2018-02-12
rfa
ប្រធានគណបក្សសង្គ្រោះជាតិ លោក កឹម សុខា ត្រូវបាននាំយកមកសាលាឧទ្ធរណ៍កាលពីព្រឹកថ្ងៃទី១ ខែកុម្ភៈ ឆ្នាំ២០១៨។
Photo from Facebook
ក្រុមមេធាវីការពារក្ដីឱ្យលោក កឹម សុខា ប្រធានគណបក្សសង្គ្រោះជាតិ បានប្ដឹងសាទុក្ខសុំឱ្យតុលាការកំពូល ដោះលែងលោក កឹម សុខា ឱ្យមានសេរីភាពដើម្បីព្យាបាលជំងឺ។
ក្រុមមេធាវីរបស់លោក កឹម សុខា ព្រួយបារម្ភអំពីស្ថានភាពសុខភាពរបស់លោក កឹម សុខា ដោយទាមទារឱ្យតុលាការដោះលែង លោក កឹម សុខា ជាបន្ទាន់ និងដោយគ្មានលក្ខខណ្ឌ ដើម្បីយកលោកមកព្យាបាលជំងឺនៅក្រៅពន្ធនាគារ។
លោកស្រី ម៉េង សុភារី បានឱ្យអាស៊ីសេរី ដឹងនៅថ្ងៃចន្ទ ទី១២ នេះថា ក្រុមមេធាវីបានប្ដឹងសាទុក្ខកាលពីថ្ងៃសុក្រ ទី៩ ចុងសប្ដាហ៍នេះ ដោយសារតែលោក កឹម សុខា កំពុងប្រឈមនឹងបញ្ហាសុខភាពត្រូវការគ្រូពេទ្យជំនាញដែលមានឧបករណ៍ទំនើបដើម្បីព្យាបាលលោកជាបន្ទាន់។
លោកស្រី ម៉េង សុភារី បានឱ្យដឹងថា លោក កឹម សុខា ត្រូវការវះកាត់សរសៃ ព្រមទាំងឆាបឆ្អឹងម្តុំស្លាបប្រជៀវខាងឆ្វេង ព្រោះកាលពីមុខតុលាការឃុំខ្លួន លោកបានទៅឱ្យគ្រូពេទ្យនៅប្រទេសសិង្ហបុរី ពិនិត្យ ហើយគ្រូពេទ្យតម្រូវឱ្យគាត់ត្រូវតែវះកាត់ និងឆាបឆ្អឹងនេះចេញ ដើម្បីកុំឱ្យកៀបសរសៃតទៅទៀត។ ក្រុមមេធាវីសង្ឃឹមថា តុលាការកំពូលនឹងដោះលែងលោក កឹម សុខា ដើម្បីឱ្យលោកមានឱកាសចេញមកព្យាបាលជំងឺនៅខាងក្រៅពន្ធនាគារ៖ «សំខាន់បំផុតរឿងឈឺហ្នឹងហើយ។ គោលការណ៍នៃការឃុំខ្លួនគឺដើម្បីសុវត្ថិភាពគាត់ ហើយបើសិនជាគាត់មានសុខភាពមិនល្អ មានន័យថាគាត់មិនទទួលបានសុវត្ថិភាពពីការការពារនៃជំងឺទេ យើងត្រូវតែរកការព្យាបាលជូនគាត់។ គាត់មិនមែនជាជនជាប់ចោទ មិនមែនជាពិរុទ្ធជន ហើយក៏មិនមែនជាទណ្ឌិតដែរ គាត់គ្រាន់តែជាជនដែលត្រូវចោទ ហើយតុលាការឃុំខ្លួនបណ្ដោះអាសន្នតែប៉ុណ្ណោះ...ដូច្នេះតុលាការគួរតែអនុញ្ញាតឲ្យគាត់នៅក្រៅឃុំដើម្បីបានទៅពិនិត្យព្យាបាលសុខភាពរបស់គាត់...»។
លោកមេធាវី ជូង ជូងី ក៏បានឱ្យដឹងដែរថា តុលាការក៏បានដឹងអំពីស្ថានភាពប្រឈមជំងឺរបស់លោក កឹម សុខា ដែរ៖ «សំខាន់គាត់មានជំងឺជាក់ស្ដែង ហើយឆ្មាំពន្ធនាគារគេមានពេទ្យ គេដឹងរឿងហ្នឹងច្បាស់។ នៅថ្ងៃសវនាការថ្ងៃទី១ កុម្ភៈ កន្លងមកហ្នឹង នៅសាលាឧទ្ធរណ៍ លោក កឹម សុខា បានបង្ហាញពីជំងឺគាត់ចំនួន ៣ ទី១ កៀបសរសៃដែលធ្វើអោយគាត់មានការចុកចាប់ ទី២ លើសឈាម ទី៣ គាត់មានជំងឺទឹកនោមផ្អែម...»។
លោកស្រី ម៉េង សុភារី ក៏បានឱ្យដឹងដែរថា លោក កឹម សុខា សំណូមពរឱ្យតុលាការដោះលែងលោកឱ្យមានសេរីភាពឡើងវិញ ហើយលោកបានធានា និងសន្យាថា លោកនឹងចូលមកឆ្លើយចំពោះមុខតុលាការគ្រប់នីតិវិធីដោយមិនគេចវេះទៅណាឡើយ។
អង្គការលើកលែងទោសអន្តរជាតិ (Amnesty International) កាលពីថ្ងៃ៥ ខែកុម្ភៈ ក៏បានរៀបចំយុទ្ធនាការអំពាវនាវទាមទារឱ្យតុលាការដោះលែង លោក កឹម សុខា ជាបន្ទាន់ និងដោយឥតលក្ខខណ្ឌ ដោយសារស្ថានភាពសុខភាពលោក កឹម សុខា កំពុងធ្លាក់ចុះដុនដាបកាន់តែខ្លាំងពេលកំពុងជាប់ពន្ធនាគារនេះ និងម្យ៉ាងទៀត ខាងមន្ត្រីពន្ធនាគារត្រពាំងផ្លុង មិនអនុញ្ញាតឱ្យគ្រូពេទ្យឯករាជ្យ ចូលទៅព្យាបាលជំងឺលោកទេ។ ចំពោះពលរដ្ឋដែលមានបំណងចង់ឱ្យមានការដោះលែងលោក កឹម សុខា អ្នកទាំងនោះអាចសរសេរសារជាភាសាអង់គ្លេសក៏បាន ឬសរសេរជាភាសាខ្មែរក៏បាន រួចផ្ញើទៅឧបនាយករដ្ឋមន្ត្រីក្រសួងមហាផ្ទៃ លោក ស ខេង ទៅលោកនាយករដ្ឋមន្ត្រី ហ៊ុន សែន និងទៅរដ្ឋមន្ត្រីក្រសួងការបរទេស លោក ប្រាក់ សុខុន ឱ្យមុនថ្ងៃទី១៩ ខែមីនា ឆ្នាំ២០១៨ ខាងមុខនេះ៕
No comments:
Post a Comment