ដោយ ខែ សុណង
2017-06-09
លោក ញឹក ប៊ុនឆៃ ធ្វើសន្និសីទកាសែតប្រកាសបង្កើតគណបក្សថ្មី នៅថ្ងៃទី៣ ខែកុម្ភៈ ឆ្នាំ២០១៦ នារាជធានីភ្នំពេញ។
RFA/San Sel
ព្រះមហាក្សត្របានចេញព្រះរាជក្រឹត្យត្រាស់បង្គាប់បញ្ចប់មុខតំណែង លោក ញឹក ប៊ុនឆៃ ពីទីប្រឹក្សារាជរដ្ឋាភិបាល ដែលមានឋានៈស្មើឧបនាយករដ្ឋមន្ត្រី។ នៅពេលដែលលទ្ធផលបោះឆ្នោតបឋមបង្ហាញថា គណបក្សខ្មែររួបរួមជាតិ ដែលមានលោក ញឹក ប៊ុនឆៃ ជាប្រធាន បានឈ្នះឆ្នោតនៅឃុំមួយក្នុងខេត្តបន្ទាយមានជ័យ នោះ លោកបានបកស្រាយថា មានអ្នកបង្កើតព័ត៌មានក្លែងក្លាយលាបពណ៌ថា លោកទៅចូលរួមជាមួយគណបក្សសង្គ្រោះជាតិ។
ពុំមានសេចក្ដីបំភ្លឺណាមួយអំពីមូលហេតុដែលព្រះមហាក្សត្រចេញព្រះរាជក្រឹត្យត្រាស់បង្គាប់ បញ្ចប់មុខតំណែង លោក ញឹក ប៊ុនឆៃ ពីទីប្រឹក្សារាជរដ្ឋាភិបាលនៅឡើយ។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានបដិសេធអត្ថាធិប្បាយបញ្ហានេះ និងបានឆ្លើយថា លោកមិនដឹងព័ត៌មាន និងមិនបានឃើញព្រះរាជក្រឹត្យនេះទេ។
អាស៊ីសេរី មិនអាចទាក់ទងប្រធានគណបក្សខ្មែររួបរួមជាតិ លោក ញឹក ប៊ុនឆៃ ដើម្បីបំភ្លឺបញ្ហានេះបានឡើយ នៅថ្ងៃទី៩ មិថុនា ដោយទូរស័ព្ទរបស់លោកមិនអាចទាក់ទងបាន។ ចំណែកមន្ត្រីនៃគណបក្សនេះមួយចំនួនក៏បានឆ្លើយថា មិនបានដឹងព័ត៌មាននេះដែរ។
ទាក់ទងបញ្ហានេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏ឆ្លើយថា មិនដឹងមូលហេតុចំពោះព័ត៌មាននេះដែរ។ ប៉ុន្តែលោកថា បើមានបែបនេះមែន មានតែគោរពតាមព្រះរាជក្រឹត្យរបស់ព្រះមហាក្សត្រ៖ «យើងមានយោបល់អី មានតែការគោរពព្រះមហាក្សត្រនេះហើយបើព្រះអង្គឡាយព្រះហស្តលេខាលើព្រះរាជក្រឹត្យ ហើយយើងគោរពតាមហ្នឹងហើយ»។
កាលពីថ្ងៃទី៧ ខែមិថុនា ប្រធានគណបក្សខ្មែររួបរួមជាតិ លោក ញឹក ប៊ុនឆៃ បានផ្ដល់សម្ភាសន៍ឲ្យអាស៊ីសេរីថា បន្ទាប់ពីលទ្ធផលបោះឆ្នោតបឋមបង្ហាញថា គណបក្សលោកបានឈ្នះឃុំមួយក្នុងខេត្តបន្ទាយមានជ័យ មានអ្នកបង្កើតព័ត៌មានក្លែងក្លាយលាបពណ៌ថា លោកទៅចូលរួមជាមួយគណបក្សសង្គ្រោះជាតិ ប៉ុន្តែលោកថា លោកបានជូនដំណឹងទៅលោកនាយករដ្ឋមន្ត្រី ហ៊ុន សែន រួចរាល់ហើយពីព័ត៌មានក្លែងក្លាយនេះ។ លោកថា មានការភណ្ឌច្រឡំតិចតួចក្នុងរយៈពេលប៉ុន្មានថ្ងៃនេះ ប៉ុន្តែលោកបានដោះស្រាយរួចហើយ។
ការលើកឡើងរបស់លោក ញឹក ប៊ុនឆៃ ដូចនេះ បន្ទាប់ពីលេចឮព័ត៌មានថា មានសមត្ថកិច្ចចម្រុះទៅព័ទ្ធផ្ទះរបស់លោកនៅសង្កាត់ជ្រោយចង្វារ ខណ្ឌជ្រោយចង្វារ ក្រុងភ្នំពេញ កាលពីថ្ងៃទី៦ និងទី៧ ខែមិថុនា។
លទ្ធផលបឋមនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ បង្ហាញថា ក្នុងចំណោមគណបក្សតូចៗ ដែលចូលរួមប្រកួតប្រជែងមានតែគណបក្សខ្មែររួបរួមជាតិ ឈ្នះបានឃុំមួយក្នុងខេត្តបន្ទាយមានជ័យ។
លោក ញឹក ប៊ុនឆៃ អតីតមេទ័ព និងជាមន្ត្រីជំនិតរបស់សម្ដេចក្រុមព្រះនរោត្ដម រណឫទ្ធិ កាលពីគណបក្សហ៊្វុនស៊ិនប៉ិច នៅដឹកនាំរដ្ឋាភិបាល។ អ្នកទាំងពីរបានបែកបាក់គ្នាបន្ទាប់ពីសម្ដេចក្រុមព្រះត្រូវបានទម្លាក់ចេញពីតំណែងប្រធានគណបក្សហ៊្វុនស៊ិនប៉ិច។ ប៉ុន្តែក្រោយមានការសម្របសម្រួលពីលោក ហ៊ុន សែន លោក ញឹក ប៊ុនឆៃ និងសម្ដេចក្រុមព្រះ អ្នកទាំង២ បានរួមរស់ក្រោមដំបូលគណបក្សហ៊្វុនស៊ិនប៉ិច ឡើងវិញ។ ទីបំផុតកាលពីចុងឆ្នាំ២០១៦ លោក ញឹក ប៊ុនឆៃ សម្រេចចិត្តចាកចេញចោលសម្ដេចក្រុមព្រះ មកបង្កើតគណបក្សថ្មីឈ្មោះ គណបក្សខ្មែររួបរួមជាតិ។
កាលពីអាណត្តិទី៤ រដ្ឋាភិបាលដឹកនាំដោយលោក ហ៊ុន សែន ធ្លាប់តែងតាំងលោក ញឹក ប៊ុនឆៃ ជាឧបនាយករដ្ឋមន្ត្រី ប៉ុន្តែនៅពេលនេះមិនឃើញលោកមានតួនាទីក្នុងរដ្ឋាភិបាលទៀតទេ៕
No comments:
Post a Comment