ដោយ ថា កិត្យា
2017-09-14
rfa
លោក ហ៊ុន វណ្ណៈ សកម្មជនចលនាមាតាធម្មជាតិ ដែលត្រូវបានអាជ្ញាធរចាប់ខ្លួន កាលពីថ្ងៃទី១២ ខែកញ្ញា ឆ្នាំ២០១៧។
Photo provided
អង្គការដែលធ្វើការផ្នែកបរិស្ថាន និងសិទ្ធិមនុស្សសម្ដែងការសោកស្ដាយដែលតុលាការខេត្តកោះកុង សម្រេចឃុំខ្លួនសកម្មជនមាតាធម្មជាតិ ២នាក់ក្នុងពន្ធនាគារ កាលពីយប់ថ្ងៃទី១៣ ខែកញ្ញា។ ពួកគេចាត់ទុកថា ការសម្រេចរបស់តុលាការគឺជារឿងអយុត្តិធម៌ និងជាការគំរាមកំហែងដល់ការចូលរួមការពារធនធានធម្មជាតិ។
សកម្មជនចលនាមាតាធម្មជាតិ និងមន្ត្រីសមាគមអាដហុក (ADHOC) ប្រចាំខេត្តកោះកុង បន្តទាមទារឲ្យដោះលែងសកម្មជនមាតាធម្មជាតិ ឲ្យមានសេរីភាពឡើងវិញ ដោយអះអាងថា ពួកគេពុំបានប្រព្រឹត្តកំហុសដូចការចោទប្រកាន់របស់តុលាការនោះទេ។
សកម្មជនមាតាធម្មជាតិ អ្នកនាង លីម គីមស័រ រៀបរាប់ថា ការឃុំខ្លួនសកម្មជនមាតាធម្មជាតិ ២នាក់នោះ គឺជារឿងហួសចិត្ត និងអយុត្តិធម៌បំផុត ព្រោះចំណាត់ការនេះមានចេតនារារាំងសកម្មភាពរបស់ពួកគាត់ដែលឈឺឆ្អាលរឿងការពារធនធានធម្មជាតិ៖ «សម្រាប់ពួកខ្ញុំ ដូចជារឿងធម្មតាទៅហើយ វាដូចជាអត់មានរឿងអីដែលធ្វើអោយពួកខ្ញុំបារម្ភភ័យខ្លាចអីផង ព្រោះកន្លងមកយុវជនយើងធ្លាប់បានជាប់ពន្ធនាគារហើយ។ ម្សិលមិញនេះ សួរនាំយុវជនយើងពីរនាក់ និងដាក់ពន្ធនាគារហើយ ក៏មានដីកាថ្មីមួយទៀត កោះហៅយុវជនយើង ៣នាក់ ដែលជាប់ពន្ធនាគារលើកមុននោះឲ្យចូលទៅចៅក្រមម្តងទៀតនៅក្នុងខែ១១ ខាងមុខនេះ។ អ្វីដែលគេធ្វើនេះ វាគ្រាន់តែជាការគំរាមកំហែងដើម្បីឲ្យពួកយើងបញ្ឈប់សកម្មភាព ប៉ុន្តែវាដូចជាអត់មានរឿងអីដែលយើងត្រូវបញ្ឈប់ទេ ព្រោះការងារទាំងអស់នេះ គឺយើងធ្វើដើម្បីសង្គមជាតិ និងតម្លាភាព»។
កាលពីយប់ថ្ងៃទី១៣ ខែកញ្ញា តុលាការខេត្តកោះកុង បានសម្រេចឃុំខ្លួនសកម្មជនមាតាធម្មជាតិពីរនាក់ មានលោក ឌឹម គុណឌី និងលោក ហ៊ុន វណ្ណៈ ដាក់ពន្ធនាគារបណ្ដោះអាសន្នដោយចោទប្រកាន់ចំនួនពីរបទល្មើស គឺទី១ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងទី២ ធ្វើឲ្យប៉ះពាល់ដល់សិទ្ធិខាងរូបភាពនៃបុគ្គល។
សំណុំរឿងនេះ អង្គការមាតាធម្មជាតិ បានពឹងពាក់មេធាវីពីររូបឲ្យជួយការពារក្ដីសកម្មជនរបស់ខ្លួនហើយ ប៉ុន្តែខាងមេធាវីនៅមិនទាន់បានជួបជាមួយកូនក្ដីនៅឡើយ នៅរសៀលថ្ងៃទី១៤ ខែកញ្ញា។ទោះយ៉ាងណា មេធាវីការពារក្ដីបញ្ជាក់ថា កិច្ចការដំបូងដែលពួកគេនឹងធ្វើ គឺស្នើសុំតុលាការអនុញ្ញាតឲ្យកូនក្តីរបស់ខ្លួនបាននៅក្រៅឃុំបណ្ដោះអាសន្ន។
