ដោយ អាស៊ីសេរី
2017-10-10
ស្ត្រីសម្រាលកូននៅមន្ទីរពេទ្យបង្អែកខេត្តព្រះសីហនុ នៅថ្ងៃទី២១ ខែកុម្ភៈ ឆ្នាំ២០១៧។ RFA/Den Ayuthyea
RFA/Den Ayuthyea
អ្នកវិភាគថា ការដែលលោកនាយករដ្ឋមន្ត្រី ហ៊ុន សែន ផ្ដល់ប្រាក់ឧបត្ថម្ភដល់ស្ត្រីដែលជាមន្ត្រីរាជការនៅពេលសម្រាលកូន គឺជានយោបាយប្រជាភិថុតិដើម្បីចង់ប្រជាប្រិយភាពតែប៉ុណ្ណោះ។ ប្រតិកម្មបែបនេះរបស់អ្នកវិភាគ បន្ទាប់ពីប្រមុខរដ្ឋាភិបាលផ្ដល់កញ្ចប់ថវិកាពិសេសចាប់ពី ៨០ម៉ឺនឡើងទៅដល់ស្ត្រីដែលជាមន្ត្រីរាជការស៊ីវិល នគរបាល កងទ័ព នៅពេលសម្រាលកូន។
សន្ដានចិត្តរបស់លោក ហ៊ុន សែន ចំពោះតែស្ត្រីដែលជាមន្ត្រីរាជការស៊ីវិល នគរបាល កងទ័ព នៅពេលសម្រាលកូន ទទួលបានកញ្ចប់ថវិកាពីរដ្ឋាភិបាលនោះ មិនទទួលបានការស្វាគមន៍ពីអ្នកវិភាគនយោបាយ ពីសង្គមស៊ីវិល និងពលរដ្ឋសាមញ្ញនោះទេ។
អ្នកវិភាគនយោបាយជើងចាស់ដ៏លេចធ្លោលោកបណ្ឌិត ឡៅ ម៉ុងហៃ យល់ថា លោក ហ៊ុន សែន ត្រូវគិតគូរជួយដោះស្រាយលើករណីស្ត្រីសម្រាលកូនឲ្យស្ត្រីទូទៅ ដើម្បីទទួលបានការគាំពារពីរដ្ឋដូចគ្នាមិនចាំបាច់សំដៅលើស្ត្រីនៅក្នុងក្រុមណាមួយនោះទេ។ លោកយល់ថា ប្រមុខរដ្ឋាភិបាលដែលមានសិទ្ធិចាត់ចែងចាយលុយជាតិរាប់រយលានដុល្លារក្នុងមួយឆ្នាំៗ គួរតែធ្វើច្បាប់មួយកំណត់ថា ស្ត្រីក្នុងកម្រិតដែលទទួលបានថវិកាឧបត្ថម្ភពីរដ្ឋនៅពេលសម្រាលកូន មិនមែនម្ដងលោក ហ៊ុន សែន នឹកឃើញម្ដងប្រកាសផ្ដល់កញ្ចប់ថវិកាកម្មការិនីរោងចក្រ ម្ដងទៀតក៏ប្រកាសផ្ដល់ជូនស្ត្រីដែលជាមន្ត្រីរាជការ។
ជាងទៅទៀត លោកបណ្ឌិត ឡៅ ម៉ុងហៃ យល់ថា នយោបាយប្រជាភិថុតិ របស់លោក ហ៊ុន សែន នៅពេលនេះ នឹងធ្វើឲ្យស្ត្រីផ្សេងទៀតដែលមិនទទួលការគោលនយោបាយសង្គមកិច្ចនេះ មិនសប្បាយចិត្តឡើយ។
ប្រតិកម្មរបស់លោកបណ្ឌិត ឡៅ ម៉ុងហៃ បែបនេះ ខណៈលោកនាយករដ្ឋមន្ត្រី ហ៊ុន សែន ប្រកាសកាលពីថ្ងៃទី០៩ ខែតុលា ជាសាធារណៈថា រាជរដ្ឋាភិបាលរបស់លោកនឹងផ្ដល់ប្រាក់ឧបត្ថម្ភដល់ស្ត្រី ដែលជាមន្ត្រីរាជការស៊ីវិល ស្ត្រីដែលជាមន្ត្រីនគរបាល ស្ត្រីដែលជាកងទ័ព នៅពេលសម្រាលកូននឹងទទួលបានប្រាក់៨០ម៉ឺន ចំពោះការសម្រាលបានកូន១ ចំណែក កូនភ្លោះពីរទទួលបានប្រាក់១,៦០លានរៀល និងអ្នកមានកូនភ្លោះបីទទួលបានប្រាក់ ២,៤លានរៀលចាប់ពីខែមករា ឆ្នាំ២០១៨តទៅ។ លោក ហ៊ុន សែន បន្តថា ការផ្ដល់កញ្ចប់ថវិកានេះ មិនមែនជាការលំបាកចំពោះរដ្ឋាភិបាលរបស់លោកនោះទេ។
លោកនាយករដ្ឋមន្ត្រីឲ្យដឹងដែរថា ស្ត្រីក្នុងក្របខ័ណ្ឌមន្ត្រីរាជការស៊ីវិល នគរបាល និងកងទ័ព មានសរុបប្រមាណ ៩ម៉ឺននាក់។ ក្នុងនោះស្ត្រីមានលទ្ធភាព មានកូនមានជិត១១.០០០នាក់។
