ដោយ អាស៊ីសេរី
2017-10-26
សហគមន៍ការពារព្រៃឈើឡៅកា ក្រោយចេញពីបំភ្លឺ នៅសាលាដំបូងខេត្តមណ្ឌលគិរី កាលពីថ្ងៃទី២៥ ខែតុលា ឆ្នាំ២០១៧។
Photo Provided
តុលាការខែត្រមណ្ឌលគិរី កោះហៅសហគមន៍ការពារព្រៃឈើ ៧នាក់ មកស្រាយបំភ្លឺសំណុំរឿងបង្ករបួសស្នាមដោយអចេតនាដែលប្រព្រឹត្តកាលពីឆ្នាំ២០១៤។ សហគមន៍ការពារព្រៃឈើឡៅកា ចាត់ទុកដីកាកោះហៅរបស់តុលាការ ជាទម្រង់គំរាមកំហែងសកម្មជនការពារព្រៃឈើ ព្រោះសំណុំរឿងនេះសហគមន៍មិនប្រាកដថា បុគ្គលណាជាដើមបណ្ដឹងនៅឡើយទេ។
សហគមន៍ការពារព្រៃឈើភូមិឡៅកា សង្កាត់សុខដុម ចំនួន ៧នាក់ បានវិលមកលំនៅឋានវិញហើយនៅរសៀលថ្ងៃទី២៥ តុលា ថា បន្ទាប់ពីស្រាយបំភ្លឺជាលើកទី៣ នៅព្រឹកថ្ងៃទី២៥ តុលា នៅសាលាដំបូងខែត្រមណ្ឌលគិរី។ សហគមន៍ប្ដេជ្ញាថា នឹងបន្តក្រាញ់ននៀលការពារធនធានធម្មជាតិ នៅសេសសល់ចុងក្រោយឲ្យគង់វង្ស បើទោះបីពួកគាត់រងការគំរាមកំហែងតាមប្រព័ន្ធតុលាការក្ដី។
សមាជិកសហគមន៍ឡៅកា ដែលតុលាការកោះហៅ លោក គិរ ងាវ រំឭកថា កាលពីឆ្នាំ២០១៤ សហគមន៍ឡៅកា ប្រទះឃើញសកម្មភាពកាប់ឈើ និងដឹកជញ្ជូនឈើក្នុងតំបន់ព្រៃសហគមន៍ឡៅកា ដោយក្រុមហ៊ុន ក្រុមហ៊ុន វីឡេក ឌីវឺឡប់មែន (Development) ហើយពួកគាត់ប្តឹងទៅសមត្ថកិច្ចពាក់ព័ន្ធ រួមទាំងអាជ្ញាធរមូលដ្ឋានផងឲ្យទប់ស្កាត់បទល្មើសព្រៃឈើ តែសមត្ថកិច្ចពាក់ព័ន្ធទាំងនោះធ្វើមិនដឹងមិនឮ។ បញ្ហានេះសហគមន៍បានបង្ខំចិត្តដាក់បារាសកាត់ទទឹងផ្លូវ បំណងរារាំងរថយន្តដឹកឈើប្រណិត ដោយចាប់រថយន្តដឹកឈើបាន ១០គ្រឿង រួចបញ្ជូនទៅមន្ត្រីជំនាញអនុវត្តច្បាប់។ ក្រោយមកនគរបាលនៅតំបន់នោះប្ដឹងសហគមន៍ថា បង្ករបួសស្នាមដោយអចេតនាដល់អ្នកដំណើរ ដោយសារតែសហគមន៍ដាក់បារាសខុសច្បាប់ ហើយនគរបាលទាំងនោះបានកសាងសំណុំរឿងទៅតុលាការដោយពុំមានដើមបណ្តឹង។ លោកសង្ស័យថា សំណុំរឿងនេះទំនងជាឈ្មួញរកស៊ីឈើ ឃុបឃិតជាមួយឈ្មួញប្ដឹងសហគមន៍។
លោកក គិរ ងាវ កត់សម្គាល់ថា កាលពីឆ្នាំ ២០១៤ ដើមឈើច្បោះរបស់សហគមន៍ឡៅកា រាប់រយដើម ត្រូវបានក្រុមហ៊ុន វីឡេក ឌីវឺឡប់មែន កាប់យកឈើដើម្បីយកដី ក៏ប៉ុន្តែអ្នកភូមិបានប្ដឹងករណីនេះ ជូនអាជ្ញាធរមូលដ្ឋាន និងស្ថាប័នតុលាការ។ រហូតមកទល់បច្ចុប្បន្ន ក្រុមសមត្ថកិច្ច និងតុលាការមិនទាន់ដោះស្រាយយ៉ាងណានៅឡើយ។
សហគមន៍ឡៅកា ម្នាក់ទៀតលោកស្រី ផ្លឹក ភារម្យ ចាត់ទុកដីកាកោះរបស់តុលាការ ជារឿងមិនសមហេតុផល ព្រោះបេសកកម្មការពារធនធានធម្មជាតិ របស់សហគមន៍ត្រូវបានធានាដោយច្បាប់ និងអនុសាសន៍របស់ប្រមុខរដ្ឋាភិបាល បែរជាត្រូវរងការគំរាមកំហែងតាមប្រព័ន្ធតុលាការទៅវិញ។ ដោយឡែកអ្នកមានឥទ្ធិពល និងឧកញ៉ាមួយចំនួនដែលកាប់បំផ្លាញព្រៃឈើ និង ជួញដូរឈើខុសច្បាប់ច្រើនឆ្នាំមកហើយ បែរជាត្រូវរួចខ្លួន។
