ដោយ តាំង សារ៉ាដា
2018-01-21
rfa
អ្នកវិភាគឯករាជ្យ បណ្ឌិត ឡៅ ម៉ុងហៃ ថ្លែងក្នុងវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១០ ខែកុម្ភៈ ឆ្នាំ២០១៧។ RFA
Photo: RFA
អ្នកវិភាគនយោបាយជើងចាស់រិះគន់ថា ការបញ្ចូលសមាជិកថ្មី របស់គណបក្សប្រជាជនកម្ពុជាចូលទៅក្នុងគណៈកម្មាធិការកណ្ដាលចំនួន ៣៤២នាក់ ដែលជាមន្ត្រីរាជការ គឺធ្វើឲ្យការគ្រប់គ្រងរបស់គណបក្សនេះ ក្លាយជាគណបក្សកុម្មុយនិស្តផ្ដាច់ការតែម្ដង។
ប៉ុន្តែអ្នកនាំពាក្យ គណបក្សកាន់អំណាចឆ្លើយតបថា ការសម្រេចបញ្ចូលសមាជិកថ្មីនេះ គឺជាការសម្រេចនៃមហាសន្និបាតទាំងមូលរបស់គណបក្ស។
លោក បណ្ឌិត ឡៅ ម៉ុងហៃ រិះគន់ថា ការបញ្ចូលសមាជិកនៃគណៈកម្មាធិការកណ្ដាលរបស់គណបក្សប្រជាជនកម្ពុជានៅពេលនេះ គឺគ្រាន់តែធ្វើឲ្យគណបក្សរឹងមាំប៉ុណ្ណោះ។ លោកបន្តថាកាលណាបក្ស និងរដ្ឋមានតែមួយដូច្នេះ នឹងធ្វើឲ្យការគ្រប់គ្រងប្រទេសងាកទៅរករបបផ្ដាច់ការ។ «»
ការរិះគន់របស់លោកបណ្ឌិត ឡៅ ម៉ុងហៃ ស្របពេលដែលគណបក្សប្រជាជនកម្ពុជាធ្វើមហាសន្និបាតគណៈកម្មាធិការកណ្ដាល រយៈពេល បីថ្ងៃជាប់ៗគ្នា ហើយនៅថ្ងៃទី២១ ខែមករានេះគឺជាថ្ងៃចុង ក្រោយនៃមហាសន្និបាត។
គណបក្សប្រជាជនកម្ពុជាបានសម្រេចបញ្ចូលសមាជិកថ្មីនៃគណៈកម្មាធិការកណ្ដាលជាង ៣៤២នាក់ដែលអ្នកទាំងនោះជាមន្ត្រីរាជការមានឋានៈ ជាឯកឧត្ដម និងលោកជំទាវ។ រហូតមកទល់ពេលនេះ គណៈកម្មាធិការកណ្ដាលនៃគណបក្សប្រជាជនកម្ពុជា ដែលជាអតីតគណបក្សកុម្មុយនិស្តនេះ មានសមាជិកចំនួន ៨៦៥នាក់។
អ្នកនាំពាក្យគណបក្សប្រជាជនកម្ពុជា បានប្រាប់អាស៊ីសេរី តាមទូរស័ព្ទយ៉ាងខ្លីថា នេះជាការសម្រេចរបស់អង្គសន្និបាត។
គណបក្សប្រជាជនកម្ពុជារងការរិះគន់ម្តងរួចមកហើយ កាលពីមហាសន្និបាតមុនៗ ព្រោះគណបក្សនេះបានបញ្ចូលមន្ត្រីកងកំលាំង រួមមានមេប៉ូលិស មេទាហានឲ្យទទួលបានតួនាទីសំខាន់ៗនៅក្នុង ជួរបក្ស ដែលធ្វើឲ្យកងកម្លាំងបាត់បង់ឯករាជ្យភាព នៅក្នុងមុខដំណែង ដែលជាអ្នកបម្រើជាតិ។ ការសម្រេចធ្វើមហាសន្និបាត ដើម្បីវាយតម្លៃសភាពការណ៍នយោបាយរបស់បក្សកាន់អំណាចនៅពេលនេះ គឺក្រោយពេលគណបក្សប្រជាជនកម្ពុជា រំលាយគណបក្សសង្គ្រោះជាតិកាលពីចុងឆ្នាំ២១០៧។នៅក្នុងសារសំឡេងបែកធ្លាយរបស់លោក ហ៊ុន សែន ក្រោយការរំលាយគណបក្ស សង្គ្រោះជាតិកន្លងទៅ លោក ហ៊ុន សែន បានប្រាប់ទៅសមាជិករបស់លោកថា លោកមានការព្រួយបារម្ភខ្លាចគណបក្សរបស់លោក ត្រូវពលរដ្ឋរំលាយចោលវិញតាមរយៈការបោះឆ្នោតនៅ ពេលខាងមុខ។ លោក ហ៊ុន សែន បន្តទៀតថា នៅក្នុងមហាសន្និបាតនោះ ក៏មានការរៀបចំយុទ្ធសាស្ត្រដើម្បីអូសទាញមន្ត្រីបក្សសង្គ្រោះជាតិដែលនៅសេសសល់ឲ្យចូលរួមជាមួយគណបក្សប្រជាជនកម្ពុជាផងដែរ៕
No comments:
Post a Comment