Khmer Circle: Blatant act of Treason?...
ដោយ អាស៊ីសេរី
2017-10-10
ពលរដ្ឋចង្អុលតម្រុយបង្គោលព្រំដែនដែលគាត់អះអាងថាដីរបស់គាត់បាត់ទៅវៀតណាម នៅចន្លោះបង្គោលព្រំដែនលេខ១៤៧ និង ១៤៨ ឋិតនៅឃុំថ្នាធ្នង់ ស្រុករំដួល ខេត្តស្វាយរៀង នៅថ្ងៃអាទិត្យ ទី៨ ខែមករា ឆ្នាំ២០១៧។ RFA/Uon Chhin
RFA/Uon Chhin
មន្ត្រីសង្គមស៊ីវិល និងពលរដ្ឋរស់នៅស្រុកចន្ទ្រា ខែត្រស្វាយរៀង អំពាវនាវឲ្យរដ្ឋាភិបាលផ្អាកបោះតម្រុយព្រំដែនសិន អំឡុងពេលដែលកម្ពុជាកំពុងមានវិបត្តិនយោបាយ។ ការអំពាវនាវនេះធ្វើឡើង ក្រោយពីអាជ្ញាធរកម្ពុជា និងវៀតណាមកាលពីពេលថ្មីៗនេះ បានបោះតម្រុយព្រំដែននៅស្រុកចន្ទ្រា យ៉ាងប្រញាប់សម្រេចបានជាង ២០បង្គោល និងបានរារាំងមន្ត្រីបក្សប្រឆាំង និងពលរដ្ឋមិនឲ្យចូលរួមតាមដានពីការបោះតម្រុយព្រំដែននោះទេ។
ពលរដ្ឋ និងមន្ត្រីបក្សប្រឆាំងនៅខែត្រស្វាយរៀង ចាត់ទុកការបោះតម្រុយព្រំដែនរបស់អាជ្ញាធរកម្ពុជា និងវៀតណាមថា មិនមានតម្លាភាព និងធ្វើឡើងដោយលាក់បាំង។
ការថ្លែងបែបនេះដោយសារពួកគាត់ មើលឃើញថា សមត្ថកិច្ចស្រុកចន្ទ្រា នៅតែរឹតត្បិតសេរីភាពមន្ត្រីបក្សប្រឆាំង និងពលរដ្ឋមិនឲ្យទៅពិនិត្យមើលតម្រុយព្រំដែននៅតំបន់នោះ។
អាជ្ញាធរកម្ពុជា និងវៀតណាម បានសម្រេចបោះតម្រុយព្រំដែន លេខ ១៩៤ ដល់២០១ រយៈពេលជាង ១ខែមកហើយ ក្នុងចន្លោះបង្គោលនីមួយៗ អាជ្ញាធរប្រទេសទាំងពីរបានបោះចំនួនពីរបង្គោល។ ចំណែកពលរដ្ឋ និងមន្ត្រីបក្សប្រឆាំងអះអាងថា ការបោះតម្រុយព្រំដែននោះបានចូលដីស្រែពលរដ្ឋច្រើនហិកតារ ត្បិតបង្គោលព្រំដែនចាស់ គឺឋិតនៅឆ្ងាយពីបង្គោលព្រំដែនបច្ចុប្បន្ន។
ពលរដ្ឋរស់នៅស្រុកចន្ទ្រា ថ្លែងសុំមិនបញ្ចេញឈ្មោះ សម្ដែងការសោកស្ដាយនៅគ្រាដែលដីរបស់កម្ពុជា នៅតែរបូតដល់ដៃវៀតណាមជាបន្តបន្ទាប់ ហើយមកទល់ពេលនេះ ពលរដ្ឋកម្ពុជាក៏ត្រូវអាជ្ញាធរវៀតណាមរារាំងមិនឲ្យលើកភ្លឺស្រែ និងធ្វើកសិកម្មក្នុងដីរបស់ខ្លួន ដោយលើកហេតុផលថា ជាតំបន់ហាមឃាត់ ឬជាតំបន់ស។ លោកថា ពលរដ្ឋខ្មែរមួយចំនួន នៅក្បែរព្រំដែន ត្រូវបានយោធាវៀតណាម ហាមមិនឲ្យធ្វើស្រែ និងលើកភ្លឺស្រែ ក្នុងដីរបស់ខ្លួននៅក្បែរព្រំដែនដែលគ្រប់គ្រងច្រើនទសវត្សរ៍មកហើយ ក្រោមហេតុផលថា ជាតំបន់ស រីឯដីស្រែរបស់វៀតណាមវិញ អាជ្ញាធរពុំកំណត់ជាតំបន់សនោះទេ។ លើសពីនេះ នៅគ្រាដែលពលរដ្ឋខ្មែរត្រូវបានអាជ្ញាធរវៀតណាម ធ្វើទុក្ខបុកម្នេញមិនឲ្យធ្វើស្រែ និងលើកភ្លឺស្រែ អ្នកភូមិបានដាក់ពាក្យប្ដឹងសុំអន្តរាគមន៍ពីអាជ្ញាធរកម្ពុជា មិនត្រឹមតែមិនមានដំណោះស្រាយទេ បែរជាត្រូវអាជ្ញាធរចោទថា ជាក្រុមបក្សប្រឆាំងទៅវិញ។
ស្របជាមួយគ្រានេះ ការបោះបង្គោលព្រំដែនលេខ ១៩៤ ដល់ ២០១ នៅឃុំចន្ទ្រា កាលពីពេលថ្មីៗនេះ បានរំកិលចូលដីខ្មែរច្រើនហិកតារក្ដី ក៏ពលរដ្ឋមិនហានចេញមុខប្ដឹងមកអាជ្ញាធរកម្ពុជាដែរ។
បុរសដដែលមានមន្ទិលថា អំឡុងពេលដែលកម្ពុជាកំពុងចម្រូងចម្រាស់រឿងនយោបាយ អាជ្ញាធរកម្ពុជា និងវៀតណាម បានបោះតម្រុយព្រំដែនយ៉ាងលឿន និងរឹតត្បិតមិនឲ្យមន្ត្រីបក្សប្រឆាំង និងពលរដ្ឋទៅពិនិត្យមើលនោះទេ។ លោកចាត់ទុកការបោះតម្រុយព្រំដែននៅតំបន់នោះ គឺកម្ពុជាចាញ់ប្រៀបជាងវៀតណាមច្រើន ត្បិតបង្គោលព្រំដែនចាស់ ដែលធ្វើនៅសម័យបារាំងគឺឋិតនៅឆ្ងាយពីតំបន់ព្រំដែនបច្ចុប្បន្ន។
កាលពីឆ្នាំ២០១៥ អាជ្ញាធរវៀតណាម បានស្ថាបនាផ្លូវក្រវាត់ព្រំដែននៅស្រុកចន្ទ្រា ពុះយកដីខ្មែរជាង ៥០០ហិកតារ ដែលឋិតនៅចន្លោះបង្គោលព្រំដែនលេខ ១៩៤ និង១៩៧។ ការរបូតដីខ្មែរចូលទៅវៀតណាមនេះ អាជ្ញាធរកម្ពុជាហាក់ធ្វើមិនដឹងមិនឮ បើទោះបីជា ពលរដ្ឋខ្មែរប្ដឹងរឿងក្ដី ហើយមកទល់ពេលនេះ ដីខ្មែរជាង ៥០០ហិកតារនៅតំបន់នោះ បានហ៊ុមព័ទ្ធដោយផ្លូវក្រវាត់ព្រំដែនដែលវៀតណាមស្ថាបនា។
