ដោយ មាន ឫទ្ធិ
2018-02-11
ពលរដ្ឋរស់នៅឃុំពីរធ្នូ និងឃុំឃ្សឹម ស្រុកស្នូល ខែត្រក្រចេះ បាននាំគ្នាតវ៉ាឃាត់គ្រឿងចក្រក្រុមហ៊ុនសម្បទានសេដ្ឋកិច្ចវៀតណាម កាលពីថ្ងៃទី១០ កុម្ភៈ ឆ្នាំ ២០១៨។
Photo Provided
ពលរដ្ឋជាង ៣០០នាក់ រស់នៅឃុំពីរធ្នូ និងឃុំឃ្សឹម ស្រុកស្នូល ខែត្រក្រចេះ បានលើកគ្នាតវ៉ាប្រឆាំង ក្រុមហ៊ុនសម្បទានសេដ្ឋវៀតណាមឈ្មោះ ចម្ការកៅស៊ូមេមត់ ដែលបានប្រើគ្រឿងចក្រឈូសឆាយកំណត់ព្រំដី ប៉ះពាល់ផលដំណាំ និងដីធ្លីពួកគាត់ច្រើនហិកតារ។ ពួកគាត់ថា អាជ្ញាធរមិនបានស្វែងរកដំណោះស្រាយជម្លោះដីធ្លីធ្លីនោះទេ បែរជាប្រើកម្លាំងប្រដាប់អាវុធបង្ក្រាបក្រុមអ្នកតវ៉ាដោយចាប់ខ្លួនអ្នកភូមិ ២នាក់ និង គំរាមចាប់ពលរដ្ឋផ្សេងទៀតដាក់គុកបើនៅតែរឹងទទឹងតវ៉ាទៀត។
ពលរដ្ឋមានជម្លោះដីធ្លីជាមួយក្រុមហ៊ុនដីសម្បទានសេដ្ឋកិច្ចរបស់វៀតណាម នៅ ឃុំឃ្សឹម និងឃុំពីរធ្នូ នៅថ្ងៃទី១១ កុម្ភៈ អំពាវនាវឲ្យអាជ្ញាធរខែត្រក្រចេះ អន្តរាគមន៍ទៅក្រុមហ៊ុនចម្ការកៅស៊ូមេមត់ ឲ្យបញ្ឈប់យកគ្រឿងចក្រឈូសឆាយកំណត់ព្រំប្រទល់ដី ប៉ះពាល់ផលដំណាំ និងដីធ្លីពួកគាត់។
តំណាងពលរដ្ឋរស់នៅឃុំឃ្សឹម ស្រុកស្នូល លោក អឹម ម៉េង ឲ្យដឹងនៅថ្ងៃទី១១ កុម្ភៈថា ពលរដ្ឋបានប្រមូលផ្ដុំគ្នាមករស់នៅតំបន់នោះ ជាបន្តបន្ទាប់តាំងពីដើមឆ្នាំ២០១៥ ជាង ៤រយគ្រួសារ ដោយសារពួកគាត់សុទ្ធសឹងជាពលរដ្ឋក្រីក្រ គ្មានដីធ្វើលំនៅឋាន និងធ្វើស្រែចម្ការចិញ្ចឹមជីវិត ទើបនាំគ្នាកាប់រានសាងលំនៅឋាន។ លោករំឭកថា កាលពីថ្ងៃទី១០ កុម្ភៈ ពលរដ្ឋជាង ៣រយនាក់ បាននាំគ្នាតវ៉ា ហាមឃាត់មិនឲ្យគ្រឿងចក្ររបស់ក្រុមហ៊ុនសម្បទានសេដ្ឋកិច្ចវៀតណាម ឈូសឆាយកំណត់ព្រំដី បង្កប៉ះពាល់ដីចម្ការ ផលដំណាំ និងលំនៅឋានពួកគាត់ច្រើនគ្រួសារ។ លោកថា នៅគ្រាដែលអ្នកភូមិកំពុងតវ៉ា សមត្ថកិច្ចស្រុកស្នូលបានចាប់ខ្លួនពលរដ្ឋ ២នាក់ និងដោះលែងនៅល្ងាចថ្ងៃដដែលៗ ក្រោយពីពលរដ្ឋព្រមានធ្វើបាតុកម្មនៅមុខសាលាស្រុកស្នូល៖ «»។