កាលពីថ្ងៃទី១០ ខែតុលា ឆ្នាំ ២០១៧ តំណាងអយ្យការខែត្រមណ្ឌលគិរី បានកោះហៅ សហគមន៍ព្រៃឈើ ៧រូប ឲ្យមកស្រាយបំភ្លឺសំណុំរឿងបង្ករបួសស្នាមដោយអចេតនាដែលប្រព្រឹត្តនៅភូមិឡៅកា សង្កាត់សុខដុម ក្រុងសែនមនោរម្យ កាលពីឆ្នាំ ២០១៤។
អាស៊ីសេរីមិនអាចរកប្រភពទាក់ទងតំណាងអយ្យការខែត្រមណ្ឌលគិរី លោក មន វ៉ាន់ដា ដើម្បីសុំការបញ្ជាក់បញ្ហានេះបានទេនៅថ្ងៃទី២៥ តុលា។
មន្ត្រីសម្របសម្រួលសមាគមអាដហុក (ADHOC) ខែត្រមណ្ឌលគិរី លោក សុក រដ្ឋា យល់ថា ពាក្យបណ្ដឹងរឿងនេះពុំមានធាតុផ្សំណាមួយ ដែលសមត្ថកិច្ចកសាងសំណុំរឿងទៅតុលាការនោះទេ។ លោកថា សហគមន៍ឡៅកា ព្យាយាមរិះរកគ្រប់វិធីសាស្ត្រ ដើម្បីទប់ស្កាត់ជនល្មើសកាប់បំផ្លាញព្រៃសហគមន៍ និងប្រើសិទ្ធិរបស់ខ្លួនការពារដីធ្លី និងធនធានធម្មជាតិ តែពួកគាត់បែរជារងគ្រោះដោយសារតែសមត្ថកិច្ចធ្វើទុក្ខបុកម្នេញ ដោយគំរាមកំហែងតាមប្រព័ន្ធតុលាការទៅវិញ។ លោករំពឹងថា សំណុំរឿងនេះ តុលាការនឹងប្រើឆន្ទានុសិទ្ធិសម្រេចឲ្យបានត្រឹមត្រូវ តាមគោលការណ៍ច្បាប់។
សហគមន៍តំបន់ការពារធម្មជាតិឡៅកា មានទំហំដី ២.២២៦ហិកតារ បានចុះបញ្ជីជាព្រៃសហគមន៍ដោយក្រសួងបរិស្ថានកាលពីឆ្នាំ ២០១៤។ ព្រៃសហគមន៍នេះឋិតក្នុងដែនជម្រកសត្វព្រៃភ្នំព្រេច នៃភូមិឡៅកា សង្កាត់សុខដុម ក្រុងសែនមនោរម្យ ខែត្រមណ្ឌលគិរី។ សហគមន៍ថា បច្ចុប្បន្នសកម្មភាពកាប់ឈើមានតម្លៃ និងទន្ទ្រានព្រៃយកដីនៅតែបន្តកើតមាន ដោយអ្នកមានឥទ្ធិពល និងពលរដ្ឋចំណូលស្រុក ហើយសហគមន៍ពុំមានកម្លាំងគ្រប់គ្រាន់ក្នុងការទប់ស្កាត់នោះទេ ហើយកិច្ចសហការបង្ក្រាបបទល្មើសព្រៃឈើរបស់សមត្ថកិច្ចពាក់ព័ន្ធក៏ហាក់ទន់ជ្រាយនៅឡើយ។
របាយការណ៍អង្កេតរបស់សមាគមអាដហុក ខែត្រមណ្ឌលគិរី បានឲ្យដឹងថា ចាប់តាំងពីមានប្រកាសបង្កើតសហគមន៍តំបន់ការពារ រហូតបច្ចុប្បន្ន ជម្លោះស្រួចស្រាល់មួយចំនួនកើតមាននៅក្នុងសហគមន៍ ដូចជាទំនាស់ប្ដឹងតវ៉ារវាងសហគមន៍ និងមន្ត្រីបរិស្ថាន ទាក់ទិនការអនុវត្តគោលនយោបាយការពារព្រៃឈើមិនបានត្រឹមត្រូវ ជម្លោះសហគមន៍ប្ដឹងក្រុមហ៊ុន វីឡេក ឌីវឺឡប់មែន ទាក់ទិនការរំលោភឈូសឆាយព្រៃការពារជិត ៣០០ហិកតារ និងកាប់បំផ្លាញដើមឈើ ផលិតជ័រទឹកសហគមន៍រាប់ពាន់ដើម ជម្លោះប្រើអំពើហិង្សារវាងបុគ្គលិកក្រុមហ៊ុន និងប៉ូលិសមូលដ្ឋាន វាយមកលើសហគមន៍ដែលជាអ្នកបង្ក្រាបបទល្មើសព្រៃឈើ៕
No comments:
Post a Comment