំមើលនយោបាយ និងសង្គម លោក គឹម សុខ ដែលកំពុងជាប់ពន្ធនាគារដោយសារបណ្ដឹងរបស់លោកនាយរដ្ឋមន្ត្រី ហ៊ុន សែន នោះ ក៏ប្រកាសដែរថា លោកសម្រេចចិត្តបង្អត់អាហារខ្លួនឯង ៧ថ្ងៃ ចាប់ពីថ្ងៃទី២៩ ខែឧសភា ដល់ថ្ងៃទី៤ ខែមិថុនា ដើម្បីអង្វរឲ្យជនរួមឈាមខ្មែរទាំងនៅក្នុងប្រទេស និងក្រៅប្រទេសដែលមានឈ្មោះបោះឆ្នោត សូមទៅបោះឆ្នោតឲ្យបានគ្រប់គ្នា ហើយបោះឆ្នោតផ្លាស់ប្ដូរឲ្យបាននូវមេដឹកនាំឃុំ-សង្កាត់ដែលជាមេរោគកុម្មុយនីស្តសម្លាប់សិទ្ធិសេរីភាពប្រជាធិបតេយ្យរបស់ប្រជាពលរដ្ឋនៅមូលដ្ឋានកន្លងមក។
លោកមេធាវី ជូង ជូងី លើកឡើងថា លោកមានការព្រួយបារម្ភចំពោះការធ្វើកូដកម្មបង្អត់អាហារមួយសប្ដាហ៍នេះ ប៉ុន្តែលោកគោរពឆន្ទៈរបស់កូនក្តី។ ទោះយ៉ាងណា លោកនឹងព្យាយាមចូលសួរសុខទុក្ខអំឡុងពេលនេះតាមដែលអាចធ្វើទៅបាន៖ «ខ្ញុំមានការព្រួយបារម្ភ តែខ្ញុំគោរពឆន្ទៈរបស់គាត់»។
លោកវេជ្ជបណ្ឌិតមួយរូបសុំមិនបញ្ចេញឈ្មោះ បញ្ជាក់ថា ប្រសិនបើមនុស្សមានសុខភាពល្អ ហើយគាត់បង្អត់អាហារមួយសប្ដាហ៍នោះ គឺមិនមានផលប៉ះពាល់ធ្ងន់ធ្ងរឡើយ ប្រសិនបើគាត់ទទួលទានទឹកធម្មតា។ ប៉ុន្តែប្រសិនបើមនុស្សដែលមានសុខភាពខ្សោយ ហើយដាច់ចិត្តបង្អត់អាហារ និងស្ថិតនៅក្នុងទីកន្លែងលំបាកគ្មានខ្យល់ចេញចូលជាដើមនោះ គឺរាងកាយរបស់គាត់អាចរងផលប៉ះពាល់ធ្ងន់ធ្ងរ។
យ៉ាងណាក្តី នៅក្នុងសារលិខិតរបស់លោក គឹម សុខ ក៏បានបញ្ជាក់ដែរថា ការបោះឆ្នោត គឺជាដំណោះស្រាយសន្តិវិធីនៃការផ្លាស់ប្ដូរមេដឹកនាំទាំងនៅមូលដ្ឋាន និងថ្នាក់ជាតិ ហើយគ្មានទេសង្គ្រាម។ លោកថា ក្រុមមេដឹកនាំបច្ចុប្បន្ន ទាំងនៅថ្នាក់មូលដ្ឋាន និងកម្រិតជាតិ បានឆ្លងពេញបន្ទុកនូវមេរោគឧក្រិដ្ឋកម្ម និងពុករលួយ ចូលជ្រាបគ្រប់សព្វដល់ខួរក្បាល ឆន្ទៈ ស្មារតី និងព្រលឹងវិញ្ញាណរបស់ពួកគាត់អស់ហើយ។ ដូច្នេះ បើចូលចិត្ត អាណិត និងស្រឡាញ់ពួកគាត់ គឺត្រូវផ្លាស់ប្ដូរពួកគាត់ចេញ ដើម្បីនាំពួកគាត់ចេញទៅព្យាបាលឲ្យបានទាន់ពេលវេលា។
ឆ្លើយតបចំពោះលិខិតនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា វាកាន់តែបង្ហាញនូវចរិតជាអ្នកប្រឆាំង ព្រោះអ្នកប្រឆាំងមានចរិតមិនដែលសរសើរបក្សកាន់អំណាចទេ។ លោកនៅតែមានជំនឿថា ប្រជាពលរដ្ឋនឹងមានសុភវិនិច្ឆ័យសម្រេចចិត្តបោះឆ្នោតឲ្យគណបក្សប្រជាជនកម្ពុជា បន្តដឹកនាំប្រទេសតទៅទៀត ទាំងថ្នាក់ជាតិ និងថ្នាក់ក្រោមជាតិ ហើយពលរដ្ឋនឹងមិនយកសំណូមពររបស់លោក