ដោយ សូត សុខប្រាថ្នា
2017-08-12
ចម្ការស្រកានាគរបស់កសិករនៅភូមិរមូល ឃុំរអាង ស្រុកកំពង់សៀម ខេត្តកំពង់ចាម។ រូបថតកាលពីថ្ងៃទី១០ ខែសីហា ឆ្នាំ២០១៧។ RFA/Saut Sokprathna
RFA/Saut Sokprathna
កសិករដាំផ្លែស្រកានាគ នៅឃុំរអាង ស្រុកកំពង់សៀម ខេត្តកំពង់ចាម ឱ្យដឹងថា របរដាំផ្លែឈើប្រភេទនេះ ជួយដល់ជីវភាពរស់នៅរបស់ពួកគាត់ឱ្យកាន់តែប្រសើរ។ ផ្លែឈើរបស់ពួកគាត់ដាំដោយមិនបានប្រើប្រាស់ជីគីមីឡើយ ពោលគឺប្រើជីធម្មជាតិស្រោចស្រព ដើម្បីឲ្យដើមស្រកានាគលូតលាស់ល្អ។ សង្គមស៊ីវិលនៅខេត្តនេះយល់ថា ប្រសិនបើពលរដ្ឋកាន់តែច្រើនគាំទ្រផ្លែឈើនៅក្នុងស្រុក កាត់បន្ថយការបរិភោគបន្លែផ្លែឈើនាំពីក្រៅប្រទេស នឹងអាចបង្កើតមុខរបរដល់កសិករខ្មែរបន្ថែមទៀត និងកាត់បន្ថយការប៉ះពាល់សុខភាព ដោយសារតែផ្លែឈើនាំចូលអាចគេប្រើជីគីមីច្រើនជាដើម។
កសិករដាំស្រកានាគ នៅឃុំរអាង ស្នើឱ្យពលរដ្ឋនាំគ្នាគាំទ្រផ្លែឈើរបស់ខ្មែរឱ្យបានកាន់តែច្រើនបន្ថែមទៀត ដើម្បីបង្កើតការងារដល់ពួកគាត់។ កសិករលើកឡើងថា ប្រសិនបើពលរដ្ឋខ្មែរគាំទ្រផលិតផលកសិកម្មនៅក្នុងស្រុក ពិសេសបន្លែផ្លែឈើដែលគ្មានសារធាតុគីមី គឺមិនត្រឹមជួយបង្កើតមុខរបរដល់ពួកគាត់ប៉ុណ្ណោះទេ ប៉ុន្តែជាផ្នែកមួយជួយដល់សុខភាពរបស់ខ្លួនឯងដែរ។
ម្ចាស់ចម្ការស្រកានាគ នៅឃុំរអាង លោក ផុន ភឿន មានប្រសាសន៍ថា របរនេះជួយលើកកម្ពស់ជីវភាពរបស់ពួកគាត់ឱ្យកាន់តែប្រសើរឡើង ល្អជាងធ្វើចំណាកស្រុកឆ្ងាយដែលប្រឈមនឹងហានិភ័យការងារ និងរកប្រាក់ចំណូលមិនសូវបានច្រើន។ លោកបន្តថា បញ្ហាទីផ្សារ គឺមិនមានអ្វីចោទឡើងទេ ព្រោះមានម៉ូយមកយកដល់កន្លែង និងមានពលរដ្ឋក្នុងស្រុកនាំគ្នាទិញយកទៅបរិភោគលក្ខណៈគ្រួសារ ដោយសារពួកគាត់យល់ថា ជាផ្លែឈើដែលមិនមានប្រើថ្នាំ ឬជីគីមី ពោលគឺប្រើប្រាស់ជីលាមកសត្វគោក្របីតែប៉ុណ្ណោះ។ យ៉ាងនេះក្ដី លោកថា ដំណាំប្រភេទនេះអាចមានបញ្ហាប្រឈមខ្លះដែរ៖ «ខាងក្រោមត្រូវការសំអាតកុំឱ្យមានស្មៅ។ យើងត្រូវការជួលកម្មករចម្រាសវា ព្រោះស្រកានាគឫសនៅខាងលើ អ៊ីចឹងវាត្រូវការជញ្ជក់ ឬប៉ះពាល់សត្វល្អិតដែរ»។