មាត្រា ៣០២ នៃក្រមព្រហ្មទណ្ឌចែងថា អំពើថតរូបភាពនៃបុគ្គលនៅក្នុងទឹកដីកន្លែងឯកជនដោយគ្មានការព្រមព្រៀងពីបុគ្គលនោះទេ ត្រូវផ្ដន្ទាទោសដាក់ពន្ធនាគារពី ១ខែ ទៅ ១ឆ្នាំ និងពិន័យជាប្រាក់ពី ១០ម៉ឺនរៀល ទៅ ២លានរៀល។
មន្ត្រីសម្របសម្រួលសមាគមអាដហុក ប្រចាំខេត្តកោះកុង លោក ញៀប សំអឿន រិះគន់ថា ការចោទប្រកាន់របស់តុលាការនេះ មិនសមហេតុផល។ លោកចាត់ទុកថា ការចោទប្រកាន់ និងសម្រេចឃុំខ្លួននេះ គឺជាការគំរាមកំហែងដល់សកម្មជនការពារបរិស្ថាន និងអ្នកការពារសិទ្ធិមនុស្ស៖ «យើងអង្គការសង្គមស៊ីវិលយើងស្នើឲ្យអាជ្ញាធរនឹងលោកធ្វើយ៉ាងណាបញ្ចៀសការដាក់ពន្ធនាគារ ហើយនិងយើងអាចនិយាយគ្នាបានតើ បទល្មើសតូចតាចណាស់ ហើយយើងចេះតែចាប់ពួកគាត់យកមកចោទអ៊ីចឹងវាដូចជាអត់សមហេតុផល»។
សកម្មជនទាំងពីរនាក់ ត្រូវក្រុមហ៊ុនតំបន់សេដ្ឋកិច្ចពិសេសកោះកុង ដែលហៅកាត់ថា អេស.អ៊ី.ហ្សិត (SEZ Koh Kong Co., Ltd.) របស់លោកឧកញ៉ា លី យ៉ុងផាត់ ប្ដឹងឲ្យអាជ្ញាធរឃុំព្រែកខ្សាច់ ឃាត់ខ្លួននៅម៉ោងប្រមាណ ១០ព្រឹកថ្ងៃទី១២ ខែកញ្ញា ខណៈអ្នកទាំងពីរនាក់ កំពុងជិះទូកថតរូប និងវីដេអូ កប៉ាល់ដឹកខ្សាច់ស៊ីលីកាពីរគ្រឿងក្នុងលំហសមុទ្រ នៅឃុំព្រែកខ្សាច់ ស្រុកគីរីសាគរ ខេត្តកោះកុង។
ការឃាត់ខ្លួននេះ ក្រោយពីសកម្មជនមាតាធម្មជាតិ បានចេញផ្សាយវីដេអូមួយទាក់ទងនឹងការរកឃើញភាពមិនប្រក្រតីនៃការនាំចេញខ្សាច់ស៊ីលីកា ឬខ្សាច់សទៅកោះតៃវ៉ាន់ ចំនួនជាង ១លានតោនដែលគិតជាទឹកប្រាក់ជាង ៣០លានដុល្លារអាមេរិក។
អាស៊ីសេរី មិនទាន់អាចទាក់ទងតំណាងក្រុមហ៊ុនបានឡើយជុំវិញករណីនេះ។
អ្នកនាង លីម គីមស័រ បញ្ជាក់ថា តាមសម្ដីប្រជាសហគមន៍ និងអ្នកបើកទូកជូនសកម្មជនទាំង ២នាក់ទៅថតរូបនោះ គឺពួកគពុំបានចូលទៅក្នុងការដ្ឋានក្រុមហ៊ុនរបស់លោកឧកញ៉ា លី យ៉ុងផាត់ នោះទេ ពោលគឺពួកគេថតនៅឆ្ងាយ និងពុំបានទៅញុះញង់អ្នកណាម្នាក់ឡើយ។ អ្នកនាងសោកស្ដាយដែលថា រដ្ឋាភិបាលតែងតែប្រកាសឲ្យប្រជាពលរដ្ឋសហការការពារធនធានធម្មជាតិ ប៉ុន្តែនៅពេលពួកគាត់ចូលរួមបែរជាត្រូវចាប់ខ្លួនជាបន្តបន្ទាប់ទៅវិញ៕
No comments:
Post a Comment