គឹម សុខ ឡើយ ព្រោះការលើកឡើងរបស់លោក គឹម សុខ គឺក្នុងន័យសងសឹក ក្នុងន័យគំនុំ និងក្នុងន័យចងអាឃាតជាមួយគណបក្សកាន់អំណាចប៉ុណ្ណោះ៖ «ខ្ញុំយល់ថាគាត់ជាជនជាប់ចោទ ដូច្នេះវាគ្មានឥទ្ធិពលអីដល់ប្រជាពលរដ្ឋដែលបោះឆ្នោតតាមចិត្តគាត់ចង់ទេ។ ប្រជាពលរដ្ឋគាត់មានសុភវិនិច្ឆ័យនៅក្នុងការសម្រេចគូសសន្លឹកជូនគណបក្សណាមួយដែលលោកជឿទុកចិត្ត ហើយជឿទុកចិត្តនេះដោយប្រការអី គឺទី១ គឺមានការកសាងនូវសមិទ្ធផលនានានៅក្នុងសង្គមជាតិ និងប្រជាពលរដ្ឋពិតៗ។ ទី២ គឺថាមានតែគណបក្សប្រជាជនកម្ពុជា ទេដែលជាស្ថាបនិកនៃសន្តិភាពសុខចិត្តបូជាសាច់ស្រស់ឈាមស្រស់ដើម្បីសន្តិភាព ហើយសន្តិភាពនេះហើយសុខសាន្តត្រាណរបស់ប្រជាពលរដ្ឋ។អ៊ីចឹងនេះហើយគឺជាគុណសម្បត្តិដ៏ច្រើនលើសលប់របស់គណបក្សប្រជាជន ដែលប្រជាពលរដ្ឋលោកមើលឃើញជាក់ស្តែង»។
ក្រៅពីលោក គឹម សុខ នោះ កាលពីថ្ងៃទី២៤ ខែឧសភា កន្លងទៅ មន្ត្រីអាដហុកម្នាក់ក្នុងចំណោម ៤នាក់កំពុងជាប់ឃុំ គឺលោក នី សុខា បានផ្ញើលិខិតសរសេរផ្ទាល់ដៃរបស់លោក តាមរយៈកូនប្រុសលោក មកអាស៊ីសេរី ដោយសរសេរថា ក្នុងសង្គមមួយដែលដឹកនាំបែបផ្ដាច់ការ ពិបាកធ្វើឲ្យពួកលោកទទួលបានយុត្តិធម៌ពីតុលាការណាស់ ព្រោះយុត្តិធម៌មានសម្រាប់តែអ្នកមានអំណាច និងបក្សរបស់គេប៉ុណ្ណោះ។
លោកអំពាវនាវឲ្យពលរដ្ឋខ្មែរដែលមានសិទ្ធិបោះឆ្នោត ទៅបោះឆ្នោតនៅថ្ងៃទី៤ មិថុនា ទាំងអស់គ្នា តាមឆន្ទៈ និងមិនត្រូវខ្លាចការគំរាមកំហែង។ មន្ត្រីសង្គមស៊ីវិលរូបនេះ ស្នើឲ្យពលរដ្ឋបោះឆ្នោតឲ្យអ្នកនយោបាយមិនប្រើហិង្សាដើម្បីដោះស្រាយបញ្ហា។
អ្នកវិភាគនយោបាយ លោក គឹម សុខ ត្រូវតុលាការចាប់ឃុំខ្លួនបណ្ដោះអាសន្ននៅពន្ធនាគារព្រៃស កាលពីថ្ងៃទី១៧ ខែកុម្ភៈ កន្លងទៅ តាមបណ្ដឹងរបស់លោក ហ៊ុន សែន ដែលប្ដឹងរូបលោក និងទារសំណងជំងឺចិត្តជាងកន្លះលានដុល្លារអាមេរិក។ ការឃុំខ្លួននេះ ក្រោមបទបរិហារកេរ្តិ៍ជាសាធារណៈ និងញុះញង់ឲ្យមានភាពវឹកវរចលាចលដល់សន្តិសុខសង្គម បន្ទាប់ពីលោក គឹម សុខ និយាយជាប្រយោលថា គណបក្សប្រជាជនកម្ពុជា ជាអ្នកសម្លាប់បណ្ឌិត កែម ឡី និងថារដ្ឋាភិបាលបច្ចុប្បន្ន បណ្តោយឲ្យមានប្រព័ន្ធមួយដែលមានការសម្លាប់មនុស្ស ហើយរកមុខឃាតកមិនឃើញ។
សំណេរចុងក្រោយនៃលិខិតនោះ លោក គឹម សុខ ក៏បានបង្ហាញពីការសោកស្ដាយដែរ ដោយសារតែលោកមានពេលវេលាខ្លីដើម្បីចូលរួមជាគំនិតយោបល់ជាមួយជនរួមជាតិ៕
No comments:
Post a Comment