ដោយ យាង សុជាមេត្តា
2017-06-02
លោកនាយករដ្ឋមន្រ្តី ហ៊ុន សែន (លើកដៃនៅលើរថយន្តខាងឆ្វេង) ចូលរួមហែក្បួនឃោសនា នៅថ្ងៃចុងក្រោយនៃយុទ្ធនាការ ឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅរាជធានីភ្នំពេញ នៅថ្ងៃទី២ ខែមិថុនា ឆ្នាំ២០១៧។ RFA/Tep Sony
RFA/Tep Sony
លោកនាយករដ្ឋមន្រ្តី ហ៊ុន សែន ថ្លែងថា បើមានការផ្ទេរអំណាច ឬតំណែងមែន គឺជាការផ្ទេរ ទៅឲ្យកូនចៅរបស់គណបក្សប្រជាជនកម្ពុជា មិនមែនផ្ទេរទៅឲ្យអ្នកផ្សេងនោះទេ។ ការថ្លែងរបស់លោក ហ៊ុន សែន ធ្វើឡើងនៅថ្ងៃទី២ មិថុនា ដែលជាថ្ងៃចុងក្រោយនៃយុទ្ធនាការ ឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅរាជធានីភ្នំពេញ។
ក្នុងនាមជាប្រធានគណបក្សកាន់អំណាច លោក ហ៊ុន សែន អំពាវនាវឲ្យសមាជិកបក្សត្រូវការពារបក្ស និងចាំបាច់ត្រូវបោះឆ្នោតឲ្យគណបក្សប្រជាជនកម្ពុជា។ លោកថា ការសម្រេចចិត្ត ខុសមួយថ្ងៃ ចង្រៃមួយជីវិត។ លោក ហ៊ុន សែន ថែមទាំងថ្លែងឌឺដងឲ្យបក្សប្រឆាំង ដែលលោកថា កន្លងទៅធ្លាប់មិនគាំទ្របក្សកាន់អំណាចបន្ថយថវិកាវិស័យយោធា តែបែរជាចង់បំពាក់អាវុធឲ្យយោធាទៅវិញ។
នៅថ្ងៃចុងក្រោយនៃយុទ្ធនាការឃោសនាបោះឆ្នោតនេះ នៅរាជធានីភ្នំពេញ មានគណបក្ស នយោបាយតែពីរគត់ដែលធ្វើយុទ្ធនាការ គឺគណបក្សប្រជាជនកម្ពុជា និងគណបក្សសង្រ្គោះជាតិ។ គណបក្សប្រជាជនកម្ពុជាចាប់ផ្ដើមជួបជុំនៅម៉ោង៦ព្រឹក ដោយចេញដំណើរ ពីផ្លូវ៦០ម៉ែត្រ ក្នុងសង្កាត់ចាក់អង្រែលើ។ ចំណែកគណបក្សសង្រ្គោះជាតិវិញចាប់ផ្ដើម ហែចាប់ពីម៉ោង២រសៀល ដោយចេញដំណើរចេញពីវត្តពោធិយារាម ហៅវត្តចាស់ ខណ្ឌជ្រោយចង្វារ ប៉ុន្តែអ្នកគាំទ្រគណបក្សនេះទៅប្រមូលផ្ដុំនៅមុខវត្តចាស់តាំងពីព្រឹកនេះដែរ។
ការបោះឆ្នោតឃុំ-សង្កាត់ អាណត្តិទី៤នេះ មានគណបក្សនយោបាយចំនួន១២ បានចុះឈ្មោះ បេក្ខជនដើម្បីចូលរួមប្រកួតប្រជែងក្នុងការជ្រើសរើសក្រុមប្រឹក្សាឃុំ សង្កាត់ សរុបចំនួន ១៦៤៦ ទូទាំងប្រទេស។ គណបក្សទាំង១២នោះ រួមមាន គណបក្សប្រជាជនកម្ពុជា គណបក្សសង្រ្គោះជាតិ គណបក្សហ៊្វុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ គណបក្សខ្មែររួបរួមជាតិ គណបក្សសំបុកឃ្មុំសង្គមប្រជាធិបតេយ្យ គណបក្សសញ្ជាតិកម្ពុជា គណបក្សប្រជាធិបតេយ្យមូលដ្ឋាន គណបក្សយុវជនកម្ពុជា គណបក្សជនជាតិដើមប្រជាធិបតេយ្យកម្ពុជា គណបក្សអំណាចខ្មែរ និងគណបក្សសាធារណរដ្ឋប្រជាធិបតេយ្យ។
ប៉ុន្តែក្នុងចំណោមគណបក្សនយោបាយទាំង១២នេះ មានតែគណបក្ស ២គត់ដែលបានដាក់ បេក្ខជនឈរឈ្មោះនៅគ្រប់ឃុំ-សង្កាត់ទំាងអស់ចំនួន១៦៤៦ នោះគឺ គណបក្សប្រជាជនកម្ពុជា និងគណបក្សសង្រ្គោះជាតិ។
1 comment:
Hun Sen's Hanoi Masters put a gun to his head : You do not transfer power
to the CNRP, only to your sons. This is our order !!!
Post a Comment