កសិករដដែលរៀបរាប់ថា វិធីដាំស្រកានាគ គឺគេត្រូវយកកូនដែលកាត់ចេញដើមស្រកានាគចាស់មកផ្សាំ ដុះប្រវែង ៥ហ៊ុន ឬ ១តឹក ទើបយកទៅដាំបាន។ វិធីដាំបន្ត គេត្រូវដាំបង្គោល ឬជន្លង់ជាមុន ដែលជាប្រភេទបង្គោលមាំ និងធន់បានយូរអង្វែង ជៀសវាងបាក់នៅពេលស្រកានាគលូតលាស់ល្អ។ ចំណែកផ្នែកខាងលើ គេត្រូវចោះបង្គោល និងដាក់ដែករឹងមាំទំហំ ១៤ ទៅ ១៦ លី ខ្វែងជា ៤ជ្រុង កម្ពស់ពីដីប្រហែល ១ម៉ែត្រកន្លះ ទៅ ១ម៉ែត្រ ៧តឹក ហើយដាក់សំបកកង់ម៉ូតូសម្រាប់ដើមស្រកានាគវារលើ។ លោកបញ្ជាក់ថា ក្នុងមួយគុម្ព ត្រូវដាំបីកូន ប៉ុន្តែបើល្អគឺដាំចំនួនបួនកូន ហើយចន្លោះពីគុម្ពមួយទៅគុម្ពមួយ ប្រវែងប្រមាណ ២ម៉ែត្រ ទៅ ៣ម៉ែត្រ។
ចាប់ពីពេលដាំកូនផ្សាំរួច ស្រកានាគនឹងផ្ដល់ផលក្នុងរយៈពេល ១ឆ្នាំ។ រដូវកាលស្រកានាគផ្ដល់ផលគឺនៅក្នុងរដូវវស្សា ពោលគឺជារដូវភ្លៀងធ្លាក់។
កសិករដាំស្រកានាគប្រមាណ ៤០០គុម្ពរូបនេះ បន្ថែមថា ក្នុងមួយរដូវ ផ្ដល់ផលបានចំនួនប្រហែល ២តោន ឬលើសពីនេះ អាស្រ័យទៅលើផ្លែច្រើន ឬតិច ហើយក្នុងមួយគីឡូក្រាមលក់បានតម្លៃ ៦ពាន់រៀល។ លោកស្នើឱ្យពលរដ្ឋខ្មែរបន្តគាំទ្របន្លែផ្លែឈើក្នុងស្រុកបន្ថែមទៀត ដើម្បីសុខភាពផ្ទាល់ខ្លួន និងជួយដល់ជីវភាពកសិករ៖ «ខ្ញុំសំណូមពរថា បើខ្មែរយើងងាកមកទិញផលិតផលនៅក្នុងស្រុករបស់យើងគឺល្អ ព្រោះវាអត់មានជាតិគីមី»។
ចម្ការស្រកានាគរបស់កសិករនៅភូមិរមូល ឃុំរអាង ស្រុកកំពង់សៀម ខេត្តកំពង់ចាម។ រូបថតកាលពីថ្ងៃទី១០ ខែសីហា ឆ្នាំ២០១៧។ RFA/Saut Sokprathna RFA/Saut Sokprathna
ពលរដ្ឋមួយរូបនៅឃុំទ្រាន ដែលឆៀងចូលទិញផ្លែស្រកានាគផ្ញើប្រពន្ធកូន លោក អឿន បញ្ញា អះអាងថា លោកតែងតែចូលទិញផ្លែស្រកានាគពីកសិករនៅឃុំរអាង ព្រោះជារបស់ធម្មជាតិ ដឹងប្រភពច្បាស់លាស់ និងធានាសុខភាពជាងផ្លែឈើនៅតាមទីផ្សារ។ ជាងនេះទៀត រស់ជាតិស្រកានាគរបស់កសិករ ផុន ភឿន គឺឆ្ងាញ់ ផ្អែម ហើយជាប្រភេទសាច់ពណ៌ស្វាយ ដែលប្រពន្ធ និងកូនលោកចូលចិត្តពិសាផង៖ «ចំពោះខ្ញុំ ខ្ញុំចង់ឱ្យពលរដ្ឋនៅទូទាំងប្រទេស គាំទ្រ ផលិតផលរបស់ខ្មែរ ផលិតផលកសិកម្ម ឬដំណាំហូបផ្លែអ៊ីចឹង គឺខ្ញុំចង់ឱ្យគាំទ្រឱ្យច្រើនជាងមុន»។
ប្រភពដដែលអះអាងថា នឹងបន្តគាំទ្រផលិតផលកសិកម្មរបស់ខ្មែរ ពិសេសបន្លែ ផ្លែឈើគ្រប់ប្រភេទបន្តទៀត បើទោះបីជាពេលខ្លះតម្លៃអាចលើសផលិតផលនាំចូលក៏ដោយ ពីព្រោះការផលិតអាចប្រើដើមទុនច្រើនផលិតផលនាំចូល។
