ដោយ សេក បណ្ឌិត
2017-12-04
rfa
ទិដ្ឋភាពភូមិស្រែគរ និងភូមិក្បាលរមាសចាស់ បន្ទាប់ពីក្រុមហ៊ុនវាវីអគ្គិសនីសេសានក្រោមពីរបិទទ្វារទឹកជាស្ថាពរ នៅថ្ងៃទី២០ខែតុលាឆ្នាំ២០១៧។
Photo Provided
គណៈកម្មការដោះស្រាយផលប៉ះពាល់ខែត្រស្ទឹងត្រែង សម្រេចមិនទទួលខុសត្រូវ រាល់ការបាត់បង់ផលប្រយោជន៍ ពលរដ្ឋដែលបដិសេធមិនទទួលសំណងនោះទេ។ គណៈកម្មការនេះបានដាក់ឱសានវាទ នៃការបិទបញ្ចប់ដំណោះស្រាយផលប៉ះពាល់ទំនប់វារីអគ្គិសនីសេសានក្រោមពីរ ត្រឹមនៅថ្ងៃទី៣១ ខែធ្នូ ឆ្នាំ២០១៧។ មន្ត្រីសង្គមស៊ីវិល ចោទថា អាជ្ញាធរ និងក្រុមហ៊ុនមិនអនុវត្តតាមបញ្ជារបស់លោកនាយករដ្ឋមន្ត្រី ហ៊ុន សែន។
ពលរដ្ឋដែលរងគ្រោះដោយសារទំនប់វារីអគ្គិសនីសេសានក្រោមពីរ និងអ្នកឃ្លាំមើលបរិស្ថានចាត់ទុកការបដិសេធមិនសាងសង់ភូមិថ្មី ជូនពលរដ្ឋដែលមិនទទួលសំណង គឺជាទង្វើល្មើសបទបញ្ជារបស់ប្រមុខរដ្ឋាភិបាល។ កាលពីខែតុលា ឆ្នាំ២០១៧ លោកនាយករដ្ឋមន្ត្រី ហ៊ុន សែន បានសម្ពោធ បិទទ្វារទឹកទំនប់វារីអគ្គិសនីសេសានក្រោមពីរជាស្ថាពរ។ កាលពេលនោះ លោកបញ្ជាក់ថា រដ្ឋាភិបាលសម្រេចអនុញ្ញាតឲ្យអ្នកភូមិដែលបដិសេធមិនទទួលសំណងរស់នៅភូមិស្រែគរ និងភូមិក្បាលរមាសចាស់ អាចតាំងទីលំនៅភូមិថ្មីបាន។
ពលរដ្ឋដែលបដិសេធមិនទទួលសំណង នៅភូមិក្បាលរមាសចាស់ លោក ប្រច់ រិទ្ធិ ឲ្យដឹងនៅថ្ងៃទី ០៤ វិច្ឆិកាថា ពលរដ្ឋ ៥៧គ្រួសារប្រកាន់ជំហរក្រាញននៀលមិនចាកចេញពីភូមិ ដោយសារពួកគាត់មិនអាចបោះបង់ចោលប្រពៃណី វប្បធម៌ ដីព្រៃឈើ ផ្នូរដូនតា និងភូមិកំណើត។ លោកបញ្ជាក់ថា អ្នកភូមិក្បាលរមាសមួយចំនួនបាត់បង់ដីស្រែធ្វើកសិកម្ម និងខូចខាតផលដំណាំ នៅគ្រាដែលក្រុមហ៊ុនបិទទ្វារទឹកជាស្ថាពរ។ លើសពីនេះ អ្នកភូមិខ្លះមករស់នៅដីចម្ការវិលជុំ និងមួយចំនួនទៀត មកសង់ខ្ទមនៅទួលខ្ពស់ជាបណ្ដោះអាសន្ន។ «»
មេឃុំស្រែគរ លោក សៀក មេគង្គ ពីគណបក្សសង្គ្រោះជាតិ ដែលទើបត្រូវគេដកពីតំណែងឲ្យដឹងថា រយៈពេលជាង ២សប្ដាហ៍ចុងក្រោយនេះមានអ្នកភូមិ ៦គ្រួសារថ្មីទៀត ប្ដូរឥរិយាបថព្រមទទួលសំណង និងបានទៅរស់នៅភូមិថ្មីរួចហើយ ហើយបច្ចុប្បន្ននៅសេសសល់ពលរដ្ឋ ៥០គ្រួសារ មិនរាប់បញ្ចូលពលរដ្ឋបំបែកគ្រួសារ ដែលមិនព្រមចាកចេញពីភូមិកំណើត។ លោកថា ក្រុមហ៊ុនអះអាងថា នឹងមិនសាងសង់ភូមិថ្មីជូនពលរដ្ឋដែលបដិសេធមិនទទួលសំណងនោះទេ ព្រោះការសាងសង់ភូមិថ្មី ត្រូវចំណាយថវិកាច្រើន។ លោកបញ្ជាក់ថា ភូមិថ្មីដែលពលរដ្ឋគ្រោងស្នើសុំនោះ ហ៊ុមព័ទ្ធដោយទឹក លំបាកធ្វើដំណើរ គ្មានសាលារៀន និងមន្ទីរពេទ្យ ហើយផែនការស្ថាបនាហេដ្ឋារចនាសម្ព័ន្ធថ្មី ត្រូវចំណាយធនធានច្រើន បូកផ្សំពេលវេលាច្រើនផង បង្កកុមារខកខានមិនបានរៀនសូត្រ និងការផ្ដល់សេវាសាធារណៈជួបឧបសគ្គច្រើន។ «»