កាលពីថ្មីៗនេះដែរ ក្នុងពេលចុះជួបកម្មករកម្មការិនី លោក ហ៊ុន សែន ក៏ប្រកាសដែរថា រដ្ឋាភិបាល មានគោលនយោបាយជាតិគាំពារសង្គមចំពោះកម្មការិនីនៅពេលសម្រាលកូនដែលអាចទទួលថវិកាពី ៤០០,០០០រៀលឡើងទៅ។
លោក ហ៊ុន សែន បង្ហាញសន្ដានចិត្តជួយសម្រួលថវិកាដល់ស្ត្រីក្នុងពេលសម្រាលកូនដូចនេះ គឺស្របពេលកូនប្រសារបស់និងកូនស្រីរបស់លោកទើបសម្រាលកូននៅក្រៅប្រទេស។
នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថា រដ្ឋាភិបាលគួរមានកញ្ចប់ថវិកាដល់ការសម្រាលកូនរបស់ស្ត្រីដែលធ្វើក្នុងសេវាកម្សាន្ត ស្ត្រីធ្វើការងារសំណង់ និងស្ត្រីដែលធ្វើការងារក្នុងសិប្បកម្មតូចៗ និងនៅក្នុងរោងចក្រដែលមិនមែនជាងរោងចក្រកាត់ដេរ។ លោកថា ក្នុងនាមជាសង្គមស៊ីវិលចង់ឃើញរដ្ឋាភិបាលផ្ដល់អត្ថប្រយោជន៍ដល់ស្ត្រីទូទៅដើម្បីឲ្យទូទៅទទួលបានអត្ថប្រយោជន៍ដូចៗគ្នា។
ទាក់ទងរឿងសម្រាលកូននេះដែរ មានករណីខ្លះដែលស្ត្រីមានផ្ទៃពោះមិនមែនជាមន្ត្រីជារាជការ ថែមទាំងមានជីវភាពក្រីក្រផង គ្មានលទ្ធភាពបង់លុយពេទ្យត្រូវពេទ្យទុកដល់ស្លាប់។
ស្ត្រីជាអ្នកលក់ដូរម្នាក់រស់នៅរាជធានីភ្នំពេញ លោកស្រី អម សុខលាភ មានអាយុ៦០ឆ្នាំធ្លាប់សម្រាលកូនបាន៤ ដោយលុយខ្លួនឯងនោះ ឲ្យអាស៊ីសេរីដឹងថា លោកស្រីសប្បាយចិត្តពេលឃើញនាយករដ្ឋមន្ត្រីចេះគិតគូរពីលំបាករបស់ស្ត្រី។ ប៉ុន្តែពលរដ្ឋសាមញ្ញរូបនេះ ទោះស្ត្រីក្នុងស្រទាប់វណ្ណៈបើមានគ្រួសារគឺជៀសមិនផុតពីការមានផ្ទៃពោះនឹងត្រូវសម្រាលកូននោះទេ ដូច្នេះលោកស្រីចង់ឃើញរដ្ឋាភិបាលផ្ដល់ថវិកាដល់ស្ត្រីទាំងអស់ជាពិសេសស្ត្រីដែលមានជីវភាពក្រីក្រ។
លោកបណ្ឌិត ឡៅ ម៉ុងហៃ ថាការ ចាត់វិធានការផ្ទល់កញ្ចប់លុយរដ្ឋពិសេសដល់ស្ត្រីជាមន្ត្រីរាជការ និងកម្មករថា រឿងនយោបាយព្រោះលោកសង្កេតឃើញថា រដ្ឋាភិបាលសព្វថ្ងៃយកហេតុផលផ្សេងៗមកកៀបសង្កត់សង្គមស៊ីវិល បំបិទសំឡេងសារព័ត៌មានឯករាជ្យ និងធ្វើទុក្ខបុកម្នេញគណបក្សគ្រប់រូបភាព។ ប៉ុន្តែក្នុងបរិបទកៀកពេលបោះឆ្នោតខ្លួនលោកផ្ទាល់ព្យាយាមធ្វើយុទ្ធនាការគ្រប់បែបយ៉ាងដើម្បីចង់បានប្រជាប្រិយភាព។
លោក ហ៊ុន សែន ប៉ាន់ប្រមាណថា នៅឆ្នាំ២០១៨ខាងមុខ រដ្ឋាភិបាលនឹងប្រើប្រាស់លុយជាតិជាង ២លានដុល្លារចំពោះស្ត្រីកម្មករទាំងក្នុងប្រព័ន្ធនិងក្រៅប្រព័ន្ធ។ រីឯស្ត្រីជាមន្ត្រីរាជការរដ្ឋាភិបាលនឹងត្រូវចំណាយថវិកាជាតិលើការសម្រាលកូននេះជាង១០លានដុល្លារ និងស្ត្រីជាកងកម្លាំងប្រដាប់អាវុធអស់ជាង ២លានដុល្លារ។ ប៉ុន្តែ លោក ហ៊ុន សែន មិនទាន់ហ៊ានប្រាប់ថា រដ្ឋាភិបាលនឹងត្រូវចំណាយលុយរដ្ឋលើការសម្រាលកូនចំពោះស្ត្រីទូទៅនៅពេលណានោះទេ៕
No comments:
Post a Comment