មន្ត្រីអង្កេតសមាគមអាដហុក (ADHOC) ខេត្តកំពង់ចាម ដែលតែងទៅទិញផ្លែស្រកានាគពីកសិករនៅឃុំរអាងបរិភោគ លោក មាន ព្រហ្មមុនី មានប្រសាសន៍ថា មូលហេតុលោកតែងតែទិញផ្លែឈើរបស់កសិករខ្មែរបរិភោគ ទីមួយជាគំរូដល់យុវជន និងពលរដ្ឋខ្មែរផ្សេងទៀត ជួយគាំទ្រផលិតផលក្នុងស្រុក។ បន្ថែមពីនេះ ជួយផ្ដល់តម្លៃ និងបង្កើតមុខរបរដល់កសិករខ្មែរឱ្យមានការងារធ្វើកាន់តែច្រើន និងដើម្បីសុខភាពផ្ទាល់ខ្លួនតែម្ដង៖ «ឱ្យគាត់មានលទ្ធភាពថា លក់តែក្នុងស្រុកក៏បានដែរ បើសិនយើងនាំគ្នាទប់ស្កាត់ ហើយបញ្ឈប់ប្រើប្រាស់អាហារណាដែលវាប៉ះពាល់ ឬផលិតផលណាដែលវាប៉ះពាល់ដល់សុខភាព។ វាមានសារធាតុគីមី វាធ្វើឱ្យខូចក្រពះ ពោះវៀន គ្រឿងក្នុង»។
របាយការណ៍របស់រាជរដ្ឋាភិបាលជាទូទៅបង្ហាញថា ពលរដ្ឋកម្ពុជា ប្រមាណ ៨៥ភាគរយជាកសិករ ធ្វើស្រែ និងចម្ការ។ ប៉ុន្តែបច្ចុប្បន្ន បន្លែ ផ្លែឈើ ត្រី សាច់ គឺនាំចូលពីប្រទេសជិតខាងក្នុងមួយថ្ងៃៗរាប់រយតោន សូម្បីគល់ស្លឹកគ្រៃ ក៏ត្រូវនាំចូលក្នុងមួយថ្ងៃរាប់សិបតោនដែរ។ ផលិតផលក្រៅស្រុកមួយចំនួនដូចជា បន្លែ ផ្លែឈើ ត្រីសាច់ គេអាចរក្សាទុកជាច្រើនថ្ងៃ ហើយមានសេចក្ដីរាយការណ៍ជាបន្តបន្ទាប់ថា ផលិតផលទាំងនោះផ្ទុកសារធាតុគីមីបណ្ដាលឱ្យខូចសុខភាពប្រជាពលរដ្ឋខ្មែរទៀតផង។
បញ្ហានេះ មន្ត្រីសិទ្ធិមនុស្សមើលឃើញថា បណ្ដាលឱ្យប៉ះពាល់ដល់ផលិតផលក្នុងស្រុកយ៉ាងខ្លាំង។ ជាក់ស្ដែង ត្រី ជ្រូក បន្លែ ផ្លែឈើរបស់កសិករខ្មែរធ្លាក់ថ្លៃយ៉ាងគំហុកនៅពេលបច្ចុប្បន្ន ដោយសារតែទំនិញក្រៅប្រទេសនាំចូលច្រើនពេក។
ជាងនេះទៀតលោកថា ការត្រួតពិនិត្យសុវត្ថិភាពចំណីអាហារពីសំណាក់អាជ្ញាធរនៅមិនទាន់បានត្រឹមត្រូវ ធ្វើឱ្យបន្លែ ផ្លែឈើ ត្រី សាច់ ដែលផ្ទុកសារធាតុគីមីមួយចំនួនអាចវាយលុកក្នុងទីផ្សារប្រទេសកម្ពុជា បាន។ ករណីនេះ មិនត្រឹមត្រូវតែធ្វើឱ្យប៉ះពាល់ដល់សេដ្ឋកិច្ចប្រទេសកម្ពុជា ប៉ុណ្ណោះទេ ប៉ុន្តែបណ្ដាលឱ្យប៉ះពាល់ដល់សុខភាពប្រជាពលរដ្ឋខ្មែរយ៉ាងធ្ងន់ធ្ងរ។
លោកបន្តថា ដើម្បីជួយស្តារសេដ្ឋកិច្ចប្រទេសកម្ពុជា និង ស្តារជីវភាពកសិករ ម្យ៉ាងដើម្បីថែរក្សាសុខភាពខ្លួនឯងផង ពលរដ្ឋខ្មែរទាំងអស់ត្រូវចូលរួមលើកកម្ពស់ផលិតផលក្នុងស្រុកឱ្យបានកាន់តែច្រើន ហើយកាត់បន្ថយការប្រើប្រាស់ទំនិញនាំចូល ពិសេសផលិតផលទាំងឡាយដែលគ្មានការត្រួតពិនិត្យត្រឹមត្រូវ និងមានសារធាតុគីមីដែលអាចបំផ្លាញដល់សុខភាពជាដើម៕
No comments:
Post a Comment