ដោយ ថា កិត្យា
2017-06-25
ក្រុមយុវជនតម្រង់ជួរមុនចូលប្រឡងតេស្ដសមត្ថភាពភាសាកូរ៉េ នារាជធានីភ្នំពេញ ថ្ងៃទី២៤ ខែមិថុនា ឆ្នាំ២០១៧។ Photo courtesy of mlvt.gov.kh's facebook
Photo courtesy of mlvt.gov.kh's facebook
យុវជនកម្ពុជា ប្រមាណជាង ៥ម៉ឺននាក់ បានចូលរួមប្រឡងតេស្ដសមត្ថភាពភាសាកូរ៉េ រយៈពេលពីរថ្ងៃ ចាប់ពីថ្ងៃទី២៤ ដល់ថ្ងៃទី២៥ ខែមិថុនា ដើម្បីបានទៅធ្វើការនៅប្រទេសកូរ៉េខាងត្បូង។ បេក្ខជនមួយចំនួនអះអាងថា បញ្ហាជីវភាពគឺជាកត្តាចម្បងដែលជំរុញឲ្យពួកគាត់ប្រាថ្នាចង់ទៅធ្វើការនៅក្រៅប្រទេស។ អ្នកសិក្សាស្រាវជ្រាវការអភិវឌ្ឍសង្គម យល់ថា រដ្ឋាភិបាលគួរតែរកវិធីសាស្ត្ររក្សាកម្លាំងយុវជនឲ្យចូលរួមអភិវឌ្ឍប្រទេសជាតិខ្លួនឯង ប្រសើរជាងបញ្ជូនពួកគាត់ចេញទៅក្រៅប្រទេស។
ក្នុងចំណោមបេក្ខជនចូលរួមប្រឡងដែលសុទ្ធតែជាយុវជនពេញកម្លាំងប្រមាណជាង ៥ម៉ឺននាក់នោះ (៥០.៩៦៤នាក់) គឺប្រទេសកូរ៉េខាងត្បូង នឹងជ្រើសរើសយកតែជាង ៣.៦០០នាក់ ក្នុងនោះវិស័យឧស្សាហកម្មចំនួន ១.៣០០នាក់ វិស័យសំណង់ចំនួន ១.៨០០នាក់ និងវិស័យកសិកម្ម ៥០០នាក់។ នេះបើយោងតាមទំព័រហ្វេសប៊ុក (facebook) របស់ក្រសួងការងារ និងបណ្ដុះបណ្ដាលវិជ្ជាជីវៈ។
ការប្រឡងតេស្ដសមត្ថភាពភាសាកូរ៉េនេះ គឺធ្វើឡើងរយៈពេលពីរថ្ងៃ ចាប់ពីថ្ងៃទី២៤ ដល់ថ្ងៃទី២៥ ខែមិថុនា ដោយមានមណ្ឌលប្រឡងចំនួន៩ ស្ថិតក្នុងរាជធានីភ្នំពេញ។ បេក្ខជនភាគច្រើនមកពីតាមបណ្ដាខេត្ត ហើយមានមុខរបរជាសិស្ស និស្សិត និងខ្លះទៀតជាកម្មករ និងកសិករ ជាដើម។
បេក្ខជនម្នាក់ឈ្មោះ ថម សំណង មកពីខេត្តកំពង់ចាម ប្រាប់អាស៊ីសេរី មុនពេលចូលប្រឡងនៅសាលាបឋមសិក្សាសន្ធរម៉ុក ក្រុងភ្នំពេញថា មូលហេតុដែលលោកប្រាថ្នាទៅធ្វើការនៅកូរ៉េ ចោលប្រពន្ធកូនមួយរយៈនោះ ដោយសារកត្តាជីវភាព ផ្ដើមចេញពីទីផ្សារការងារនៅក្នុងស្រុកមិនមានគ្រប់គ្រាន់ ប្រាក់បៀវត្សរ៍តិច គួបផ្សំនឹងតម្លៃកសិផលចុះថោកមិនសង្ឃឹមឡើងថ្លៃផង៖ «នៅជនបទធ្វើស្រែធ្វើចម្ការបាន តែដល់ពេលលក់ចេញវាថោក ធ្វើឲ្យគ្រួសារជួបការខ្វះខាត ចឹងបានចង់ទៅប្រទេសគេ ដើម្បីទទួលបានប្រាក់កម្រៃសម្រាប់ដោះស្រាយកង្វះខាតក្នុងក្រុមគ្រួសារ»។