លិខិតជូនដំណឹងរបស់អភិបាលខែត្រស្ទឹងត្រែងលោក មុំ សារឿន ចុះថ្ងៃ១១ តុលា ឲ្យដឹងថា ក្នុងករណីដែលពលរដ្ឋមិនទទួលសំណង រាជរដ្ឋាភិបាល និងក្រុមហ៊ុនបានផ្ដល់ជម្រើសនានា ជូនពលរដ្ឋដែលចង់យកទីតាំងថ្មី ឋិតនៅក្បែរភូមិចាស់ និងធ្លាប់អាស្រ័យផលស្រាប់ ដែលជាទីតាំងមានសុវត្ថិភាព ដើម្បីសាងសង់លំនៅឋានថ្មីរស់នៅ។ លើសពីនេះ រាជរដ្ឋាភិបាល និងក្រុមហ៊ុនអះអាងថា នឹងបន្តសហការដោះស្រាយផលប៉ះពាល់ ផ្អែកតាមគោលនយោបាយសមស្របជូនពលរដ្ឋផ្ទាល់។
អ្នកឃ្លាំមើលបរិស្ថាន លោក ភូ ប៊ុនថាន់ យល់ថា អាជ្ញាធរ និងក្រុមហ៊ុនគួរទទួលយកសំណូមពរពលរដ្ឋដោះស្រាយ និងអនុវត្តបទបញ្ជាប្រមុខរដ្ឋាភិបាលថា តើមានចំណុចណាខ្លះ ដែលផ្ដល់ឱកាសឲ្យពលរដ្ឋរស់នៅក្បែរភូមិចាស់បាន ជាទឹកដីកំណើតរបស់គាត់។ លោកកត់សម្គាល់ថា ការស្វែងរកដំណោះស្រាយបញ្ហានេះ បានអូសបន្លាយពេល រហូតបច្ចុប្បន្ន ហើយអាជ្ញាធរខែត្រនៅតែព្យាយាមផ្សព្វផ្សាយពីគោលនយោបាយសំណង ដែលពួកគាត់មិនពេញចិត្ត។ «»
អ្នកភូមិក្បាលរមាស និងស្រែគរ នៅតែបន្តទាមទារឲ្យក្រុមហ៊ុនទទួលខុសត្រូវការខូចខាតផលដំណាំកសិកម្ម ផ្ទះសម្បែង ផ្នូរដូនតា ព្រៃឈើ និងកុមារជាង ៨០នាក់ នៅភូមិក្បាលរមាសបោះបង់ការសិក្សាដោយសារការបិទទ្វារទឹកជាស្ថាពររបស់ក្រុមហ៊ុនវារីអគ្គិសនីសេសានក្រោមពីរ បណ្ដាលលិចផ្ទះសម្បែងពួកគាត់ទាំងស្រុង។
របាយការណ៍អាជ្ញាធរឃុំស្រែគរ ឲ្យដឹងថា មកទល់ពេលនេះ ពលរដ្ឋរស់នៅឃុំក្បាលរមាស ៥៧គ្រួសារ និងឃុំស្រែគរ ៥០គ្រួសារ មិនរាប់បញ្ចូលពលរដ្ឋបំបែកគ្រួសារ នៅមិនទាន់យល់ព្រមទទួលសំណងពីក្រុមហ៊ុននៅឡើយ។
គម្រោងសាងសង់ទំនប់វារីអគ្គិសនីសេសានក្រោមពីរ បង្កើតឡើងដោយក្រុមហ៊ុនក្នុងស្រុកឈ្មោះ រ៉ូយ៉ាល់ គ្រុប (Royal Group) មានភាគហ៊ុន ៣៩ភាគរយ និងក្រុមហ៊ុន ឆាយណា ហាយដ្រូឡានឆាង អ៊ីនធឺណេសិនណល អ៊ីននើជី (China's Hydrolancang International Energy) ប្រទេសចិន ភាគហ៊ុន ៥១ភាគរយ និងក្រុមហ៊ុនអគ្គិសនីវៀតណាម-អន្តរជាតិ (EVN) មានភាគហ៊ុន ១០%។ គម្រោងនេះជាគម្រោងខ្នាតធំទី១ នៅប្រទេសកម្ពុជា ដែលអនុម័តដោយសម័យប្រជុំរបស់គណៈរដ្ឋមន្ត្រីកាលពីខែវិច្ឆិកា ឆ្នាំ២០១២ និងចំណាយប្រាក់ជាង ៨០០លានដុល្លារ។ គម្រោងនេះបង្កផលប៉ះពាល់ប្រជាពលរដ្ឋជាង ១ពាន់គ្រួសារនៅភូមិចំនួន៧ ក្នុងឃុំចំនួន៤។ បច្ចុប្បន្ន ប្រជាពលរដ្ឋជិត ៩០ភាគរយ ទទួលយកគោលនយោបាយសំណង និងព្រមចាកចេញទៅរស់នៅតំបន់តាំងលំនៅថ្មី៕
No comments:
Post a Comment