ពលរដ្ឋម្នាក់ទៀត ថ្លែងសុំមិនបញ្ចេញឈ្មោះចោទថា សមត្ថកិច្ចបានគំរាមកំហែងពួកគាត់មិនឲ្យតវ៉ា បណ្ដាលឲ្យអ្នកភូមិមួយចំនួនខ្លាចរអា ព្រោះខ្លាចក្រែងអាជ្ញាធរចោទថា ជាក្រុមបដិវត្តន៍ពណ៌។ លោកថា នៅគ្រាដែលពលរដ្ឋតវ៉ានោះ អភិបាលស្រុកស្នូល លោក គង់ គឹមនី បានចុះសម្របសម្រួលនិងសន្យាស្វែងរកដំណោះស្រាយ។ លោកអំពាវនាវ ឲ្យអាជ្ញាធរខែត្រក្រចេះ កាត់ឆ្វៀលដីនោះជាដីសម្បទានសង្គមកិច្ចជូនពលរដ្ឋក្រីក្រពិតប្រាកដ ដើម្បីផ្ដល់ជម្រករស់នៅចិញ្ចឹមជីវិត ព្រោះពួកគាត់សុទ្ធសឹងគ្មានដីរស់នៅ៖ «»
អាស៊ីសេរីមិនអាចរកប្រភពទាក់ទង តំណាងក្រុមហ៊ុនចម្ការកៅស៊ូមេមត់ ដើម្បីសុំការបំភ្លឺរឿងនេះបានទេ នៅថ្ងៃទី១១ កុម្ភៈ។
អ្នកភូមិអះអាងថា ក្រុមហ៊ុនសម្បទានសេដ្ឋកិច្ចមេមត់ គឺជាកម្មសិទ្ធិរបស់អ្នកស្រី ហ៊ុន ម៉ាណា កូនស្រីបង្កើតរបស់លោកនាយករដ្ឋមន្ត្រី ហ៊ុន សែន វិនិយោគដំណាំឧស្សាហកម្មកៅស៊ូលើផ្ទៃដីជិត ១ម៉ឺនហិកតារ (៩.៨៥០ហិកតារ) រយៈពេល ៥០ឆ្នាំ ចាប់តាំងពីឆ្នាំ២០០៨។ ក៏ប៉ុន្តែក្រុមហ៊ុននេះបានវិនិយោគបន្តឲ្យក្រុមហ៊ុនវៀតណាមកាលពីឆ្នាំ ២០១៦។
អភិបាលស្រុកស្នួល លោក គង់ គឹមនី ធ្លាប់មានប្រសាសន៍ថា អាជ្ញាធរខែត្របានបង្កើតគណៈកម្មការរួចហើយ ទាក់ទិនការចុះសិក្សា និងវាយតម្លៃការផ្តល់ដីសម្បទានសង្គមកិច្ចជូនពលរដ្ឋទាំងនោះ។ លោកថា អាជ្ញាធរស្រុកក៏ធ្លាប់បានជូនដំណឹងទៅពលរដ្ឋដែរទាក់ទិនដំណើរការផ្ដល់ដីសម្បទានសង្គមកិច្ចរបស់អាជ្ញាធរ។ លោកជំរុញឲ្យពលរដ្ឋខ្វះខាតដីអាស្រ័យផលពិតប្រាកដ អាចដាក់ពាក្យស្នើសុំដីសម្បទានសង្គមកិច្ចមកអាជ្ញាធរ ចៀសវាងកាប់រានព្រៃដោយខុសច្បាប់។ «»