រីឯកម្មការិនីរោងចក្រម្នាក់ដែលចូលរួមប្រឡងដែរនោះ រៀបរាប់ថា ថ្វីបើនាងមិនចង់ឃ្លាតឆ្ងាយពីគ្រួសារ និងប្រទេសកំណើតក្តី ប៉ុន្តែនាងនៅតែផ្សងព្រេងទៅធ្វើការនៅប្រទេសកូរ៉េ ព្រោះថានៅទីនោះប្រាក់ខែខ្ពស់ជាងនៅកម្ពុជា ដែលអាចជួយសម្រាលបន្ទុកគ្រួសារ៖ «ទៅស្រុកគេមានប្រាក់ខែថ្លៃ អាចចិញ្ចឹមគ្រួសារបាន តែបើយើងធ្វើការរោងចក្រនៅភ្នំពេញ បានប្រាក់ខែតិច ហើយយើងផាត់ថ្លៃទឹកថ្លៃភ្លើង ណាម្ហូបអាហារ ណាផ្ញើទៅផ្ទះ ដូច្នេះវាអត់គ្រប់គ្រាន់នោះទេ»។
ពលករខ្មែរលើកឡើងប្រហាក់ប្រហែលគ្នាថា ប្រសិនបើរាជរដ្ឋាភិបាលបង្កើតការងារឲ្យបានច្រើន និងមានប្រាក់ខែសមរម្យ រួមទាំងជួយរកទីផ្សារកសិផលជាដើមនោះ គឺយុវជននឹងងាកមករកការងារធ្វើនៅក្នុងស្រុកជាក់ជាមិនខាន។
ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ ឲ្យដឹងថា បច្ចុប្បន្នមានពលករខ្មែរកំពុងធ្វើការនៅប្រទេសកូរ៉េ ចំនួន ៥៣.០០០នាក់ និងពលករមិនស្របច្បាប់ប្រមាណជា ៣ពាន់ទៅ ៤ពាន់នាក់ផ្សេងទៀត។ ពួកគេទាំងនោះកំពុងធ្វើការក្នុងវិស័យកសិកម្ម ឧស្សាហកម្ម និងវិស័យសំណង់។ ដោយឡែកក៏មានស្ត្រីខ្មែររៀបការជាមួយស្វាមីកូរ៉េ ជាង ១ម៉ឺននាក់ និងនិស្សិត ៤០០នាក់ កំពុងសិក្សា និងរស់នៅប្រទេសកូរ៉េ។ មន្ត្រីរដ្ឋាភិបាលធ្លាប់អះអាងថា ពលករចំណាកស្រុកដែលកំពុងបំពេញការងារនៅក្រៅប្រទេសបច្ចុប្បន្ន បានជួយសេដ្ឋកិច្ចប្រទេសជាតិយ៉ាងច្រើន។
អាស៊ីសេរី មិនអាចសុំការពន្យល់បន្ថែមពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានទេនៅថ្ងៃទី២៥ ខែមិថុនា ដោយទូរស័ព្ទចូលពុំមានអ្នកទទួល។
