ដោយ វ៉ែន សុមេធ
2018-01-15
ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ លោកឧបនាយករដ្ឋមន្ត្រី យឹម ឆៃលី ថ្លែងនៅថ្ងៃទី២ ខែមិថុនា ឆ្នាំ២០១៦។ RFA/Um Rainsey
RFA/Um Rainsey
មន្ត្រីសង្គមស៊ីវិល និងប្រជាពលរដ្ឋ រស់នៅខេត្តព្រះសីហនុអះអាងថា ដីចំណីឆ្នេរសមុទ្រ នៅតាមតំបន់មួយចំនួន ត្រូវមន្ត្រីមានឋានៈជារដ្ឋមន្ត្រី និងឧបនាយករដ្ឋមន្ត្រីបច្ចុប្បន្ន រំលោភធ្វើកម្មសិទ្ធិឯកជន ជាការរំលោភរដ្ឋធម្មនុញ្ញ នៃព្រះរាជាណាចក្រកម្ពុជា។
ទាំងមន្ត្រីសង្គមស៊ីវិល និងសាធារណជន សំណូមពរដល់ លោករដ្ឋមន្ត្រីក្រសួងរៀបចំដែនដី និងប្រមុខដឹកនាំរាជរដ្ឋាភិបាល ឲ្យជួយទប់ស្កាត់សកម្មភាពរំលោភយកដីចំណីឆ្នេរសមុទ្រខេត្តព្រះសីហនុ តំបន់ពយកំពេញ ឲ្យបានទាន់ពេល។
មន្ត្រីអង្គការក្រៅរដ្ឋាភិបាលមួយចំនួន មានអង្គការលីកាដូ (Licadho) និងសមាគមអាដហុក (Adhoc) ប្រចាំខេត្តព្រះសីហនុ បង្ហាញការព្រួយបារម្ភជាថ្មីទៀត ចំពោះមហិច្ឆតារំលោភកាន់កាប់ដីឆ្នេរសមុទ្រធ្វើកម្មសិទ្ធិខុសច្បាប់ នៅតំបន់អភិវឌ្ឍន៍ពយកំពេញ ក្នុងសង្កាត់លេខ៣ ផ្ដើមដោយមន្ត្រីមានឋានៈខ្ពស់ក្នុងជួររាជរដ្ឋាភិបាល ហើយក៏មានគ្រួសារមន្ត្រីខ្លះ បានជាប់សាច់ឈាម និងត្រូវជាដន្លង លោកនាយករដ្ឋមន្ត្រី ហ៊ុន សែន ក៏មានឈ្មោះរំលោភយកដីចំណីឆ្នេរសមុទ្រនេះដែរ។
មន្ត្រីផ្នែកអង្កេតអង្គការលីកាដូ ប្រចាំខេត្តព្រះសីហនុ លោក ស្រេង វ៉ាន់លី បានឲ្យអាស៊ីសេរីដឹង នៅថ្ងៃទី១៥ មករាថា ដីចំណីឆ្នេរសមុទ្រខេត្តនេះ នៅតាមតំបន់ខ្លះ ត្រូវបានគ្រួសារមន្ត្រីមានអំណាចប៉ុនប៉ងរំលោភយកធ្វើកម្មសិទ្ធិខុសច្បាប់ ដោយប្រើអំណាចបុណ្យស័ក្ដិរបស់ខ្លួន។ ក្នុងនោះក៏មានមន្ត្រីខ្លះ បានមករារាំងសកម្មភាពការងារស្ថាបនាពង្រីកផ្លូវ ចូលទៅតំបន់អភិវឌ្ឍឆ្នេរពយកំពេញ របស់ រដ្ឋបាលខេត្តព្រះសីហនុ និងក្រសួងពាក់ព័ន្ធថែមទៀតផង។