របាយការណ៍របស់អាជ្ញាធរស្រុកស្នូល ខែត្រក្រចេះ បង្ហាញថា ក្រោយពីរាជរដ្ឋាភិបាលចេញបទបញ្ជា ០១ អាជ្ញាធរខែត្រក្រចេះ បានទទួលពលរដ្ឋចំណូលស្រុករាប់ពាន់គ្រួសារមករស់នៅ និងបានកាត់ឆ្វៀលដីជាង ៤ម៉ឺនហិកតារ ពីក្រុមហ៊ុនសម្បទានសេដ្ឋកិច្ចចំនួន ៩ក្រុមហ៊ុន ដើម្បីបម្លែងជាដីសម្បទានសង្គមកិច្ចស្របច្បាប់ជូនពលរដ្ឋក្រីក្រចំណាកស្រុកមករស់នៅខែត្រនេះ។ មកទល់ពេលនេះពលរដ្ឋរស់នៅតំបន់នោះច្រើនគ្រួសារ ត្រូវបានអាជ្ញាធរស្រុក និងអាជ្ញាធរខែត្រក្រចេះកាត់ឆ្វៀលដីបម្លែងជាដីសម្បទានសង្គមកិច្ចជូនពលរដ្ឋច្រើនគ្រួសារ
មន្ត្រីស៊ើបអង្កេតសមាគមអាដហុក (ADHOC) ខែត្រក្រចេះ លោក ប៊ី វ៉ាន់នី យល់ថា ពលរដ្ឋគ្រប់រូបមានសិទ្ធិតវ៉ាស្វែងរកដំណោះស្រាយនានា ដែលរដ្ឋាភិបាលមានកាតព្វកិច្ចដោះស្រាយការលំបាករបស់ពលរដ្ឋដោយយុត្តិធម៌ មិនត្រូវប្រើកម្លាំងប្រដាប់អាវុធ ចាប់ខ្លួន និងគំរាមកំហែងនោះទេ។ លោកថា ការពន្លឿនផ្ដល់ដីសម្បទានសង្គមកិច្ចជូនពលរដ្ឋ ក៏ជាយន្តការប្រសើរក្នុងការបញ្ចប់ជម្លោះ ដែលជាផ្នែកមួយរួមចំណែក អនុវត្តគោលនយោបាយកាត់បន្ថយភាពក្រីក្ររបស់រដ្ឋាភិបាល។ «»
លោក ប៊ី វ៉ាន់នី ចាត់ទុក ការចូលមកតាំងទីលំនៅលើដីសម្បទានសេដ្ឋកិច្ច គឺជាករណីខុសច្បាប់ ក៏ប៉ុន្តែលោកលើកទឹកចិត្តឲ្យពលរដ្ឋត្រូវដាក់ស្នើសុំដីសម្បទានសង្គមកិច្ចតាមរយៈអាជ្ញាធរមូលដ្ឋានសាមីជនរស់នៅ ដើម្បីអាជ្ញាធរមានមូលដ្ឋានពិនិត្យសម្រេច។ តែយ៉ាងណាលោកអង្កេតឃើញថា ដំណើរការផ្ដល់ដីសម្បទានសង្គមកិច្ចរបស់រដ្ឋាភិបាលមានលក្ខណៈស្មុគស្មាញ និងអូសបន្លាយពេលយូរ បង្ករាំងស្ទះមុខរបរចិញ្ចឹមជីវិតពលរដ្ឋ និងប៉ះពាល់ជីវភាព ផ្ទុយពីការផ្តល់ដីសម្បទានសេដ្ឋកិច្ចឲ្យក្រុមហ៊ុនឯកជនរបស់រដ្ឋាភិបាល។
មុនឆ្នាំ២០០០ ដីសម្បទានសេដ្ឋកិច្ចមេមត់ គឺជាតំបន់ដែនជម្រកសត្វព្រៃស្រុកស្នួល លាតសន្ធឹងលើផ្ទៃដីជាង ១ម៉ឺនហិកតារក្នុងស្រុកស្នួល ខែត្រក្រចេះ ជាប់ព្រំប្រទល់ខេត្តមណ្ឌលគិរី៕
No comments:
Post a Comment