ប្រធានប្រតិបត្តិគណបក្សសង្គ្រោះជាតិ ខែត្រស្វាយរៀង លោក ម៉ៅ វិបុល ឲ្យដឹងនៅថ្ងៃទី៩ តុលា ថា មន្ត្រីបក្សប្រឆាំងនៅតាមមូលដ្ឋាន កំពុងភ័យព្រួយរឿងសុវត្ថិភាពផ្ទាល់ខ្លួន ដោយសារតែអាជ្ញាធរស្រុកចន្ទ្រា គំរាមកំហែងផ្នែកនយោបាយ នៅគ្រាដែលពួកគាត់បានលាតត្រដាងបញ្ហាព្រំដែនទៅប្រព័ន្ធផ្សព្វផ្សាយ។ ចំណែកពលរដ្ឋមួយចំនួនក៏ពុំសូវហានចេញមុខតវ៉ាដែរ បើទោះបីជា ដីស្រែរបស់ពួកគាត់ត្រូវវៀតណាមគ្រប់គ្រងក្ដី ដោយខ្លាចអាជ្ញាធរចាប់ដាក់គុក ព្រោះកន្លងទៅអាជ្ញាធរកម្ពុជាក៏ធ្លាប់ចាប់ពលរដ្ឋដាក់គុកដែរ នៅគ្រាពលរដ្ឋតវ៉ារឿងវៀតណាមមកធ្វើស្រែលើដីរបស់ខ្លួន។
លោកបន្ថែមថា អាជ្ញាធរកម្ពុជា និងនគរបាលការពារព្រំដែន បានបិទបាំងព័ត៌មានស្ដីពីការបោះតម្រុយព្រំដែននៅតំបន់នោះ ព្រោះអាជ្ញាធរបានរារាំងមន្ត្រីបក្សប្រឆាំង និងពលរដ្ឋមួយចំនួនមិនឲ្យចុះទៅតំបន់នោះ ក្រោមហេតុផលការពារសុវត្ថិភាព។
ប្រធានអង្គការសម្ព័ន្ធគណនេយ្យភាពកម្ពុជា លោក សន ជ័យ អង្កេតឃើញថា រដ្ឋាភិបាលបានសម្រេចធ្វើអ្វីមួយ គឺផ្អែកតាមរបាយការណ៍ពីអាជ្ញាធរថ្នាក់មូលដ្ឋាន។ បញ្ហានេះលោកយល់ថា អាជ្ញាធរ មូលដ្ឋានត្រូវតែមានតម្លាភាព និងការទទួលខុសត្រូវជាមួយរដ្ឋាភិបាល និងពលរដ្ឋរបស់ខ្លួនក្នុងរឿងព្រំដែន។ លោកយល់ថា ការបោះតម្រុយព្រំដែនចាំបាច់ត្រូវដោះស្រាយបញ្ហាជាមុន បើទោះបីជាស្ថានភាពនយោបាយកម្ពុជា មិនសូវល្អក្ដី សំខាន់គឺការបោះតម្រុយព្រំដែន ជារឿងបច្ចេកទេស ដែលទាមទារឲ្យអាជ្ញាធរមូលដ្ឋានរាយការណ៍ទៅថ្នាក់ជាតិ ពីផលប៉ះពាល់នានារបស់ពលរដ្ឋជាមុនសិន មុនបោះតម្រុយព្រំដែន ដើម្បីឲ្យមានវិធានការដោះស្រាយ។
យ៉ាងណា មន្ត្រីសង្គមស៊ីវិល ពលរដ្ឋ និងមន្ត្រីបក្សប្រឆាំង យល់ថា ការបោះតម្រុយព្រំដែនគួរតែមានការចូលរួមគ្រប់ភាគី ទាំងពលរដ្ឋ រដ្ឋាភិបាល សង្គមស៊ីវិល និងគណបក្សប្រឆាំង ដើម្បីបញ្ជាក់ពីភាពត្រឹមត្រូវ។ លើសពីនេះ ការបោះតម្រុយព្រំដែនកម្ពុជា នៅតែមានភាពចម្រូងចម្រាសច្រើន ដោយសារពុំទាន់មានឯកភាពជាតិផ្ទៃក្នុង ដែលធ្វើឲ្យរដ្ឋាភិបាលទទួលរងនូវការរិះគន់ និងមានការតវ៉ាពីប្រជាពលរដ្ឋ ដោយសារបាត់បង់ដី ដោយបង្គោលខិតចូលមកក្នុងដីខ្មែរជាដើម៕
No comments:
Post a Comment