ផ្ដើមពីបញ្ហានេះ អ្នកឃ្លាំមើលសង្គមបានស្នើដល់លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជាពិសេសលោកនាយករដ្ឋមន្ត្រី ហ៊ុន សែន ឲ្យជួយអន្តរាគមន៍ទប់ស្កាត់សកម្មភាពរបស់មន្ត្រីមានអំណាចទាំងនេះ ឲ្យបានទាន់ពេល ព្រោះមានមន្ត្រីខ្លះកំពុងសង់សំណង់រឹងមាំនៅជាប់ឆ្នេរសមុទ្រ និងមានមន្ត្រីខ្លះទៀត បានណែនាំឲ្យមន្ត្រីស្ថាប័នពាក់ព័ន្ធមានក្រសួង និងមន្ទីររៀបចំដែនដីជាដើម បញ្ជូនមន្ត្រីចុះវាស់ដីចំណីឆ្នេរសមុទ្រ រហូតដល់ក្នុងទឹកសមុទ្រ ដើម្បីឈានទៅស្នើសុំប្លង់កម្មសិទ្ធិស្របច្បាប់នាថ្ងៃខាងមុខ ព្រោះអាងអំណាចបុណ្យស័ក្ដិ និងត្រូវជាដន្លង របស់ប្រមុខដឹកនាំស្រាប់ផង។
ត្រង់ចំណុចនេះ លោក ស្រេង វ៉ាន់លី ក្នុងនាមមន្ត្រីសង្គមស៊ីវិលបានស្នើដល់ប្រមុខដឹកនាំរាជរដ្ឋាភិបាល និងក្រសួងស្ថាប័នពាក់ព័ន្ធ ព្រមទាំងរដ្ឋបាលខេត្តព្រះសីហនុ ត្រូវអនុវត្តច្បាប់ឲ្យបានស្មើភាពគ្នា រវាងប្រជាពលរដ្ឋក្រីក្រ មន្ត្រីរាជការថ្នាក់ទាប ឈ្មួញមានទ្រព្យ និងមន្ត្រីមានអំណាច ដោយមិនត្រូវផ្ដល់សិទ្ធិជូនមន្ត្រីមានអំណាច និងឈ្មួញមានទ្រព្យ អាចធ្វើសកម្មភាពល្មើសផ្សេងៗតាមទំនើងចិត្តទៀតទេ។
ទាក់ទិនបញ្ហានេះ ប្រជាពលរដ្ឋមួយចំនួនរស់នៅតំបន់ពយកំពេញ ស្ថិតក្នុងសង្កាត់លេខ៣ ក្រុងព្រះសីហនុ បានអះអាងថា ឈ្មោះមន្ត្រីមួយចំនួន ដែលបានរំលោភយកដីចំណីឆ្នេរសមុទ្រតំបន់ពយកំពេញខុសច្បាប់ រាល់ថ្ងៃនេះ គឺមានមន្ត្រីខ្លះ មានឋានៈជាឧបនាយករដ្ឋមន្ត្រី និងជារដ្ឋមន្ត្រី ក្នុងជួររាជរដ្ឋាភិបាលកម្ពុជាបច្ចុប្បន្ន។ ក្នុងនោះក៏មានគ្រួសារ លោកឧបនាយករដ្ឋមន្ត្រី យឹម ឆៃលី ដែលត្រូវជាដន្លង របស់ លោកនាយករដ្ឋមន្ត្រី ហ៊ុន សែន ម្នាក់ផង មានឈ្មោះជាប់ពាក់ព័ន្ធ ប៉ុនប៉ងរំលោភយកដីចំណីឆ្នេរសមុទ្រ នៅតំបន់ពយកំពេញធ្វើកម្មសិទ្ធិខុសច្បាប់នេះដែរ។
ប្រជាពលរដ្ឋ និងមន្ត្រីរាជការខេត្តព្រះសីហនុ បានសំណូមពរដល់ លោក ជា សុផារ៉ា និងលោកនាយករដ្ឋមន្ត្រី ហ៊ុន សែន ជួយទប់ស្កាត់មហិច្ឆតារបស់មន្ត្រីរដ្ឋាភិបាលជាន់ខ្ពស់មួយចំនួន ដោយត្រូវដកហូតដីតំបន់នោះ យកមកអភិវឌ្ឍជាឆ្នេរខ្សាច់ ឲ្យមានសោភ័ណភាព សម្រាប់ផ្ដល់ជូនភ្ញៀវទេសចរជាតិអន្តរជាតិ ចូលទៅកម្សាន្តនាថ្ងៃអនាគតវិញ។
