ដោយ អាស៊ីសេរី
2018-02-11
rfa
សកម្មភាពដឹកជញ្ជូនឈើពីក្នុងឧទ្យានជាតិវីរជ័យ ក្នុងខេត្តរតនគិរី ប្រទេសកម្ពុជា ទៅប្រទេសវៀតណាម កាលពីខែកុម្ភៈ ឆ្នាំ២០១៧។ Photo courtesy of EIA
Photo courtesy of EIA
កម្មករក្រុមហ៊ុនទំនប់វារីអគ្គិសនីសេសានក្រោមពីរ នៅស្រុកសេសាន ឲ្យដឹងកាលពីថ្ងៃទី១០ កុម្ភៈ ថា ជារៀងរាល់ថ្ងៃ រថយន្តយីឌុបធំៗ មិនក្រោម ១០គ្រឿងទេ ផ្ទុកឈើចន្លោះពី ៣០ម៉ែត្រគូប ទៅ ៥០ម៉ែត្រគូប ដឹកជញ្ជូនទៅលក់នៅប្រទេសវៀតណាម។
ឈើទាំងនោះ គេដឹកចេញពីរោងចក្រអារច្រៀកឈើចំនួនពីរទីតាំង ដែលឧកញ៉ាមួយចំនួនកសាងដើម្បីងាយស្រួលអារច្រៀកឈើមូលធំៗ ជាជ្រុង ក្នុងបំណងដឹកជញ្ជូនចេញក្រៅ។
លោកថា ក្នុងមួយថ្ងៃៗ កម្មករច្រើនក្រុមនាំគ្នាចូលព្រៃកាប់ឈើនៅតំបន់ឆ្ងាយ រួចដឹកតាមគោយន្ត និងរថយន្តប៉ាងកុងចូលរោងអារច្រៀកឈើនោះ ដែលឋិតក្នុងបរិវេណទំនប់វារីអគ្គិសនីសេសានក្រោមពីរ ក្នុងស្រុកសេសាន ខែត្រស្ទឹងត្រែង៖ «គ្មានថ្ងៃណាមួយខកខានទេ បើមិន ១០គ្រឿង ២០គ្រឿង ចំណែករថយន្តរ៉េវវិញ ជញ្ជូនខាងជើងទន្លេមក មិនក្រោម៤០គ្រឿងទេ លើខ្នងទំនប់។ នេះជាក្ដីកង្វល់របស់ខ្ញុំ អនាគតធនធានធម្មជាតិនៅតំបន់នោះ ក្លាយជាវាលរហោឋានហើយ ដោយពុំមានការទប់ស្កាត់»។
បុរសដដែលបន្ថែមថា ឧក្រិដ្ឋកម្មព្រៃឈើនៅតំបន់នោះ គឺជាប្រភពនៃវិនាសកម្មព្រៃឈើដ៏ធំនៅកម្ពុជា ដែលឈ្មួញមានអំណាច និងឧកញ៉ាមួយចំនួន បានប្រើរូបភាពសំអាតបាតអាងជាលេស ក្នុងការនាំឈើខុសច្បាប់ ទៅវៀតណាមរាប់លានម៉ែត្រគូបក្នុងមួយខែៗ ដែលបំផ្លាញធនធានធម្មជាតិជាប្រព័ន្ធ ប៉ះពាល់ជម្រកសត្វព្រៃក្នុងតំបន់ ការប្រែប្រួលអាកាសធាតុ និង ជីវភាពរស់នៅរបស់ពលរដ្ឋ។
ផ្ទៃអាងទំនប់វារីអគ្គិសនីសេសានក្រោមពីរ មានផ្ទៃដី ៣ម៉ឺន ៦ពាន់ហិកតារ ឋិតក្នុងស្រុកសេសាន ខែត្រស្ទឹងត្រែង ដែលមានក្រុមហ៊ុនឈ្មោះ Ang & Associates Lawyer. របស់ឧកញ៉ា គិត ម៉េង ទទួលសិទ្ធិសម្អាតបាតអាង តាំងពីឆ្នាំ២០១២។ បច្ចុប្បន្នក្រុមហ៊ុននេះ បានបិទទ្វារទឹកជាស្ថាពរដើម្បីបំពេញតួប៊ីនផលិតអគ្គិសនីជិត ៤ខែហើយ តែអាជីវកម្មឈើខុសច្បាប់លើខ្នងទំនប់ និងការដឹកជញ្ជូនពីក្រៅចូលផ្ទៃអាងនៅតែកើតមានដដែលៗ ពុំមានការទប់ស្កាត់៕
No comments:
Post a Comment