ដោយឡែកអ្នកសិក្សាស្រាវជ្រាវការអភិវឌ្ឍសង្គម លោកបណ្ឌិត មាស នី មានប្រសាសន៍ថា ថ្វីត្បិតតែពលករខ្មែរទៅក្រៅប្រទេសអាចទទួលបានប្រាក់ខែខ្ពស់ក្តី ប៉ុន្តែសម្រាប់រយៈពេលវែង គឺរដ្ឋាភិបាលគួរតែរកមធ្យោបាយផ្សេងទៀតដើម្បីធ្វើការអភិវឌ្ឍក្នុងស្រុក ហើយរក្សាកម្លាំងយុវជនឲ្យចូលរួមអភិវឌ្ឍប្រទេសជាតិ៖ «ការបញ្ជូនពលករទៅក្រៅស្រុកនេះ វាស្ទើរមានការពាក់ព័ន្ធក្នុងរឿងនយោបាយផងក៏ថាបានដែរ ដើម្បីបញ្ជូនកម្លាំងពេញទៅក្រៅឲ្យអស់ទៅ ហើយវានឹងអាចប៉ះពាល់ទៅដល់ការបោះឆ្នោត។ ចឹងបើគេមើលទៅ វាមានរឿងនៅខាងក្រោយ។ រដ្ឋាភិបាលត្រូវតែមានផែនការណាមួយ ឬយុទ្ធសាស្ត្រណាមួយ ដើម្បីរក្សាកម្លាំងពលកម្មឲ្យនៅក្នុងស្រុកសម្រាប់ជួយអភិវឌ្ឍស្រុកយើងផងបាទ»។
ចំពោះបញ្ហាចំណាកស្រុកនេះដែរ កាលនៅមានជីវិត អ្នកស្រាវជ្រាវការអភិវឌ្ឍសង្គម លោកបណ្ឌិត កែម ឡី មានប្រសាសន៍ថា និកម្មភាព ឬភាពគ្មានការងារធ្វើក្នុងស្រុករបស់ពលរដ្ឋកម្ពុជា គឺជាវិបត្តិសង្គម ឬជាសញ្ញាអាសន្នមួយដែលត្រូវដោះស្រាយ។ លោកថា កាលណាយុវជនបន្តចេញទៅរកការងារនៅក្រៅប្រទេសបែបនេះ គឺបង្ហាញឲ្យឃើញថា យុវជនបានចាកចេញពីរបៀបវារៈនៃការអភិវឌ្ឍប្រទេស ហើយផ្ទុយទៅវិញ លោកថាការទៅរស់នៅធ្វើការស្រុកគេនោះ កាន់តែធ្វើឲ្យប្រទេសគេរីកចម្រើនតាមរយៈប្រើប្រាស់សេវាកម្មផ្សេងៗ។
លោកបណ្ឌិត កែម ឡី ធ្លាប់ផ្តល់យោបល់ដែរថា ដើម្បីដោះស្រាយបញ្ហាចំណាកស្រុកនេះ គឺរដ្ឋាភិបាលត្រូវរៀបចំច្បាប់ចូលនិវត្តន៍ឲ្យបានត្រឹមត្រូវ ដើម្បីទុកឱកាសឲ្យយុវជនជំនាន់ក្រោយបន្តវេន។ ទន្ទឹមគ្នានេះ លោកថារដ្ឋាភិបាលត្រូវគ្រប់គ្រងជនអន្តោប្រវេសន៍ឲ្យមានប្រសិទ្ធភាព ព្រោះថាបច្ចុប្បន្ននេះ ជនជាតិវៀតណាម ខុសច្បាប់ជាច្រើន បានដណ្ដើមការងារយុវជនខ្មែរស្ទើរគ្រប់វិស័យ។ រីឯបញ្ហាអភិវឌ្ឍភូមិឃុំ ក៏ជារឿងដែលរដ្ឋាភិបាលមិនត្រូវមើលរំលងដែរ។ ចំណាកស្រុករបស់យុវជនខ្មែរទៅធ្វើកម្មករគេ មានន័យថាពួកគេបាត់បង់ឱកាសសិក្សារៀនសូត្រឲ្យបានខ្ពង់ខ្ពស់ ដូច្នេះពេលនោះហើយ ពលរដ្ឋកម្ពុជា អាចនៅតែធ្វើជាកម្មករគេតពូជ ឬតជំនាន់៕
No comments:
Post a Comment