អ្នកស្រី ជៀប សុធារី អ្នកសម្របសម្រួលសមាគមអាដហុក ប្រចាំខេត្តព្រះសីហនុ បានគាំទ្រចំពោះសកម្មភាពអភិវឌ្ឍតំបន់ឆ្នេរសមុទ្រ របស់រដ្ឋបាលខេត្តនេះ ពិសេសគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ដឹកនាំដោយ លោក ជា សុផារ៉ា ជាបន្តបន្ទាប់មកនេះ។ ប៉ុន្តែទន្ទឹមគ្នានេះ អ្នកស្រីបានកត់សម្គាល់ថា រាល់ថ្ងៃនេះ ឃើញឈ្មួញមានទ្រព្យ និងមន្ត្រីមានអំណាចមួយចំនួន បានបន្តសង់សំណង់រឹងមាំនៅលើដីចំណីឆ្នេរសមុទ្រនាខេត្តព្រះសីហនុ ពិសេសឆ្នេរសមុទ្រតំបន់ពយកំពេញ ក្នុងសង្កាត់លេខ៣ ធ្វើកម្មសិទ្ធិឯកជន ដោយគ្មានអាជ្ញាធរហាមឃាត់ទេ។
ទាក់ទិនបញ្ហានេះ លោក យន្ត មីន អភិបាលខេត្តព្រះសីហនុ អះអាងថា សំណង់លំនៅឋានមួយចំនួន ដែលកំពុងសង់នៅតំបន់អភិវឌ្ឍពយកំពេញ គឺសំណង់មួយចំនួន មានច្បាប់អនុញ្ញាតត្រឹមត្រូវពីស្ថាប័នជំនាញ។ ប៉ុន្តែលោកថា សម្រាប់សំណង់មួយចំនួនទៀត ដែលត្រៀមសង់នាំប៉ះពាល់ដល់ដីចំណីឆ្នេរសមុទ្រ គឺរដ្ឋបាលខេត្តនឹងបញ្ជូនមន្ត្រីជំនាញចុះពិនិត្យ និងមានវិធានការតាមផ្លូវច្បាប់។
យ៉ាងនេះក្តី ទាំងមន្ត្រីសង្គមស៊ីវិល និងប្រជាពលរដ្ឋ ខេត្តព្រះសីហនុ មានមន្ទិលថា សកម្មភាពសង់សំណង់រឹងមាំជាបឹងកាឡូ ឬជាផ្ទះវីឡាលំហែកាយ របស់មន្ត្រីមានអំណាច និងឈ្មួញមានទ្រព្យមួយចំនួន នៅតំបន់ពយកំពេញ សង្កាត់លេខ៣ ទំនងជាអាចមានការសម្របសម្រួលឯកសារច្បាប់ ពីថ្នាក់ដឹកនាំស្ថាប័នពាក់ព័ន្ធឲ្យទៅជាស្របច្បាប់ ទើបគ្មានអាជ្ញាធរចេញមុខទប់ស្កាត់ទេ។ ជាងនេះទៀតក្នុងប៉ុន្មានថ្ងៃមកនេះ គេសង្កេតឃើញមានសកម្មភាព មន្ត្រីជំនាញក្រសួងនិងមន្ទីររៀបចំដែនដី បានចុះវាស់វែងដីចំណីឆ្នេរសមុទ្រ ចូលទៅក្នុងទឹកសមុទ្រតំបន់ពយកំពេញ ទៅតាមការចង្អុលបង្ហាញរបស់មន្ត្រីមានអំណាច ដែលប៉ុនប៉ងរំលោភយកដីចំណីឆ្នេរសមុទ្រតំបន់ពយកំពេញ ឈានទៅកែច្នៃឯកសារផ្ដល់កម្មសិទ្ធិដីចំណីឆ្នេរសមុទ្រនេះស្របច្បាប់ក៏ថាបានដែរ ព្រោះខ្លាចបុណ្យស័ក្ដិមន្ត្រីមានឋានៈជាឧបនាយករដ្ឋមន្ត្រី និងត្រូវជាដន្លងលោកនាយករដ្ឋមន្ត្រី ហ៊ុន សែន ផងនោះ។
សកម្មភាពវាស់វែងប៉ុនប៉ងយកដីចំណីឆ្នេរសមុទ្រនេះ កើតឡើងស្របពេលដីនៅក្នុងទីក្រុងព្រះសីហនុមានជនជាតោចិនចូលមករស់នៅច្រើនអនេក និងតម្លៃដីឡើងថ្លៃកប់ពពក៕
No comments:
Post a Comment